سەرەکی » وتار » شیلان ده‌رگه‌ڵه‌یی » تۆماركردنی مێژوو یان نووسینه‌وه‌ی مێژوو؟پەڕە 3

تۆماركردنی مێژوو یان نووسینه‌وه‌ی مێژوو؟

ئه‌وانه‌ی مێژوویه‌كی جوان (جا له‌هه‌ر بوارێكدا بێت) بۆخۆیان تۆمار ده‌كه‌ن، زۆر به‌خته‌وه‌رن، له‌وانه‌یه‌ خۆیان و بنه‌ماڵه‌ و كه‌سوكاریشیان به‌هۆی ئه‌وه‌وه‌ ده‌رده‌سه‌ریی و نه‌هامه‌تیی زۆر ببینن، به‌ڵام له‌ كۆتاییدا، مێژوو و سه‌روه‌رییه‌ و مایه‌ی شانازیی خۆی و بنه‌ماڵه‌ و له‌وانه‌یه‌ حزب یان ناوچه‌ و وڵاته‌كه‌شی بێت.

نووسینه‌وه‌ی مێژوو وه‌ك خۆی، ئه‌ركێكی ئه‌خلاقییه‌ و گه‌یاندنی ئه‌مانه‌ته‌ به‌ خوێنه‌ر، راستگۆیی و بوێریی و سڵنه‌كردنه‌وه‌ له‌ تۆماركردنی راستییه‌كان، بێ لایه‌نگیریی و ره‌چاوكردنی خزمایه‌تیی و حزبایه‌تیی و تێكه‌ڵنه‌كردنی به‌رژه‌وه‌ندیی و كێشه‌ی شه‌خسی و بێ زێده‌ڕۆیی، نووسه‌ر گه‌وره‌تر ده‌كات، نه‌ك بچووكی بكاته‌وه‌.

ماوه‌یه‌كه‌، چه‌ند «پێشمه‌رگه‌یه‌كی دێرین» بیره‌وه‌رییه‌كانی خۆیان وا به‌تێر و ته‌سه‌لی و راستگۆیانه‌ و به‌ویژدانه‌وه‌ به‌ كتێب یان له‌ تۆڕه‌كانی سۆشیال میدیا بڵاوكردۆته‌وه‌، هه‌ست ده‌كه‌یت فیلمێكه‌ و خۆت وێنه‌یت گرتووه‌، ئه‌وانه‌ مایه‌ی ده‌ستخۆشین.

هه‌ندێكیش له‌ (چه‌كداران)ی شاخ (بیره‌وه‌ریو)ه‌كانیان وا به‌ كرچ و كاڵی و رقه‌وه‌ نووسیوه‌ته‌وه‌، ده‌ڵێی (مار)ن ژه‌هر ده‌ڕێژن.

هه‌رچی جوانییه‌ ناشیرینیان كردووه‌، هه‌رچی شاخ و كێوی لانه‌ی شێر و هه‌ڵۆیه‌، وه‌ك چه‌می پڕ چه‌قه‌ڵ وێنا ده‌كه‌ن.

ده‌یانه‌وێت هه‌رچی قاره‌مانێتیی و له‌خۆبوردوویی پێشمه‌رگه‌یه‌، به‌ مۆری خیانه‌ت له‌كه‌داری بكه‌ن.

ده‌یانه‌وێت هه‌رچی ره‌فتار و گوفتار و ره‌وشتی جوانی پێشمه‌رگه‌یه‌، به‌ دڵی پڕ له‌ قینی خۆیان له‌به‌رچاوی خوێنه‌ری بخه‌ن.

ده‌یانه‌وێت هه‌رچی سه‌روه‌ییه‌كانی شۆڕشه‌، به‌ نوكه‌ قه‌ڵه‌م و په‌نجه‌ له‌رزۆكه‌ درۆزنه‌كانیان بیشێوێنن.

ئاخر ئه‌وان نازانن یا له‌بیریان چووه‌ كه‌ ئێمه‌ی عاشقی پێشمه‌رگه‌ و كوردایه‌تی و شۆڕشی (ئه‌وێ رۆژێ) هێشتا له‌ژیاندا ماوین و هۆش و بیریشمان هێشتا نه‌له‌قاون و جێگیرن، له‌وان باشتر رابردووی جوانی شۆڕش و خه‌بات و خوێنی رژاوی شه‌هید و بریندارانمان له‌بیرماوه‌.

هێشتاش شه‌وانه‌ كه‌ سه‌رده‌خه‌ینه‌ سه‌ر سه‌رین، به‌یادی ده‌نگه‌ زوڵاڵه‌كه‌ی ده‌نگی گه‌لی كوردستان و چالاكییه‌كانی پێشمه‌رگه‌وه‌ خه‌و ده‌مانباته‌وه‌.

ئێستاش خه‌ونی ئه‌وكاتی كچێنیمان له‌بیره‌ كه‌ به‌خت یاوه‌رمان بێت و پێمان بڵێن ژنه‌ پێشمه‌رگه‌ یان خوشكه‌ پێشمه‌رگه‌.

خه‌ونی كوڕه‌ گه‌نجه‌كانمان له‌بیره‌ كه‌ له‌ شانكردنی چه‌كێك بوو تا ببنه‌ جێی شانازیی كه‌سوكار و كچانی دێ.

له‌بیریان چووه‌، خه‌ومان به‌ بینینی مام جه‌لال و بێژه‌ره‌كه‌ی رادیۆی ده‌نگی گه‌لی كوردستانه‌وه‌ ده‌بینی، له‌بیریان چووه‌، له‌ خوامان ده‌ویست (نووشته‌نامه‌)ی گیرفان یاخود مه‌تاره‌ ئاوه‌كه‌ی به‌رپشتێنی پیشمه‌رگه‌ بین.

له‌بیریان چوو، بۆ شه‌هیدی هه‌ر چالاكییه‌ك ده‌گریاین و له‌گه‌ڵ هه‌ر سه‌ركه‌وتنێكی پێشمه‌رگه‌ش ده‌تریقاینه‌وه‌ له‌خۆشیدا.

ناوی شۆڕش و پێشمه‌رگه‌ به‌ئێوه‌ نازڕێت، ئێوه‌ ئه‌وكاتیش پێشمه‌رگه‌ نه‌بوون، ته‌نها چه‌كدار بوون و هیچی تر، شۆڕشی ئێمه‌ گه‌وره‌بوو، كێوێك بوو و چه‌مێكی له‌ دامێن بوو، هه‌ڵۆكان له‌لوتكه‌دا ده‌نیشتنه‌وه‌ و ئێوه‌ی چه‌قه‌ڵیش له‌ چه‌مه‌كه‌.

ئه‌وانه‌ی ئـه‌وكات به‌مانای وشه‌ هه‌ڵۆ بوون، ئێستاش هه‌ر له‌ لوتكه‌ن، ئێوه‌ و چه‌قه‌ڵه‌ شڕه‌خۆره‌ رووخاوه‌كانی ئه‌وكات و ئێستاش هه‌ر خه‌ریكی خۆخواردنه‌وه‌ن، له‌وكاته‌وه‌ تائێستاش نه‌ توانیتان خۆتان خۆشبووێت و نه‌ كه‌سیش، دڵنیاین كه‌ هه‌ر به‌و شێوه‌یه‌ش سه‌رده‌نێنه‌وه‌.

ئه‌ركی هه‌موو پێشمه‌رگه‌یه‌كی دێرینه‌ راستییه‌كان بخاته‌ڕوو، ئه‌گه‌ر بیره‌وه‌رییه‌كانیش نه‌نووسێته‌وه‌، هه‌قه‌ وه‌ڵامی چه‌واشه‌كاریی ئه‌و چه‌كدارانه‌ی (ئه‌وێ رۆژێ) بده‌نه‌وه‌، ئه‌وه‌ له‌ نووسینه‌وه‌ی بیره‌وه‌ریه‌كانیش پیرۆزتره‌.

 860 جار بینراوە