سەرەکی » ئەدەب - سێبەر و سایە » ئه‌نیشتاین له‌ دۆزه‌خ

ئه‌نیشتاین له‌ دۆزه‌خ

حفیظ الله نادری‌

له‌ فارسییه‌وه‌: تارا شێخ عوسمان

من ده‌رباره‌ی ئه‌م مه‌سه‌له‌یه‌ زۆر بیرم كردووه‌ته‌وه‌، ده‌مه‌وێت رۆژی هه‌ینی بمرم. بۆ مردن حه‌زم له‌ رۆژه‌كانی تر نییه‌، خه‌ڵك له‌ رۆژه‌كانی تردا سه‌رقاڵن، ئه‌وان كاتیان نییه‌ بێن فاتیحا بۆ من دابده‌ن، ده‌مه‌وێت خه‌ڵكێكی زۆر بێن بۆ به‌ خاكسپاردنم، ده‌مه‌وێت بۆ دواجار له‌ناو خه‌ڵكدا بم، له‌ نێو ئه‌وانه‌دا كه‌ منیان خۆشده‌وێت.
من له‌ مردن ده‌ترسم، ره‌نگه‌ ئێوه‌ش هه‌مان هه‌ستتان هه‌بێت، من بۆیه‌ له‌ مه‌رگ ده‌ترسم، چونكه‌ وا هه‌ست ده‌كه‌م كۆتایی هه‌موو شتێكه‌. دڵینام خێزانه‌كه‌م به‌ مردنی من زۆر خه‌مبار ده‌بن، هاوڕێكانیشم به‌ هه‌مانشێوه‌، ئه‌ی تا چه‌ند رۆژ؟ ده‌، بیست یان سه‌د رۆژ؟ دوای ئه‌وه‌ چی رووده‌دات؟ ئه‌و شته‌ی بۆ ملیۆنان كه‌س دێته‌ پێش و منیش له‌به‌ر ئه‌وه‌یه‌ ده‌ترسم، من ده‌بمه‌ هیچ، ناوه‌كه‌م، ژیانم، بۆنه‌كه‌م و هه‌موو شتێكی من له‌ناو ده‌چێت، وه‌ك ئه‌وه‌ی هه‌ر نه‌بووبێتم. وه‌ك ئه‌وه‌ی هه‌رگیز له‌ كه‌ناری ده‌ریا پاسكیلم لێ نه‌خوڕیبێت. وه‌ك ئه‌وه‌ی هه‌رگیز عاشق نه‌بووبم. وه‌ك ئه‌وه‌ی چه‌ندین جار له‌ ناخی دڵه‌وه‌ نه‌گریابم. وه‌ك ئه‌وه‌ی له‌ خه‌ونمدا له‌گه‌ڵ فریشته‌كاندا نه‌خه‌وتبم. وه‌ك ئه‌وه‌ی…
من ده‌ترسم، بۆیه‌ ده‌مه‌وێت بۆ دواجار خه‌ڵك گوێیان له‌ ناوی من بێت، خه‌ڵكێكی زۆر. نامه‌وێت زۆر زوو له‌ مێشكی ئه‌واندا بسڕدرێمه‌وه‌. له‌به‌ر ئه‌وه‌یه‌ ئێستا من زیندووم. من هه‌م. ئه‌مه‌ زێده‌ڕۆییه‌، مرۆڤێك به‌ حه‌فتاو چه‌ند كیلۆ گۆشت و ئێسك- گۆشت و ئێسكی جیاواز، به‌و ده‌موده‌سته‌ له‌یاد بچێته‌وه‌، ئه‌مه‌ راست نییه‌. ئه‌مه‌ سته‌مه‌.
له‌گه‌ڵ ئه‌وه‌شدا، مردن بۆ من ئه‌زموونێكه‌، ئه‌زموونێكی پڕ له‌ چێژ. مردن واتای له‌ راده‌ تێپه‌ڕبوون. مه‌رگ مانای كردنی ئه‌و شته‌ی كه‌ هیچ مرۆڤێكی زیندوو ناتوانێت بیكات. مه‌رگ بۆ من بڵند بوون و فڕینه‌ بۆ به‌رزیی. من كه‌ له‌سه‌ر پاسكیله‌كه‌م بێ ئه‌ندازه‌ تیژڕه‌وم، من له‌ ئاسمانم. نقومی كه‌یفخۆشیم، هه‌ندێ جار دڵم ده‌خوازێت له‌وه‌ تیژتر لێبخوڕم. له‌ زه‌وی به‌رز ببمه‌وه‌ له‌گه‌ڵ ماتۆرێكدا به‌یه‌كدا بده‌ین و پاش ماوه‌یه‌ك بفڕم. پاشان بدرێمه‌وه‌ به‌ زه‌ویدا، یه‌كه‌مجار سه‌رم به‌رزه‌وی بكه‌وێت، مێشكم بچێت به‌ ئاسمانا، به‌ملاولاما بڵاو بێته‌وه‌ و هه‌موو یادگه‌م، بیروڕاكانم و هه‌موو گاڵته‌ و گه‌په‌كانم له‌سه‌ر شه‌قامه‌كه‌ پان بێته‌وه‌ دوایی ده‌ست و قاچم گۆج بن، هه‌مووی توته‌، توت. ئه‌مه‌ چ جۆره‌ هه‌ستێكه‌؟ هیچ كاتێك ئه‌مه‌م هه‌ست پێنه‌كردووه‌.
زۆرجار له‌ كانتۆنی (ویلی) سویسرام و له‌و گۆلاوه‌ سروشتییه‌دا مه‌له‌ ده‌كه‌م و به‌هه‌ر چوارده‌وری خۆمدا ده‌خولێمه‌وه‌ بۆ ئه‌وه‌ی سه‌یری چیاكان بكه‌م، كێوه‌ به‌ (ناجو) داپۆشراوه‌كان وه‌ك قژی سه‌ری كچانی ئه‌فریقایی و كاتێك كه‌ خۆر لێم ده‌دات هه‌م من و هه‌م ئاوی ده‌وروبه‌رم مه‌ست ده‌كات، من ده‌چمه‌ ژێر ئاوه‌كه‌وه‌ له‌و جێیه‌ی تیشكی خۆر ده‌بێته‌ هه‌شت به‌ش، وه‌ك چادرێكی دره‌وشاوه‌ كه‌ جگه‌ له‌ په‌ته‌كانی ئه‌وی داوه‌ته‌ به‌ربا. له‌وێدا هێشتا ساپیته‌ی گۆمه‌كه‌ ناجووڵێت. ئه‌و شوێنه‌ی ئاو و هه‌تاو هه‌یه‌. من ده‌مه‌وێت بچمه‌ قووڵایی زیاتره‌وه‌، ئه‌و شوێنه‌ی كه‌ ئیتر هه‌تاو نییه‌. ئه‌و شوێنه‌ی ته‌واو تاریكییه‌. ئه‌و شوێنه‌ی هه‌موو شتێكه‌ و منیش. ئه‌و شوێنه‌ی ماسییه‌كانی لێیه‌، ماسییه‌ گه‌وره‌ و بچووكه‌كان. ئه‌و شوێنه‌ی كه‌ مرۆڤ خۆره‌كان هه‌ن. ئه‌و جێیه‌ی كه‌ خه‌روار خه‌روار ئاو هه‌یه‌. من ده‌مه‌وێت بچم بۆ ئه‌و شوێنه‌، له‌وێ یاری به‌ ئاو بكه‌م تا ئیتر هه‌ناسه‌م پێنامێنێت و هه‌وا بخوازم، به‌ڵام له‌بری ئه‌وه‌ ئاوم بدرێتێ. ده‌مه‌وێت ئه‌و ئه‌زموونه‌ بكه‌م، ده‌مه‌وێت ژیانی ماسییه‌كان تاقیبكه‌مه‌وه‌.
ئایا ده‌مه‌وێت له‌سه‌ر ته‌ختی خه‌و بمرم یان له‌سه‌ر جاده‌یه‌كی ته‌خت؟ ئایا ده‌مه‌وێت كه‌سێك به‌ مه‌به‌ست بمكوژێت یان به‌ مه‌رگێكی سروشتیی بمرم؟ ئایا من ده‌مه‌وێت بسووتێم و بمرم یان گۆشتی له‌شم سكی شێرێكی برسیی تێربكات؟ من نازانم، مه‌گه‌ر ده‌مه‌وێت ئه‌م پێشهاتانه‌ تاقیبكه‌مه‌وه‌. ده‌مه‌وێت هه‌ست به‌وه‌ بكه‌م كه‌ به‌هێواشی دڵم ده‌وه‌ستێت و له‌سه‌ر ته‌ختی خه‌وه‌كه‌ خه‌وتوو و گریان و نائومێدی هاوڕێكانم ببینم، منیش ده‌مه‌وێت له‌ ماڵه‌وه‌ بڕۆم و كه‌سێك چاوه‌ڕوانم بێت و هه‌رگیز دووباره‌ نه‌گه‌ڕێمه‌وه‌. مردبێتم- له‌سه‌رجاده‌ كه‌وتبم و خه‌ڵك ته‌له‌فۆن بۆ ئه‌مبوڵانس بكه‌ن. حه‌زم له‌ سه‌رسوڕمان و داخداری ئه‌وانه‌. من ده‌مه‌وێت له‌ ئاگردا بسووتێم و گه‌رم بوون و بوونه‌ ئاوی لاشه‌مم حه‌ز لێیه‌. ده‌مه‌وێت هه‌ست به‌ ددانی سپی شێر بكه‌م له‌سه‌ر گیانم، ئه‌و ددانانه‌ كه‌ ده‌چه‌قنه‌ گیانم و دواتر ده‌نگی شكاندنی ئێسكه‌كانم له‌ نێوان ددانه‌كانیدا، من ده‌مه‌وێت گوێم له‌و ده‌نگه‌ بێت.
به‌ڵام مردن یاخییه‌. مه‌رگ بژارده‌ی من نییه‌ و ئه‌وه‌م له‌به‌ر ئه‌و شته‌ خۆش ده‌وێت. ئێمه‌ ناتوانین مردنمان بوێت، ده‌بێت ئه‌و داوامان بكات. وه‌ك سه‌رۆكێكی گه‌وره‌. مردن سه‌ربه‌خۆیه‌، خۆی بڕیارده‌دات و خۆی جێبه‌جێی ده‌كات. مردن پێشێلكارییه‌كه‌ له‌ دژی مرۆڤ.
ته‌نها كێشه‌ی من له‌گه‌ڵ مردن خودی مردنه‌. ئه‌گه‌ر بمرم، من ده‌مرم. كه‌واته‌ زیندوو نابمه‌وه‌. ده‌مه‌وێت مه‌رگ وه‌ك پاسكیل لێخوڕین بێت یان وه‌ك خواردنی پیتزا بێت. ده‌بێت تا كۆتایی ئه‌زموون بكرێت ئه‌گه‌ر حه‌زمان لێبوو دووباره‌ی بكه‌ینه‌وه‌، من له‌ مردن ده‌ترسم، چونكه‌ ره‌نگه‌ به‌لامه‌وه‌ خۆش نه‌بێت و دواتر رێگه‌ی گه‌ڕانه‌وه‌ داخرا بێت.
له‌به‌ر ئه‌وه‌یه‌ من حه‌زم له‌ دۆزه‌خه‌، بیستوومه‌ كه‌ مرۆڤ له‌وێ نامرێت، ده‌مرێت، به‌ڵام پاش چه‌ند ساتێك دووباره‌ زیندوو ده‌بێته‌وه‌ پاشان دووباره‌ ده‌مرێت. له‌وێ ده‌توانم رۆژی سه‌دجاریش دووباره‌ی بكه‌مه‌وه‌. دۆزه‌خ شوێنێكی نموونه‌ییه‌ بۆ من. له‌وێ ناتوانم به‌ هه‌موو مه‌رگه‌ دڵخوازه‌كانم بمرم. له‌وێ ده‌توانم شێوه‌ی نوێی مردن دروست بكه‌م. من له‌وێ ده‌توانم داهێنه‌ری مه‌رگ بم. ده‌توانم ئه‌نیشتاینی دۆزه‌خی خۆم بم. من ده‌توانم ئه‌و هه‌موو شته‌ بكه‌م، به‌ڵام هێشتا كێشه‌یه‌كم هه‌یه‌، چۆن ده‌توانم بڕۆم بۆ دۆزه‌خ؟

سه‌رچاوه‌ nebesht.com

 

 

 344 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*