سەرەکی » وتار » عەتا کەریم‌ » بەرپرسیارێتیی ئۆساهۆ شیمبۆن!

ناوه‌ڕاستی هه‌فته‌

بەرپرسیارێتیی ئۆساهۆ شیمبۆن!

یوسوكی تاكانۆ رۆژنامەنووسێكی ورد و دووربین و بەئەزموونی رۆژنامەی ئۆساهۆ شیمبۆنی ژاپۆنییە، بەرپرسی ئۆفیسی رۆژنامەكەیە لە دوبەی، بەهۆی ئۆپەراسیۆنی توركیاو گۆڕانكارییەكانی رۆژئاوای سوریاو كەیسی داعش‌و مەترسییەكانی سەرهەڵدانەوەی چەند رۆژێك لە هەرێمی كوردستان بوو، لە سنووری سحێلا و فیشخاپورەوە لە نزیكەوە دیمەنی ئاوارەكانی بینیبوو، چیرۆكەكانی تۆماركردبوو، بەدوای زانیارییەوە بوو دەستی بكەوێت لەسەر داعش و مەترسییەكانی سەرهەڵدانەوە، بەڵام ئەوەی مەبەستمە بیخەمەڕوو، بابەتێكی دیكەیە لەسەر بەرپرسیارێتی و سەلامەتیی رۆژنامەنووسی.
تاكانۆ پرسیاری زۆری لە بەندە كرد هەر لەسەر ئەو پرسانە و بەجۆرێك گەیشتە سەر خواردنی كوردەواریی، لەو كاتەدا وێنەی محەمەد هەموو سۆشیال میدیای ناوخۆیی و جیهانی تەنیبوو، منیش سەیرێكی ئەكاونەتەكەمم كرد و بێدەنگ بووم، وێنەكەم پیشانی ئەودا وەك رۆژنامەنووسێك كە لە ناوچەكەیە و بەشوێن زانیارییەوەیە و ئاگادارم كرد كە ئەم منداڵە بە چەكی فسفۆر برینداربووە كە گوایە توركیا بەكاریهێناوە، ئەو دیوەی تەركیزم لەسەری كرد، لایەنە مرۆییەكە بوو، كە ئەم ئازارە گەورەیە، ئەویش رای وابوو كە ئیتر ئەم وێنەیە «هاوار و دەنگێكە هەموو جیهان تێی دەگەن و ناشاردرێتەوە»، ئەم كورتەیەم لە ئەكاونتی خۆم لە فەیسبووك دانا و بۆ تاكانۆشم تاگ كرد، پاش 24 سەعاتێك ئاگاداركرامەوە كە ئەو قسەیەی تاكانۆ لاببەم، چونكە لە بەرپرسانی رۆژنامەكە لە تۆكیۆوە ئەو كۆمێنتەیان بینیووە كە نەدەبوو ئەو قسانە بكات و گیانی خۆی بخاتە مەترسیەوە!، بۆیە تكاكەم قبوڵكرد و ئەو بەشەم سڕییەوە!.
ئەوەی گرنگە پەیوەستبوون و ئاگاداربوونی سەنتەری كاری رۆژنامەوانی و پەیامنێر و رۆژنامەنووسە لەكاتی دۆخە نەخوازراو و جەنگەكاندا، كە دەبێت بەر لەهەموو شتێك ئاگاداری سەلامەتی خۆیان بن و ژیانی خۆیان نەخەنە مەترسییەوە ئەگەر بە كۆمێنت و رادەربڕینێكش بێت!.
لەم نموونەیەوە سەیرێكی دۆخی كاری رۆژنامەنووسی و دامەزراوەكان و ئەرك و ماف و ئیتیك و بەرپرسیارێتییان بكەین، تێدەگەین لە چ پەرتەوازەیی و ناڕێكخراوەییەكداین، زۆرێك لە دامەزراوەكان بە حزبی و ناحزبی و سێبەرەكانیشەوە، زۆر لەخوار بەرپرسیارێتیدان بەرامبەر بە رۆژنامەنووسەكانیان، هێندەی مافیان دەخۆن، مافیان پێ نادەن!، هێندەی هەواڵێكیان لەلا گرنگە، ژیان و سەلامەتی رۆژنامەنووسەكەیان بە هێندەی هەواڵەكە بەلاوە گرنگ نییە، هێندەی نها و كورتە هەواڵێكیان لەلا مەبەستە، ئاسایشی كۆمەڵایەتی و خێزانیشیان لەلا گرنگ نییە! ئەمانە لە میدیای ئاشكرا بەو جۆرەن.
ئەم ئاگاركردنەوە و بەرپرسیارێتییەی رۆژنامەی ئاساهی شیمبۆنی ژاپۆنی كە بە دوو چاپی بەیانی و ئێوارە 8 ملیۆنی لێ چاپ دەكرێت، بەمجۆرە مامەڵە لەگەڵ وتە و رایەكی رۆژنامەنووسێكی خۆیدا دەكات كە لە سۆشیال میدیاوە بینویانە و ئەویش نەینووسیووەو لەرێی تاگەوە بووە، ئاوها ئاگاداری دەكەنەوە! دەبێت مەرج و بەرپرسیارێتی ئاكاری و كارییان چۆن بێت؟!
بەكارهێنانی سۆشیال میدیا لە كۆمەڵگەی كوردەواریی بەگشتی واز لێ دەهێنین و كورتی دەكەینەوە بۆ توێژی رۆژنامەنووسی خۆمان، كە زۆرێكیان چ بێسەرەو بەرەییەك دەخۆڵقێنن لەسەر ئەو رووداوانەی روودەدەن، چەندین چیرۆكی بۆ دادەڕێژن بەچەشنێك حەقیقەتەكە ون دەبێت، كە لە شرۆڤەكارەوە دەبنە تەخوینكار، ئەوانەیشی پەرۆشی پرۆفیشناڵ و پەیوەستیی ئاكار و پرانسیپن، شتێكیان بۆ نامێنێتەوە بۆ وتن.
ئێرە هەرێمی كوردستانە و ئەوێش ژاپۆن!

print

 93 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*