سەرەکی » مانشێت » بافڵ تاڵەبانی و لاهور شێخ جەنگی:لەسەر رێبازی سەرۆك مام جەلال،بەردەوام دەبین

یەكێتی دەكەینەوە بە یەكێتی-یەكەی جاران

بافڵ تاڵەبانی و لاهور شێخ جەنگی:لەسەر رێبازی سەرۆك مام جەلال،بەردەوام دەبین

لە كۆبوونەوەی دوێنێی ئەنجومەنی سەركردایەتیی یەكێتیی نیشتمانیی كوردستاندا، پەیڕەوی ناوخۆی یەكێتی پەسەندكرا و هەڤاڵان بافڵ تاڵەبانی و لاهور شێخ جەنگی بە هاوسەرۆكی یەكێتی هەڵبژێردران.
دوای هەڵبژاردنیان بە هاوسەرۆكی یەكێتی، بافڵ تاڵەبانی و لاهور شێخ جەنگی، سوپاسی تەواوی ئەندامان ‌و لایەنگرانی یەكێتیی نیشتمانیی كوردستانیان كرد و تەئكیدیان لەسەر ئەوە كردەوە «بەپێدانی ئەم متمانەیە بەرپرسیارێتییەكی قورس دەكەوێتە سەرشانمان«. بەڵێنیشیاندا لەسەر رێبازی سەرۆك مام جەلال، بەردەوام بن.

بەهیممەتی هەموو لایەك توانیمان كۆسپە قورسەكان پێكەوە تێپەڕێنین
سەرەتا، لاهور شێخ جەنگی هاوسەرۆكی یەكێتی، رایگەیاند: یەكێتیی دەیان هەزار رۆڵەی بەخشییە ئەم خاك‌و نیشتمانە بۆ ئەوەی میللەتەكەمان بگاتە ئەم رۆژەی كە ئێستا تێیدا دەژین، وتیشی: بەدڵنیاییەوە هەڵبژاردنمان شەرەفێكی گەورەیە و ئەركێكی قورسیشە لە هەمان كاتدا، شاندانەبەر ئەم بەرپرسیارێتییە گەورەیە لەكاتێكدایە كە یەكێتیی نیشتیمانی كوردستان و یەكێتییەكەی سەرۆك مام جەلال و شەهیدەكانمان، لە 10 ساڵی رابردوودا چەندین هەورازو نشێوو جیابوونەوەی بەخۆیەوە بینی، بەڵام بەهیممەتی ئێوەومانان و كادیرە دڵسۆزەكان و بەتایبەتی كەسوكاری سەربەرزی شەهیدان‌و پێشمەرگە قارەمانەكان‌و كەمئەندامانی سەنگەرو زیندانیانی سیاسی‌و هەموو هەواداران‌و دۆستانی یەكێتی، توانیمان ئەم كۆسپە قورسانە پێكەوە تێپەڕێنین‌و یەكێتی بگەیەنینە ئەمڕۆ.

خەڵك لەگەڵ یەكێتی ئاشتدەكەینەوە
لەدرێژەی قسەكانیدا، جەختیشیكردەوە كە ئەركە قورسەكەی ئێمە لەدوای كۆنگرەو لەئەمڕۆوە دەستپێدەكات، یەكێتیی نیشتمانیی كوردستان لەناو خەڵكەوە هەڵقوڵاوە، بەداخەوە من نامەوێت بچمە سەر هۆكاری ئەوەی كە بۆچی یەكێتیی نیشتمانیی كوردستان گەیشتە ئەوەی كە پاشەكشە بكات لەساڵانی رابردووداو لە جەماوەر دووربكەوێتەوە، بەڵام بەدڵنیاییەوە پێتان دەڵێم كە واجبـی ئێمە وەك هاوسەرۆك ئەوە دەبێت كە خەڵك لەگەڵ یەكێتیی نیشتمانیی كوردستان ئاشتبكەینەوە، دووبارە یەكێتیی نیشتمانیی كوردستان وەكو مام-ی كۆچكردوومان دەیفەرموو «بگەڕێتەوە بۆ خانووە قوڕەكان».

یەكێتی لە پێناوی خزمەتكردنی كۆمەڵانی خەڵكی كوردستاندا دامەزراوە
ئەوەشی وت: من بەڵێنتان پێدەدەم و دڵنیام هەڤاڵ بافڵ-یش بە هەمان شێوە، ئێمە سەربازێكی ونی ئەم حزبە دەبین بۆ لەمەودوا، شەو و رۆژ دەخەینەسەر یەك بۆ ئەوەی شەهیدەكانمان‌و دڵی كەسوكاری شەهیدەكانمان ئاسوودەبێت، ماڵ بەماڵ، دێ بەدێ، شار بەشار دەكەین ‌و كوچە بەكوچە دەگەڕێین بۆ ئەوەی یەكێتیی بخەینەوە سەر ئەو سكەیەی كە لەپێناویدا دامەزرا، ئەویش خزمەتكردنی كۆمەڵانی خەڵكی كوردستانە.
لەكۆتایی قسەكانیشیدا، لاهور شێخ جەنگی، وتی: ئەم بەرپرسیارێتییە گەورەیە وایلێكردووم كە نەتوانم زۆر قسە بكەم، بۆیە داوای لێبووردنتان لێدەكەم‌و دووبارە سوپاسی یەك بەیەكتان دەكەم، بەڵێن بێت لەجێگەی متمانەی ئێوەومانان و هەموو یەكێتییە دڵسۆزەكان دەبین‌و دووبارە سوپاس.

ئەم متمانەیەتان هیچ كاتێك لەدەست نادەین
پاشان، بافڵ تاڵەبانی هاوسەرۆكی یەكێتی، وتی: پێمخۆشە سوپاسی هەڤاڵان بكەم، ئینشائەڵڵا ئەم متمانەیەتان هیچ كاتێك لەدەست نادەین، شانبەشان ئەم حزبە یەكێتیی نیشتمانیی كوردستان هەڵدەستێنینەوە، ئینشائەڵڵا یەكێتییەكەمان دەكەینەوە بە یەكێتییەكەی مام جەلال.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*