سەرەکی » چاوپێکه‌وتن » لە قۆناغی نوێبوونەوەی یەكێتیدا گرنگیی تەواو بە پتەوكردنەوەی پەیوەندیی نێوان یەكێتی و كۆمەڵانی خەڵك دەدرێت

لە قۆناغی نوێبوونەوەی یەكێتیدا گرنگیی تەواو بە پتەوكردنەوەی پەیوەندیی نێوان یەكێتی و كۆمەڵانی خەڵك دەدرێت

پۆڵا شەهید سیروان تاڵەبانی ئەندامی سەركردایەتی و لێپرسراوی مەڵبەندی گەرمیان بۆ كوردستانی نوێ: پەیڕەوی نوێ بە تەواوی لە خزمەت نوێبوونەوەی یەكێتیدایە

*یەكێتی بە سەركردایەتییەكی نوێوە قۆناغێكی نوێ دەستپێدەكات

*پێویستە پاراستنی یەكڕیزیی نێوماڵی كورد، ئامانجی سەرەكیی هەموو لایەنەكان بێت

*هەنگاوەكانی نوێبوونەوەی یەكێتی بەردەوام دەبێت و نوێبوونەوە لە هەموو ئاست و بوارە جیاوازەكان و ئۆرگانەكانی یەكێتیی نیشتمانیی كوردستاندا رەنگدەداتەوە

*بڕیاری سەركردایەتیی نوێی یەكێتی ئەوەیە كە لە قۆناغی نوێبوونەوەدا، یەكێتی بچێتەوە ناو كۆمەڵانی خەڵك و لە خزمەتكردن بە كۆمەڵانی خەڵك، بە هەموو چین و توێژەكان، بە كەسوكاری سەربەرزی شەهیدان و ئەنفالكراوان، بە هێزی پێشمەرگەی كودستان، بە هەموو ناوچە و شوێنە جیاجیاكان، بە هیچ شێوەیەك كەمتەرخەمی ناكرێت

دیداری، هەڵكەوت زەنگەنە
پۆڵا شەهید سیروان تاڵەبانی ئەندامی سەركردایەتی و لێپرسراوی مەڵبەندی گەرمیانی یەكێتیی نیشتمانیی كوردستان لە دیدارێكدا لەگەڵ كوردستانی نوێ، رایگەیاند: لە قۆناغی نوێبوونەوەی یەكێتیدا گرنگیی تەواو بە پتەوكردنەوەی پەیوەندیی نێوان یەكێتی و كۆمەڵانی خەڵك دەدرێت، وتیشی: یەكێتی بە سەركردایەتییەكی نوێوە قۆناغێكی نوێ دەستپێدەكات، پەیڕەوی نوێش بە تەواوی لە خزمەت نوێبوونەوەی یەكێتیدایە.

نوێبوونەوەی یەكێتی بەردەوام دەبێت
پۆڵا شەهید سیروان تاڵەبانی ئەندامی سەركردایەتی و لێپرسراوی مەڵبەندی گەرمیان، لە دیدارەكەیدا لەگەڵ كوردستانی نوێ، رایگەیاند: لە راستیدا نوێبوونەوە و گەشەپێدان هەمیشە ئامانجێكی سەرەكیی یەكێتیی نیشتمانیی كوردستانە، ئەم ئامانجە لە ئامادەكارییەكان بۆ بەستنی چوارەمین كۆنگرە و رۆژانی بەڕێوەچوونی كۆنگرە، هەمواركردنی پەیڕەوێكی نوێ،پرۆسە و هەنگاوەكانی دوای كۆنگرە، خۆشبەختانە بەشێوەیەكی زۆرباش بەرجەستە بووە و دەتوانم بڵێم یەكێتی بە سەركردایەتییەكی نوێوە قۆناغێكی نوێ دەستپێدەكات، پەیڕەوی نوێش بە تەواوی لە خزمەت نوێبوونەوەی یەكێتیدایە، وتیشی: خۆشبەختانە پرۆسەكانی هەڵبژاردنی هاوسەرۆكان و هەموو هەنگاوەكانی دوای كۆنگرە، بەشێوەیەك بەڕێوەچوون كە خزمەت بە قۆناغی نوێبوونەوە و گەشەپێدانی یەكێتی دەكەن، ئاماژەی بەوەشدا “هەنگاوەكانی نوێبوونەوەی یەكێتی بەردەوام دەبێت و نوێبوونەوە لە هەموو ئاست و بوارە جیاوازەكان و ئۆرگانەكانی یەكێتیی نیشتمانیی كوردستاندا رەنگدەداتەوە”.

پلان و بەرنامەی یەكێتی لە قۆناغی نوێبوونەوەدا
هەروەها باسی لە پلان و بەرنامەی یەكێتی لە قۆناغی نوێبوونەوەدا كرد و وتی: بەرنامە و سیاسەت و پلانی هاوسەرۆكان و سەركردایەتیی یەكێتی تەئكیدكردنەوەیە لە درێژەدان بە رێبازی سەرۆك مام جەلال، “لە قۆناغی نوێبوونەوەی یەكێتیدا گرنگیی تەواو بە پتەوكردنەوەی پەیوەندیی نێوان یەكێتی و كۆمەڵانی خەڵك دەدرێت، هەوڵەكان لە هەموو ئاستەكاندا چڕ دەكرێنەوە بۆ ئەوەی باشترین خزمەت بە هەموو چین و توێژ و ناوچەكان بكرێت”. ئەوەشی خستەڕوو: ئێستا زۆربەی هەوڵەكانمان چڕكردۆتەوە بۆ روبەڕوبونەوەی پەتای كۆرۆنا، هەموو هەوڵێكمان خستۆتەگەڕ بۆ ئەوەی لەم دۆخەدا بەتەواوی لە خزمەت كۆمەڵانی خەڵك و لایەنە پەیوەندیدارەكاندا بین، لە خزمەت خەڵكی كەمدەرامەتدا بین.

پاراستنی یەكڕیزیی
لێپرسراوی مەڵبەندی گەرمیان لە بەشێكی دیكەی دیدارەكەدا،باس لە پەرۆشی یەكێتی بۆ پاراستنی یەكڕیزیی دەكات و هەڵوەستەش لەسەر هەڵوێستی هەندێك لایەن لە بەرامبەر یەكێتیدا دەكات، لەوبارەیەوە دەڵێت: لەم بارودۆخە هەستیارەی ناوچەكەدا، وەكو كورد لەهەموو كات زیاتر پێویستمان بە پاراستنی یەكڕیزیی و یەكهەڵوێستییە، ئەمەش لای یەكێتیی نیشتمانیی كوردستان هەمیشە پرسێكی گرنگ بووە و یەكێتی هەموو هەوڵەكانی بۆ پاراستنی یەكڕیزیی نێوماڵی كورد بووە و زۆرجاریش لەپێناوی بەدیهێنانی ئەو ئامانجەدا، قوربانیی زۆریداوە، ئێستاش یەكێتی تەئكید لە درێژەدان بەم سیاسەتە راست و دروستەی خۆی دەكاتەوە، بەڵام بەداخەوە زۆرجار هەندێك لایەنی دیكە بەشێوەیەكی دیكە مامەڵەیان كردووە، وتیشی: دەبێت پاراستنی یەكڕیزیی نێوماڵی كورد، ئامانجی سەرەكیی هەموو لایەنەكان بێت، ناكرێت یەكێتی هەمیشە ئامادەبێت لەپێناوی ئەو ئامانجەدا، هەموو قوربانییەك بدات، بەڵام بەپێچەوانەوە هەندێك لایەنی دیكە تەنها بە دروشم باس لەو ئامانجە بكات و لەبواری كردارییدا تەواو پێچەوانە مامەمەڵە بكات، راشیگەیاند: یەكڕیزیی بە پڕوپاگەندەكردن دژی یەكێتی بەدینایەت،باسكردن لە پاراستنی یەكڕیزیی گەلی كوردستان و پڕوپاگەندە دروستكردن دژی یەكێتی، تەواو پێچەوانەی یەكترن.

خزمەتكردن بە هەموو چین و توێژەكان
لێپرسراوی مەڵبەندی گەرمیان لە درێژەی دیدارەكەیدا ئاماژەی بەوەدا “بڕیاری سەركردایەتیی نوێی یەكێتی ئەوەیە كە لە قۆناغی نوێبوونەوەدا، یەكێتی بچێتەوە ناو كۆمەڵانی خەڵك و لە خزمەتكردن بە كۆمەڵانی خەڵك، بە هەموو چین و توێژەكان، بە كەسوكاری سەربەرزی شەهیدان و ئەنفالكراوان، بە هێزی پێشمەرگەی كودستان، بە هەموو ناوچە و شوێنە جیاجیاكان، بە هیچ شێوەیەك كەمتەرخەمی ناكرێت”.

print

 435 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*