سەرەکی » وتار » لەتیف فاتیح فەرەج‌ » ساڕێژكردنی برین

خورجە

ساڕێژكردنی برین

١
ئەوەی بەسەر كەركوك و ناوچە دابڕێنراوەكان هات، برینە، برینێكی قوڵ، ئەمە هەرگیز پێویستی بە بەخشینەوەی تۆمەت و ناشرین كردنی یەكتر نیە، ئەمە كەوتنە، كەوتنێكی قورس، دوای نزیكەی سێ‌ مانگ لە و كەوتنە ئێمە هێشتا سەرقاڵی ئەوەین یەكتر بشكێنین، لە كاتێكا ئەوانی تر خەریكی چنینەوەی بەروبوومی ئەو كەوتنەی ئێمەن، ئەوانەی بەشدار بوون لە غلۆربوونەوەكەدا خۆیان لێ‌ نەبان كردووە و یاریەكەیان بۆ ئەوە بە جێهێشتووە، تا ئەوانی دیكە بەئارەزووی خۆیان گۆڵ بكەن، ساڕێژكردنی برین پێویستی بە رێكخستنەوەی تیپەكەیە، نەك بە جێهێشتنی گۆڕەپانەكە، جێهێشتنی گۆڕەپان واتە خۆبەدەستەوە دان، ئایە برین بە خۆبەدەستەوە دان ساڕێژ دەبێت؟.
2
لە نەبوونی پێكەوەیدا، زەمینە بۆ ئەوانی تر، مەبەستم ڕكابەرەكانە دەڕەخسێت بۆ ئەوەی زیاتر پێی لێڕاكێشن، وەك ئەوەی لەم رۆژانە لە سەرگەڕان و گوندەكانی دەوروبەری دبز ڕوودەدەن،ئەوانی تر لە خوایان دەوێت ئێمە هەر خەریكی ئەو بەزمەی خۆمان بین، بەزمی بۆ وا كراو كێ‌ كردی و كێ‌ خائین و خەتابارە، لە كەوتن و شكستاهەموو هەوڵێك بۆ ناشرینكردنی یەكتر زیاتر ئەركی هەستانەوەكە قورس تر دەكات، قسە لە سەر ئەوە نیە دوێنێ‌ چی ڕوویدا قسە لە سەر ئەوەیە بە یانی چی بكەین، خەیاڵی سڕینەوەی یەكتر، خەیاڵێكی كوشندەو ناجۆرە، لە بری سڕینەوە دەكرێ‌ بیر لە چاككردن بكەینەوە .
3
لە راستیدا هەموو هەوڵێك بۆ ساڕێژكردنی برینەكەو كردنەوەی دەلاقەیەكی نوێ‌ بۆ ئەوەی خۆر بگاتە كونجە تاریكەكان و روناك بنەوە جێی ستایشە نەك تانەو تەشەر، كوردی باشورپێویستە یەكجار لە ژیاندا واز لە تانەو تەشەرو پاشقولی یەكتر بێنێت، لانی كەم بۆ ئەوەی گیانی گۆرانی شاعیر ئاسودە بێت كاتێ‌ گوتی « با پیس نەبیت خۆت مەدە لەم كوردی عێراقە « .
من دەزانم هەندێك لەو سیاسیانەی سوێندیان خواردووە لاپەڕە ژاراویەكان هەڵنەدەنەوە ئێستا گاڵتەی تەواویشیان بەو قسانە نایەت، لە كاتێكا ئێمە بە كۆڵێك برین و كۆستەوە هاتوینەتە ساڵی تازەوە، كەچی هێشتا هەن گەرەكیانە شیرو تیر لە یەكتر بسوین .

 252 جار بینراوە