سەرەکی » وتار » كاروان ئەنوەر » چۆن ئەم رێبوارە خەبەر بكەینەوە؟

چۆن ئەم رێبوارە خەبەر بكەینەوە؟

ئەم كەسە ئەگەر خۆی بە گێل بزانێت ئەوە ئازادە، بەڵام ئەگەر سەرقاڵی گێلاندنی خەڵك بێت ئەوە زۆر نەگبەتە، چونكە ئێستا خەڵكی هەر پێنج پارچەی كوردستان زۆر باش دەزانن كێ باشووری دۆڕاند و كەللە رەقی كێبوو ئەم هەموو دۆڕانەی بەدوای یەكدا هێنا..
رێبواری كەریم وەلی دەیەوێت بە خەڵكی كوردستان بڵێت، پارتی و سەرۆكەكەی نەبوون ئەزموونی هەرێم و حوكمڕانی 26 ساڵی رابردوویان دۆڕاند، بەڵكو ئەوە تەنها یەكێتییە شكستی بە كاك مەسعود هێناوەو لە تۆڵەدا هەروەك لە 31 ی ئابدا چیمان لێكردن ئاوهایان لێدەكەینەوە..
ئەم پیاوە لەخەونێكی زۆر خۆشدا دەژی!! ناهەقی نییە.. چونكە لەدەوڵەتی خەونەكانەوە وەك یاری مارو پەیژە گەڕاینەوە بۆ چوارگۆشەی یەكەم و لەئەنجامی كورتبینی سیاسەتی حزبەكەی ئەو و چەند سەركردەیەكی حزبەكەی ئێمەشەوە، ئەوەشی هەمان بوو لەسەر مێزی قومار دۆڕاندمان..
كاكە رێبوار وەلی.. خەتاباری یەكەم لەم یارییەدا كاك مەسعود بوو، داننان بە دۆڕاندا سەختەو تۆمەتباركردنی خەڵك بە شكست زۆر ئاسانە، بەڵام تۆمەتی شكست زامی دۆڕان لەبیر خەڵك ناباتەوە، ناكرێت تۆ وەك وشترمرغ سەری خۆت لەچاڵێكدا بچەقێنیت و لەشت هەمووی بەدەرەوە بێت.. نەزانیت كاك مەسعود تەنها كەركوكی نەدۆڕاند، بەڵكو هەموو باشووری كوردستانی كردە قوربانی راكێشانی یەك وەرەقە كە گرەوەكەو قومارەكەشی پێ دۆڕاندین..
سەرجەم زەوی و فڕۆكەخانە و بەنداو و خاڵی سنووری و بازاڕو مووچەو كەركوك‌و سەدان بیرە نەوتی رەسمی و قاچاغ و ئاو و خاك و خۆڵ و نان و سەوزەو تەنانەت توری پردێشی خستەوە بەردەستی بەغدا..
ئینجا راپرسیش هەڵوەشێنرایەوە.. كاكە رێبوار لەمە زیاتر ماڵوێرانی دەبێت چی بێت؟؟؟
ئەی جەنابتان كەی لەم خەونەتان رادەبن؟
خیانەتی چی و تەسلیم كردنی چی و فرۆشتنی چی؟؟ ئێستا باسی 31 ی ئاب دەكەیت‌و شانازی پێوە دەكەیت!! برا لە ئەم چەكوشەی ئێوە وەشاندتان ئەمجارە بەر سەری هەموو كورد كەوت و مێشكی گەورەو بچوكتان پێ پژاند.. شانازی چی و گەورەیی چی و دیبلۆماتی چی نەگبەت؟؟!!
كاك رێبوار تۆ و حزبەكەی تۆ و سەرۆكی حزبەكەت لەسەر قاپێكی ئاڵتوون نامەی دۆڕانێكی ئاسانتان ئیمزا كردوە، ئەمجارەیان نەوتبەتاڵتان بە كوردستانی باشوور كرد، كەچی ئێستا دەتەوێت بەگۆشەیەكی چەند سەد وشەیی دۆڕانی پارتی و كاك مەسعود و چەند سەركردەیەكی یەكێتی و یەكگرتوو بەتۆمەتی فرۆشتن و شكستێكی سەربازی ماكیاژ بكەیت و خۆڵ لەچاوی خەڵكی هەر پێنج پارچەی كوردستان بكەیت و پینەو پەڕۆی كارەساتی ئەم دۆڕاندنەی پێبكەیت؟؟
لەم ساتەدا خەڵكی باشوور لەژێر گورزێكی قورس و دۆڕان و بارێكی دەروونی زۆر خراپدا دەژین، ناكرێت قەڵەمچیەكان ئەم بارە ئاڵۆزتر بكەن، تۆمەت بەخشینەوەكانی تۆو قەڵەم بەدەستەكانی تری پارتی، كار لە رەوینەوەی ترس و خەمەكانی خەڵك ناكات، ئەم شۆكەی ئێستا كوردانی سەرزەوی تووشی هاتن بەهۆی سەركردەو حزبەكەی تۆوەیە، نەك یەكێتیی نیشتمانیی، باس لە رزگاركردنی كەركوك دەكەیت لەدەستی یەكێتی وەك چۆن لە 31 ی ئابدا هەولێرتان لەدەستی یەكێتی دەرهێنا.. وەك شانازیەك باسی ئەو رووداوە دەكەیت.. بەڵام ئەوە خەجاڵەتی قەڵەمە كە جەنابت شانازی بە داكەندنی دەرپێی نەتەوەیەكەوە بكەیت.
كەركوك و باشوور تۆو حزبەكەت دۆڕاندتان..
خەبەرت بێتەوە برالە..

 120 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*