شیعری روح

عه‌بدولڕه‌حمان فه‌رهادی

گەر تۆ نەبای
سەرەتای ھەموو بەھاران
سەوزایی لە گیا دەتۆرا
لە ھاوینا
قرچە گەرمایی نەدەما
گڕ قەت کڵپەی نەدەبینی
ئاسۆ بێ زەردەپەڕ دەما
پاییز ڕەنگە نارنجییەکەی
لە گەڵا و گوڵ دەسەندەوە
شنە و شەماڵ
ئاوازیان دەبوو بە نووزە
بای وەشت
قژی ئاڵۆزی درەختی
ھیچ ڕۆژێ شانە نەدەکرد
زستان خاڵی دەبوو لە تەم
باوبۆرانمان نەدەبینی
ئاسمان سیمای ھەڵدەبزڕکا
بزر دەبوو ڕەنگی شینی‌.
***
وێنەی نیگایەکی چاوتم
ڕۆژێ بە دیاری بۆ مانگ نارد
وتی: شەرتبێ
بیکەم بە کانیی تریفەم.

***
نیوەشەوێ
لەودیو ئاسمان
خۆر دەستی گرتم و بردمی
قەفتەیێ لە تیشکەکانی
نێو گۆزەی دڵی خۆی دامێ،
کە ھاتمەوە
مانگ لە ئاسمان ڕێی پێ گرتم
جامێ تریفەی زیوینی
کانیاوی خۆی دایە دەستم،
ھەر ئەوشەوە
بەر لە ئەلەندی بەیانیی
ھەر ھەموویم ھەڵڕشتە نێو
نووتەکی بەردەرگای ماڵتان.
***
له‌گه‌ڵ كازیوه‌
كاتێ كه‌ڵه‌باب
له‌سه‌ر باره‌دار دێته‌ خواره‌وه‌
شه‌ونمی دره‌خت خۆی پۆشته‌ ده‌كات
تا بۆ تیشكی تاو
ورد بخنێته‌وه‌
ئه‌وكات شالوورێ
له‌ودیو په‌نجه‌ره‌ی ژووری تاریكم
كه‌ به‌خته‌وه‌ری تیایدا خه‌وتووه‌
دێ هه‌ڵده‌نیشێ
منیش هه‌ندێ له‌ ئازاره‌كانمی
وه‌كوو نۆته‌یێ
یا وه‌ك مێلۆدیی
بۆ ده‌خوێنمه‌وه‌
ئیتر له‌وێوه‌
گۆرانییه‌كانی عاشقێكی دین
شالوورێكی مه‌ست
ده‌یچریكێنێ.
***
ئێواره‌یێ
به‌ر له‌وه‌ی خۆر
پێڵووی چاوانی بچنه‌ خه‌و
ڕه‌نگی ڕه‌شی له‌ قژت خواست
ناردیی بۆ ئاسمان تا بیدا
له‌ سینه‌ی شه‌و.
***
تاشه‌ به‌ردێكی بنار كێوێكم
ئه‌وه‌ی دێ، پشتی خۆیم پێ ده‌دا
هه‌ر له‌پاڵ ده‌فی سینه‌ی سووتماكم
هه‌ناسه‌ی ئۆخه‌ی
پشووی ماندوویی
وزه‌ی خۆرێكی گه‌رم و ڕووناكم
پلووكه‌ به‌ردی ته‌ختی دامه‌ نیم
هه‌ركه‌سێ ویستیی
چۆنم هه‌ڵگرێ و
له‌ كوێم دابنێ، كڕ بم.. دامێنم.
شه‌وه‌زه‌نگ ده‌زڕم
ژان و مه‌ینه‌تی، دێم ده‌خه‌مه‌ ژێر
هه‌وری دامێنم.
***
ده‌مه‌وێ شیعرێ بنووسم
ڕووحی تیا بێ
هه‌ر به‌ ته‌نیا وشه‌ نه‌بێ
پیتی ڕیزكراوی سه‌ر ڕووی
په‌ڕه‌ی سپیی كاغه‌ز نه‌بێ،
دڵێكی میهره‌بانی وه‌ك
دڵی تۆی له‌ سینه‌دا بێ،
وشه‌ی وه‌ك وشه‌كانی تۆ
شیله‌ی شه‌وبۆ و شكۆفه‌ بێ
وێنه‌ی سیمای
به‌یانیانی تازه‌ ڕابووی
پڕ خه‌ونی ئه‌رخه‌وانی بێ.
ده‌قێكه‌ زیندوو ده‌نووسم
چاوی له‌ چاوی تۆ بچێ
هه‌میشه‌ له‌ ڕوانینا بێ
ئاسۆگه‌ی ڕوون
هه‌ر بمێنێ
گه‌ش وه‌ك پۆڵوو
تا ئه‌به‌د و
تا دونیای ڕوون.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

دواین ئه‌فسانه‌ی دونیا

فاروق هومه‌ر رۆژێك لای هاوڕێیه‌كم ئاره‌زوویه‌كی دێرینی خۆمم دركاند، ئه‌و ...