سەرەکی » وتار » ئازاد ئیبراهیم ‌ » یه‌كێتی و هێزی نه‌رم

لەناو روداوەکاندا

یه‌كێتی و هێزی نه‌رم

دوای‌ كۆنگره‌

به‌شی شه‌شه‌م

له‌دوای‌ دامه‌زراندنی یه‌كێتیی نیشتمانیی كوردستاتنه‌وه‌ له‌سه‌ر ده‌ستی سه‌رۆك مام جه‌لال و هه‌ڤاڵه‌كانی‌ وه‌ك هێزێكی نه‌ته‌وه‌یی و نیشتمانی‌، یه‌كێتی دوو هێڵی دیار و گرنگی كاركردنی له‌یه‌كتر جوودا كردۆته‌وه‌، له‌لایه‌ك خه‌باتی چه‌كداریی‌ و سه‌ربازی كه‌ زیاتر وه‌ك هێزی ڕه‌ق ناوده‌برێت، له‌لایه‌كی تریشه‌وه‌ هێزی نه‌رمی خۆی كه‌ هێزی دپلۆماسیی و لینكی په‌یوه‌ندییه‌كانی‌ بووه‌ له‌گه‌ڵ لایه‌ن و هێزه‌ ناوخۆیی و ده‌ره‌كییه‌كان.
سه‌رۆك مام جه‌لال ئه‌م شێوه‌ خه‌باته‌ی‌ له‌ مه‌قوله‌یه‌كدا كۆكرده‌وه‌ و یه‌ژێت «ئه‌وه‌ی‌ دۆستایه‌تیمان بكات تاسه‌ر به‌دۆستمان ده‌مێنینه‌وه‌، ئه‌وه‌یشی دوژمنایه‌تیمان بكات با سه‌ری‌ بدات له‌كێوه‌كانی‌ كوردستان». به‌ تێگه‌شتنێكی ساده‌ واته‌ یه‌كێتی هه‌م بڕوای‌ به‌هێزی دپلۆماسیی و ئاشتی هه‌یه‌، هه‌م بڕوایشی به‌ هێزی ره‌ق و به‌رپه‌رچدانه‌وه‌ش هه‌یه‌.
قۆناغی رابردووی‌ یه‌كێتی قۆناغێكی مێژوویی پڕ خه‌باتی مه‌ده‌نی و چه‌كدارییه‌ بۆ یه‌كێتی و ئه‌و مێژووه‌ تائه‌به‌د وه‌ك شانازیی ده‌مێنێته‌وه‌، ئه‌وه‌شی‌ ئێستا یه‌كێتی هه‌یه‌تی و شانازیی پێوه‌ ده‌كات ئه‌و لینكه‌ گه‌رم و گوڕه‌ سیاسی و دیپلۆماتی و نێوده‌وڵه‌تییه‌یه‌ كه‌ له‌ رابردوودا سه‌رۆك مام جه‌لال بناغه‌كه‌ی‌ داناوه‌.
خودی‌ مام جه‌لال و هه‌ڤاڵه‌كانی‌ له‌ رابردوویه‌كی دووری‌ تاریكه‌وه‌ یه‌كێتییان گه‌یانده‌ ئه‌و ئاسته‌ی‌ كه‌ له‌كاتێكدا یه‌كێتی سه‌ره‌تای‌ دامه‌زراندن و خه‌باتی ده‌ست پێكردووه‌ و به‌هێزه‌ ره‌قه‌كه‌ی‌ شه‌ڕی چه‌ندان هێز و وڵاتی‌ ناوچه‌یی ده‌كات، هاوكات له‌ڕێگه‌ی‌ لینكی سیاسی و دیپلۆماتیشه‌وه‌ په‌لی بۆ پنته‌ ئه‌منی و سیاسییه‌كانی‌ جیهان راده‌كێشا و ناوه‌نده‌كانی‌ بڕیار له‌جیهاندا ده‌رگایان بۆ سه‌رکرده‌كانی‌ یه‌كێتی ده‌كرده‌وه‌ و مامه‌ڵه‌ی هێزێكی مێژوویی و خاوه‌ن پێگه‌ی‌ سیاسیی گه‌وره‌یان بۆ یه‌كێتی ده‌كرد.
له‌دوای‌ چواره‌مین كۆنگره‌، قۆناغی یه‌كێتی قۆناغێكه‌ هه‌مووان خه‌ونمان ئه‌وه‌یه‌ كه‌ یه‌كێتی به‌ شێوه‌یه‌ك بێت له‌و سه‌ره‌تا گرنگ و پیرۆزه‌ بچێت كه‌ یه‌كێتی تێیدا هاته‌ئاراوه‌ و دڕی به ‌شه‌وه‌زه‌نگی كورد و خه‌باتی نه‌ته‌وه‌یی كورد دا.
هه‌موو دڵسۆزانی‌ یه‌كێتی ده‌خوازین وه‌ك چۆن ده‌ستپێكی دامه‌زراندنی‌ یه‌كێتی ده‌ستپێكی ده‌ركه‌وتنی كورده‌ له‌سه‌ر ئاستی ناوچه‌یی و جیهانی‌، ئه‌وا ده‌بێت كۆنگره‌ش هه‌مان هێز بكاته‌وه‌ به‌به‌ر یه‌كێتیدا بۆئه‌وه‌ی‌ له‌ رێگه‌ی‌ لینكه‌ ده‌وڵه‌مه‌ند و پڕ سه‌روه‌رییه‌كه‌ی و به‌هۆی سه‌رمه‌شقێكی كاریزمای‌ وه‌ك ره‌حمه‌تی‌ مام جه‌لال-ه‌وه‌ جارێكیتر په‌یوه‌ندییه‌كانی‌ به‌هۆی‌ هێزی نه‌رمه‌وه‌ له‌گه‌ڵ جیهاندا گرێبداته‌وه‌.
جۆزێف نای‌ نووسه‌ری‌ ئه‌مریكی له ‌كتێبه‌كه‌یدا «هێزی نه‌رم» باسی هێزی نه‌رم ده‌كات و ده‌ڵێت «هه‌موو هێزێكی نه‌رم له‌سه‌ر سێ پایه‌ی‌ گرنگ وه‌ستاوه‌، یه‌كه‌م فه‌رهه‌نگه‌كه‌ی‌، دووه‌م به‌ها سیاسییه‌كه‌ی‌ و سێیه‌م سیاسه‌تی‌ ده‌ره‌وه‌ی‌ خۆی. ئه‌م سێ بنه‌مایه‌ هه‌نوكه‌ له‌ هێزێكی گه‌وره‌ی‌ مێژوویی وه‌ك یه‌كێتیی نیشتمانیی‌ كوردستاندا كۆبووه‌ته‌وه‌ و به‌جۆرێك یه‌كێتی له‌م سێ بواره‌دا ده‌وڵه‌مه‌نده‌ كه‌ نه‌ك له‌سه‌ر ئاستی هه‌رێمی كوردستان، به‌ڵكو له‌سه‌ر ئاستی ناوچه‌كه‌ش هێزێكی سیاسی وه‌ك یه‌كێتیی نیشتمانیی كوردستان نییه‌ خاوه‌ن هه‌مان بنه‌ماكانی‌ هێزی نه‌رم بێت.
له‌دوای‌ كۆنگره‌ رۆحیه‌تێك و توانایه‌ك پێویسته‌ وه‌ك هه‌ر جومگه‌ و به‌شێكیتری‌ ئه‌م جه‌سته‌ گه‌وره‌ سیاسییه‌ی‌ یه‌كێتی، ده‌ست بداته‌ هێزی نه‌رمی یه‌كێتی و به‌ئاراسته‌ی‌ كرانه‌وه‌ی‌ زیاتر و زۆرتر بیباته‌ پێشه‌وه‌. هاوسه‌رۆكانی‌ یه‌كێتی به‌پێوه‌ری‌ پێگه‌ی‌ سیاسیی خۆیان و نزیكییان له‌ سه‌رۆك مام جه‌لال و دواتر وه‌ك پێگه‌شیان له‌سه‌ر ئاستی جیهانی‌، ده‌رفه‌تی ئه‌وه‌یان له‌پێشه‌ ره‌وڕه‌وه‌ی‌ ئه‌م مێژووه‌ ده‌وڵه‌مه‌نده‌ی‌ یه‌كێتی و هێزی نه‌رمی یه‌كێتی زیاتر به‌ره‌و پێشه‌وه‌ به‌رن و كه‌ناڵی باشتر و زیاتر له‌نێوان یه‌كێتی و هه‌ر لایه‌ن و وڵاتێكی تردا دروست بكه‌ن و ببێته‌ مایه‌ی‌ خێری یه‌كێتی و كورد و كوردستان.
ئه‌م مێژووه‌ ده‌وڵه‌مه‌نده‌ی‌ یه‌كێتیی له‌سه‌ره‌تای‌ دروستبوونی یه‌كێتییه‌وه‌ تاكو هه‌نوكه‌ به‌ناو تونێلی تاریك و دۆخی نه‌خوازراودا هاتووه‌، ده‌كرێت له‌وێستگه‌یه‌كدا تووشی داكشان و سستی بووبێته‌وه‌، به‌ڵام هه‌رگیز نه‌وه‌ستاوه‌ یان كۆتایی نه‌هاتووه‌.
ئێستاش ئه‌وه‌ی‌ له ‌سه‌ركردایه‌تی نوێی یه‌كێتی چاوه‌ڕوان ده‌كرێت دووباره‌ كاركردنه‌ له‌سه‌ر ئه‌و پاشخانه‌ ده‌وڵه‌مه‌نده‌ی‌ یه‌كێتی كه‌ هێزی
نه‌رمی یه‌كێتییه‌.

print

 181 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*