سەرەکی » وتار » لەتیف فاتیح فەرەج‌ » دەربارەی تۆمەت

خورجە

دەربارەی تۆمەت

1
گۆرانی گەورە شاعیری كورد لە بارو دۆخێكی ناخۆش و پڕ لە تۆمەت بەخشینەوەدا كەبەرانبەری دەكرێت دەڵێت :
ئەی تریفەی مانگەی شەوی دەركی دەلاقە
با پیس نەبی خۆت مەدە لەم كوردی عیراقە
هیچ نەتەوەو گەلێك هێندەی كورد تۆمەت و بوختان نابەخشێتەوە، كەسیش هێندەی كورد بۆ هاو خوێنەكەی لە بۆسەدا نیە تا وەكو مار پێوەی بدات، دەفەرموو رەخنەیەك بگرە و بڵێ‌ نابێت ئەم جیاوازیە هەبێت، بزانە چۆن هەرچی نەشیاوە بۆتی دروست دەكەن، ئێمە باسی دادگەری و وەك یەكی دەكەین، ئەمە كەی پەیوەندی بەوەوەهەیە تۆ بێی تیری پوچی كەوانەكەت بەو جۆرە بهاوی، بێئەوەی بە پوختەیی پێمان بڵێیت چۆن دەكرێت برینەكان ساڕێژ بكەین .
ناكرێت هەموومان وەكو یەك بیر بكەینەوە، ئەوەی لای تۆ زەریفە مەرج نیە لای یەكی دیكەش وا بێت، لە خەڵك گەڕێن با قسەی دڵی خۆیان بكەن، لە خت و خۆڕا پەلامار مەدەن.
2
باشە بێكەسی شاعیر لە خۆڕا نیە دەڵێت:
كورد ئەبەد ناگا بە مەقسەد نۆكەری بێگانەیە
دوودڵن پیسن لە گەڵ یەك بۆیە وا بێلانەیە
كەسێك بە دڵ و بە داو پەنجەرەكان پاكدەكاتەوە بۆ ئەوەی روناكیەكە باشتر بێتە ژوورەوە، كە سێكی تر كە خەریكی پیسكردنی باخچەكەیە دەیكاتە هەڵاو دەڵێت ئەوە فڵانی پەنجەرەكە پیس دەكات، مێژوومان لیپە لە دروستكردنی تۆمەت بۆ یەكتر، ئەوانەی بە قولە پێی گۆران و رەفیق چالاكدا نەگەیشتوون، پەلاماریان داون و هەوڵیان داوە بیانبێزێنن، بەڵام مێژوو پێچەوانەی ئەوە دەڵێت تۆمەت بەخشی و جوێندەرو بوختان چیەكان كەس لە كولەگەی تەڕا ناویان نابیسێ‌ و گۆران و رەفیق چالاك سەدان ساڵی تر هەن.
3
دەی نالی و مەولانا خالید و زۆری تر ناهەقیان بووە پشت بكەنە ئەم میللەتەو سەری خۆیان هەڵبگرن، ئاخر خەڵك هیچی بە دەستەوە نەبووە دژی نالی بیڵێت وتویانە «مەحبوبە خێل و قیچە « ئێستا مەحبوبە هەرچۆنێكە ئەوە كەی كێشەیە نالی ئەوی بەو جۆرە گەرەك، لەوەش ناخۆشتر ئەوەیە تۆ بە فڵان حزب دەڵێیت كاكە ئەو كارە بەو جۆرە نابێت، ئەو لە بری وەڵام دەنێرێت باشترین بوختان چی بۆ بێنن تا تۆڵەی ئەو ئامۆژگاریەت لێبكاتەوە .
كورد ئەوەندە خۆشن لە دەبلیو سیەكانیشدا خەریكی تۆمەت بەخشینەوەن و ناوی ئەم و ئەو بە خراپە دەنووسن، ئەم بابەتە هەقی ئەوەی هەیە ڤەكۆڵینی وردی لە سەر بكرێت.

 455 جار بینراوە