سەرەکی » وتار » لەتیف فاتیح فەرەج‌ » خەمەكانی راپەڕین

خورجە

خەمەكانی راپەڕین

1
لە گەڵ ئەوەشدا كە زۆرێك لە هاونیشتمانیانی كوردستان بە شانازیەوە دەڕواننە راپەڕین و هەمیشە بە شكۆوە یادی دەكەنەوە، ئەوەش لە بەر ئەوەی لە دوای كەوتنی كۆماری كوردستانەوە لە مهاباد ، یەكەم جار بوو كورد وەرچەرخانی گەورە بكات و بە پاڵپشتی دنیای دەرەوەو نەتەوەیەكگرتوەكان و ئەنجومەنی ئاسایش و دۆستەكانی لە دنیا ببێتە خاوەنی بەشێك لە باشوری كوردستان ، بەشێك كە سەرەڕای كێشەو گرفتەكان و گەندەڵی ، بەڵام تا ئێستا وەك دیفاكتۆ ماوەتەوەو رۆژ بە رۆژیش پێگەكەی پتەو تر دەبێت ، ئەمە ئەگەر لە خۆمانی نەشێوێنین و چاكسازی ریشەیی بكەین ، لە تەك ئەوەشدا خەڵكێكی زۆری تر هەن لە راپەڕین نائومێدو لەو رۆژگارە تورەو قەڵسن ، دیارە هۆیەكەش هەر ئەوەیە نەتوانرا دادگەری كۆمەڵایەتی و سیاسی دەستەبەر بێت و لە زۆربەی سێكتەرەكانی ئابوری و تەندروستی و پەروەردەیدا كەم و كوڕی زۆرو ناشرینی هەیە .
2
من ماوەیەكی كەم دوای راپەڕین شتێكم نووسی وەك شیعر تێیدا دەڵێم :
راپەڕینمان كرد پەح
راپەڕینمان كرد پف
راپەڕینمان كرد پەكوف
ئەمە نائومێدی زیاتر نیە ، دەكرا لە سایەی راپەڕیندا كوردستان ئێستا لە دۆخێكی تردا بوایەو ئەو ستەمی جوگرافیەش هەر بوونی نەبوایە كە ئێستا لەم بستۆكە خاكە هەیە ، بەرادەیەك ستەمەكە گەورەیە لە بری هاونیشتمانیانی كوردستان بیر لە زنجیرە بەندی كۆمەڵایەتی و پێكەوەیی بكەنەوە ، هەندێ‌ جار لێرەو لەوێ‌ گوێ‌ بیستی ئەوە دەبین كە ئەم شار ئەو شاری خۆش ناوێت ، یان چاوی بە گەشەو پێشكەوتنیدا هەڵنایەت ، بە بڕوای من بەرپرسیاری یەكەمی ئەم ناجۆرییە ، ئەو شێوازەخراپەی حوكمڕانیە كە هەرێمی كوردستان هەیەتی ، شێوازێك لە بری ئەوەی مرۆڤ دڵی پێخۆش بێت ناچارە رقی لێیی بێت .
3
بە درێژای دیرۆك شاعیرو نوسەرانی كورد شیعرو نووسینیان بۆ راپەڕین و لە خەوهەستان و لە سەر پێوەستانی نەتەوەكەیان چڕیووە ، ئەوەی كە پڕ بە گەروی هاواری كردووە :
دەمی راپەڕینە دەمی راپەڕین
هەتاكەی بەسستی وبە پەستی بژین
شیوەنی ئەو میلەتەی بووە ، كە هێمنی شاعیر لە بارەیەوە دەڵێت :
شیوەنی من شینی كوردی بێبەشە
ئەو گەلەی حاشا دەكەن لێی و هەشە
گەلێك كە شایانی ژیانێكی شایستە ترو دۆخێكی باشترە ، تا ئەو ساتەی كورد لە هەر كوێی ئەم سەرزەمینە لە بەردەم هەڕەشەو ستەمكاریدا بێت ، هەڕەشەو ستەمكاری خۆیی یان نەیارو ناحەزان ئەوە دەنگی سرودی دەمی راپەڕین هەر بەرزەو راپەڕینیش ماوێتی بگاتە دوا مەنزڵ .

 339 جار بینراوە