سەرەکی » چاوپێکه‌وتن » رزگار عەلی بۆ کوردستانی نوێ:كۆنفرانسی مەڵبەندەكان لە 17 مەڵبەند بەڕێوەدەچێت..پەڕە 2

ئەمڕۆ كۆنفرانسی مەڵبەندەكانە

رزگار عەلی بۆ کوردستانی نوێ:كۆنفرانسی مەڵبەندەكان لە 17 مەڵبەند بەڕێوەدەچێت..

رزگار عەلی بۆ کوردستانی نوێ:كۆنفرانسی مەڵبەندەكان لە 17 مەڵبەند بەڕێوەدەچێت،كە 4886 هەڤاڵ بەشدارن و لەو رێژەیەش 1726 هەڤاڵ كاندیدن

ئامادەكارییەكان بۆ بەستنی چوارەمین كۆنگرەی یەكێتیی نیشتمانیی كوردستان بەردەوامن و ئەمڕۆ 9/12/2019 كۆنفرانسی مەڵبەندەكان لە 17 مەڵبەند بەڕێوەدەچێت. رزگار عەلی سەرۆكی لیژنەی باڵای هەڵبژاردنەكانی چوارەمین كۆنگرە بە كوردستانی نوێ-ی راگەیاند: هەموو یەكێتییەكان پەرۆشی بەستنی كۆنگرەیەكی سەركەوتوون.

دیداری، هەڵکەوت زەنگەنە

لەچوارچێوەی ئامادەكارییەكاندا بۆ بەستنی چوارەمین كۆنگرە، رۆژانی 16-18/11/2019 كۆنفرانسی كۆمیتەكان لە سنووری سەرجەم مەڵبەندەكاندا بەسەركەوتوویی بەڕێوەچوو، رۆژی 21/11/2019ش كۆنفرانسی مەكتەبەكان دەستیپێكرد و بەسەركەوتوویی بەڕێوەچوو، رۆژی 5/12/2019ش ئەنجومەنی سەركردایەتیی یەكێتیی نیشتمانیی كوردستان كۆبۆوە و بڕیاریدا رۆژی 9/12/2019 كۆنفرانسی مەڵبەندەكان، هەروەها رۆژی 21/12/2019 چوارەمین كۆنگرە بەڕێوەبچێت.

كۆنفرانسی مەڵبەندەكان لەلایەن 17 لیژنە و 165 هەڤاڵ، سەرپەرشتی دەكرێت
لەبارەی ئامادەكارییەكانی بەستنی چوارەمین كۆنگرەوە، رزگار عەلی ئەندامی مەكتەبی سیاسی و لێپرسراوی دەزگای هەڵبژاردن و سەرۆكی لیژنەی باڵای هەڵبژاردنەكانی چوارەمین كۆنگرە، لە دیدارێکدا لەگەڵ كوردستانی نوێ، رایگەیاند: بە هەوڵی هەموو لایەك و بە یەكڕیزیی ناو یەكێتی، ئامادەكارییەكان بۆ بەستنی چوارەمین كۆنگرە بەردەوامە، وتیشی: هەموو یەكێتییەكان پەرۆشی بەستنی كۆنگرەیەكی سەركەوتوون، لەپێناوی بەهێزبوونەوە و نوێبوونەوەی یەكێتیدا، راشیگەیاند: ئەمڕۆ كۆنفرانسی مەڵبەندەكان لە 17 مەڵبەند بەڕێوەدەچێت و پرۆسەكەش لە سەعات 8ی بەیانییەوە دەستپێدەكات، كە تێیدا 4886 هەڤاڵ بەشدارن و لەو رێژەیەش 1726 هەڤاڵ كاندیدن بۆ ئەوەی لە كۆنفرانسی مەڵبەندەكانەوە سەربكەون بۆ ئەندامی كۆنگرە، بۆ هەر مەڵبەندێكیش رێژەیەك بۆ كۆنگرە دیاریكراوە، لە هەموو ئەو رێژانەشدا نابێت رێژەی ژنان 20 % كەمتر بێت.
رزگار عەلی، وتیشی: كۆنفرانسی ئەمڕۆی مەڵبەندەكان لەلایەن 17 لیژنەوە سەرپەرشتی دەكرێن، كە ژمارەی سەرۆك و ئەندامانی لیژنەكان لە 165 هەڤاڵ پێكهاتوون و بریتین لە هەڤاڵانی ئەنجومەنی ناوەند و ئەندامانی مەكتەبەكانی ی.ن.ك، كە شارەزایی تەواویان هەیە لە پرۆسەكەدا، ئاماژەی بەوەشدا «پرۆسەكە بەوپەڕی شەفافییەتەوە بە تەكنیكی نوێ بەڕێوەدەچێت و بۆ ئەو مەبەستە هەموو پێداویستییەكان ئامادەكراون و رێنمایی پێویستیش ئاراستەی مەڵبەندەكان كراوە».

كۆنفرانسی كۆمیتە و مەكتەبەكان بەسەركەوتوویی بەڕێوەچوون
سەرۆكی لیژنەی باڵای هەڵبژاردنەكانی چوارەمین كۆنگرە لە درێژەی دیدارەكەیدا لەگەڵ كوردستانی نوێ، ئەوەشی خستەڕوو كە «كۆنفرانسی كۆمیتەكان لە 207 كۆمیتە، كۆنفرانسی مەكتەبەكان لە 12 مەكتەب بەسەركەوتوویی بەڕێوەچوون»، وتیشی: خۆشبەختانە هەموو كۆمیتە و مەكتەبەكان بەوپەڕی دڵسۆزیی و تەباییەوە، بە جۆش و خرۆشەوە بەشداریی كۆنفرانسەكانیان كرد، باسی لەوەشكرد «رێژەی بەشداربوون لە كۆنفرانسی كۆمیتەكاندا زیاتر 95 % بووە»، راشیگەیاند: كۆی گشتی ئەوانەی لە كۆنفرانسی كۆمیتەكاندا بەشدارییان كردووە 19674 هەڤاڵ بووە، لەو رێژەیەش 3569 هەڤاڵ كاندید بوون و 1773 هەڤاڵ وەك نوێنەری كۆمیتەكان هەڵبژێردران بۆ ئەندامی كۆنفرانسی مەڵبەندەكان. وتیشی: لە بەڕێوەچوونی كۆنفرانسی كۆمیتە و مەكتەبەكاندا تەنها 7 سكاڵا روبەڕومان كراوەتەوە و ئەو سكاڵایانەش یەكلاكراونەتەوە.

print

 247 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*