سەرەکی » چاوپێکه‌وتن » دوو دیداری کوردستانی نوێ لەیادی کیمیابارانی هەڵەبجەی شەهیددا

دوو دیداری کوردستانی نوێ لەیادی کیمیابارانی هەڵەبجەی شەهیددا

لە دوو دیداری جیاجیادا هەریەک لە پارێزگاری هەڵەبجە و سەرۆکی شارەوانی پڕۆژەکانی شارەکە و کەموکووڕییەکانی دەخەنە ڕو و ئاماژەش بەو ئاستەنگ و قەیرانانە دەکەن کە رووبەڕووی خزمەتکردنی شارەکە دەبنەوە، لەپێش هەمووشیانەوە ئەو قەیرانە داراییەی کە لە ساڵی 2014ەوە بەرۆکی هەرێم بەگشتی و هەڵەبجە بەتایبەتی گرتووە و پێیانوایە کە ئەو قەیرانە ئەگەر بۆ ناوچەکانی دیکە یەک قەیران بێت، ئەوا بۆ هەڵەبجە چەند قاتی ئەوە کاریگەریی هەبووە.

سازدانی دیدارەکان: فاروق فەتاح

 

پارێزگاری هەڵەبجە: هەڵەبجە پێویستی بە نزیکەی 500 ملیار دینارە تا بتوانرێت سیمای پارێزگایەکی پێ بدرێت

*لە ماوەی دەستبەكاربوونتانەوە وەك پارێزگاری هەڵەبجە ئەو كارو خزمەتگوزاریيانە كامانە كە پێشکەش بەو شارەتان کردووە؟

لە ماوەی دەستبەكاربوونمانەوە تا ئەمڕۆ کە دوو ساڵ و چوار مانگە توانیومانە چەندین كاری گرنگ پێشکەش بکەین وەک ئەوەی زۆرێك لەو دەزگا و فەرمانگانەی كە سەربە حكومەتی عیراقی فیدراڵن و بە هاوکاریی لەگەڵ حكومەتی هەرێمی كوردستاندا لە هەڵەبجەدا كردوومانەتەوە، کەئەوەش زیاتر بۆ ئەوەی عیراق بێتە ژێر باری بڕیارەکەی خۆی سەبارەت بە داننان بە هەڵەبجەدا وەک پارێزگایەکی عیراق، بە تایبەتیش ئەو گەرمانگانەی كە پەیوەندییان بە وەزارەتی ناوخۆوە هەیە.

هەروەک توانیومانە لە ساڵی پێراردا رێگەی نێوان (تەوێڵە – ئاوێسەر) نۆژەن بکەینەوە و سەرلەنوێ قیرتاوی بكەینەوە كە خەڵكی بۆ گەشتوگوزار ئەوەش بووە مایەی رەزامەندیی خەڵکی ناوچەکە و گەشتیارانیش.
هەروەها تەواوکردنی رێگای دووسایدی (هەڵەبجە – سەید سادق) كە ئێستا ئەوە كارئاسانییەكی زۆری كردووە لە نێوان (هەڵەبجە – سلێمانی)دا واتە ئێستا نێوانی پارێزگای هەڵەبجە بۆ پارێزگای سلێمانی تاكە دوو پارێزگان کە لەمسەرەوە تا ئەوسەر دوو سایدە.

یەکێکی دیکە لەو کارانەی کە توانیومانە بە هاوكاریی حكومەتی هەرێمی كوردستان و بەیارمەتی بەڕێز نووسینگەی قوباد تاڵەبانی جێگری سەرۆکی حکومەتی هەرێم بڕی 10 ملیۆن دۆلاریان بۆ پردی (تۆو قووت) بۆ دابین کردین، واتە حكومەتی هەرێم ئەو 10 ملیۆنەی بۆ ئامادەکردووین تا پردی (تۆوقووت)ی پێی تەواوبكەین ئەوكاتە ئیتر نێوان (هەڵەبجە – دەربەندیخان) ، (هەڵەبجە – گەرمیان) كارئاسانیی دەبێت و رێگەكە كورت دەبێتەوە.

چەندین كاری دیکەش کە لە سێکتەرەکانی پەروەردە، شەهیدان، كشتوكاڵ. هەروەها لەگەڵ بەڕێوەبەرایەتی رۆشنبیریی هەڵەبجەشدا چەندین كارو چالاكی و فێستیڤاڵی جۆراوجۆرمان کردووە.

*ئەو پڕۆژانە چین کە بەنیازن لە ئایندەدا بۆ سەنتەری پارێزگای هەڵەبجە و سنوورەکانی ئەو پارێزگایە پێشکەشی بکەن؟

هەوڵمانداوە لەگەڵ حكومەتی هەرێمی كوردستان بگەینە ئەو رایەی کە سەرباری ئەوەی قەیرانی ئابووریی لائارادایە، نەڵام داومانكردووە کە حكومەتی هەرێم پێنج سەد كەس ئەگەر بە دامەزرانیش نەبێت ئەوا بە گرێبەست بۆ سەرجەم سێكتەرەكان دابمەزرێنێت و داوەشمان كردووە کە پەرلەمان دانیشتنێكی بهێنێتە هەڵەبجە یان ئەجێندای یەکێک لە کۆبوونەوەکانی خۆی تایبەت بکات بە كەیسی بە پارێزگابوونی هەڵەبجە و پێویستییەكانی و داواشمان لە حكومەتی هەرێمی كوردستان کردووە کە بڕی ئەو داهاتانەی كە لە هەڵەبجە و پارێزگای هەڵەبجەدا دەست دەکەون، لانیكەم بۆ دوو تا سێ ساڵ لەو داهاتە بمان بەخشن، واتە هەمووی بۆ خەرجیی بنیاتنانەوەی ژێرخانی ئابووری و كارە خزمەتگوزارییەكانی هەڵەبجە بێت.

*دەکرێت ئێستا بڵێین هەڵەبجە سیمای بە پارێزگابوونی پێوە دیارە؟

لەبارەی ئەوەی کە ئاخۆ سمیای بە پارێزگابوون بە هەڵەبجەوە دیارە یان نا، ئەوە خۆتان وەک رۆژنامەنووس و خەڵکی ناوچەکە ئەوە دەزانن کە هەڵەبجە مانگی 2014 بوو بە پارێزگا، واتە لە 14/3/2014 دەبێت بە پارێزگا و لە 10/6/2014 هێزێكی نەگریسی وەكو داعش شارێكی گەورەی وەكو (موسڵ) دەگرێت، بەمەش قەیرانی ئابووریی روودەكاتەوە عیراق بەگشتی و هەرێمەکەی ئێمە بەتایبەتی و شەڕ بەرەو كەركوك و گوڵاڵە و شنگال و خانەقین و بەرەو ناوچەكانی تری كوردستان دێت و ئەمەش كاریگەریی خراپی کردە سەر ئابووریی عیراق، سەرەڕای ئەوەش هەر لەسەرەتای ساڵی 2014دا لەلایەن بەغداوە بوجە و مووچەی هەرێمی كوردستان بڕا، بۆیە لەماوەی ئەم شەش ساڵەدا كە هەڵەبجە بووە بە پارێزگا، شەش ساڵ بووە پڕی قەیران و نەهامەتی، تا ناوەڕاستی ساڵی 2018 ، واتە لە كۆتاییەكانی ساڵی 2018 ئیتر وردە وردە مووچەی فەرمانبەران و كارگوزاران دراوە. ئێمە بۆ ئەم مەبەستە بەرنامەمان ئەوەیە كە سیمای هەڵەبجە بگۆڕین چ ئەوانەی پێش ئێمە و ئەوانەش کە دوای ئێمە دێن، بەڵام بمانەوێ سیماكەی بە شەش ساڵی دوای بە پارێزگابوون بەتەواوی بگۆڕێت، بێگومان پێوەی دیارنابێت، بەڵکو بە بڕوای من هەڵەبجە لانیكەم دەبێت (300 -500) ملیۆن دۆلار واتە نزیكەی نیو ملیار دۆلاری تێدا خەرج بكرێت لە ریستورانتی پێنج ئەستێرەی گەورە و هۆتێلی 5 ئەستێرەیی گەورە و جادە و شەقامی گشتی و پارك و باخچەی رازاوە، هەروەها بتوانین هۆڵی گەروە كە بۆ سیمینار بۆ یادی كیمیاباران بۆ كۆڕ و كۆبوونەوەی گەورە بشێت ئەوەش دەخوازێت پارەی زۆری تیا خەرج بکرێت ئەگەر بمانەوێت بەتەواوی سیمای بە پارێزگابوونی پێوە دیاربێت، ئەمەش دیارە بە حوكمی ئەو قەیرانە داراییەی لە عیراق و هەرێمیشدا هەیە کارێکی قورسە، بەڵام خۆشبەختانە دوو ساڵە تا رادەیەکی کەم لەو قەیرانە دەرچووین و دەتوانین بڵێین باشترە لەجاران، بەڵام هێشتا وەك پێویست ئەو پارەیە نە لەبەردەستی حكومەتی هەرێمدایە نە پارێزگای هەڵەبجەدا.

*بۆ كەم كردنەوەی بێكاریی و دۆزینەوەی هەلی كار بۆ هەڵەبجەییەكان و خەڵكی ناوچەكە بە گشتی چیتان کردووە و هەوڵەکانتان بە چ ئاراستەیەکدایە؟

لەبارەی هەلی کارەوە بەشێکی پەیوەستە بە قەیرانی ئابوورییەوە، رەخساندنی هەلی كاریش بۆ خەڵكی ناوچەكە وەكو سەرەتا وتم ئێمە وەکو پارێزگار داومان لە حكومەتی هەرێمی كوردستان كردووە كە 500 پێنج سەد كەسمان بۆ دابمەزرێنی بۆ سێكتەرەكانی (كشتوكاڵ و پەروەردە و شەهیدان و تەندروستی و ناوخۆ لە کایەکانی پۆلیس و پاسپۆرت) و بۆ هەموو ئەو سێكتەرانەی تر کە کێشەی کەمیی کارمەند و دەستی کاریان هەیە و داواشمان كردووە حكومەتی هەرێم لە رێگەی پەرلەمانەوە ئەو قانون و یاسایانەی كە دەردەچێت، پێناسەی قانونی تێدابێت هەتا كار ئاسانی بۆ كاری وەبەرهێنان لە هەڵەبجەدا بكرێت بۆ ئەم مەبەستەش لەگەڵ بەڕێزان وەزیری پلاندانان و وەزیری ئاوەدانكردنەوە و دەستەی وەبەرهێنان دانیشتووین و بەڕێز كاك دانا عەبدولکەریم وەزیری ئاوەدانكردنەوە و بەڕێز (د. دارا) وەزیری پلاندانان و (د. محمد شوكری) سەرۆکی دەستەی وەبەرهێنان لەگەڵ رای ئێمەدان و پێیان وایە کە دەبێت هەڵەبجە دەستی ئاوەدانیی تێدابێت تا هەلی كاری تێدا بڕەخسێنرێت، دەبێت هەموومان پێکەوە خزمەتی ئەم پارێزگایە بكەین، چونكە هەم كورد وەکو نەتەوە قەرزارێتی و هەم كۆمەڵگەی نێودەوڵەتیش، بۆیە ئەمە بە پلانی چوار ساڵە و پێنج ساڵە دەكرێت، من هێشتا دوو ساڵ و چوار مانگە دەستبەكاربووم، ئەو برادەرانەی پێش من كە لێرە پارێزگاربوون كاری باشیان كردووە و هیوادارم منیش توانیبێتم و لە ئایندەشدا بتوانم هەنگاوێك زیاتر لەوەی ئەوان کارەکان ببەمە پێشەوە و سەر ئومێد دەخوازم دوای منیش ئەوانەی دێن وەكو تەواوكاری كاروانەکە هەر كەسەو بەردێک بخاتە سەر بەردی ئاوەدانکردنەوەی هەڵەبجە تا بەهەوڵی هەمووان دەیکەینە پارێزگایەكی نموونەیی لەگەڵ هەر سێ پارێزگاكەی دیكەی ئێستای هەرێمی كوردستاندا.

*بۆ ئەمساڵ بەرنامەتان چییە وەک پارێزگا بۆ یادکردنەوەی کیمیابارانکردنی هەڵەبجە؟

ئێمە بە حوكمی ئەوەی كە خۆمان وەک خەڵكی هەڵەبجە یادی کیمیابارانی هەڵەبجە لە ویژدان و بیرو ئەقڵماندا دەكەینەوە، بۆیە ئەمساڵ بۆ یادەکە لە گۆڕستانی شەهیدانی هەڵەبجە ئەو یادە دەكەینەوە، واتە ئێمە یاد دەكەینەوە، بەڵام هۆڵمان ییە، بانگهێشتی رەسمیمان بۆ كەس نییە و كۆڕو كۆبوونەوەمان نییە، بگرە هەموو كەس ئازادە چۆن ئەو یادە دەكاتەوە، هەركەس دێت بۆ خۆی دێت، ئێمە سوپاسیان دەكەین.
ئێمە پێشوازیی لە هەركەسێك دەكەین كە دێت بۆ ئەو یادە و تاجە گوڵینەیەك دادەنێت یان فرمێسكێكمان بۆ دەڕێژێت یان دێت لەگەڵماندا فاتیحایەك بۆ سەر گڵكۆی شەهیدەکانمان دەخوێنێت.
وەكو پارێزگای هەڵەبجە ئەمساڵ لە ویژدانی خۆماندا ئەو یادە دەكەینەوە هیوادارین بتوانین كارێك بكەین كەمترین خەڵك كۆببێتەوە، بۆیە ئەمساڵ بە خۆپارێزیی و بە رەچاوكردن و لەبەرچاوگرتنی رێنماییە تەندروستییەكان ئەو یادە بەرزڕادەگرین بۆ سەلامەتیی هاووڵاتییان و خەڵكی شارەكەمان.

سەرۆکی شارەوانی هەڵەبجە: ئەگەرچی شوێنەواری کاولکاریی بە سەنتەری شارەکەوە دیارە، بەڵام هەڵەبجە زۆر گەشەی کردووە

*وەک سەرۆکی شارەوانی ئەو کارە خزمەتگوزاریانە چین کە لە ماوەی دەستبەکاربوونتانەوە بۆ شارەکەتان کردووە؟

لەو ماوەیەدا کە من پۆستی سەرۆکایەتی شارەوانیم وەرگرتووە، بەداخەوە قەیرانی دارایی بەرۆکی هەموو کوردستانی گرتووە، ئەمەش ئەگەر کاریگەریی یەکجار لەسەر شوێنەکانی تر هەبووبێت، ئەوا لەسەر هەڵەبجە و هەڵەبجەییەکان دوو هێندە بووە.

هەروەها روونیکردەوە کە هەڵەبجە لەکاتی تاوانی کیمیابارانی ساڵی (١٩٨٨) دا جگە لەوەی کە بۆردوومان و کیمیاباران کرا و بەشێکی وێران و خاپوور بوو، ئەو ئاوەدانییەشی کە بەپێوە مابوو لەلایەن رژێمی بەعسی رووخاوەوە تەقێنرایەوە.

ئەمەش بوو بەهۆی ئەوەی کە گرفتی گەورە دروست بێت و نەتوانرێت وەک پێویست خزمەت بکرێت. دەکرێت ئێمە دەستکردن بە ئاوەدانکردنەوەی هەڵەبجە و دەوروبەری بگەڕێنینەوە بۆ دوای ساڵی (٢٠٠٣)، چونکە ئەوە بەتەواوی سەرەتایی ئاوەدانکردنەوەی هەڵەبجە بوو. لە دوای راپەڕین هەڵەبجە تەنها شوێنەواری شارێکی وێرانە بوو، بەداخەوە ئابڵوقەی ئابووریی جیهان لەسەر عیراق و هی عیراقیش لەسەر هەرێم بوو، پاش ماوەیەکی کەمیش ناوچەکە بووە مەیدانی شەڕی ناوخۆ و دەسەڵاتی حکومەتی هەرێمی بەسەرەوە نەما تا بەپێی پێویست ئاوەدانی بکاتەوە، لە سەروبەندی رووخانی رژێمیشدا شەڕی جوندولئیسلام و ئەنسار دەستیپێکرد، ئیتر دەتوانین بڵێین لەدوای 12 ساڵ لە راپەڕین ئینجا دەستی ئاوەدانی گەیشتە هەڵەبجە و ئەوەش تا کۆتایی ساڵی 2013 بەردەوام بوو، دووبارە بڕینی بودجە و مووچەی هەرێم لەلایەن بەغدا و قەیرانی دارایی و شەڕی داعش بەرۆکی هەڵەبجە و هەموو کوردستانی گرتەوە.

بۆیە لەوەتەی کە من بووم بە سەرۆکی شارەوانی، توانیومانە کەم تا زۆر هەندێک کارو خزمەت پێشکەش بکەین وەکو سەوزکردن و هەڵمەتی نەمام ناشتن بە هاوکاریی سەرجەم لایەنە پەیوەندیدارەکان. ئەوەی کە گرفتە خزمەتگوزارییەکان لە ئاست چاوەڕوانی خەڵکی خۆشەویستی هەڵەبجەدا نییە و هەقی خۆشیانە دوای (33) ساڵ کە هێشتا کۆڵان هەبێت پێویستی بە قیرتاوکردن و کۆنکرێت کردن بێت و نەتوانین بۆیان بکەین.
بەداخەوە ئێستاش بودجە کەم بۆتەوە و قەیرانی دارایی هەیە، سەرەڕای کەمبوونەوەشی بەڵام ئەوەشمان وەک پێویست بۆ سەرف ناکرێت کە بتوانین لانیکەمی خزمەتگوزاریی پێشکەش بە هاووڵاتیان بکەین.

*پێتوانییە تا ئێستاش هەڵەبجە سیمای نەگۆڕاوە و پێویستی بە گۆڕانکاریی زیاترە؟

بە بڕوای من هەڵەبجە تاڕادەیەک سیمایی گۆڕاوە هەرچەندە سەنتەری ناوشاری هەڵەبجە هەروەک خۆیی ماوەتەوە، بەڵام ئەوەی کە گۆڕانکاریی تێداکراوە، لە رووی پاک و خاوێنی و قیرتاوکردنی کۆڵانەکانی ناوبازاڕ و سەنتەری ناوشارەوە بووە، بەڵام هەندێک گۆڕانکاریی هەبووە کە فراوانی بکەین، بەڵام بەداخەوە جارێکی تر بەهۆی قەیرانی داراییەوە نەتوانراوە ئەوە بکرێت. ئەوەشمان لەیادنەچێت هەڵەبجە پێش کیمیاباران و کاولکردنی لە ساڵی 1988 رووبەرەکەی تەنها (٧) حەوت کیلۆمەتر دووجا بووە، بەڵام ئێستا نزیکەیی (32) کیلۆمەتر دووجایە.

ئەمەش خۆی بۆ خۆی فراوانبوونێکی زۆر باشە و بەوەش سیماکەی زۆر گۆڕانکاریی گەورەی بەسەردا هاتووە.

هەر لەو گۆڕانکارییانەی کە بەسەر شارەکەدا هاتووە، بۆ نموونە ئێستا زانکۆی هەڵەبجە و پەیمانگەی هونەرە جوانەکان و یاریگای وەرزشی نێودەوڵەتی لە هەڵەبجەدا هەن، جگە لە چەندین پڕۆژەی دیکە.
بەڵام ئەمانەش وەک پێویست لە ئاستی داواکاریی دانیشتووانی هەڵەبجەدا نین و هەقی خۆشیانە هەرچییەکیان بۆ بکرێت.

*ئەو رێگرییانە چین کە دێنە پێشتان بۆ خزمەتکردنی ئەم شارە؟
-ئەو گرفتانەی کە دێنە رێگەمان بەداخەوە لە هەندێک شوێندا زیادەڕۆیی هەیە کە زۆرجار دەبێتە گرفت بۆ جێبەجێ ‌کردنی پڕۆژەکانمان، بەڵام ئێستا گرفتی سەرەکیمان نەبوونی بودجەیە بۆ خزمەتکردنی هاووڵاتیان، خزمەتکردنی هاووڵاتیان، چونکە هەموو خزمەتگوزارییەک پێویستی بە پارە و بووجەیە، ئەگەر پارە لەبەر دەستدا نەبێت ناتوانرێت ئاسانترین خزمەتگوزاریی پێشکەش بکەین، بەداخەوە ئەمەش یەکێکە لە گرفتە سەرەکیەکانمان، بۆیە ئێمە داوا لە حکومەتی هەرێمی کوردستان دەکەین ئاوڕێکی جدی لە دانیشتووانی هەڵەبجە بداتەوە، بەتایبەتی ئەو پڕۆژانەی کە راگیراون لە سەرەتای ساڵی (2014) ەوە. دیارە کاتێک کە قەیرانی دارایی دەستیپێکرد، چەندین پڕۆژەمان هەبوو، نزیکەیی (٩)پڕۆژەیی سەرەکی لەناو شاری هەڵەبجەدا هەن، جگە لەوەی کە پڕۆژەکان وەستاون، بوونەتە هۆی دڵگرانیی ئێمە و دانیشتوانی شارەکەش.

*تاچەند رازیت لە ئەدایی کارەکانی خۆت بەرامبەر بە کەسوکاری قوربانیانی شارەکە؟

سەبارەت بە کەسوکاری سەربەرزی شەهیدان سەری رێزو نەوازش بۆ سەرجەم وارسی شەهیدان دادەنەوێنم، بە راستی زۆر پێویستە ئاوڕێکی بەپەلە و جدییان لێ بدرێتەوە، بەتایبەتی بریندارەکان کە بەداخەوە رۆژانە لێیان وەفات دەکات، پێویستیان بەوەیە بنێردرێنە دەرەوە بۆ چارەسەر، یاخود پزیشکی پسپۆڕ و چارەسەری تایبەت بە خۆیان بۆ بهێنرێت.

بۆئەوەی چیتر بە دەست ئەو نەخۆشییانەوە نەناڵێنن. بەداخەوە وارسی شەهیدان گلەیی زۆریان هەیە، هەرچەندە ئەم پرسیارە دەبوو زیاتر رووبەڕووی بەڕێوەبەرایەتیی شەهیدان بکرێتەوە باشترە.

میراتگرانی شەهیدان هەرچییەکیان بۆ بکرێت، ناگاتە ئاستی ئەوەی کە ئەو ئەندامێکی خێزانەکەیان لەدەستداوە، بۆیە هەتا لەلایەن حکومەتی هەرێمی کوردستانەوە خزمەت بکرێن و گرنگی بە منداڵەکانیان بدرێت و کورسیی خوێندنیان بۆ دابین بکرێت، ئەو پێناسەیەی کە وەکو ناسنامە هەڵیانگرتووە، ئیشی پێ بکرێت، لە فەرمانگە حکومییەکان و دەزگا و لایەنە پەیوەندیدارەکان رێزی تایبەتیان لێ بگیرێت.

خۆ ئەگەر نەشتوانرێت لە رووی مادییەوە هاوکاریی بکرێن، خۆ دەتوانرێت بەهۆی ئەوەی کە ئەو ناسنامەیان هەڵگرتووە لەلایەنی مەعنەوییەوە دڵیان رابگیرێت و رێزیان لێ بگیرێت. بۆ نموونە لە زۆرێک لە باجە حکومییەکان ببەخشرێن. ئەمە ئەگەر هیچیش نەبێت لە رووی مەعنەوییەوە هەست بە بوونی رێزی خۆیان دەکەن و ئاسوودەییەک بە دڵ و دەروونیان دەبەخشێت و هەست دەکەن کەسوکاریان لە پێناویی بەدەستهێنانی ئازادیی ئەمڕۆی کوردستاندا شەهیدبوون.

ئەوەشی کە لەلای شارەوانییە بۆ کەسوکاریی شەهیدان دەتوانم بڵێم کە ماوەی (10)ساڵ دەبێت ژمارەی زەوییان وەرگرتووە، ئەو ژمارانە جێگیر نین، واتە تەنها ژمارەیە، وەکو میراتگریی‌ شەهید وەریان گرتووە، ئەوانەی کە یەک شەهیدیان هەیە، من ئەوە نزیکەی چوار ساڵە بووم بە سەرۆکی شارەوانی لە پێشینەی کارەکانمدا بووە کە بتوانم ئەو ژمارەیەیان بۆ بکەم بە زەویی (سورەت قەید)یی خۆیان هەبێت، خۆشبەختانە ئەو کارە گەیشتۆتە قۆناغی کۆتایی بەهیوام لە ئایندەیەکی نزیکدا زەوییەکانیان بەسەردا دابەش بکەین، دواکەوتنی ئەمەش بەهۆی ئەوەوە بووە کە زەوی نەبووە لە سنووری شارەوانی هەڵەبجەدا، راستە زەوییەکان کشتوکاڵین، بەڵام هیچ پێسینەیەکیان نەماوە.

*چ هەستێکتان هەبوو کە بەڕێزتان وەک شایەتحاڵێک لە کەیسی هەڵەبجەدا لە دادگای باڵای تاوانەکانی عیراق دەستنیشانکران؟

ئەمریکاییەکان لە ساڵانی (2004 – 2005) چاوپێکەوتنیان لەگەڵ نزیکەی هەزار کەس لە خەڵکی هەڵەبجەدا کرد، هەتا تاوانەکەیان بۆ بگێڕنەوە، منیش یەکێک بووم لەو کەسانەی کە بانگکرابووم بۆ وەرگرتنی زانیاریی و گێڕانەوەی تاوانەکە، دیارە هەڵبژاردنی من لەوەوە بوو کە من بۆخۆم کەسم لە کیمیابارانەکەدا شەهید نەببوو، دەتوانم بەشێوەیەکی راست و دوور لە زاڵبوون و کاریگەریی سۆزی لەدەستدانی کەسی نزیک و پلەیەک و وابەستەبوون، دەتوانم تارادەیەک بێلایەنانە، تاوانەکە بگێڕمەوە، ئەوەش یەکێک بوو لە خۆشترین کاتەکانی ژیانم کە بەشداریی دادگای باڵایی تاوانەکانم کرد و سەدام حسێن و سەرانی رژێمم لە قەفەسی تاوانباریدا بینی، ئەو پرسیارەش کە لێیان کردم لەکاتی وەرگرتنی شایەتدا وتیان دەتەوێت لە پشتی پەردەوە، یان بەبێ پەردە قسە بکەیت؟ منیش زۆر بوێرانە وتم حەزدەکەم بەبێ پەردە قسەبکەم و وەک شایەتحاڵێک ئەو تاوانە رووبەڕووی سەدام و سەرانی رژێم بکەمەوە.

کوێستان ئەکرەم فەرەج

*ساڵی (1966) لە هەڵەبجە لە دایکبووە، قۆناغەکانی سەرەتایی و ناوەندیی و ئامادەیی لە هەڵەبجە تەواوکردووە، دەرچووی پەیمانگەی تەکنۆلۆ‌‌جی کەرکوکە.

*ساڵی 1982 پەیوەندیی کردووە بە رێکخستنەکانی ی.ن.ک-ەوە.

رۆژی کیمیابارانی هەڵەبجەی بە چاوی خۆی بینیووە، بۆیە بۆ کەیسی دادگاییکردنی سەرانی رژێم لە بەغدا ئامادەبووە بۆ شایەتیدان لەسەر راست و دروستی ئەو تاوانە.

لە ساڵی (1993) وەکو فەرمانبەرێکی ئاسایی لە شارەوانیی هەڵەبجە دامەزراوە و هەموو قۆناغەکانی بڕیووە وەک فەرمانبەر و لێپرسراوی بەش و جێگری سەرۆکی شارەوانی و دواتر لە (1/6/2016) وەک سەرۆکی شارەوانیی هەڵەبجە دەستنیشان کراوە.

 419 جار بینراوە