سەرەکی » دۆسێ » وەزارەتی نەوتی عیراق داهاتی نەوتی مانگی ئاب رادەگەیەنێت

بە تەواوەتی پابەندی رێكەوتنەكەی ئۆپیك بوو

وەزارەتی نەوتی عیراق داهاتی نەوتی مانگی ئاب رادەگەیەنێت

وەزارەتی نەوتی عیراق، بڕی هەناردە و داهاتی بەدەستهاتووی مانگی ئابی ڕابردوو رادەگەیەنێت، ئەمەش بە پشتبەستن بە ئامارێكی كۆمپانیای بەبازاڕكردنی نەوتی عیراق (سۆمۆ)، ئەمەش لەكاتێكدایە كە بەڕێژەی 106% پابەندی رێكەوتنكەی (ئۆپیك) بووە بۆ كەمكردنەوەی ئاستی بەرهەمی نەوت.

لە 1ی ئەیلولی 2020، عاسم جیهاد وتەبێژی وەزارەتی نەوتی عیراق لە بەیاننامەیەكدا رایگەیاند”لە مانگی كانوونی یەكەمی رابردوودا، لە كێڵگە نەوتییەكانی ناوەڕاست و باشووری عیراق، بڕی (77) ملیۆن و (505) هەزار (136) بەرمیل نەوت هەنارەكراوە، لە كیڵگە نەوتییەكانی كەركوكیش بەرەو بەندەری جەیهان، (2) ملیۆن و (989) هەزار و (400) بەرمیل نەوت هەناردە كراوە”.

بە وتەی عاسم جیهاد”كۆی گشتی هەناردەی ڕۆژانەی نەوت لە مانگی ئابی ڕابردوو گەیشتووەتە (2) ملیۆن و (597) هەزار بەرمیل كە (2) ملیۆن و (500) هەزار بەرمیلیان لە بەندەرەكانی بەسرەوە هەناردەكراوە و لە بەندەری جەیهانی توركیاشەوە هەناردەی ڕۆژانە گەیشتووەتە (97) هەزار بەرمیل.

هەر لە بەیاننامەكەی وەزارەتی نەوتدا هاتووە”تێكڕای نرخی بەرمیلێكی فرۆشراو بە (43.693) دۆلار بووە، كۆی داهاتی نەوتە هەناردەكراوەكەش (3) ملیار و (517) ملیۆن و (45) هەزار دۆلار بووە.

هەر لەو چوارچێوەیەدا كەناڵی (العربیە) ، بە پشتبەستن بەو زانیارییانەی لەڕێی بارە نەوتییەكان و سەرچاوەكانی كەرتی نەوتی عیراقییەوە دەستبەری كردوون بڵاویكردەوە، هەناردەكانی نەوتی خاوی عیراق، لە سەرەتای مانگی ئابی رابردووەوە دابەزیەوە، ئەمەش دەستەواژەیەكە بۆ پابەندبوونی دووەم گەورەترین بەرهەمهێنەری نەوت لە ئۆپیك بە بەڵێنەكانی سەبارەت بە كەمكردنەوەی خستنەڕەووی نەوت بەپێی ئەو رێكەوتنەی كە لەلایەن رێكخراوەكەوە سەركردایەتی دەكرێت.

بەپێی زانیارییەكان، هەناردەكانی باشووری عیراق، رۆژانەی بۆ 2.63 ملیۆن بەرمیلی رۆژانە تا 25 ئاب كەمبۆتەوە، ئەمەش بەپێی ژمارە مامناوەندەكانی پترۆ-لۆجستكس، كە چاودێری بارە نەوتەكان دەكات لەگەڵ ئامارەكانی رڤینیتیڤ ئەیكۆن.

ئەو ژمارەیە بە 40 هەزار بەرمیل نەوتی رۆژانە كەمترە لە ژمارەی رەسمی هەناردەكانی باشووری عیراق لە مانگی تەمموزدا كە گەیشتبووە 2.67 ملیۆن بەرمیل نەوتی رۆژانە.

رێكخراوی هەناردەكردنی نەوت و هاوپەیمانەكانی، كە بە گروپی (ئۆپیك+1) ناودەبرێن، لە سەرەتای مانگی ئابی 2020 دەستییان كرد بە كەمكردنەوەی بێپێشینەی خستنەڕووی نەوت، ئەمەش هاوكات بوو لەگەڵ بوژانەوەی داواكاریی لەسەر نەوت كە بەهۆی كاریگەرییەكانی بڵاوبوونەوەی ڤایرۆسی كۆرۆنا، پاشەكشەی كردبوو.

لەگەڵ ئەوەشدا عیراق، تائێستا هەر بەردەوامە لە كەمكردنەوەیی بەرهەم دوای ئەوەی لە مانگەكانی پێشوودا بەشێوەیەكی ناتەواو پابەندی رێكەوتنەكەبوو.

هەر لەو چوارچێوەیەدا، دانییڵ جربر، بەڕێوەبەری جێبەجێكاری پترۆ-لۆجستكس لە لێدوانەكانی بۆ ئاژانسی (رۆیتەرز) لە سەرەتای مانگی ئەیلولی 2020 رایگەیاندبوو»عیراق بەنیازە بەهێزترین ئاستی پابەندبوونی مانگانەی خۆی لەمساڵدا بهێنێتەدی».

هەناردەی رۆژانەی نەوت لە باشووری عیراقەوە وەك كەناڵی (العربیە)، ئاماژەی پێدەكات، لە سەرەتای مانگی ئابەوە بە كەمتر 100 هەزار بەرمیل بەراورد بە بارەكانی مانگی تەمموزی رابردوو مەزەندە دەكرێت.
بە وتەی جربر»بەڵام تائێستاش پێویستە كەمكردنەوەی زیاتر بكرێت بۆ قەرەبووكردنەوەی ئەو بڕە نەوتە زۆرەی لەماوەی چەند مانگی رابردوودا لە بازاڕەكاندا خرایەڕوو».

عیراق لە حەوتی ئابی رابردوو رایگەیاندبوو كە رۆژانە 400 هەزار بەرمیل نەوتی تر لە مانگەكانی ئاب و ئەیلولدا كەمتر بەرهەم دەهێنێت، ئەمەش وەك قەرەبووكردنەوەی زۆری بەرهەمهێنانی لە سێ‌ مانگی پێشوو.
بەغدا ئەندامی رێكخراوی ئۆپیك، لە هەندێك كاتدا كەمترین پابەندبوونی هەبووە بە رێكەوتنەكانی رێكخراوەكە.

باشوور بە دەرچەی سەرەكی هەناردەكردنی نەوتی خاوی عیراقی دادەنرێت، هەناردەكردنی نەوت لە باكوورەوە لە مانگی ئابدا هەندێك كەمی كرد و بۆ نزیكەی 400 هەزار بەرمیل نەوت لە رۆژێكدا دابەزی ، ئەمەش بەپێی زانیارییەكانی گواستنەوە و سەرچاوەكانی كەرتی نەوتی عیراقی.

بەگشتی هەناردەكانی عیراق، 80 هەزار بەرمیل نەوت، تا 25ی ئاب دابەزی، ئەمەش بە پشتبەستن بە ناوەندی ئەو زانیاریانەی كە تائێستا بەردەستن.

لە مانگی تەمموزی رابردوو، رێژەی پابەندبەوونی عیراق بە كەمكردنەوەی بەرهەمی نەوت، نزیكەی 73% بوو، ئەمەش بەپێی ئەو روپێوانەی لەلایەن رۆیتەرزەوە ئەنجامدراون.

لەگەڵ بەكارهێهنانی پشكی عیراق كە بەرزترینە لە مانگی ئابدا لە چوارچێوەی خۆڕێكخستنەوەی ئۆپیك+، لە سۆنگەی كەمكردنەوەی قەبارەی رێكەوتنەكە، رێژەی پابەندبوونی بەغدا، بەپێی حیساباتەكانی رۆیتەرز، بۆ 106% بەرزبۆتەوە.

print

 153 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*