سەرەکی » مانشێت » نوێبوونەوە دەستیپێكرد

نوێبوونەوە دەستیپێكرد

بافڵ تاڵەبانی: یەكێتییەكەمان دەكەینەوە بە یەكێتییەكەی مام جەلال

لاهور شێخ جەنگی: ئەركە قورسەكەی ئێمە لەدوای كۆنگرە و لەئەمڕۆوە دەستپێدەكات

لە كۆبوونەوەی دوێنێی ئەنجومەنی سەركردایەتیی یەكێتیی نیشتمانیی كوردستاندا، پەیڕەوی ناوخۆی یەكێتی پەسەندكرا و هەڤاڵان بافڵ تاڵەبانی و لاهور شێخ جەنگی بە هاوسەرۆكی یەكێتی هەڵبژێردران.
دوای هەڵبژاردنیان بە هاوسەرۆكی یەكێتی، بافڵ تاڵەبانی و لاهور شێخ جەنگی، سوپاسی تەواوی ئەندامان ‌و لایەنگرانی یەكێتیی نیشتمانیی كوردستانیان كرد و تەئكیدیان لەسەر ئەوە كردەوە «بەپێدانی ئەم متمانەیە بەرپرسیارێتییەكی قورس دەكەوێتە سەرشانمان«. بەڵێنیشیاندا لەسەر رێبازی سەرۆك مام جەلال، بەردەوام بن.
سەرەتا، لاهور شێخ جەنگی هاوسەرۆكی یەكێتی، رایگەیاند: ئەركە قورسەكەی ئێمە لەدوای كۆنگرە و لەئەمڕۆوە دەستپێدەكات، وتیشی: بەدڵنیاییەوە پێتان دەڵێم كە واجبـی ئێمە وەك هاوسەرۆك ئەوە دەبێت كە خەڵك لەگەڵ یەكێتیی نیشتمانیی كوردستان ئاشتبكەینەوە، دووبارە یەكێتیی نیشتمانیی كوردستان وەكو مام-ی كۆچكردوومان دەیفەرموو «بگەڕێتەوە بۆ خانووە قوڕەكان».
پاشان، بافڵ تاڵەبانی هاوسەرۆكی یەكێتی، رایگەیاند: پێمخۆشە سوپاسی هەڤاڵان بكەم، ئینشائەڵڵا ئەم متمانەیەتان هیچ كاتێك لەدەست نادەین، شانبەشان ئەم حزبە یەكێتیی نیشتمانیی كوردستان هەڵدەستێنینەوە، یەكێتییەكەمان دەكەینەوە بە یەكێتییەكەی مام جەلال.

ئەمڕۆ سەركردایەتی پرۆگرام تاوتوێ دەكات
هەردوێنێ مستەفا چاوڕەش سەرپەرشتیاری كۆبوونەوەكانی ئەنجومەنی سەركردایەتیی یەكێتیی نیشتمانیی كوردستان، رایگەیاند: سەعات 11ی پێشنیوەڕۆی ئەمڕۆ 19/2 ئەنجومەنی سەركردایەتی، بۆ تاوتوێكردنی پرۆگرامی یەكێتیی نیشتمانیی كوردستان، كۆدەبێتەوە.
هەروەها رزگار عەلی ئەندامی ئەنجومەنی سەركردایەتیی یەكێتیی نیشتمانیی كوردستان لەكۆنگرەیەكی رۆژنامەنووسیدا، رایگەیاند: بەخۆشحاڵییەوە ئەنجومەنی سەركردایەتیی یەكێتیی نیشتمانیی كوردستان پەیڕەوی ناوخۆی پەسەندكرد، كە لە (77) مادە پێكهاتووە، وتیشی: هەمیشە بە گیانێكی هەڤاڵانە و لەپێناوی پاراستنی یەكێتیی ناو یەكێتی، كاردەكەین.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*