سەرەکی » وتار » هێمن کەریم » باوكێك چی بە یەكێتییەكان دەڵێت؟

لەناو رووداوەکاندا

باوكێك چی بە یەكێتییەكان دەڵێت؟

باوكێك كە چەكی خەباتی لەرێگەی یەكێتیبوونییەوە دەكاتە شان و تەمەنی گەنجیی خۆی بۆ نیشتمانەكەی خەڵاتكردبێت، كاتێك دەبینێت لەژێر سایەی دەسەڵاتی كوردیدا پڕبەدونیا هاواردەكات، جا بەهەر تێڕوانینێكی سیاسی بدوێت یان نا، گرنگ ئەوەیە ئەو باوكە دەڵێت: من لوقمانم پێشمەرگەی دێرینی یەكێتیم، كەسانێكی دەسەڵاتدار لەژێر سایەی ئەو دەسەڵاتە كوردییەدا ژیانی منداڵەكەمیان وێران كردووەو ئێستاش دەیانەوێت بمكوژن»، ئیدی هەرچی جوانی ئەو دەسەڵاتە و حزبەی كە هەیە لەبەرچاوت دەكەوێت و ئەركێكی ئەخلاقیت دەكەوێتە سەرشان كە ناكرێت و ناگونجێت چاوپۆشیی لە ئامانجی شۆڕش و بەهاو هێڵە گشتییەكانی بكەیت، چونكە راستەوخۆ وەزیفەی (فریادڕەس) بەر یەكێتی دەكەوێت كە پێویستە بگاتە هانای.
لەپاڵ ئەوەشدا لوقمان پێمان دەڵێت: هەرێمی كوردستان بەهۆی ئەو نەزعە سیاسییەوە كە هەیە، تووشی داڕوخانێكی سیاسی و ئیداریی بۆتەوە و فەزایەك لە ئینتیمای سیاسی دروستكراوە كە هەرچی ئینتیمای نیشتمانییە خواردویەتی. دۆخێكی سیاسی دروستكراوە، پیاوانی سیاسیی كردۆتە پیرۆز و هەرچی نەوەیەك كە بەشداریی شۆڕشی نەكردبێت مافی تانە و ژیانی پێ رەوا نابینرێت.
دۆخێك دروستبووە دووكەس لەنزیك ئەم یان ئەو سیاسییەوە هەرچی بیانەوێت دەیكەن و لەبەرامبەریشدا زۆرجار یاسا و دادگاكان بێدەنگن سەبارەت بە مافی گشتی هەتا (چزە) لە بڕبڕەی پشتت هەڵنەستێت، هیچ دامەزراوەیەكی دەوڵەت دەنگ و ناڵەت نابیستێت.
ئەم رووداوە پێمان دەڵێت: «تاكی كوردی نغرۆی نائومێدییەكانی بووە، ژیانی بەچەشنێك لێڵ بووە، نازانێت دەست بۆ كام ئومێدە بەرێت! فەزای گشتی دەنگوباسی لە چەشنێك دەگەڕێ و چارەسەریش لەدۆڵێكی تر كاردەكات»، ناكرێت لەبەرئەوەی دەستدرێژیكار كوڕی بەرپرسە باڵاكان بێت ئیتر چۆنی بوێت بەو جۆرە بژی.
دۆخی ئێستای ژیانی هاووڵاتیانی ئەم هەرێمە، تاقەت پڕوكێنە. لەهەر چركەساتێكدا ئەگەری پیشاندانی وێنەیەكی دڵتەزێن لەئارادایە، لەم نێوەندەشدا كەسایەتییە سیاسییەكان پێویستیان بە دۆزینەوەی خۆیان هەیە، چونكە زۆرێكیان ئێستا بەپێی پێویست خۆیان لەبیر چۆتەوە، هەندێكیان بەگوێرەی كارو پیشەیان دەبێت كەسانی شارەزا و بەتوانا لە چواردەوریان بێت نەك وەك ئەوەی دەیبینین تەنها خزم و ئەو گروپانەی كە بەئاگانین لە دۆخی دڵتەنگیی كۆمەڵگە.
لەم سەردەمی لێڵی و لیخنییەدا كەسانێك هەن كە لەپاڵ سیاسەتدا فێری زۆرشت كراون، فێربوون چۆن پرنسیپە مەعنەوی و فیكرییەكان تێكبشكێنن و بابەتە جەوهەرییەكان وەلابنێن و لەتەك ئەم شكاندنەشدا خەریكی دروستكردنی پاڵەوانی بێ داستانن، بەڕاستی فێری زۆر شت كراون، فێری ئەوەبوون كە چۆن لەپێناو خۆیاندا هەموو جوانییەكانی كەسانیتریش ناشرین بكەن، فێری ئەوەبوون لەم سەردەمەدا نەژین.
بەراستی سیاسەتكاری ئێستاو نەوەی سەردەمی خۆیان نین! تەنها كۆمەڵێك ماونەتەوە كە ئێستا دەرفەتە و دەتوانن بڵین «بەڵی ئێمە كوڕی رۆژگاری خۆمانین و كوڕی رۆژگاری نائومێدیی نین، لەهەر جێگەیەك بێت هیوایەك نیشان دەدەین بۆ لێدانی ناشرینییەكان».
من هەرگیز لەگەڵ هەڵچوونی نالۆژیكی نیم، بەڵام گرنگە بۆ دەسەڵاتی سیاسی كە ئەوە بزانێت كاتێك دەست بۆ هاووڵاتییەك دەبرێت، دەبێت تێبگات كە دەست بۆ سەروەرییەك براوە، خاوەن تاوان دەبێت بزانێت كە ژیریی لەوەدایە كە ئەم نەوەیە بناسین و تێیبگەن! ئەگەرنا بۆ تا ئەوپەڕی هەوڵی رازیبوون هەر ناڕازییە؟
ژیریی لەوەدایە كە تێبگەین بۆ دەبێت هەمیشە وەك قوربانی سەیری خۆیان دەكەن؟
بەكورتی كارەساتی لوقمانی باوك پێمان دەڵێت: هێزێك نەتوانێت هێزو شوناس و جەوهەرو ستراتیژی خۆی و كۆمەڵگە بپارێزێت و هەیبێت، ئەوا ناشتوانێت سەردەمی خۆی دەستكاریی بكات! حزبێك لەبەر كەسەكانی تاوانێك لە دەسەڵاتی دادوەریی بشارێتەوە، ئەوا ناتوانێت خەون ببینێت و دەبێت چاوەڕێی خەونی هەتیوویی كەسانی تر بكات! بەرگریی لە شعوری كۆمەڵگە و خەونی بوون بە هێزێكی پاك و بێگەردە، كاری نەوەیەك و كەسانێكە كە سەرەتا خۆیان لە ئامێربوون داماڵن و بزانن ئەم سەردەمە هی خۆیانە، لانیكەم تا پیشانی تاوانبارانی بدات و تێبگات كە ئەم سەردەمە، سەردەمی روونكردنەوەی ئاوەكەیە، نەك خۆهاویشتنە ناو گۆماوە لیخنەكە و دەبێت ئەوەی نیشان بدات كە ئەم نەوەیە پێویستە لەدواوە نەبێت و شەڕێك بكات، لانیكەم لۆژیكێك لەپێناو دیمەنەی جوانی!
زۆر بەڕوونی روو دەكەمە یەكێتی و دەڵێم : «با هەموو شتێك جێ نەهێڵین بۆ رۆژگار تا ئەو حوكمی لەسەر بدات، هێشتا پێویستمان بە سەندنەوەی خەونەكانمانە، ئەو خەونەی كە ویستمان ئێمە بیبینین!
ئاسمانی ئەم وڵاتە هێندە نزم بۆتەوە كە هاووڵاتییەكانی هەرچۆن هەستن و بەرزببنەوە، سەریان بەری دەكەوێت، ژیان لەم هەرێمەدا بەهۆی ئەو دۆخە دروستكراوەوە كە ناونراوە ژیان، بەشی هیوای تێدا نەماوەتەوە، ئەگەر بڕیاربێت ئەم دۆخەش كورسییەكانی پەرلەمان دیاری بكەن كە كێ یەكەمە، ئەوا هەر ئەو لایەنەش بەڕێژەی یەكەم بەرپرسیارە لەم دۆخە.
بۆیە لایەنی خاوەن دەنگ ‌و كورسیی یەكەم نابێت لەئاست ئەم بەرپرسیارێتییەدا چاودابخات، یەكێتیش وەك هێزێك كە بۆ هەموو سەردەمێك لە مەشخەڵانەكەیدا دەڵێت (ئەمجارە)، دەبێت تێبگات كە لوقمانی باوك بە یەكێتی دەڵێت: ئەمجارە دواجارە و دەبێت دواجاربێت لەژێر حكومڕانییە هاوبەشەكەی ئەودا ناڵەو گریانی پێشمەرگە دێرینەكانی ببینێت، ئەگەرنا جارێكیتر مانای نابێت!

print

 7 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*