سەرەکی » مانشێت » بۆ چلەی خەباتگێڕ و دیپلۆماتكار ئەحمەد بامەڕنی

بۆ چلەی خەباتگێڕ و دیپلۆماتكار ئەحمەد بامەڕنی

د.بەرهەم ساڵح

چل رۆژ بەسەر كۆچی دوایی هاوڕێیەكی خۆشەویستم و تێكۆشەرێكی دێرینی كوردایەتی تێدەپەڕێت، كە تۆماری ژیانی پڕە لە خەبات و تێكۆشان، پڕە لە هەوڵ و ماندوبوون بۆ كوردایەتی، لە تەمەنی هەرە گەنجی خۆی تا كۆچی دوایی، لە خزمەتی گەلەكەی و یەكێتیی نیشتمانیی كوردستان درێغی نەكرد و بە پشوویەكی درێژەوە رێبوارێكی بەئەمەك و راستگۆی رێگای خەبات بوو، بۆیە كۆچی دوایی، كۆستێكەو پڕنابێتەوە، ئەو تێكۆشەرە؛ كاك ئەحمەد بامەڕنی-یە، كە چل رۆژ بەر لە ئێستا بەجێیهێشتین و خەمێكی قوڵی خستە دڵی دۆست و هاوڕێیانی.

كۆچی دوایی كاك ئەحمەد بامەڕنی، بۆ من كۆستێكی بەسوێیە، چونكە هاوڕێ و هاوكارێكی نزیكم بوو، یاد و یادەوەرییەكی دوورودرێژو بەردەوام كۆی دەكردینەوە، من لە سەرەتای هەشتاكان، لە مەنفاو غەریبـی ناسیم، لە زۆر وێستگەی جیاجیای خەبات و كاركردن بەیەكەوە بووین، لە كاری حزبییەوە بگرە تا یەكێتیی خوێندكاران و دروستكردنی پەیوەندی لەگەڵ دنیای دەرەوە، زۆر یادەوەریمان بەیەكەوە هەیە، هەرچەندە زەمەن دەگۆڕا، هەلومەرجی خەبات سەخت و ئاڵۆزتر دەبوو، كاك ئەحمەد وەكو كێوێك دەوەستاو ورەی بەرنەدەدا و بێهیوا نەدەبوو، بگرە بە حەماسێكی زیاترەوە كاری دەكرد، بەتایبەت لە ئەوروپا ناوێكی دیاربوو، كادیرێكی بەجووڵە بوو، لەم رووەوە هاوكارێكی باشی جەنابی مام جەلال بوو، رۆڵێكی بەرچاوی هەبوو لە پەرەپێدانی پەیوەندییە دیپلۆماسییەكانی یەكێتی لە دەرەوە، لە كۆبوونەوە حزبییەكان لە دەرەوە، لەو كۆڕو كۆبوونەوانەی تایبەت بوون بە كورد و كوردستان ئامادەیی هەبوو، لەو رووەوە مام جەلال متمانەیەكی زۆری پێ هەبوو، هەر كارێكی پێسپێردرابێت، بەسەركەوتوویی ئەنجامی دەدا، لەدوای راپەڕین لە پەرەپێدانی رایەڵەی پەیوەندییەكانی یەكێتی بە ئەوروپا بەتایبەت لە فەرەنسا، جێدەستی كاك ئەحمەد دیارە، وەك ئاشكراشە رۆڵی فەرەنسا لە پشتیوانی لە كورد بەرچاوبوو لەو سەردەمدا بە ئێستاشەوە.

كاك ئەحمەد، پەیوەندییەكی باشیشی لەگەڵ كوردانی پارچەكانی تری كوردستان هەبوو، تەنانەت لە زۆر وێستگەی هەستیارو قورسیش بەكەڵكیان هاتووە، شارەزایی قوڵی لەسەر سروشتی سیاسی و ئاراستەی كاركردنیان هەبوو، بۆیە كاك ئەحمەد كادیرێكی قاڵبووەوەی خەبات و تێكۆشان بوو، بەكۆچی دوایی، هاوڕێ و دۆست و پێشمەرگەیەكی سەنگینمان لەدەست چوو.

دوای دەستبەكاربوونیشی وەكو باڵیۆزی عیراق و كاركردنی لە چەند وڵاتێكی ئەوروپی، دووبارە لەم ئەركەش هەر كاك ئەحمەدی جاران بوو و سەركەوتووانە لە بواری دیپلۆماسی و وەكو باڵیۆز كارەكانی كرد، ئەوەی كاك ئەحمەدی جیادەكردەوە، پیاوێكی هێمن و لەسەرخۆ بوو، دڵساف و دوور لە بوغزو كینە بوو، هاوڕێیەكی دڵساف و سەرڕاست بوو، بۆیە دۆست و خۆشەویستی هەمووان بوو.

دوای تەواوبوونی ئەركەكەی وەكو باڵیۆز، بەلامەوە گرنگ بوو وەكو راوێژكاری دیپلۆماسی لەسەرۆكایەتیی كۆمار لەگەڵ بەندە كاربكات، لەم ئەركەش بۆ من و بۆ كارەكەش هەمان كاك ئەحمەدی جاران بوو، هەمان حەماس و خواستی بۆ ئیشكردن و راپەڕاندنی ئەركەكانی هەبوو، بەدڵنیایی وەكو راوێژكارێكی كارامە شوێنی گرت و بۆ من مایەی متمانە بوو، هەموو ئەو مەلەف و ئەركانەی كەوتنە سەرشانی لەو ماوەیەدا، زۆر بە رێكی ئەنجامی دەدان، بێ ئەوەی ماندوبوون و هیلاكی پێوە دیاربێت، لە سەرۆكایەتیی كۆمار بەزوویی جێی خۆی كردەوە و لەوێش بوو بە هاوڕێ و دۆستی هەمووان.

جیا لە كاری سیاسی و حزبییش، كاك ئەحمەد كەسایەتییەكی سادەو سەرڕاست و خۆش مەشرەب بوو، بەزوویی دەچووە دڵی بەرامبەرەكەی، كەسێكی دڵساف بوو، بەهای هاوڕێیەتی و دۆستایەتی بە باشی دەزانی، لەم رووەشەوە خاوەنی پەیوەندییەكی كۆمەڵایەتیی بەرفراوان بوو.

بۆیە كۆچی دوایی كاك ئەحمەد، ئەگەر لەلایەك خەسارەت بێ بۆ كوردایەتی و خەباتی دیموكراسی، بۆ من سەرەڕای ئەمانە، لەدەستدانی هاوڕێیەكی نزیك و سەرڕاست و بەئەمەك بوو، لە‌دەستدانی راوێژكارێكی زیرەك و بە توانا و جێی متمانە بوو، بەڵام مەخابن كۆرۆنا زەفەری پێبردو لێمان جیابووەوە، ئەمڕۆ كە چل رۆژ بەسەر كۆچی دواییدا تێدەپەڕێت، دروود بۆ گیانی پاكی دەنێرم و هیوادارم لە بەهەشتی نەمریی؛ گیانی شاد بێت.

یادو یادەوەریی كاك ئەحمەد بامەڕنی، هەمیشە بە زیندوویی دەمێننەوە.

 303 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*