سەرەکی » ئەدەب - سێبەر و سایە » بێئاگایی لە مێژوو، نموونه‌ رۆمانی من تامه‌زرۆی خۆشه‌ویستیم

بێئاگایی لە مێژوو، نموونه‌ رۆمانی من تامه‌زرۆی خۆشه‌ویستیم

سه‌دیق سه‌عید رواندزی

له‌ دوای راپه‌ڕینه‌وه‌ به‌گشتی و له‌م ساڵانه‌ی دواییشدا به‌ تایبه‌تی، ژماره‌یه‌كی زۆر له‌ رۆمان كه‌وتوونه‌ته‌ به‌ر دیده‌ی خوێنه‌ران. به‌شێكی یه‌كجاركه‌میان لێده‌رچێت، ده‌نا زۆربه‌ی ئه‌و رۆمانانه‌ نه‌خوێنراونه‌ته‌وه‌ و پشت گوێ خراون. ئه‌م پشتگوێ خستنه‌، په‌یوه‌ندی به‌وه‌وه‌ نییه‌ كه‌ ره‌خنه‌گری ئه‌ده‌بیمان نییه‌ وه‌ك ئه‌وه‌ی زۆرجارده‌گوترێت، كه‌ بۆ چوونێكی لاوازو و بێ ئه‌رگۆمێنته‌، په‌یوه‌ندی به‌وه‌وه‌ش نییه‌ كه‌ خوێنه‌ری جدی رۆمانمان نییه‌، به‌ڵكو په‌یوه‌ندی به‌وه‌وه‌ هه‌یه‌، كه‌ له‌ راستیدا زۆربه‌ی زۆری ئه‌وانه‌، به‌ ناو رۆمان بوونه‌. ده‌نا هیچ ره‌گه‌زێكی هونه‌ری نووسینی رۆمانیان تێدانییه‌. چونكه‌ رۆمان، ژانڕێكی قورس و ئاڵۆزه‌ و نووسینی پێویستی به‌ پاشخانێكی گه‌وره‌ی رۆشنبیری له‌ هه‌موو رووێكه‌وه‌ هه‌یه‌. تاكو رۆماننووس نه‌كه‌وێته‌ هه‌ڵه‌ی جۆراو جۆره‌وه‌. كه‌چی به‌ پێچه‌وانه‌وه‌ به‌ شێكی زۆری ئه‌وانه‌ی ئه‌زموونی رۆمان تاقیده‌كه‌نه‌وه‌ و له‌ بنه‌ڕه‌تدا رۆماننووس نین و له‌ باره‌ی نووسینی رۆمانه‌وه‌ شاره‌زاییه‌كی ئه‌وتۆیان نییه‌، له‌ رۆمانه‌كانیاندا هه‌ڵه‌ی زه‌ق ده‌كه‌ن و بێ ئه‌وه‌ی هه‌ستی پێ بكه‌ن به‌ سه‌ریاندا تێپه‌ڕده‌بێت. به‌شێك له‌و هه‌ڵانه‌، په‌یوه‌ندییان به‌وه‌وه‌ هه‌یه‌، كه‌ ئاگاداری رووداوه‌ مێژووییه‌كان، زه‌مه‌ن و قۆناغه‌كان نین. بۆیه‌ كه‌ ده‌گه‌ڕێنه‌وه‌ سه‌ر رووداوێك، ئه‌وا به‌ دیدگای ئێستا رووداوه‌كانی ئه‌و كات ده‌بینن و ده‌خوێننه‌وه‌. له‌ كاتێكدا هه‌موو رووداوێك، په‌یوه‌سته‌ به‌ قۆناغ و زه‌مه‌نێكی دیاریكراو. رۆمانێكم خوێنده‌وه‌، نووسه‌ره‌كه‌ی باسی ساڵی كۆڕه‌وی كورد له‌ ساڵی 1991 ده‌كات، كه‌چی نووسیویه‌تی:(باران له‌ پێنچ ملیۆن مرۆڤی كوردی ده‌دا). واته‌ هێنده‌ بێ ئاگابووه‌ له‌ نووسینی رۆمانه‌كه‌ی، دركی به‌وه‌ نه‌كردووه‌ كه‌ ساڵی كۆڕه‌وه‌كه‌، ژماره‌ی دانیشتووانی هه‌رێم، پێنچ ملیۆن كه‌س نه‌بووه‌. وه‌لێ چونكه‌ ئه‌و به‌ دیدگای ئێستا مێژووی ئه‌وكات ده‌بینێت، ئیدی هه‌ر واده‌زانێت كۆڕه‌وه‌كه‌ ئێستا روویداوه‌. بۆیه‌ یه‌كێك له‌و ره‌گه‌زه‌ گرنگانه‌ی كه‌ ده‌بێت رۆماننووس به‌ ئاگاییه‌وه‌ به‌رجه‌سته‌ی بكات مێژووه‌. چونكه‌ هه‌موو رووداوێكی مێژوویی، په‌یوه‌ندی به‌ قۆناغێكه‌وه‌ هه‌یه‌. ناكرێ رۆماننووس قۆناغه‌كان له‌ یه‌كتری جیانه‌كاته‌وه‌، كه‌چی رووداوه‌كان بگێڕێته‌وه‌. له‌و سۆنگه‌یه‌وه‌ رۆمانی (من تامه‌زرۆی خۆشه‌ویستیم) یه‌كێكه‌ له‌و رۆمانانه‌ی چه‌ندین هه‌ڵه‌ی زه‌قی مێژوویی تێدایه‌، كه‌ ده‌ریده‌خه‌ن نووسه‌ری رۆمانه‌كه‌ ئاگاداری هیچ شتێك نییه‌ و ته‌نها به‌ مه‌به‌ستی درێژكردنه‌وه‌ ئه‌و رووداونه‌ باس ده‌كات. به‌رله‌وه‌ی ئه‌و هه‌ڵانه‌ به‌ ده‌ق دیاری بكه‌ین، كورته‌یه‌ك له‌ باره‌ی ناوه‌ڕۆكی رۆمانه‌كه‌وه‌ بۆ خوێنه‌ران ده‌خه‌ینه‌ روو. ئه‌م رۆمانه‌، باس له‌ كچێك ده‌كات كه‌ ناوی (هه‌ژێن)ه‌. ئه‌م كچه‌، باوكی پێشمه‌رگه‌بووه‌و له‌گه‌ڵ پۆلێك پێشمه‌رگه‌ی تر دوای گه‌ڕانه‌وه‌یان له‌ چالاكییه‌ك شه‌هید ده‌كرێن. دوای شه‌هید كردنی باوكی، دایكیشی شووده‌كاته‌وه‌. سه‌ره‌نجام داپیره‌ و باپیره‌ی هه‌ژێن، واتا دایك و باوكی ( شێرزاد بازگر)ی پێشمه‌گه‌ر، هه‌ژێن گه‌وره‌ ده‌كه‌ن و له‌ قۆناغی ناوه‌ندیدا داپیره‌ و باپیره‌شی یه‌ك له‌ دوای یه‌ك ده‌مرن. هه‌ژێن بۆ ئه‌وه‌ی بێ لانه‌ و سه‌رپه‌رشت نه‌مێنێته‌وه‌، مامۆستا به‌نازی مامۆستای قوتابخانه‌كه‌ی له‌ گوند، ده‌یگرێته‌ خۆی و ده‌ره‌نجام قۆناغه‌كانی خوێندن ته‌واو ده‌كات. كوڕێكیشی خۆشده‌وێت به‌ ناوی لاوێن و ئه‌ویش جێی دێڵێت و به‌مه‌ش جارێكی تر هه‌ژێن بێ به‌ش ده‌بێت له‌ خۆشه‌ویستی. دواجاریش رووداوه‌كانی رۆمانه‌كه‌ كۆتاییان دێت. ئه‌مه‌ پوخته‌ی ناوه‌ڕۆكی رۆمانه‌كه‌یه‌، وه‌لێ نووسه‌ری رۆمانه‌كه‌ له‌ چه‌ندین لایه‌نی مێژوویی، بابه‌تی و هونه‌ری كه‌وتۆته‌ هه‌ڵه‌وه‌، كه‌ له‌ خواره‌وه‌ ده‌یانخه‌ینه‌ روو:

یه‌كه‌م: هه‌ڵه‌ی رووداو و مێژوو:
بێگومان، مه‌رج نییه‌ زه‌مه‌نی نێو ده‌ق، هه‌مان زه‌مه‌نی مێژوویی واقیع بێت و كرنۆلۆژیای رووداوه‌كان به‌ دوای یه‌كتریدا بێن، وه‌لێ كاتێ باسی رووداوێكی مێژوویی ده‌كه‌ین، یان دیارده‌یه‌كی سه‌رده‌م، ئه‌وا ده‌بێت مێژوو وه‌ك ئه‌وه‌ی كه‌ هه‌یه‌ ئاماژه‌ی پێ بدرێت. بۆنموونه‌:_ كه‌ باسی ئه‌نفاله‌كان ده‌كه‌ین، ئه‌وا ناتوانین بڵێین ئه‌نفاله‌كان له‌ حه‌فتاكان روویداوه‌، چونكه‌ مێژووی ئه‌و كاره‌ساته‌ ساڵی(1988)ه‌. ئه‌گه‌ر باسی ئه‌نفالیش بكه‌ین ، ئه‌وا هه‌موومان ده‌زانین كه‌ ساڵ 1988و پێویست به‌ هیچ ئاماژه‌كردنێك ناكات. نووسه‌ری ئه‌و رۆمانه‌، چه‌ندین رووداوی داونه‌ته‌ پاڵ یه‌ك به‌بێ ئه‌وه‌ی له‌ رووی زه‌مه‌نی و مێژووییه‌وه‌ هه‌ر په‌یوه‌ندییان به‌ یه‌كترییه‌وه‌ هه‌بێت، به‌مه‌ش كه‌وتۆته‌ هه‌ڵه‌ی وا كه‌ خۆشی هه‌ستی پێ نه‌كردووه‌ وه‌ك:
*كه‌ شێرزاد بازگری پێشمه‌رگه‌ و باوكی هه‌ژێن، له‌ گه‌ڕانه‌وه‌ی چالاكییه‌كدا له‌ شار، له‌ بناری چیای باواجی به‌ بۆردومانی فڕۆكه‌ شه‌هید ده‌بێت، هه‌ر ئه‌و رۆژه‌ش هه‌ژێن له‌ دایك ده‌بێت.(ل58ی رۆمانه‌كه‌). واته‌ ئێمه‌ لێره‌دا له‌ به‌رده‌م زه‌مه‌نی به‌رله‌ راپه‌ڕینین كه‌ پێش ساڵی 1991ده‌كات. دووساڵ پێشتریش دوای ئه‌نفاله‌كانه‌، كه‌ قۆناغی خامۆشی و نه‌بوونی هیچ جموجۆڵێكه‌، كه‌واته‌ گریمان رووداوی شه‌هیدكردنی ئه‌و پێشمه‌رگه‌یه‌ ساڵی(1987) یان پێشووتربووبێت. كه‌چی نووسه‌رده‌نووسێت:( هێشتا هه‌ژێن ته‌مه‌نی پێنچ ساڵان بوو كه‌ باپیره‌ی بردی بۆ قوتابخانه‌، هه‌رچه‌نده‌ ته‌مه‌نی گونجاو نه‌بوو، وه‌لێ چونكه‌ زیره‌ك بوو وه‌ریانگرت.ل24ی رۆمانه‌كه‌).كه‌واته‌ چوونی هه‌ژێن بۆ قوتابخانه‌ ده‌كه‌وێته‌ دوای راپه‌ڕین و ساڵی 1992.شه‌ش ساڵی قۆناغی سه‌ره‌تایی و سێ ساڵی قۆناغی ناوه‌ندیش كه‌ داپیره‌ و باپیره‌ی ده‌مرن، نزیكه‌ی ده‌كاته‌ ساڵی 2001. كه‌چی رۆماننووس له‌و قۆناغه‌دا، باسی پۆلی نۆی بنه‌ڕه‌تی و مۆبایل و زۆرشتی دیكه‌ش ده‌كات!. كه‌ به‌رهه‌می چه‌ندین ساڵی دواترن. كه‌ هه‌ژێن داپیره‌ و باپیره‌ی به‌چه‌ند مانگێكی كه‌م و به‌دوای یه‌كتری ده‌مرن، ئه‌و پۆلی (سێی ناوه‌ندییه‌) نه‌ك (نۆی بنه‌ڕه‌تی) وه‌ك ئه‌وه‌ی رۆماننووس نه‌یزانیوه‌، چونكه‌ شوناسی قۆناغی نۆی بنه‌ڕه‌تی له‌ دوای ساڵی 2007 داهات، كه‌ تائێستا چه‌ندین رۆماننووس و نووسه‌رم بینیون له‌ به‌رهه‌مه‌كانیان، كه‌وتوونه‌ته‌ ئه‌و هه‌ڵه‌ و ره‌خنه‌شم لێگرتوون. كه‌واته‌ كاتێ داپیره‌ و باپیره‌ی شه‌هێن ده‌مرن، ساڵی 2001ه‌. دوای مردنی ئه‌وانیش مامۆستا به‌ناز بۆ دڵنه‌وایی هه‌ژێن ده‌باته‌وه‌ ماڵی خۆیان له‌ شار. نووسه‌ری رۆمانه‌كه‌ له‌لاپه‌ڕه‌ 62دا ده‌نووسێت:_(هه‌ژێنم برده‌ بازاری گه‌وره‌ و ماركێت و مۆڵه‌كان، له‌و هه‌موو داهێنان و ته‌كنه‌لۆژیانوێیه‌ سه‌ری سوڕما. بردمه‌ ئه‌و پاركه‌ گه‌وره‌یه‌ش كه‌ كتێبخانه‌ی له‌ نێو دروستكرابوو (مه‌به‌ست پاركی شه‌هید سامی عه‌بدولڕه‌حمان و كتێبخانه‌ی زه‌یتوونه‌ له‌ نێو پاركه‌كه‌).چه‌ندین پاركی دیكه‌ و سه‌نته‌ری كولتووریم نیشاندان). واته‌ له‌ ساڵی 2001. نووسه‌ری رۆمانه‌كه‌ بیری چۆته‌وه‌ ئه‌و باسی كچێك و رووداوێك ده‌كات له‌ سه‌ره‌تای دووهه‌زاره‌كان، كه‌چی باسی پێشكه‌وتن و مۆڵ و پاركه‌كانی ئێستا ده‌كات، كه‌ چه‌ند ساڵێكی كه‌مه‌ بینا كراون. ئه‌مه‌ بێ ئاگاییه‌كی زه‌ق و دیاره‌ له‌ مێژوودا.
* له‌لاپه‌ڕه‌ 142دا، دوای ئه‌وه‌ی هه‌ژێن قۆناغه‌كانی خوێندن ته‌واو ده‌كات، ده‌چێته‌ زانكۆ و له‌ قۆناغی دووه‌می زانكۆدا، خاڵێكی بۆ سۆراغ و هه‌واڵپرسینی دێته‌وه‌ لای دوای ئه‌وه‌ی چه‌ندین ساڵ بوو دایكی جێی هێشتبوو. ئه‌و زه‌مه‌نه‌، ئه‌گه‌ر به‌ پێی ته‌مه‌ن و ژیانی هه‌ژێن بێت، ساڵی 2007 ده‌كات. چونكه‌ له‌لاپه‌ڕه‌ 142دا ده‌نووسێت:_(دایكی بیست ساڵه‌ جێی هێشتووه‌. واتا 1987-2007)، كه‌چی سه‌یر له‌وه‌ دایه‌ نووسه‌رله‌ لاپه‌ڕه‌ 143رۆمانه‌كه‌ی باسی(داعش و تونێڵه‌كانی داعش!) ده‌كات. له‌ كاتێكدا هه‌فت ساڵ دواتر داعش سه‌ریهه‌ڵدا و په‌لاماری كوردستانیدا.
*له‌لاپه‌ڕه‌ 87دا نووسیویه‌تی:_(هه‌ر چوار چرای ماڵه‌كه‌م كوژانه‌وه‌). واتا مه‌به‌ستی ئه‌وه‌یه‌ دایك و باوك و داپیره‌ و باپیره‌ی هه‌ژێن مردن، له‌ كاتێكدا ئه‌و دایكی نه‌مردووه‌ و ماوه‌ و ته‌نها شووی كردۆته‌وه‌!
*له‌لاپه‌ڕه‌ 134ی رۆمانه‌كه‌دا نووسه‌ر نووسیویه‌تی:_( هه‌ژێن له‌ كۆڵیژی پزیشكییه‌، كه‌چی دواتر له‌ لاپه‌ڕه‌ 153دا ده‌نووسێت:_(ئه‌وه‌ی هه‌ژێن له‌ ته‌مه‌نی چوار ساڵی زانكۆیدا بژاری كردبوو). واته‌ نووسه‌ر لێره‌دا، ته‌مه‌نی زانكۆی هه‌ژێنی به‌چوار ساڵ داناوه‌. بێ ئاگابووه‌ له‌وه‌ی كۆلیژی پزیشكی خوێندن تیایدا شه‌ش ساڵه‌ نه‌ك چوار ساڵ، كه‌ ئه‌مه‌ش هه‌ڵه‌یه‌كی دیكه‌ی زه‌قه‌.

دووه‌م: زمانی رۆماننووس یان زمانی كاره‌كته‌ره‌كان:
یه‌كێك له‌و هه‌ڵانه‌ی به‌شێكی زۆری ئه‌وانه‌ی رۆمان ده‌نووسن و شاره‌زاییه‌كی ئه‌و تۆیان نییه‌ ئه‌وه‌یه‌، كه‌ خۆیان له‌ بری كاره‌كته‌ر و كه‌سایه‌تییه‌كان ده‌دوێن و رووداوه‌كان ده‌گێڕنه‌وه‌. واتا بیریان ده‌چێت كه‌ ده‌بێ كه‌سایه‌تییه‌كان خۆیان بدوێن، سه‌ره‌نجامیش ده‌كه‌ونه‌ هه‌ڵه‌وه‌. بۆ نموونه‌: كاره‌كته‌ر نه‌خوێنده‌واره‌، كه‌چی وه‌ك رووناكبیرێك ده‌دوێت!.به‌ درێژایی ئه‌و رۆمانه‌ش، هه‌ستم به‌وه‌ نه‌كرد كه‌ كاره‌كته‌ره‌كان خۆیان ده‌دوێن، به‌ڵكو زۆر به‌ زه‌قی و تۆخی ئه‌وه‌ دیاره‌ كه‌ نووسه‌ری رۆمانه‌كه‌یه‌ له‌ بری ئه‌وان ده‌دوێت. بۆنموونه‌: باپیره‌ی هه‌ژێن كه‌ كه‌سێكی به‌ ساڵاچوو، میللی و گوندشینه‌، كه‌چی ده‌ڵێت:(سه‌ربه‌رزم كوڕه‌كه‌م، ئه‌و رۆژه‌ی تۆ به‌ره‌ و ئاسمان هه‌ڵكشایت، بازگرێكی تر له‌ دایك بوو، زنجیره‌ی بنه‌ماڵه‌كه‌مان ناپچڕێ لا58). ئه‌م قسانه‌، له‌ قسه‌ی كه‌سانێك ده‌چن، كه‌ خوێنده‌واریی و ره‌وانبێژییه‌كی باشیان هه‌بێت، نه‌ك قسه‌ی پیره‌مێردێك. هه‌روه‌ها هه‌ژێن كه‌ ته‌مه‌نی ته‌نها چوارده‌ ساڵه‌ ده‌ڵێت:( ده‌بێ من به‌رهه‌می گوناهێك بووبم وبه‌ نهێنی له‌ دایك ببم، كرابمه‌ مه‌لۆتكه‌یه‌ك و به‌یانییه‌ك به‌رله‌ مه‌لا بانگدان له‌ به‌رده‌م مزگه‌وتێك فڕێدرابم. لا65). ئه‌مه‌ له‌ قسه‌ی كچێكی هه‌رزه‌كاره‌ی چوارده‌ ساڵی ناچێت كه‌ هێشتا له‌وانه‌یه‌ مانای وشه‌ی زۆڵ نه‌زانێت. له‌ ده‌یان شوێنی دیكه‌ش، نووسه‌ر خۆی له‌ بری كاره‌كته‌ره‌كان ده‌دوێت و قسه‌ ده‌كات. كه‌ خوێنه‌ران ده‌توانن بۆ دڵنیایی رۆمانه‌كه‌ بخوێننه‌وه‌. هاوكات له‌ گه‌لێك شوێنی رۆمانه‌كه‌شی زمانێكی وه‌سفییانه‌ی وا به‌رجه‌سته‌ ده‌كات، كه‌ زمانی نووسینی رۆمان نییه‌. وه‌ك لاپه‌ڕه‌(112).

سێیه‌م: هه‌ڵه‌ی ده‌ربڕین وگوزارشتكردن:
له‌و رۆمانه‌،چه‌ندین ده‌ربڕین و گوزارشتكردنی نابابه‌تییانه‌م كه‌وتنه‌ به‌رچاو، كه‌ بۆ من وه‌ك خوێنه‌رێك جێگه‌ی ره‌خنه‌ و سه‌رنج بوون، كه‌ چۆن نووسه‌ری رۆمانه‌كه‌، كه‌ خۆشی چیرۆكنووسه‌ و چه‌ند به‌رهه‌مێكی ئه‌ده‌بی هه‌یه‌، ئه‌مه‌ دید و تێڕوانینیه‌تی. له‌ خواره‌وه‌ ئاماژه‌ به‌ به‌شێكییان ده‌ده‌م:_
*لا4نووسیویه‌تی:_(ئه‌ندامه‌كانی بیستی من). ئه‌مه‌ چ مانایه‌كی هه‌یه‌؟ مه‌گه‌ر بیستن خۆی هه‌ست و گوێچكه‌ش ئه‌ندامێكی له‌ش نییه‌!؟
*لا14 نووسیویه‌تی:_(سواری ئه‌سپێكی سپی وه‌ك هێلكه‌ ببوو). هێڵكه‌ له‌و رسته‌یه‌دا، هیچ جوانییه‌كی به‌و ده‌ربڕینه‌ نه‌به‌خشیوه‌؟
*لا14نووسیویه‌تی:_(ره‌وه‌ ئوتومبێله‌كان). ره‌وه‌ ئوتومبێل چییه‌؟!
*لا17نووسیویه‌تی:_(چریكه‌ی هه‌ڵۆ). به‌ڵام ده‌نگی هه‌ڵۆ (سیڕه‌)یه‌ نه‌ك چریكه‌.
*لا24نووسیویه‌تی:_(گه‌رباپیره‌ی نادروست بووایه‌).له‌ رۆمانه‌كه‌دا مه‌به‌ست نه‌خۆشكه‌وتنی باپیره‌یه‌، به‌ڵام نادروست نابێت چونكه‌ ئه‌مه‌ به‌ مانای نه‌گونجاو دێت.
*لا55نووسیویه‌تی:_(له‌ هه‌موو مزگه‌وته‌كان بانگ ده‌درا). له‌ رۆمانه‌كه‌دا، مه‌به‌ست ئه‌و بانگه‌وازه‌یه‌ كه‌ له‌ سه‌رده‌می شاخدا پێشمه‌رگه‌ كه‌ ده‌هاتنه‌ شاره‌كان له‌ مزگه‌وته‌كان ده‌یانكرد. بۆیه‌ بانگه‌وازه‌ نه‌ك بانگ، كه‌ دوو وشه‌ی ته‌واو جیاوازن له‌ یه‌كتری. چونكه‌ هه‌موو ده‌مێك بانگ نادرێت و كاته‌كانی دیاریكراون.
*لا56نووسیویه‌تی:_(كاغه‌زی ناسك!).
*لا101نووسیویه‌تی:_( ئه‌دی خوا بۆ نێر و مێی دروستكردووه‌، بۆ ئه‌وه‌ نییه‌ جووت بن و وه‌چه‌ بنێنه‌وه‌؟) به‌ڕاستی كاره‌ساته‌ ئه‌مه‌ بیر كردنه‌وه‌ی نووسه‌ری رۆمان بێت!.ئه‌م تێڕوانینه‌، چ جیاوازییه‌كی هه‌یه‌ له‌گه‌ڵ تێڕوانینی ره‌شۆكی و میللی؟ ئه‌گه‌ر په‌یوه‌ندی نێرو مێ هه‌ر بۆ وه‌چه‌ خستنه‌وه‌ بێت، ئاخۆ هیچ جیاوازییه‌ك ده‌مێنێته‌وه‌ له‌ نێوان مرۆڤ و ئاژه‌ڵ؟!. سه‌یر له‌وه‌ دایه‌ له‌لاپه‌ڕه‌ 111ی رۆمانه‌كه‌، نووسه‌ر دژی ئه‌و بۆچوونه‌ی خۆی ده‌وه‌ستێته‌وه‌.
*لا104نووسیویه‌تی:_(قه‌ره‌بۆی هه‌موو ئه‌و ته‌مه‌نه‌ ده‌كه‌مه‌وه‌ كه‌ نه‌مگوت باوكه‌). چونكه‌ ئه‌و رۆژه‌ی هه‌ژێن له‌ دایك ده‌بێت، هه‌مان رۆژیش شێرزاد بازگری باوكی شه‌هید ده‌بێت.
*لا108نووسیویه‌تی:_(هه‌ژێن ده‌یگوت ئه‌گه‌ر یه‌كێكم خۆشبووێت ده‌بێ له‌ باوكم بچێت). ئه‌م ده‌ربڕینه‌، گوزارشت له‌وه‌ ده‌كات كه‌ هه‌ژێن باوكی خۆی بینیبێت. نووسه‌ری رۆمانه‌كه‌ بێ ئه‌وه‌ی هه‌ستی پێ بكات، كه‌وتۆته‌ پارادۆكسی واتاوه‌.
*لا122نووسیویه‌تی:_(تۆپه‌ڵه‌ تیشكێكی سپی هێلكه‌یی). ئه‌م جۆره‌ ده‌ربڕینانه‌، نیشانه‌ی ئه‌وه‌ن كه‌ چۆن كه‌سانێك به‌ زمانێكی هه‌ژار له‌ ڕووی ده‌ربڕینه‌وه‌ رۆمان ده‌نووسن. ده‌نا تۆپه‌ڵه‌ تیشك چ مانایه‌كی تێدایه‌؟.
*لا124 نووسیویه‌تی:(نه‌ده‌بوو هه‌ژێن ره‌به‌ن بمێنێته‌وه‌). نووسه‌ری رۆمانه‌كه‌، لێره‌داجیاوازی له‌ نێوان دۆخی نێر و مێ نه‌كردووه‌. چونكه‌ ره‌به‌ن بۆ نێر به‌كار دێت، بۆ ڕه‌گه‌زی مێ قه‌یڕه‌ دروسته‌.
*لا133نووسیویه‌تی:_(باشترین شوێن بۆ هه‌ڵبژاردنی هاوسه‌ر زانكۆیه‌.). ئه‌وه‌ بۆیه‌ زانكۆكانمان بێ داهێنان و مه‌عریفه‌ن، چونكه‌ به‌ شوێنی خۆشه‌ویستی و كه‌پڵ و كه‌پڵداری ده‌زانین.
*لا 155نووسیویه‌تی:_( له‌ ناخه‌وه‌ وه‌ك مه‌نجه‌ڵی ساوار ده‌كوڵا). بۆچی ساواربێت؟
*لا156نووسیویه‌تی:_(له‌ نێو ده‌ریایه‌كی سپی خوێنین). جاكه‌ خوێنینه‌، چۆن سپییه‌؟!
وێرای ئه‌و سه‌رنجانه‌مان وه‌ك خوێنه‌رێكی رۆمان، هاوكات تێبینیمان له‌باره‌ی زمانی رۆمانه‌كه‌شه‌وه‌هه‌یه‌. چونكه‌ زمانی رۆمانه‌كه‌، زمانێكی وه‌سفی رووت، واقیعی و ساده‌یه‌، كه‌ هیچ جوانكاری و هونه‌رێكی تێدانییه‌. گه‌رچی نووسه‌ری رۆمانه‌كه‌ هه‌وڵیداوه‌ وه‌ك زمانی نووسینی رۆمان به‌رجه‌سته‌ی بكات، وه‌لێ به‌ بڕوای من تیایدا سه‌ركه‌وتوو نه‌بووه‌. دواجار ده‌ڵێم، مه‌رج نییه‌ ئه‌وه‌ی له‌ نووسینی چیڕۆكدا سه‌ركه‌وتووبوو، له‌ نووسینی رۆمانیشدا سه‌ركه‌وتوو بێت.چونكه‌ رۆمان و چیرۆك، راسته‌ له‌ چه‌ندین توخم وه‌ك یه‌ك و هاوبه‌شن، وه‌لێ دوو ژانری ئه‌ده‌بی ته‌واو له‌ یه‌كتری جیاوازن. به‌شێك له‌ چیرۆكنووسه‌كانی ئێمه‌، رۆمان وه‌ك چیرۆك ده‌بینن بۆیه‌ ده‌كه‌ونه‌ هه‌ڵه‌وه‌. چونكه‌ نووسینی رۆمان باكگراوه‌ندێكی گه‌وره‌ی رۆشنبیری و مه‌عریفی ده‌وێت. بۆ ئه‌وه‌ی كه‌ باسی رووداوێكمان كرد نه‌كه‌وینه‌ هه‌ڵه‌وه‌!!

*په‌راوێز:_من تامه‌زرۆی خۆشه‌ویستیم/ رۆمان/ نووسینی ئاسۆحه‌سه‌ن/ساڵی چاپ 2019..

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*