سەرەکی » ئابووری » گەچی كفری هەناردەی شارەكانی عیراق دەكرێت

هەفتانە 300 مەتر بەرهەم دەهێنێت

گەچی كفری هەناردەی شارەكانی عیراق دەكرێت

لە قەزای كفری سەر بە ئیدارەی گەرمیان، كارگەیەك هەفتانە بڕی 300 مەتر گەچ بەرهەم دەهێنێت، بەوتەی خاوەنەكەشی، باشی جۆری گەچی كفری ناوبانگی هەیەو بەرهەمەكانیان جگە لەگەرمیان هەناردەی پارێزگای سەڵاحەددین‌و دیالەش دەكرێت، مێژوونوسێكیش دەڵێت: «مێژووی بەكارهێنانی گەچ‌و قایەی كفری لە سنوورەكەدا دەگەڕێتەوە بۆ هەزاران ساڵ لەمەوبەر».
گەچ مادەیەكی سروشتییەو لەتاوێر و بەردی گەچی شاخ‌و دۆڵەكان بەرهەم دەهێنرێت‌و بەچەند قۆناغێكدا تێدەپەڕێت تا دەكرێت بە مادەیەكی ئامادەكراو، لەساڵانی رابردوودا گەچ‌و قایە كەرەستەی سەرەكی بووە لە بیناسازی‌و دروستكردنی كۆشكداو ئێستاش بۆ سپیكردنەوەی دیوار لە بیناسازیدا بەكاردەهێنرێت.

تاكە كارگەیە لە سنووری ئیدارەی گەرمیان
گەچی شاخی باوەشاسوار لە سنووری قەزای كفری سەر بە ئیدارەی گەرمیان، ناوبانگی تایبەتی هەیەو لەڕابردوودا سەرچاوەی سەرەكی بووە لەبواری بیناسازیدا بۆ سنوورەكەو ئێستاش لەڕێگای كارگەیەكەوە هەفتانە 300 مەتر گەچی لێ بەرهەم دەهێنرێت‌و هەناردەی شار و شارۆچكەكانی تر دەكرێت.
ئەم كارگەیە تاكە كارگەیە لە سنووری ئیدارەی گەرمیان، وەك خۆیان دەڵێن، سەنگەر محەمەد خاوەنی كارگەكە دەڵێت: «بەرهەممان دەگاتە پارێزگاكانی دیالەو سەڵاحەدین‌و قەزای كەلار و سەرجەم شوێنەكانی دیكەی گەرمیان».
ئاماژە بەوەشدەكات، بۆ كارپێكردنی كورەكان پێویستمان بەڕۆنی رەشە، بەڵام حكومەت هیچ هاوكارییەكمان ناكات لەكاتێكدا پێویستە بۆمان دابینبكات، بۆیە بەناچاری لەبازاڕی رەشدا بە پارەیەكی زۆر دەیكڕین، سەرەنجام ناچارین نرخی گەچەكەمان بەرزبكەینەوە.

50 كاتژمێر كوركە كار دەكات
بەرهەمهێنانی گەچ‌و بەردی گەچ، بەمشێوەیەیە، سەرەتا بە حەفارە شاخەكە هەڵدەكۆڵن‌و بەردەكانی دەشكێنن، دواتر بە شۆفڵ بەردەكەی دەردەهێنن‌و دەیكەنە ناو سەرەنێك كە دەیبێژێت، دواتر بەردەكان لەدەوری كورەی ئاگری تایبەت بە خۆی هەڵدەچنن‌و ژێرەوەی بەردەكان وەكو تونێل بە بۆشی دەهێڵنەوە، پاشان بە خۆڵ سەری دەگرن‌و كورەكە دادەگیرسێنن، بەشێوەیەك دەبێت نزیكەی 50 كاتژمێر كوركە كار بكات تا دەبێت بە گەچ.
لەكۆتاییدا بەردەكان لە گەچەكە دەردەهێنن‌و گەچەكە دەكەنە ناو ئامێری كەسارەوەو دەبێت بە گەچی ئامادەكراو و بار دەكرێت بۆ فرۆشتن، بەرهەمهێنانی گەچ هەموو ئەم قۆناغانەی پێویستەو كارێكی زەحمەتە.

تا 20 ساڵ لەمەوبەریش بە گەچ‌و قایە كاركراوە
سوهەیل خورشید مێژوونووس، سەبارەت بەگرنگی‌و مێژووی بەكارهێنانی گەچ‌و قایە لە كفریدا دەڵێت: «تۆبۆگرافیای كفری نیمچە شاخاوییە، لە سنوورەكەدا شاخی باوەشاسوار هەیە كە گەچییە، بەو هۆیەشەوە مێژووی بەكارهێنانی گەچ‌و قایە لە ناوچەكەو دەورووبەری زۆر كۆنە، بۆ نمونە شوێنەوار و گۆڕەكانی زەنگئاباد و سەرقەڵا كە دۆزراوەتەوە و مێژووەكەی دەگەڕیتەوە بۆ هەزاران ساڵ لەمەوپێش‌و چەند كیلۆمەترێكی كەم لەكفرییەوە دوورە، كە بە گەچ‌و قایە دروستكراوە.
دەشڵێت: «تا ساڵی چلەكان لە شاری كفری ماددەیەك دروستكراوە وەك چیمەنتۆی ئەمڕۆ و پێیدەوترێت قسڵ، كە بۆ بناغەی خانوو بەكارهاتووەو گەچ‌و قایەش بۆ دیوار و سواقدان‌و سەقفەكەی لە ساڵانی رابردوودا بەهۆی نەبوونی هۆیەكانی گواستنەوە نەتوانراوە بۆ شوێنە دوورەكان بگوازرێتەوە، بەڵام بۆ سەرجەم شوێنەكانی دەوروبەری كفری گواستراوەتەوە، تا 20 ساڵ لەمەوبەریش بە گەچ‌و قایە كاركراوە، بەڵام لە ئەمڕۆدا بلۆك بەكاردەهێنرێت لەبری قایە كەچی گەچ هێشتا بۆ سپیكردنەوەی دیوارەكان بەكاردێت».

سەرچاوە: ژووری بازرگانی‌و پیشەسازیی سلێمانی

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*