سەرەکی » ئەدەب - سێبەر و سایە » باکوری و جەمال هیدایەت ئەو دوو هونەرمەندەی کۆڵەکەی هونەری هەولێرن

دەروازە

باکوری و جەمال هیدایەت ئەو دوو هونەرمەندەی کۆڵەکەی هونەری هەولێرن

نازم دڵبەند

هەردووکیان (80) ساڵیان تێپەڕاندوە و زۆر نزیکی (90)ساڵین، بەڵام رۆژانە بە گەرموگۆڕیەوە لەشەقام و لەکۆڕ و کۆبونەوە هونەرییەکان دەبینرێن. زۆربەی بەیانیان من و مامۆستا (جەمال) لە چاخانەکەی (حاجی سوداد) پێکەوە چا و قاوە دەخۆینەوە لەم رۆژانە لێم پرسی :

٭ مامۆستا کەی پەیمانگای هونەرە جوانەکانی بەغدا-ت تەواو کردوە؟

من یەکەم کەسم لەهەولێر دەرچووی پەیمانگای هونەرە جوانەکانی بەغدام لەساڵی ( ١٩٥٦) تەواوم کردوە لەبەشی موزێک لە ئالەتی (عود)‌ کەگەڕامەوەش لەگەڵ هونەرمەند(واحید مەرجان) تیپی (دەرسیم)مان دامەزراند و لەوێوە دەستمان بەکاری هونەری کرد. ئینجا لە کۆتایی شەستەکاندا (تیپی هونەری هەولێر) مان لەگەڵ ژمارەیەکی زۆری هونەرمەندانی هەولێر لەمانە هونەرمەندان (تەحسین تەها و فوئاد ئەحمەد و واحید مەرجان).

بەدرێژایی ئەو هەموو ساڵانەی کە ئێمە ئەندامی ئەو تیپەبووین و مامۆستا سەرۆکی تیپ بوو بۆ چرکەیەکیش دڵی کەسی نەشکاندوە و هەمیشە دەم بەپێکەنین بوو.لەرۆژە زۆر سەختەکانی سەردەمی رژێم بەرگری لە هونەرمەندان کردوە، هەموویانی لای خۆی لەچالاکی قوتابخانەکان کۆکردبۆوە تا ئێستاشی لەگەڵدابێ خۆشەویستی هەموانە.

ئەو و مامۆستا (باکوری) لەهەموو چالاکیە هونەرییەکان پێکەوە بوینە،چونکە هونەرمەند (باکوری)یش ئەندامی تیپی هونەری هەولێر بوو هەر بە هاوکاری گروپی موزیکی ئەم تیپە بەشداری ئاهەنگەکانی دەکرد هەرچەندیش مامۆستا (باکوری) مامۆستای زمانی ئێنگلیزی بوو، بەڵام هەرگیز لەکاری هونەریدا دانەدەبڕا،چونکە ئەو لە پەنجاکانەوە لەگەڵ هونەرمەند(شەماڵ سائیب)کە خوێندکار بوون لەبەغدا دوو هاوڕێ و دوو هونەرمەندی رادیۆی کوردی بەغدابوون، بۆیە تا ئێستاش کەلای باکوری ناوی شەماڵ سائیب دێ هەناسەیەکی سارد هەڵدەکێشێ و دەڵێ:

زۆر برادەر بووین پێکەوە خوێندکاربووین لە بەغدا من لە (دارالمعلین العالی) ئەو لە زانکۆی بەغدا کۆلێژی (علم النفس) لەیەک شوقەش پێکەوە دەژیاین لە شەقامی (الکفاح) جارێکیان من گۆرانی (ئەڵێن جوانە)م ئامادەکردبوو ئەویش(ئەرێ لەیلێ) گوتی:

بۆنایەی بیگۆڕینەوە تۆ ئەو (ئەرێ لەیلێ)یە بڵێ و من (ئەڵێم جوانە) دەڵێم، چونکە زۆر حەزی لەم گۆرانیە کردبوو،بەهەرحاڵ من رازینەبووم.

جائەوەی ئەمڕۆ لە هونەرەوە نزیک بێ دەزانێ لەبارودۆخێکی ئەوسای کۆمەڵایەتی ئەوانە چونەتە ناو دنیای هونەر چ گەورەییەکیان نواندوە.

مامۆستا (جەمال هیدایەت) دەگێڕێتەوە دەڵێ:
بابم زۆر حەزی لەوە بوو من ببمە ئەفسەر،چونکە ئەوساکە تەنها کوڕە ئاغاودەوڵەمەندو دەستڕۆیشتوەکان خوێندنیان تەواو دەکرد بەدەگمەن خەڵکی هەژاری وەک ئێمە هەرئەوانیش دەبونە ئەفسەر و حاکم و پزیشک،چونکە دەیانتوانی مەسروف بکەن….من قسەی بابمم شکاند چومە پەیمانگای هونەرە جوانەکان لەبەرئەوەی لەمیانی دەنگی (شەهابە)ی هەولێری هونەرم خۆشویست…مامۆستا باکوری-ش لەخێزانێکی هونەرپەروەربوون بەخۆی و (یوسف)ی برای موزیکژەنیش بوون و یەکێ بوو لەدامەزرێنەرانی (تیپی باواجی کۆیە).

ئەمانە کۆڵەگەی هونەری کوردی بوون لەهەولێر بەو تەمەنەشەوە هەمیشە خۆشەویستیان هەر بۆ ئەو هونەرەیە کەرۆژێ لەرۆژان سەری خۆیان بۆ هەڵگرتوە بۆ بەغدا تا شەهادە نامەیەکی بۆ بهێننەوە و لەم شارە بە مەحکەمی بنیاتی بنێن.

هەر تەمەن درێژبن ئەم دوو مامۆستایە ئەم دوو هونەرمەندە.

 79 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*