سەرەکی » هەواڵ » مێژوویەکی بەبڕشت،کەسایەتییەک لە تاریکیدا دەدرەوشایەوە

پڕۆفیسۆر د. عیزەدین مستەفا رەسوڵ

مێژوویەکی بەبڕشت،کەسایەتییەک لە تاریکیدا دەدرەوشایەوە

رۆژى 15/11/2019 لەهۆڵی هۆتێل گراند میلینۆم لە سلێمانی، مەراسیمێكی شایستە بۆ چلەی كۆچى دوایى (پڕۆفیسۆر د. عیزەدین مستەفا رەسوڵ) بەڕێوەچوو، كە تیایدا ژمارەیەكی به‌رچاو له‌ بەرپرسانی حزبی و حکومی و ئەدیب و رۆشنبیر و هاوڕێیان و خانەوادەی کۆچکردوو ئامادەیبوون.
لەمەراسیمەکەدا مەلا بەختیار، سیاسەتمەدارو رۆشنگەر وتەیەکی پێشکەشکرد، لەبەشێکی وتەکەیدا وتی: ئاسان نییە لە یادی قەڵەمێکی زۆر گەورە، مێژوویەکی بەبڕشت، کەسایەتییەک کە لەتاریکیدا دەدرەوشا، لەهیچ قۆناغێک کۆڵی نەدا، هیچ بوارێک نەما پەی پێ نەبا، هیچ توانایەک لە کەسایەتی و مێژوویدا وەکو پاشکۆیەک نەمایەوە پێشکەش بەکورد و کوردستان و رێبازی چەپی نەکات. ئاسان نییە ئەم مروارییانە لە دەریای خەبات و کۆڵنەدان و کۆشش و هزر و رۆشنگەری و رووناکبیری و رەخنەی دکتۆر عیزەدین، یەکێکی وەکو من بتوانێ دەنکەکانی دەربهێنێت و پێشکەش بکەم.
هەر لەمەراسیمەکەدا حاکم قادر حەمەجان پەیامی مەکتەبی سیاسی یەکێتی نیشتمانی کوردستانی پێشکەشی ئامادەبووان کردو لەبەشێکی پەیامەکەدا وتی: كۆچكردوو د. عیزەدین، گەرچی لەنەوەی بنەماڵەیەكی نیشتمانپەروەرو خاك دۆست بوو، بەڵام خودی خۆی بەتەنیا كەسایەتیییەكی بڵند بوو، لەپاڵ زانایی و داناییەكەیدا هەستی نەتەوەیی و نیشتمانپەروەری هەر لەسەرەتای لاوێتییەوە لەناخیدا چەسپی و چەكەرەی كردبوو، تا لەژیاندابوو بەرلەوەی مەرگ یەخەی پێبگرێت بەدەر لەجیاوازی بیروڕای سیاسی، بەردەوام و دانەبڕاوبوو لەبەشداریكردنی چالاكییە سیاسییەكان و لەیەكەم خولی پەرلەمانی كوردستاندا لەسەر لیستی یەكێتی نیشتمانی كوردستان ئەندام پەرلەمان بوو. ئەمەجگە لەوەی بەفكرو ئایدۆلۆژیاو بیركردنەوەی مۆدێرنانە لەیەككاتدا سیاسی و ئەدیب و نووسەرو ڕۆژنامەنووس و زمان ناس و مێژوو نووس بوو.
هەروەها لەمەراسیمەکەدا فاروق مەلا مستەفا، وتاری بنەماڵەی خوێندەوەو وتی: بەشداریكردنتان نموونەی وەفادارییە بۆ پیاوێك كە هەموو تەمەنی بۆ خزمەتی گەل و نیشتمان تەرخانكردووە. فاروق مەلا مستەفا لەدرێژەی پەیامەكەیدا ئاماژەى بەوەدا کە ئەوان وەک بنەماڵە بەرامبەر مێژووە جوانەكەی د. عیزەدین بەوەفا دەبن و بەرهەمە مەزنەكانی دەپارێزن و وادەكەن کە مێژووی پڕ سەربەرزی لەهەموو بوارەكاندا لەبەردەستی خوێندەواراندا بێت. هەر لەمەراسیمەکەدا چەندین وتاری تر و فیلمێکی دۆکیۆمێنتەری پێشکەشکران کە سەرجەمیان باسیان لەژیانی پڕ سەروەری (پڕۆفیسۆر د. عیزەدین مستەفا رەسوڵ) دەکرد.
پڕۆفیسۆر دكتۆر عیزەدین مستەفا رەسوڵ ساڵی 1934 لە سلێمانی لەدایكبووەو ساڵی 1948 بۆ‌تە ئەندامی حیزبی شیوعی عیراق، ساڵی 1959 خانەی مامۆستایانی تەواوكردووەو ساڵی 1963 یەكەم بڕوانامه‌ى دكتۆرای لەشاری باكۆ وەرگرتووە. دكتۆر عیزەدین زیاتر لە 90 كتێبی بڵاوكردۆتەوەو سەرپەرشتی نامەی ماستەرو دكتۆرای چەندین ئەكادیمی كردووە، سەرلەبەیانی رۆژی 3/10/2019 لە سلێمانی كۆچی دواییكرد.

print

 101 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*