سەرەکی » کەلتوور » له‌ شامه‌وه‌ بۆ ئیمرالیی ئۆج ئالان

ته‌رازووی كورد

له‌ شامه‌وه‌ بۆ ئیمرالیی ئۆج ئالان

وه‌رگێرانی له‌ توركیه‌وه‌: شنۆ هیرانی

ن: موراد یه‌تكین

بەشی سیانزەهەم

هه‌وڵێكی شكستخواردوو بۆ كوشتنی ئۆج ئالان
ئه‌نقه‌ره‌ زیاتر له‌جارێك پلانی كوشتنی ئۆج ئالا-ی ڕابه‌ری په‌كه‌كه‌ی له‌ شامی پایته‌ختی سووریا داڕشت، یه‌كێ له‌م پلانانه‌، پلانێك بوو به‌ئاگاداری سه‌رۆكایه‌تی ئه‌ركانی سوپا و به‌رێگای پسپۆرانی برواری ئیغتیالات له‌ناو یه‌كه‌ سه‌ربازیه‌كانی ناو سوپاو هێزه‌ تایبه‌تیه‌كان (كۆماندۆ) كاری له‌سه‌ر كرابوو.
له‌ڕاستیدا هێزه‌ چه‌كداره‌كانی توركیا پێشتر هه‌رگیز ده‌ستی له‌كرده‌وه‌ی له‌م شێوه‌یه‌ له‌ ده‌روه‌ی توركیا وه‌رنه‌دابوو.. به‌و هۆیه‌شه‌وه‌ بۆ ئه‌نجامدانی ئه‌ركێكی وه‌ها پێوستی به‌ فه‌رمانێكی نووسراوی ڕاسته‌وخۆ له‌لایه‌ن خودی سه‌رۆك وه‌زیرانه‌وه‌ هه‌بوو. كه‌چی تانسۆ چیله‌ر نه‌یده‌ویست واژۆ له‌سه‌ر فه‌رمانێك بكات كه‌پلانی پیاوكوژی له‌ده‌روه‌ی وڵاتی له‌خۆ ده‌گرت.
ده‌زگای هه‌واڵگری (میت) كه‌ به‌ یاسا به‌رپرس بوو له‌ ئه‌نجامدانی ئۆپراسیۆنه‌كانی ده‌ره‌وه‌ی وڵات هه‌ر له‌1994وه‌ له‌ بزاڤ دابوو و ئه‌زموونێكی ئه‌وتۆیان هه‌بوو له‌م كارانه‌. له‌گه‌ڵ ئه‌وه‌ش چیله‌ر نه‌یده‌ویست به‌رپرسیاریه‌تی ئه‌مكاره‌ بدات به‌ میت.
به‌پێی یاسایی ئه‌رك و ده‌سه‌ڵاته‌كانی پۆلیسیش، ئه‌نجامدانی كارێكی له‌م شێوه‌یه‌ رێگه‌ پێدراو نه‌بوو، به‌ڵام چیله‌ر زیاتر له‌گه‌ڵ ئه‌وه‌بوو ئه‌م كاره‌ به‌ پۆلیس بسپێردرێت. ئه‌و له‌گه‌ڵ ئه‌وه‌دابوو كه‌ ئه‌م ئۆپراسیۆنه‌ له‌لایه‌ن مه‌همه‌ت ئاغر به‌رێوه‌به‌ری گشتی ئاسایشی توركیا به‌رێوه‌ببرێ، به‌م شێوه‌یه‌ش له‌ ئه‌گه‌ری به‌ده‌ستهێنانی هه‌رسه‌ركه‌وتنێك، ئه‌م سه‌ركه‌وتنه‌ ده‌بوو به‌ ده‌ستكه‌وتێك بۆ پۆلیس و ده‌سه‌ڵاتی سیاسی. به‌مشێوه‌یه‌ش به‌رێگه‌ی سه‌رباز و هه‌واڵگری سه‌رۆك كۆمار ده‌میرال هیچ پشكێكی له‌م ده‌ستكه‌وته‌دا نابێ. چیله‌ر بۆ هه‌ڵبژاردنی 25-ی كانوونی یه‌كه‌می 1995 وه‌ك سیاسه‌تمه‌دارێكی له‌ناوبه‌ری ئۆج ئالان بچێته‌ ناو هه‌ڵبژاردنه‌كانه‌وه‌ و به‌هۆیه‌شه‌وه‌ زۆرترین ده‌نگ به‌ده‌ستبهێنێ. له‌كه‌والیسه‌كاندا باس له‌وه‌ ده‌كرا كه‌ ڕاوێژكار سۆزمان كۆكسال له‌كۆبوونه‌وه‌یه‌كی به‌رفراوانی ده‌زگای میتدا یه‌ك به‌ده‌نگی خۆی هاوریكردبوو»ئه‌بێ كه‌لله‌ی ئه‌وم بۆ بهێنن». ئه‌م ووته‌یه‌ی ڕاوێژكاری میت ته‌نانه‌ت دزه‌یكردبوو بۆناو رۆژنامه‌كانیش و بڵاوكرایه‌وه‌.

به‌ڵام كه‌سانێكیش هه‌بوو كه‌نیگه‌ران بوون له‌م مه‌به‌سته‌ی چیله‌ر
كه‌سایه‌تێكی وه‌كوو (یاڵجین كۆجوك) كه‌ئه‌وكاته‌ ڕه‌زامه‌ندانه‌ له‌هه‌نده‌ران ده‌ژیا، هه‌موو رۆژانی یه‌كشه‌مه‌یه‌ك له‌ پانێله‌كانی (مه‌د تیڤی)یه‌وه‌ كه‌له‌ به‌لجیكاوه‌ په‌خش ده‌كرا ده‌بوو به‌میوان. ناو به‌ناو ئۆج ئالانیش به‌رێگای ته‌له‌فۆنه‌وه‌ به‌شدار ده‌بوو له‌م جۆره‌ پانێلانه‌. ئه‌وكاته‌ په‌یامێك گه‌یشتووبوه‌ یاڵجین كوجوك، ده‌گووترا په‌یامه‌كه‌ له‌رێگای سایه‌تێكی نزیكی مه‌سعود یه‌ڵماز-ی سه‌رۆكی پارتی(ئاناپه‌) بوو، به‌ڵام تا ئێستاش ناوی ئه‌و كه‌سه‌ ئاشكرا نه‌كراوه‌. له‌په‌یامه‌كدا هاتووبوو كه‌ چیله‌ر ده‌یه‌وێت ئۆج ئالان بكوژێت. له‌وه‌ش زیاتر هه‌یه‌. كاتێك بۆ نووسینی ئه‌م كتێبه‌ سه‌ردانێكی یاڵجین كوجوكم كرد، بابه‌ته‌كه‌ی به‌مشێوه‌یه‌ بۆ باسكردم.
له‌ په‌یامه‌كه‌دا وه‌ها نووسرابوو»له‌سایه‌ی ئه‌م زانیاریه‌وه‌ ئۆج ئالان ژیانی پارێزراو ده‌بێ، به‌ڵام پێویسته‌ ئه‌و گه‌ره‌نتی ئه‌وه‌مان بۆبكات كه‌ پارتی(هه‌.ده‌.په‌) ناچێته‌ هه‌ڵبژرادنه‌كانی 25-ی كانوونی یه‌كه‌مه‌وه‌ و هه‌موو ده‌نگه‌كانیشی بۆ پارتی (ئا.نه‌.په‌) مسۆگه‌ر ده‌كات. من له‌گه‌ڵ ئاشتی دابووم، هیچ كێشه‌یه‌ك نه‌بوو له‌گه‌یاندنی ئه‌م په‌یامه‌، به‌ڵام منیش چاوه‌ڕوانی هه‌ندێگ گه‌ره‌نتی بووم، به‌شێكیش له‌مانه‌ جێه‌جێ كران».
بۆ نمونه‌ كۆركۆت ئۆزال كه‌چووبووه‌ پاڵ پارته‌كه‌ی مه‌سعود یه‌ڵماز، له‌ هه‌مان ئه‌وساته‌ وه‌خته‌ی من به‌شداربووم له‌ پرۆگرامێكی ته‌له‌فزیۆنی، ئه‌ویش له‌ ته‌له‌فزیۆنێكی تر به‌شداری پانێلێك ده‌كات و ده‌ڵێ:»ئه‌گه‌ر هاتینه‌ سه‌ر ده‌سه‌ڵات، من ده‌توانم بچم و چاوم به‌ ئاپۆ بكه‌وێت». ئه‌و لێدوانێكی به‌مشێوه‌ی دابوو. من ئه‌وكاته‌ قه‌ناعه‌تم به‌وه‌ هێنا كه‌ئه‌وكه‌سه‌ی هاتۆته‌ لای من، به‌ڕاستی له‌لای یه‌ڵمازه‌وه‌ هاتووه‌. من پێم وایه‌ نه‌ك ته‌نها یه‌ڵماز، له‌وانه‌بوو خودی ده‌میره‌ل-یش له‌ناو ئه‌م كاره‌دا هه‌بێت. ئه‌وان نه‌یانده‌ویست ئۆج ئالان له‌لایه‌ن چیله‌ره‌وه‌ ده‌ستگیر بكرێ یاخود بكوژرێ. ئه‌وان ده‌یانویست ئاپۆ بۆخۆیان بمێنێته‌وه‌.
یاڵجین كوجوك پێی گووتم: «من ڕاسپارده‌كه‌م ڕاسته‌وخۆ، یاخود به‌رێگای ته‌له‌فۆن به‌ ئۆج ئالان نه‌گه‌یاند». به‌ڵكو كاتێك له‌ گه‌ڵ پیاوه‌كانی ئه‌و له‌ پاریس قسه‌م كرد له‌م باره‌یه‌وه‌، خۆی له‌خۆیدا هه‌واڵه‌كه‌ی پێده‌گه‌یشت، …… پێشی گه‌یی……».
چیله‌ر نه‌ ئۆج ئالان-ی پێ كوژرا و نه‌هه‌ڵبژاردنه‌كانیشی به‌ده‌ست هێنا. له‌م نێوه‌نده‌دا پێشهاتێكی زۆر سه‌یر هاته‌ پێشه‌وه‌. ئۆرگه‌نه‌ڕاڵ دۆغان گوره‌یش كه‌ سه‌رده‌می ده‌سه‌ڵاتداری چیله‌ر سه‌رۆكی ده‌سته‌ی ئه‌ركانی سوپای توركیا بوو، مه‌همه‌ت ئاغر به‌رێوه‌به‌ری ئاسایشی گشتی و هه‌روه‌ها ئۆنلی ئه‌ركان-ی والی ناوچه‌كانی باری نا ئاساییان تێدا به‌رێوه‌ ده‌چوو له‌سه‌ر لیستی(ده‌. یه‌.په‌) وه‌ نه‌یانتوانی سه‌ركه‌وتن به‌ده‌ست بهێنن و ببنه‌ ئه‌ندامی په‌رله‌مان. بۆ ئه‌و سه‌رده‌مه‌ ئه‌مه‌ نمونه‌یه‌كی زۆر سه‌رنج ڕاكێش بوو به‌وه‌ی كه‌ تا چه‌ند پرسی ئاسایشی توركیا به‌سیاسی بووبوو.
ئه‌زمه‌ی ئه‌و كوالیسۆنه‌ شكستخوارد و كورت خایه‌نه‌ی نێوان (ده‌.یه‌.په‌)(جه‌.هه‌.په‌)(سه‌.هه‌.په‌) كه‌ به‌ هه‌ڵبژاردنی ده‌نیز بایكاڵ بۆ سه‌رۆكایه‌تیكردنی پارته‌كه‌ دووباره‌ ناوی جه‌.هه‌.په‌-ی وه‌رگرته‌وه‌) وایكرد له‌6-ی مارسدا كوالیسۆنێك نێوان (شا.نا.په‌)و (ده‌.یه‌,په‌) دروست بێ بۆ پێكهێنانی حكومه‌ت. ئه‌وكاته‌ چیله‌ر له‌ده‌روه‌ی كابینه‌كه‌ مایه‌وه‌ و یه‌ڵماز بوو به‌ سه‌رۆك وه‌زیران.
یه‌شیل… «ئه‌گه‌ر بمانكردایه‌ ئاپۆ مردبوو»
یه‌ڵماز كێشه‌یه‌كی ئه‌وتۆی له‌گه‌ڵ میتدا نه‌بوو. هه‌موو ده‌سه‌ڵاتێكی پێویستی دابوو به‌ راوێژكار كۆكسال، سه‌رپه‌رشتیكردنی ئۆپراسیۆنه‌كه‌ی دایه‌ ده‌ستی سه‌رۆكی فه‌رمانگه‌ی (كۆنترا- تیرۆر) كه‌ ئه‌وكاته‌ مه‌همه‌ت ئایمور سه‌رۆكایه‌تی ده‌كرد. به‌شی هۆبه‌ی كاروباری (كوردان) و هۆبه‌ی هواڵگریش به‌شێوه‌یه‌كی سروشتی هاوكاربوون له‌گه‌ڵی.
له‌ڕاستیدا پلانی تیرۆركردنه‌كه‌ زۆر ساده‌بوو، پلانه‌كه‌ ئه‌وه‌بوو ئۆتۆمبیلێكی بۆمبڕێژ كراو له‌ناو ئه‌و باخچه‌یه‌ی به‌رده‌م بینای ماڵه‌كه‌ی ئۆج ئالان دابنرێت و به‌ ته‌قاندنه‌وه‌ی ئۆتۆمۆبێله‌كه‌ ئۆج ئالان و بیناكه‌ له‌گه‌ڵ زه‌ویدا ببن به‌یه‌ك. میت تیمه‌ێكی پشكنینی به‌نهێنی بۆ سوریا دزه‌ پێكردن بۆ ئه‌وه‌ی كار له‌سه‌ر ده‌ستنیشانكردنی ئه‌و شوێنانه‌ بكه‌ن كه‌ ئۆج ئالان بۆی ده‌چوون. ده‌رئه‌نجام ئه‌وه‌یان ده‌ستكه‌وتبوو كه‌ ئۆج ئالان له‌نێوان شوقه‌یه‌كی له‌ناو بینایه‌كی ده‌ نهۆمی له‌شار و ڤێلایه‌كی له‌گه‌ره‌كی به‌ساتین له‌ ناوه‌ڕاستی شام و هه‌روه‌ها له‌ ده‌ره‌وه‌ی شامیش له‌ناوچه‌یه‌كی سه‌ر به‌ شه‌بها دێت و ده‌چێ و هه‌ر ماوه‌یه‌ك له‌ یه‌كێ له‌م شوێنانه‌ ده‌مێنێته‌وه‌. هه‌موو په‌یوه‌ندیه‌ ته‌له‌فۆنی و بێته‌ڵه‌كانی له‌گه‌ڵ ملیتانه‌كانی له‌توركیا و باكووری عێراق له‌خانووه‌كه‌ی ناو كێڵگه‌كه‌ی ده‌ره‌وه‌ی شامه‌وه‌ ئه‌نجام ده‌دات. واتا خانوه‌كه‌ی ناو كێڵگه‌كه‌ی وه‌ك ناوه‌ندێكی په‌یوه‌ندیكردن به‌كارده‌هێنا. خانووی ناو كێڵگه‌كه‌ ده‌كه‌وته‌ ناوه‌ندی سه‌نته‌ری شامه‌وه‌ به‌سه‌ر رێگای فرۆكه‌خانه‌ی نێوده‌وڵه‌تی شام و به‌دیواری به‌رز ده‌ورداربوو، له‌وێشه‌وه‌ به‌ چه‌ند سه‌د مه‌ترێك بینایی كه‌مپی ئه‌كادیمیایی (مه‌عسوم كۆركماز) هه‌بوو كه‌ به‌رده‌وام زیاتر له‌ 200 ملیتان تێدا په‌روه‌رده‌یان ئه‌بینی. (كه‌مپی مه‌عسوم كۆركوماز.. كه‌كه‌مپێك بوو بۆ مه‌شق و ڕاهێنانی سه‌ربازی و په‌روه‌رده‌ی سیاسی ئه‌ندامانی په‌كه‌كه‌، سه‌رتا له‌دۆڵی بیقاعی لوبنان بوو به‌فشاری توركیا داخراو گوازرایه‌وه‌ بۆ شام ….وه‌رگێر) تیمه‌كه‌ی میت به‌ووردی له‌هه‌موو رێداكانی هاتوچۆی بۆ ئه‌م شوێنانه‌و له‌ڕووی رێوشوێنی ئه‌منی و بوونی خه‌ڵكانی سڤیل و ته‌وقیته‌كانی هاتوچۆی ئۆج ئالان ئه‌نجامدا. میت تاقیبێكی ووردی بۆ هاتوچۆكانی كه‌مپی مه‌عسووم كۆركواز كردبوو، چونكه‌ هاتوچۆی بۆ شوێنه‌كانی تر به‌شێوه‌یه‌كی رێكوپێك نه‌بوو، واتا پابه‌ندی هیچ رۆتینێك نه‌بوو له‌م شوێنانه‌. ته‌نها خانوه‌كه‌ی كه‌ وه‌د ناوه‌ندێكی په‌یوه‌ندی كردن به‌كاری ده‌هێنا نه‌بێ، له‌وێ رۆژانه‌و بۆ چه‌ندین كاتژمێر ده‌مایه‌وه‌. له‌وێ به‌رێگه‌ی ته‌له‌فۆنی ئۆیدوه‌وه‌ بۆ چه‌ندین كاتژمێر له‌په‌یوه‌ندیدابوو له‌گه‌ڵ سه‌ركرده‌كانی په‌كه‌كه‌ له‌شاخ و ناوچه‌ جیاوازه‌كان. ئه‌و ته‌له‌فۆنه‌ ئۆیدویانه‌ی كه‌ هه‌م ئۆج ئالان و هه‌م فه‌رمانده‌كانی قه‌ندیل به‌كاریان ده‌هێنا له‌لایه‌ن ئه‌نقه‌ره‌وه‌ گوێی لێده‌گیرا. له‌چوارچێوه‌ی ڕاپۆرته‌كانی میت بڕیاردرا كرداری كوشتنه‌كه‌ له‌و كاتژمێرانه‌ ئه‌نچامبدرێت كاتێك ئۆج ئالان بۆ ئه‌نجامدانی په‌یوه‌ندیه‌ ته‌له‌فۆنیه‌كانی هاتووچۆی ئه‌م شوێنه‌ده‌كات.
پلانی ئۆپراسیۆنه‌كه‌ له‌15 مارسی 1996 به‌مه‌به‌ستی په‌سه‌ندكردن ڕه‌وانه‌ی به‌رده‌م ده‌میرال-ی سه‌رۆك كۆمار و تانسۆ چیله‌ری سه‌رۆك وه‌زیران سه‌رۆكی ئه‌ركانی سوپا كه‌رادایی كرا.
كۆدی نهێنی ئۆپراسیۆنه‌كه‌ به‌ناوی (ئۆپراسیۆنی مارسیدس) هۆكاری ئه‌و ناوه‌ش ئه‌وه‌بوو كه‌سێكی به‌ڕه‌گه‌ز سووری له‌گه‌ڵ میت كاری ده‌كرد و هه‌ر له‌سه‌رتاوه‌ به‌شداربوو له‌هه‌موو كاره‌كانی میت بۆ ده‌ستنیشانكردنی شوێن پێی ئۆج ئالان و ئه‌و كه‌سه‌ش به‌ ئۆتۆمۆبیلێكی جۆری مارسیدس-ی مۆدێل كۆنی ڕه‌نگ ڕه‌ش هه‌ڵده‌ستان به‌كاره‌كانی له‌گه‌ڵ میت. بۆ ته‌قینه‌وه‌كه‌ش مینیی پاسێكی جۆری مازدا پڕ له‌ تێ ئێن تی و ماده‌ ته‌قه‌مه‌نیه‌كان ئاماده‌كرا، ئه‌وكاته‌ له‌سوریا ژماره‌یه‌كی زۆر له‌م جۆره‌ مینی پاسانه‌ بوونیان هه‌بوو به‌تایبه‌تی هه‌ڵبژاردنی مینیی پاسی مازدا بۆ ئه‌وه‌بوو كه‌ كرده‌وه‌كه‌ سه‌رنجی هیچ كه‌س به‌لای خۆیدا ڕانه‌كێشی. بۆ ئه‌م مه‌به‌سته‌ش دوو له‌و مینی پاسی سپی هاوشێوه‌ی یه‌كتری ئاماده‌كران. دانه‌یه‌كیان تابلۆ و ژماره‌ی سوری لێدرابوو به‌ڕێگه‌ی سنووره‌وه‌ ده‌ربازی ناو سوریا كرابوو. دوای ئه‌مه‌ ئه‌م مازدایه‌ له‌ ده‌روازه‌یه‌كی تر دووباره‌ گه‌ڕێنرایه‌وه‌ بۆ توركیا، به‌ڵام تابلۆكه‌ی لێكرایه‌وه‌ و دووباره‌ گه‌ڕێنرایه‌وه‌ بۆ سوریا و به‌هه‌مان ئه‌و مازدایه‌وه‌ كرایه‌وه‌ كه‌ پڕبوو له‌ تی ئێن تی و ته‌قه‌مه‌نی كه‌ بۆ ئه‌نجامدانی كرده‌وه‌ به‌كارده‌هات.
له‌ژێر كوشنه‌كانی مینی پاسه‌كه‌ 1تۆن له‌ماده‌ی ته‌قێنه‌ر له‌جۆری (سی 4) به‌شێوه‌یه‌كی زۆر مه‌حكه‌م ئاماده‌كرابوو. له‌م به‌شه‌ی ئۆپراسیۆنه‌كه‌ به‌تایبه‌تی كه‌سایه‌تێكی وه‌كو (كاشیفكۆزان ئۆغڵو) تێدا به‌شداربوو كه‌ لیوایه‌ و فه‌رمانده‌یه‌كی خانه‌نشینكراوی سه‌ربازی بوو و بۆماوه‌یه‌كی دورودرێژ فه‌رماندارییه‌تی هێزه‌ تایبه‌تیه‌كانی( كۆماندۆ)ی كردبوو و دوای خانه‌نشین بوونیشی چوو بو خزمه‌تكردن له‌ناو ده‌زگایی هه‌واڵگری میت.
ئه‌و تیمه‌ی كه‌ له‌سووریا ئۆپراسیۆنه‌كه‌یان جێبه‌جێ ده‌كرد پێكهاتبوون له‌ (مه‌تین ئاتاماج، هه‌روه‌ها ئه‌وكه‌سه‌ی به‌نازناوی (یه‌شیل) كه‌ناسنامه‌ی ساخته‌ی به‌كارده‌هێنا، هه‌روه‌ها ته‌تیكچی مه‌همه‌ت یه‌ڵدرم (ووشه‌ی ته‌تكچی له‌زمانی توركیدا به‌و كه‌سانه‌ ده‌گوتری كه‌ به‌پاره‌ خه‌ڵك ده‌كوژن و هیچ په‌یوه‌ندیه‌كیان به‌كاری تروه‌وه‌ نیه‌ ته‌نها ئه‌ركیان كوشتنی كه‌سی ده‌ست نیشانكراوه‌…… وه‌رگێر». پسپۆڕێكی میتیش كه‌ خه‌ڵكی هه‌تایی بوو و زمانی عه‌ره‌بی ده‌زانی. جێیی بایه‌خه‌ كه‌ كاری شوێن پێ هه‌ڵگرتنی ئۆج ئالان و ئاشكراكردنی شوێنه‌كه‌ی له‌لایه‌ن دوو كه‌سی به‌ڕه‌گه‌ز سوری و ئه‌ندامی ده‌زگایی هه‌واڵگری میتی توركیا بوون ئه‌نجامدرا. بێجگه‌ له‌مانه‌ سێ كه‌سیتر كه‌ ئه‌ندامی پارتی نه‌ته‌وه‌په‌رستی توركیابوون له‌به‌شه‌ مه‌ده‌نیه‌كه‌ی هێزه‌ تایبه‌تیه‌كانه‌وه‌ كاریان ده‌كرد، ئاسانكاریان بۆ دابینكردنی شوێنی مانه‌وه‌ و ده‌سته‌به‌ركردنی كه‌رسته‌و پێداویستیه‌كانی تیمی ئه‌نجامده‌ری ئۆپراسیۆنه‌كه‌ به‌بێ ئه‌وه‌ی فه‌رمانده‌یی هێزه‌ تایبه‌تیه‌كانی هه‌تایی له‌ وورده‌كاریه‌كان ئاگاداربكه‌نه‌وه‌ كاریان ده‌كرد، یه‌كێ له‌م سێ كه‌سه‌ په‌یوه‌ندی هه‌بوو له‌گه‌ڵ قاچاغچیه‌كانی ماده‌ هۆشبه‌ره‌كان، زۆر به‌ ئاسانی ده‌یتوانی كه‌ره‌سته‌ و پێداویستیه‌كان له‌ نێوان سوریاو لوبنان و یۆنان بگوازێته‌وه‌.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*