سەرەکی » وتار » لەتیف فاتیح فەرەج‌ » بۆ دكتۆره‌ ئەرشیفییه‌كه‌

بۆ دكتۆره‌ ئەرشیفییه‌كه‌

دكتۆر عیزه‌دین مسته‌فا ره‌سوڵیش گه‌ڕایه‌وه‌ به‌ردلۆڤانی‌ خودا، شانسی‌ ئه‌وه‌م هه‌بووه‌ كه‌ زۆر جار له‌ خزمه‌تی‌ ئه‌و پیاوه‌دا بوومه‌ بۆ به‌غداو كه‌ركوك، ماوه‌یه‌ك له‌مه‌وبه‌ر چه‌ند دۆستێكی‌ گه‌نج سه‌ریان لێدا بوو، ووتبووی‌ ئه‌رێ‌ له‌تیفه‌كه‌ وه‌زعی‌ چۆنه‌، زۆر جار ته‌له‌فونم بۆ ده‌كردو هه‌واڵیم ده‌پرسی‌، جارێكیان وتم دكتۆر ته‌ندروستیت چۆنه‌، له‌و وشه‌ی‌ ته‌ندروستیه‌ زۆر نیگه‌ران بوو، ووتی‌ تۆش لێم مه‌به‌ به‌ ئێرانی‌ ته‌ڵه‌به‌كان، قسه‌ زۆر كراو هاته‌ سه‌ر ئه‌وه‌ی‌ ره‌خنه‌ی‌ له‌ كاك نه‌وشیروان گرت و وتی‌ ئه‌مه‌ چیه‌ دروستی‌ كردووه‌ و ده‌یه‌وێت چی‌ بگۆڕێ‌، منیش زۆر به‌ نه‌رمی‌ هه‌وڵم ده‌دا قسه‌ی‌ بۆبكه‌م، خۆش ئه‌وه‌بوو چه‌ند رۆژ دواتر كاك نه‌وشیروان چووبووه‌ سه‌ردانی‌ ئیتر نازانم له‌وێ‌ ره‌خنه‌كانی‌ گرتبوون یان نا، ساڵێك له‌مه‌وبه‌ر وابزانم بۆ گه‌شت چووبووه‌ قه‌ره‌داخ، ته‌له‌فونی‌ بۆ كردم زۆرمان قسه‌ كرد، دیسان به‌زم و ره‌زمی‌ سیاسی‌ تیا بوو، باسی‌ كزی‌ چاوه‌كانی‌ كردوو وتی‌ خه‌ریكه‌ له‌ ده‌ستیان ده‌ده‌م، لام وایه‌ وتارێكی‌ كورتم له‌ سه‌ر چاوه‌كانی‌ نووسی‌، 30 ساڵ پتره‌ من ئه‌و پیاوه‌ ده‌ناسم و هه‌میشه‌ شتی‌ لێوه‌ فێر ده‌بم، ده‌ی‌ قسه‌و نوكته‌ی‌ خۆشیشمان هه‌بوو، یه‌ك دوو جار به‌ فڕۆكه‌ نا به‌ ئۆتۆمبیل چووینه‌ته‌ به‌غدا، جارێكیان یادی‌ شاعیری‌ ناسراو محه‌مه‌د مه‌هدی‌ جه‌واهیری‌ بوو، عه‌ره‌به‌كان به‌گشتی‌ رێزی‌ زۆریان لێده‌گرت و له‌ ئوستادو دكتۆر به‌و لاوه‌یان پێناگووت، هه‌موو ده‌ست له‌ سه‌ر سنگ له‌ به‌ری‌ ده‌وه‌ستان، ئه‌ویش هێور هێور باسی‌ جه‌واهیری‌ و به‌غداو ئه‌ده‌بی‌ عه‌ره‌بی‌ و گۆرانی‌ شاعیری‌ بۆ ده‌كردن، جارێكیش بۆ یادی‌ گۆران پێكه‌وه‌ بووین خاتونێكی‌ گۆشتنی‌ تێكسمڕاوی‌ خڕو خه‌پانی‌ ته‌مه‌ن سه‌رو په‌نجا ساڵێكی‌ ئاشوری‌ كار گوزاری‌ هۆتێله‌كه‌ بوو،سپی‌ و جوانیش بوو زۆر سه‌یری‌ دكتۆری‌ ده‌كرد، وتم دكتۆر ئه‌و خاتونه‌ له‌وه‌ ده‌چێت حه‌زی‌ لێكردبیت ووتی‌ به‌خوا ره‌نگه‌ حه‌زی‌ له‌ گیرفانم كردبێت، وتم ده‌ی‌ ئه‌وه‌ش حه‌زه‌، پێكه‌نی‌ و هیچی‌ نه‌گوت .
بۆ پرسی‌ نوسه‌ران هاته‌ كه‌ركوك و پێكه‌وه‌ زۆرمان قسه‌ كرد، ئه‌و ده‌یووت هه‌رچۆنێكه‌ ناكرێت نوسه‌ران به‌و تۆخیه‌ زه‌ردو سه‌وز بكرێن و بواری‌ هه‌ناسه‌ی‌ ئازادانه‌یان بۆ نه‌مێنێته‌وه‌ باسی‌ ئه‌وه‌شی‌ كرد كه‌ مام جه‌لال نایه‌وێت نوسه‌ران بحزبێنرێن، داوای‌ لێكردم له‌ یه‌كێتی‌ نوسه‌ران به‌شدار بم، من به‌ بڕووبیانوی‌ جیا جیا خۆم له‌ كاره‌كه‌ دزیه‌وه‌، به‌ڵام زۆری‌ لێنه‌كردم، دڵنیابوو له‌وه‌ی‌ زۆرم لێبكات ناچارم قسه‌ی‌ نه‌شكێنم، به‌ دڵیش حه‌زم به‌ كاره‌كه‌ نه‌بوو، دكتۆر پیاوێكی‌ ئارشیفی‌ زۆر ده‌وڵه‌مه‌ند بوو، خۆی‌ له‌ فه‌رهه‌نگێكی‌ گه‌وره‌ ده‌چوو له‌ سه‌ر هارو مار زانیاری‌ هه‌بوو، له‌ رۆژو سه‌عات و ساڵ و لاپه‌ڕه‌ی‌ كتێب و ته‌نانه‌ت ورده‌كاری‌ زۆر وردا ده‌تووت كۆمبیوته‌ره‌، زۆریشی‌ ده‌خوێنده‌وه‌و ده‌بینی‌ و داخی‌ له‌ ناجۆری‌ و خراپی‌ ده‌خوارد.
له‌ ساڵی‌ 1994 ماوه‌یه‌كی‌ كه‌م له‌ په‌یمانگای‌ پێگه‌یاندنی‌ كادیران له‌ هه‌ولێر مامۆستام بوو، بیرم نایه‌ت بۆ هیچ پرسیارێك ده‌سته‌ وه‌ستان بووبێت، ئیتر له‌ دیرۆك و ئه‌ده‌به‌وه‌ بیگره‌ تا ده‌گاته‌ ناساو ته‌ی‌ كردنی‌ بۆشاییه‌كان، له‌ ته‌ك دكتۆرا یاده‌وه‌ری‌ و قسه‌ی‌ خۆش و گفت و گۆی‌ زۆرمان هه‌بووه‌، به‌ داخم كه‌ نه‌متوانی‌ له‌م دوا دوای‌ ته‌مه‌نه‌یدا سه‌ری‌ لێبده‌م، كێشه‌كه‌ش په‌یوه‌ندی‌ به‌ كاته‌وه‌ هه‌بوو، ئه‌و پاش نیوه‌ڕوان له‌ سه‌عات 5 به‌ دواوه‌ ده‌یتوانی‌ خه‌ڵك ببینێت منیش هه‌ر جاره‌و به‌ هۆیه‌ك بۆم رێكناكه‌وت، ئاسوده‌ بنوو ئوستاد ته‌مه‌نێكی‌ پڕ به‌خشش و دانسقه‌ت هه‌بوو، ده‌زانم له‌وێنده‌ر له‌ته‌ك دكتۆر كه‌مالدا له‌ كونجێكی‌ به‌ هه‌شتا به‌شیر موشیر ده‌دۆزنه‌وه‌و كۆڕی‌ كوردانه‌ گه‌رم ده‌كه‌ن.

 272 جار بینراوە