سەرەکی » راپۆرت » ئامادەكردنی: دیاری سابیر » بەلجیكا؛ دۆخی پەنابەران لە سایەی كوڕی پەنابەرێكی عیراقیدا

بەلجیكا؛ دۆخی پەنابەران لە سایەی كوڕی پەنابەرێكی عیراقیدا

دوای ئەوەی پۆستی وەزیری دەوڵەت بۆ كاروباری پەنابەران و كۆچی بەلجیكای وەرگرت، سامی مەهدی كە كوڕی پەنابەرێكی عیراقییە، هەڕەشەی دەركردنی ئەو كەسانەی كرد كە مافی پەنابەرێتییان رەتكراوەتەوە، هەروەك نیازی كەمكردنەوەی ژمارەی كەمپەكانی پەنابەرانیشی هەیە.

ژمارەی كەمپە داخراوەكان زیاد دەكرێن
ئەو وەزیرە تازەیەی بەلجیكا بە تەلەفزیۆنی VTMی وڵاتەكەی راگەیاند: تاكو ئێستا ئەو كەسانەی مافی پەنابەرێتییان رەتكراوەتەوە و دیپۆرتكراونەتەوە، ژمارەیان كەمە و حكومەتی برۆكسل تەنها 18 %یانی دیپۆرتكردۆتەوە، لە كاتێكدا لە ئەڵمانیا 35 %ی ئەو جۆرە كەسانە دیپۆرتكراونەتەوە، بۆیە پێویستە بیر لە زیادكردنی ژمارەی ئەو كەسانە بكەنەوە، كە مافی پەنابەرێتییان رەتكراوەتەوە و تاكو ئێستاش لە بەلجیكا ماونەتەوە.

سامی مەهدی جەختیشیكردەوە: ژمارەی كەمپە داخراوەكان زیاد دەكرێن و ئەو كەسانەی مافی پەنابەرێتییان رەتكراوەتەوە، لە رێی ئەو كەمپانەوە دیپۆرت دەكرێنەوە.

لە بەلجیكا 120 بۆ 150 هەزار پەنابەری نایاسایی هەیە
بە گوێرەی رێكخراوی سەكۆی هاووڵاتی بۆ پشتیوانیی پەنابەران: ئێستا لە بەلجیكا 120 بۆ 150 هەزار پەنابەری نایاسایی هەیە. هەروەها بەپێی داتاكانی بنكەی زانیاریی بۆ پەنابەران AIDA و ئەنجومەنی ئەوروپا بۆ پەنابەران EDRE، بەلجیكا لە ساڵی 2018 دا نزیكەی 23 هەزار و 500 داواكاریی بۆ مافی پەنابەرێتی پێشكەشكراوە، كە زۆربەیان خەڵكی سوریان و پاشان فەلەستینی و ئەفغانین.

ناڕەزایی پەنابەرە عیراقییەكان
لێدوانەكەی ئەو وەزیرە بە رەگەز عیراقییە، شەپۆلێكی ناڕەزایی لە نێو پەنابەرە عیراقییەكاندا دروستكرد و لە تۆڕە كۆمەڵایەتییەكانەوە رەخنەی توندیان ئاراستەی سامی مەهدی كرد و ناڕەزاییان دەربڕی لەوەی كە كوڕی وڵاتەكەی خۆیان، لە غەریبی دەریان دەكات.

عیراق رەتیدەكاتەوە
هەروەها لێدوانەكانی وەزیرە بەلجیكییەكە، ئیڤان فایەق وەزیری كۆچ و كۆچەرانی عیراقی هێنایە سەر خەت و هەر ناردنەوەیەكی زۆرەملێی پەنابەرانی وڵاتەكەی رەتكردەوە و رایگەیاند: وەزارەتەكەیان هەر دیپۆرتكردنەوەیەكی زۆرەملێی پەنابەرانی عیراق رەتدەكاتەوە و پێویستە رەچاوی دۆخەكەیان بكرێت. وتیشی: بە مەبەستی تاوتوێكردنی ئەو دۆسێیە، باڵیۆزی بەلجیكا لە بەغدا بانگهێشت دەكەن.

هەموو ئەوانە دەگرێتەوە كە بە نایاسایی چوونەتە بەلجیكا
وەكو وەڵامدانەوەیەكی وەزیرە عیراقییەكە، وەزیرەكەی بەلجیكا رایگەیاند: لێدوانەكەی بە هەڵە لێكدراوەتەوە و وڵاتەكەی هیچ كەسێك دەرناكات كە هەڕەشەی كوشتنی لەسەر بێت. وتیشی: مەبەستی هەڵگری هیچ رەگەزنامەیەكی دیاریكراو نەبووە، بەڵكو هەموو ئەوانە دەگرێتەوە كە بە نایاسایی چوونەتە بەلجیكا و لەگەڵ ئەوەی مافی پەنابەرێتییان رەتكراوە، بەڵام تاكو ئێستا لەوێ نیشتەجێن. هەروەك ئامادەیی خۆی دەربڕی بۆ هەماهەنگی و دروستكردنی پردێكی دۆستانە لە نێوان بەلجیكا و عیراق و سەرجەم وڵاتانی دیكە، لە پێناوی رێكخستنی كۆچ و پەنابەرێتیی رێكخراو و یاسایی.

ئەولەویەت بۆ كێیە؟
روونیشیكردەوە: ئەولەویەت بۆ پەسەندكردنی مافی پەنابەرێتی و پاراستنی ئەوانەیە، كە بەهۆی جەنگ یان كارەساتی سروشتییەوە هەڕەشە لەسەر ژیانیان هەیە، بەڵام ئەوانەی تەنها لەبەر باشكردنی گوزەرانیان و باری داراییان دێنە بەلجیكا، بە نایاسایی دێنە وڵاتەوە، ناتوانن دۆخی ژیانیان باشتر بكەن.

ئاماژەی بەوەشكرد: ئەو راستییەی كە باوكی عیراقییە، هیچ لە واقیعەكە ناگۆڕێت و پێشتریش زۆرێك لەو عیراقییانەی مافی پەنابەرێتییان رەتكراوەتەوە، بە زۆرەملێ رەوانەی وڵاتەكەیان كراونەتەوە.

دوای تەنگژەیەكی سیاسیی كە 493 رۆژی خایاند، حكومەتی نوێی بەلجیكا لە كۆتایی مانگی ئەیلولی رابردوودا پێكهێنرا و سامی مەهدی تەمەن 32 ساڵیش پۆستی وەزیری دەوڵەت بۆ كاروباری پەنابەران و كۆچی پێدرا، كە كوڕی پەنابەرێكی عیراقییە و ساڵی 1970 چۆتە ئەو وڵاتە.

سەرچاوە، ئاژانسەكان

 

 100 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*