سەرەکی » چاوپێکه‌وتن » رۆژنامەگەریی كوردی پێویسـتی بە ژێرخانی تیۆرییە

بەڕێوەبەری یەكەمین فێستیڤاڵی میدیاگەلی كوردی:

رۆژنامەگەریی كوردی پێویسـتی بە ژێرخانی تیۆرییە

شیروان یاری بە ورووژاندنی پرسیار لە نەبوونی ژێرخانی تیۆریی رۆژنامەگەری كوردی، وتی: تەواو ئەزموونی رۆژنامەگەریی كوردی بە گوێرەی مێژوو پەیوەستە بە رۆژنامەگەریی سیاسی و خستنە پەراوێزی رۆژنامەگەریی فەرهەنگی و ئەدەبی.

ئاژانسی هەواڵی مێهر، بەشی كوردی – ئەمجەد غوڵامی: یەكەمین فێستیڤاڵی نەتەوەیی میدیاگەلی كوردی لە كاتێكدا پاش چەند مانگ دواخران و درێژكردنەوەی ماوەی وەرگرتنی بەرهەمەكان و زیادكردنی بەشی فارسی بە بەشی ڕكابەریی فێستیڤاڵ لە رۆژی سێ‌شەممە (١٠ی گوڵان) كۆتایی پێهات، كە بەڕێوەبەرانی ئەو فێستیڤاڵە بەرەوڕووی كۆمەڵێك ڕەخنە لە بابەتی نەبوونی دیسیپلینی كاری و ئاوێتەكاریی وەك شەمەندبوونەوەی زمانی فارسی و بە پەراوێزكەوتنی زمانی كوردی (بەشی سەرەكی فێستیڤاڵ) بوونەوە و لە هەمان كاتدا ستافی بەڕێوەبەر بەردەوام جەختیان لە لاوازی و ئاستی نزمی بەرهەمە گەیشتووەكان كردووە و لایان وایە فێستیڤاڵ بە بەڕیوەبردنی چەند كارگە و وۆركشۆپ بە بەشداری مامۆستایان باڵای بواری رۆژنامەگەریی ئێران یەكەمین هەنگاوە پێویستەكانیان بۆ چوارچێوەدان بە تیۆری رۆژنامەگەری پڕۆفێشناڵی كوردی هەڵگرتووە و بۆ تێپەڕبوون لەو باس و خواستانە پێویستە ئەو هەنگاوانە بەردەوام بێت.
لەمناوە شیروان یاری بەڕێوەبەری یەكەمین خولی فێستیڤاڵی میدیاگەلی كوردی و لە رۆژنامەنووسانی چالاكی پارێزگای كوردستان لە وتووێژ لە گەڵ هەواڵنێری مێهر وێرای ئاماژە بە لاوازییەكان و زەروورەتی شەمەندكردنەوەی پرسی تیۆری بۆ خەملاندنی رۆژنامەگەریی كوردی، لە لای خۆیەوە وەڵامی هەندێك پرسیاری هاوپەیوەند بە كەمایەسییەكان و چاوەروانییەكان و هەنگاو و پلانەكانی داهاتووی فێستیڤاڵی میدیای كوردی لە ساڵانی داهاتووی دایەوە كە لە خوارەوە دەیخوێننەوە:

دیمانه: ئەمجەد غوڵامی

* بە ئاوردانەوە لە بەڕێوەچوونی یەكەمین فێستیڤاڵی میدیاگەلی كوردی، رۆژنامەگەریی كوردی لە چ ئاستێكدا دەبینن؟
ـ ئەگەر لە سۆنگەی چەندایەتییەوە بڕوانینە بەرهەمە گەیشتووەكان بە فێستیڤاڵ، دەبێ بڵێم ئاستی بەشداری لە هەر دوو بەشی سەرەكی و لاوەكی بە گشتی خراپ نەبوون. بەڵام بە لێكدانەوەی ناوەڕۆك و كاكڵەی بەرهەمەكان دەبێ دان بەوەدا بنێم كە لە بابەتی هەواڵنووسی، ڕاپۆرت‌نووسی، دیمانە و وتووێژ، سەروتار و یادداشت لە ئاستێكی ئایدیاڵ و پڕۆفێشناڵدا نەبوون. چونكە زۆربەی بەرهەمەكان لە بواری هەواڵ، ڕاپۆرت و دیمانە لە زمانی فارسییەوە وەرگێڕدرابوونە سەر زمانی كوردی و بە گوێرەی داوەران تەنیا ژمارێكی كەمیان شیاوی هەڵسەنگاندن و لە ئاستی فێستیڤاڵدا بوون.
یەكێك لە كێشەكانی ئێمە لە رۆژنامەگەریی كوردستان نەبوونی میتۆد و تیۆری پڕۆفێشناڵی هەواڵنووسییە؛ هەواڵ مۆتۆری رۆژنامەگەرییە و دوو هەزار ساڵ لەوە پێش لە سەردەمی ڕۆمی كۆن، ئۆكتاسناتۆس و ئۆكتادیۆرنا (دیۆرنا بە واتای رۆژانە) سەریان هەڵداوە. ئەم دووە لەو سەردەمەدا ڕووداوگەلی رۆژانەی خەڵكیان بڵاو كردۆتەوە. ئێوە بیر لەوە بكەنەوە لەو كاتەوە تا ئێستە مۆتۆری رۆژنامەگەری ڕەوتێكی پڕ لە گۆڕانی چ لەباری پێكهاتە، فۆڕم و ناوەڕۆك و چ لەباری تیۆرییەوە ئەزموون كردووە. ئێستە پرسیار ئەوەیە كە كامانەن ئەو تیرۆریگەلەی لە هەواڵنووسیی كوردی بۆ ناسینی سووژە، كۆكردنەوەی زانیاری لەبارەی سووژە و چۆنیەتی داڕشتنی هەواڵ بە پێی شێوازە باوەكانی هەواڵنووسی لە بواری سەخت هەواڵ و نەرم هەواڵدا، كاری پێدەكرێ؛ ڕێك بەو جۆرەی لە ناو فارسەكاندا باوە.
تەواو ئەزموونی رۆژنامەگەریی كوردی ئێمە بە گوێرەی مێژووی رۆژنامەگەری لە كوردستان پەیوەستە بە رۆژنامەگەریی سیاسی كە بە داخەوە ئێستاش وەك هێژمۆنیایەك رۆژنامەگەریی فەرهەنگی و ئەدەبی و لەوان سروە، مەهاباد و ئاوێنە (كە ڕۆڵێكی بەرچاویان بووە لە پێكهاتە و فۆرمی رۆژنامەگەریی پسپۆڕانەی ئەدەبی)ی خستۆتە پەڕاوێزەوە. ئەوە لە كاتێكدایە كە بە وتەی زۆربەی وێژەرانی كورد، سروە ئاكادیمیایەك بووە بۆ بەرهەم هێنانی ئەدەب و زمانێكی ئاركا و دەوڵەمەندی كوردی و بە تایبەت زمانێكی بەتوانا بۆ وەرگێڕان.
بە گشتی واباوە كە بۆ هەڵسەنگاندنی ناوەڕۆكی میدیاكان ئاور لە شرۆڤەی گوتاری و دیسكۆرسیڤی هەواڵ، ڕاپۆرتی هەواڵی و ناهەواڵی، دیمانە، سەروتار و یادداشت دەدەنەوە، كە ئەو هەڵوێستەی باس كرا زیاتر بۆ رۆژنامەگەریی گشتی دەگەڕێتەوە و كەمتر رۆژنامەگەریی پسپۆڕانە لە خۆ دەگرێت. خۆزگە ئێمەش رۆژێك بتوانین بۆ تێپەڕبوون لەو قەیرانە، پێگەیەكی تیۆری و بیرۆكەیی بۆ رۆژنامەگەریی كوردی لە بواری هەواڵ، ڕاپۆرت و دیمانە بەرهەم بهێنین و هەوڵی بو بده ین.

* بە بڕوای ئێوە رۆژنامەگەریی پڕۆفێشناڵ دەبێ خاوەن چ تایبەتمەندیگەلێك بێت؟
ـ سەرەتا واباشە ئاور لە خود چەمكی میدیا بدەینەوە. ئێوە ئەگەر ئەم وشە لە گوگلدا سێرچ بكەن بە هەزاران مانا و پێناسەی جۆراوجۆری بۆ دەدۆزنەوە. چونكە خود چەمكی میدیا هەڵگری ماناگەلێكی یەكجار زۆرە. چەمی میدیا (مێدیۆم) لەباری ڕیزمانییەوە هەم ناوە و هەمیش ئاوەڵنا؛ میدیا وەك ئاوەڵناو بە مانای مامناوەند یان نێوان دێت و وەك ناو بە مانای كەرەسە و ئامێر و ڕەهەند و دەلاقەی پەیوەندییە بە كۆمەڵەكان. ئێستا با بگەڕێینەوە بۆ پرسی رۆژنامەگەریی پڕۆفێشناڵ و بۆ ئەو مەبەستە سەرنجتان بۆ پێناسەی كلاسیكی فەڕەنسییەكان لە رۆژنامەگەری پڕۆفێشناڵ ڕادەكێشم: كەسێك كە پیشەی سەرەكی، هاوپەیوند و بەجەربەزانەی ئەو، ئیش كردن لە نووسینگەی رۆژنامە، هەواڵدەری، ڕادیۆ، تەلەڤیزیۆن، ئاژانس یان ماڵپەڕی هەواڵ بێت. هەڵبەت نابێ لە بیرمان بچێت كە داهاتی رۆژنامەنووس لە رێگەی پیشەی رۆژنامەگەرییەوەیە. ئەمە پێناسەیەكی بنەماییە و ڕەنگە جیاواز بێت لە گەڵ ڕەوتی رۆژنامەگەری لە ئێران و بە تایبەت لە كوردستان، چونكە بە بڕوای كارناسانی پسپۆڕ، ژوورنالیزمی پڕۆفێشناڵ سێ بنەمای سەرەكی هەیە كە بریتین لە: یەكەم؛ بەهرەمەند بوون لە لێهاتوویی و پسپۆڕییە پێویستەكان بۆ ئامادەكردن و بەرهەم هێنانی بابەت لە چۆنیەتی داڕشتنی هەواڵ و نووسینی ڕاپۆرتەوە بگرە تا ئامادەبوون لە دڵی ڕووداوەكان و خۆبواردن لە شاگەشكەیی و هەروهەنگامەگەری. دووهەم؛ پابەندبوون بەو بەرپرسایەتییە كۆمەڵایەتیانەی كە رۆژنامەنووس دەبێ ڕەچاویان بكات و لەوان نووسینی ڕاشكاوانە و ڕەخنەگرتن لە دزێوییەكان و كرداری هەڵەی دەوڵەت و گرووپگەلی دیكە. هەروەها ڕێخۆش كردن بۆ پەرەسەندنی ئاشتی، دژایەتی لە گەڵ هەڵاواردن و بایكۆتی كەمینەكان و هەڵبڕینی دەنگی كەسانێك كە كەمتر هەلی هاتنە گۆیان پێ دراوە. سێهەم؛ پابەندبوونی ئەخلاقی وەك بێ لایەن بوون و تا جێی مومكین ئابژێكتیڤ، پاراستنی سەرچاوەكان و ڕاستبێژی و … بە بڕوای مامۆستایانی رۆژنامەگەری بە تایبەت دوكتۆر نمەك دۆستی تارانی رۆژنامەگەرانی پڕۆفێشناڵ دەبێ باوەڕیان بەو سێ بنەمایە بێت و پێی پابەند بن، دەنا لە نەبوونی هەركام لەو سێ بنەمایە ئەو سێ بەشە تێك دەڕووخێت.

* ئایا دەكرێ باوەڕمان بە دابەشكاریی دوو جەمسەرانەی رۆژنامەگەری پڕۆفێشناڵ و ئاماتۆر هەبێت و لەمناوە چۆن دەتوانین لە بەرزەخی ئاماتۆربوون تێپەڕین و بگەیێنە جەمسەری پڕۆفێشناڵ؟
ـ بە گشتی لە بواری رۆژنامەگەریدا چەمكێكمان بە ناوی رۆژنامەگەریی ئاماتۆر نییە، بەڵكوو كارناسان و شارەزایانی ئەو بوارە زیاتر لە چەمكی قوتابی و فێرخواز چ بۆ خۆیان و چ بۆ دیتران كەڵك دەبەن. بۆ وێنە مینوو بەدیعی وەك یەكێك لە مامۆستا ناسراوە و لێهاتووەكانی بواری رۆژنامەگەری لە سەربەردەی خۆیدا دەڵێ پاش وەرگیرانی لە زانكۆی عەلامە تەباتەبایی تاران بەردەوام بە فێرخواز بانگ كراون. كەواتە رۆژنامەگەری لەو سونگەوە زانستێكی پشت‌ئەستوورە بە ئەزموونی ژیندراوی خودی رۆژنامەنووسەكە كە لە گۆڕەرپانی مەشق و نووسیندا بەردەوام ئەزموونی تازە تاقی دەكاتەوە و ئەزموون لە سەر ئەزموون كەڵەكە دەكات؛ دەنا رۆژنامەگەری بە بێ ئەو ئەزموونە تەنیا بڕوانامەیەكی ئاكادێمی سەڵتە. بە ئاوردانەوە لە مێژووی رۆژنامەگەری دەبینین كە زۆربەی رۆژنامەگەرانی سەركەوتووی ئێرانی لە دەریای نووسین و داهێنان و ئەزموونی نوێدا مەلەوانی شارەزا بوون و بە بەهرە وەرگرتن و ئەزموونی جۆراوجۆر و تاقیكاریی سەیر و سەمەرە بێرە گەیشتوون. بۆ وێنە مامۆستا عەلی ئەكبەر قازی زادە باس لەوە دەكات كە كاتێك بۆ هەڵبژاردنی ڕشتەی خوێندنی زانكۆیی پرس بە خاڵۆی دەكات، هەر دووكیان بەو هیوایە كە زانستە پەیوەندییەكان دەروەستی بە كاروباری تەكنیكی و موخابراتییەوە هەیە، ئەم ڕشتە هەڵدەبژێرن و دوای دوو تێرم (نیوساڵ)ی خوێندن دەزانێ كە ڕشتەكەی دەروەستی بە رۆژنامەگەرییەوە هەیە و بەوەشەوە هەست بە هۆگرییەك بەو ڕشتەیە دەكا و خوێندنەكەی تا قۆناغە باڵاكان درێژە پێ دەدا. یان فەریدوون سدیقی كە لەم فێستیڤاڵە وەك رۆژنامەگەرێكی بە ئەزموونی كورد ڕێزی لێگیرا لە دیمانەیەكدا دەڵێ: «چەند ساڵ لەوە پێش لە شاری سنەی قەدپاڵی ئاویەر، ڕاپۆرتێكم بۆ رۆژنامەی كەیهانی شاری سنە نووسی و ئەو ڕاپۆرتە بووە هەوێنی بانگهێشت كران و چوونی من بۆ رۆژنامەی كەیهانی تاران». لەوێیە كە فەریدوون سدیقی دەبێتە بنیاتنەری نووسینی ڕاپۆرت دیالۆگ لە ئێراندا. لە ڕاستیدا ئەو هۆگریەیە كە فەریدوون دەگەیێنێتە ئاستێك كە زۆربەی مامۆستایانی بەرزی رۆژنامەگەری ئێران شانازی بە دۆستایەتی و بەهرە وەرگرتن لە قەڵەمی دەكەن، ئەمە هەمان شتە كە لە تیزێر و گرتەی ڤیدئۆیی فیستیفالدا بینیتان.

* باسی گرتە و تیزێری تایبەت بە فەریدوون سدیقی لە ژێر ناوی «فەریدوونی قەڵەم» كرا، وەك بزانین ئەو گرتەیە بە هاوكاری بەڕێزتان و دوكتۆر مەنسوور ساعی و ڕەنگە ناوەندی توێژینەوەی میدیایی ئێران ئامادە كرابوو، دەكرێ لەوبارەشەوە ڕوون كردنەوەیەكتان هەبێ؟
ـ وەك ئاماژەتان پێدا، تیزێرەكە بە هاوكاری و بەڕێوەبەریی دوكتۆر مەنسوور ساعی لە مامۆستایانی بواری زانستە پەیوەندییەكان و لە داوەرانی ئەم خولەی فێستیڤاڵی میدیاگەلی كوردی ئامادە كراوە و من وەك قوتابییەكی مامۆستا سدیقی پێشنیاری ناوی «فەریدوونی قەڵەم»م دا و بەڕێزیان بە دڵێكی ئاواڵەوە قبووڵیان كرد و كاتێك پرسمان بە مامۆستایانی دیكەش كرد، ئەوانیش ناوەكەیان زۆر بە لاوە پەسند بوو. هەڵبەت بەشی زۆری ماندوویی ئامادەكردنی ئەو تیزێرە لە ئەستۆی كاك مەنسوور بووە و جێی خۆیەتی دەستخۆشی تایبەتی لێ بكرێ و ڕێزی لێ بگیرێ. بەڵام لە پەنای ئەو هەمووە ماندووییە، بە داخەوە هەندێ گلەییش لەوبارەیەوە هەن كە ناوی دەنێم «شكاندنی شووشەی دڵی فەرەیدوونی قەڵەم» و لام وایە كاتێك مامۆستا بەو ورە بەرزەی خەڵاتی نەخدیی خۆی بەخشییە هەڵبژاردراونی خەڵات وەرنەگرتووەی فێستیڤاڵ، هیچكات چاوەروانی ئەوەی نەدەكرد نرخی دیاری كراوی خەلاتەكە لە لایەن ئیدارەی گشتیی فەرهەنگ و ئیرشادی كوردستان بەو ڕادەیە كەم بێت. ئەگەرچی ئێمە لە لایە خۆمانەوە و بە یارمەتیی یانەی چاپەمەنی كوردستان هەوڵێكی زۆرمان داوە بۆ قەرەبووكردنەوەی ئەو كەمكارییەی ئیدارەی ئیرشاد و هیوادارم بەو كارە لە شەرمەندیی مامۆستا سدیقی بێینە دەرێ.

* تاقمێكی زۆری بەشداربووان هێشتاش سەبارەت بە بەڵێنی پارێزگاری كوردستان بۆ پێدانی ٣٠ ملیۆن تمەن بە هەڵبژاردراونی ئەم خولەی فێستیڤاڵی میدیاگەلی كوردی پرسیار دەكەن، ئایا هەواڵێكی تازە لەوبارەیەوە هەیە؟
ـ وایە، بەڕیز بەهمەن مورادنیا پارێزگاری كوردستان لە ڕێوڕەسمی كۆتایی فێستیڤاڵ بە ئاوردانەوە لە ئاستی كەمی نرخی خەڵاتەكان، لە لای خۆیەوە بەڵێنی پێدانی ٣٠ ملیۆن تمەنی وەك دیاریی پارێزگاری بۆ هەڵبژاردراون (٥٢ هەڵبژاردەی یەكەم، دووهەم و سێهەم) دا. بەڵام تا ئیستە هیچ پارەیەك لە پارێزگارییەوە نەگەیشتۆتە دەس بەڕێوەبەرانی ئەم خولەی فێستیڤاڵ و من بۆ پێوشوێن گرتنی ئەو بابەتە نامەیەكم ئاراستەی بەڕیز پارێزگار كردووە و هیوادارم بە زوویی كاروباری ئەو بەشەش جێبەجێ بێت و بە ئەنجام بگات. هەڵبەت پێویستە ئەوەش بڵێم كە جگە لەو بەڵینەی پارێزگاری بەڕێز، گرفتێكی دیكەی خولی یەكەمی فێستیڤاڵی میدیایی كوردی نەبوونی پلان و تەرازێكی دروستی ماڵی لە ئاستی سەرەوە بوو و وەك دەبینین هێشتاكە پارەی داوەران و ستافی كاریی فێستیڤاڵ نەدراوە و لەوبارەیەوە من شەرمەندەی داوەرانێك بووم كە هەركام لە خۆیاندا كەسایەتییەكی ناسراوەی بواری میدیایی لە ئاستی وڵات و تەنانەت لە ئاستی جیهانین و بوونی ئەو جۆرە بێ ڕێزیانە دەبنە مایەی دڵساردبوونەوە لە درێژەدان بە چالاكییەكان و بە فیڕۆچوونی دەسكەوتەكان.

* لە بەیاننامەی فێستیڤاڵدا ئاماژەتان بە هەنگاوەكانی دواتر و لەوان بە نێونەتەوەیی كردنی فێستیڤاڵی میدیاگەلی كوردی لە ساڵانی داهاتوودا كرد، چ پلان و ڕێوشوێنێك بۆ ئەو مەبەستە لە بەرچاو گیراوە؟
ـ وەك لە درێژەی ڕاگەیاندنی یەكەمین خولی فێستیڤاڵدا ڕاشكاوانە و بە ئاشكرا ڕاگەیێندرا، ساڵێ داهاتوو بڕیارە دووهەمین خولی فێستیڤاڵی میدیاگەلی كوردی بە گوێرەی سیاسەت و ستراتژیی ئیدارەی گشتیی فەرهەنگ و ئیرشادی ئیسلامی بە شێوەی نێونەتەوەیی بە ئامادەبوونی رۆژنامەنووسانی توركیا، سووریا، عێراق و ئێران و تایبەت بە زمانی كوردی (بە چەندین شێوەزاری) بەڕێوە بچێت و چیتر زمانی فارسی لەو خولەدا بەشدار نەكرێت. هەڵبەت ئەوە ستراتژییەكی ئایدیاڵە و تا قۆناغی جێبەجێ بوون وەك سێوەكەی نیۆتۆن هەزار خول دەخوات …

* وەك دواپرسیار ئایا نۆرمگەلی نوێی پەیوەندیی وەك SMS، كەناڵەكانی تێلگرامی یان تۆڕە كۆمەڵایەتییەكان جێیەكیان لە فێستیڤاڵەكانی دواتردا دەبێ. یان بە گشتی ئەو نۆڕمانە دەچنە ڕیزی كاری میدیایی و رۆژنامەوانییەوە؟
ـ وەك دەزانن پاژە پێكهێنەرەكانی میدیایی بۆ گواستنەوەی پەیام بریتین لە چوار ماكی سەرەكیی وتە، مۆسیقا، وێنە و دەق لە ژێر كاریگەریی سیاسەت، ئابووری و تەكنۆلۆژیا و لەمناوە سیستەم و پێكهاتەی رۆژنامەوانیی ئەوڕۆ ڕوو لە گۆڕان و پێشكەوتنە و ئەمە خۆی دەرەوەستی بە ناوەڕۆكی ئەو میدیاگەلەوە هەیە. بە واتایەكی دیكە هەواڵ لە هەر میدیایەكدا دەبێ هەڵگری سێ بنەمای نائاڵۆزی و ڕوونی، دروستی و هەمەگری بە پشتبەستن بە سەرچاوەگەلی كەسێنی، یاسایی و میدیایی بێت و جگە لەوە هەواڵ نییە، بەڵكوو جۆرێك هەڵوێستی كەسێنییە و لە خۆیدا خەسارێكە كە ڕیساكانی هەواڵ پێشێل دەكات. ئێمە لە ڕووداوی بوومەلەرزەی سەرپێلی زەهاو و لافاوەكەی ئاق قەلا، گوڵستان، لورستان و شیراز بینیمان كە چۆن بە دەستێوەردان لە لایەنی بەرفراوانی و ئامارەكان و تێكدانی كیشمەكێش و دژوازییەكان لە بایەخەكانی هەواڵدا، تووشی هەمەگریی نەرێنی هاتین و یاری بە هەست و دەروونی خەڵكی و هاووڵاتیان كرا. بە گشتی ناتوانین نكۆڵی لە ئامادەبوونی رۆژانە و سەرهەڵدانی رۆژنامەگەریی شارۆمەندی بكەین، ئەمە شتێكی حاشاهەڵنەگرە و كاریگەریی ئەم نۆرمە ئەوڕۆكە بە تەواو مانا سەلمێندراوە، بۆ وێنە لە ڕووداوەكانی بەهاری عەرەبی، لە شەڕی سووریا و یەمەن یان لە شۆڕشی هێلەك زەردەكانی فەڕەنسا ئەوە شارۆمەند میدیاكانن كە تەواو ڕووداوەكان ڕێكدەخەن و نمایشی دەدەن و دەبنە سەرچاوەی یەكەمی هەواڵەكان. بەڵام بەوەشەوە نەبوونی یاسا و ڕێسایەكی دروست لە شێوەكانی گەیاندنی پەیام وەك جۆرەكانی گەورەكردنەوە و زێدەوێژیی درۆیین، بە هەمان ئەندازە دەتوانێ كاریگەری نەرێنی هەبێ و هاووڵاتیان تووشی سەرلێشوان و هەڵەكاری بكات. لە بابەتی بەشی دووهەمی پرسیارەكە، دەبێ بڵێم كە ئێمە لە سیاسەتی فێستیڤاڵەكاندا ناچار لە پێڕەوكردنی بڕیارەكانی وەزارەتی ئیرشاد و جێگرایەتی چاپەمەنی ئەو وەزارەتەین و فێستیڤاڵی میدیاگەلی كوردیش لەو چوارچێوەیە بەدەرنییه.
هەڵبەت هیوادارین بوونی كەسانێكی وەك گیتا عەلی ئابادی، یوونس شوكرخواه و محەمەد تەقی ڕەوغەنی‌ها لە بەرپرسایەتی ناوەندی توێژینەوەی میدیایی ئێران و پەیوەندیی نزیكی جێگرایەتی چاپەپەمەنی وەزارەتی ئیرشاد لە گەڵ ئەو ناوەندە ڕێخۆش بكات بۆ ئاوردانەوەی جیدی لەو فەزایە و چوارچێوەدان بەو پرسە تەنانەت لە كەشێكی ئاكادیمیدا، هەر چەند لە ماوەی ساڵانی ڕابردوو كتێب و كۆڕبەندگەلێكی زۆر باش سەبارەت بەو مژارە ئاراستە كراوە و دەتوانێ ڕێخۆشكەر بێت بۆ پەیوەندی دوو لایەنەی میدیا و شارۆمەند میدیا وەك بەهرە وەرگرتن لە دەسكەوتەكانی ئەوان و لە بەرامبەردا هەوڵ بۆ ڕاهێنانی ئەو جۆرە شارۆمەندانە و بێ شك فێستیڤاڵەكان دەتوانن یەكەمین شوێنێك بن بۆ دروست بوونی ئەو پەیوەندییه.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*