سەرەکی » ئەدەب و هونەر » پۆرنۆگرافی له‌ نۆڤڵێتی په‌نجا و هه‌شت دا

پۆرنۆگرافی له‌ نۆڤڵێتی په‌نجا و هه‌شت دا

نه‌زیره‌ ره‌سوڵی

له‌ فارسییه‌وه‌: ئه‌ده‌ب و هونه‌ر

زاراوه‌ی پۆرنۆگرافی بۆ یه‌كه‌م جار له‌ سه‌ده‌ی نۆزده‌دا هاته‌ ناو زمانی ئینگلیزییه‌وه‌. پۆرنۆگرافی بریتییه‌ له‌ وێنه‌گرتنی ره‌فتاره‌ سێكسییه‌كانی مرۆڤ یان ئاژه‌ڵ كه‌ ئامانجه‌كه‌ی جووڵاندن و وروژاندنی وه‌رگره‌. ئه‌مشه‌ له‌قاڵبه‌ جیاوازه‌كاندا ده‌بێت وه‌كو كتێب، وێنه‌، فیلم، گۆڤار، په‌یكه‌ر، وێنه‌كێشان و … ده‌خرێته‌ڕوو

پۆرنۆگرافی یانی زه‌قكردنه‌وه‌ی سێكس و ئه‌ندامه‌ سێكسییه‌كان له‌ لایه‌كه‌وه‌ و دیارنه‌مانی ده‌روون و هه‌ست و سۆز و له‌ هه‌مووی گرنگتر له‌ ده‌ستدانی گه‌وهه‌ری هونه‌ری له‌ لایه‌كی تره‌وه‌.
كتێبی په‌نجا و هه‌شت له‌ دوو نۆڤڵێت پێكهاتووه‌: به‌ ناوی په‌نجا و هه‌شت و موفید به‌گ.

ئه‌ده‌بی كتێبی په‌نجا و هه‌شت ئه‌ده‌بێكی «پۆرنۆگرافی»یه‌.

نووسه‌ر له‌م كتێبه‌دا به‌ شێوه‌یه‌كی روون و ئاشكرا به‌ شێوه‌یه‌كی ئه‌ده‌بی پۆرنۆگرافی بۆ خوێنه‌ر باس ده‌كات. بێگومان هه‌ردوو نۆڤڵێته‌كه‌ تایبه‌تمه‌ندیی و خاسیه‌تی تایبه‌ت به‌ خۆیان هه‌یه‌ كه‌ خوێنه‌ر ده‌به‌نه‌وه‌ بۆ سه‌رده‌می رابردوو و گه‌لێ كه‌لتووری كوردی كه‌ پێشان هه‌بوون. به‌ڵام به‌شی یه‌كه‌می كتێبه‌كه‌ واته‌ نۆڤڵێتی (مه‌سیما) واته‌ هه‌مان نۆڤڵێتی په‌نجا و هه‌شت زیاتر سه‌رنجی منی راكێشا. په‌نجاو هه‌شت حیكایه‌تی ژنێكه‌ به‌ ناوی (مه‌سیما) كه‌ ژنی یه‌كێك له‌ كاربه‌ده‌ستانی ده‌وڵه‌ته‌، مه‌سیما له‌ كاتی سێكسدا له‌گه‌ڵ مێرده‌كه‌ی، سه‌باره‌ت به‌ دزیی و دزیی ده‌وڵه‌ت و گه‌نده‌ڵیی و كاولكارییه‌كانی مێرده‌كه‌ی ده‌رده‌دڵ ده‌كات. سێكس به‌لای مه‌سیماوه‌ جگه‌ له‌ كابووسێكی ترسناك شتێك دیكه‌ نییه‌.

ئه‌و ئه‌ده‌به‌ی نووسه‌ر له‌م نۆڤڵێته‌دا به‌كاری هێناوه‌ له‌گه‌ڵ ئه‌و ئه‌ده‌به‌ كه‌ تا ئێستا خوێندوومه‌ته‌وه‌ جیاواز بوو، بێ په‌روایی و رێك راست بوونی نۆڤڵیته‌كه‌، ئه‌و ئازار و ئه‌شكه‌نجه‌یه‌ی مه‌سیما ته‌حه‌مولی ده‌كات هه‌ر هه‌مووی مایه‌ی تێڕامان بوون.

هه‌روه‌كو پێشان ئاماژه‌م بۆ كرد مه‌سیما به‌ ده‌ست ئازار و ئه‌شكه‌نجه‌وه‌ ده‌ناڵێنێت و له‌ كاتی سه‌رجێی له‌گه‌ڵ مێرده‌كه‌یدا به‌رده‌وام ده‌رده‌دڵ ده‌كات. ده‌رده‌دڵ سه‌باره‌ت به‌ مێردێك كه‌ هه‌موو رۆژێك ئاواتی به‌ مردنی ده‌خوازێت و به‌ ده‌ست دزیی و خیانه‌ته‌كانییه‌وه‌ ئازار ده‌چێژێت. مه‌سیما پێی گوتین مێرده‌كه‌ی له‌ كاتی سه‌رجێیدا به‌رده‌وام سووكایه‌تی و قه‌شمه‌ری پێده‌كات.

كه‌واته‌ به‌ سه‌رنجدانی ئه‌و قسه‌ و زاراوانه‌ی كه‌ هه‌موویمان له‌ ده‌قه‌كه‌دا بینی گه‌یشتینه‌ ئه‌و ئه‌نجامه‌ی نووسه‌ر ئه‌ده‌بیاتی پۆرنۆگرافی به‌كارهێناوه‌. له‌ پۆرنۆگرافیدا زیاتر جه‌خت له‌ ئه‌ندامی سێكسی و وێنه‌كێشانی ده‌كرێته‌وه‌ و رووی سۆزداری و ده‌روونی هه‌ردوولا فه‌رامۆش ده‌كرێت.

به‌ شێوه‌یه‌كی روون و ئاشكرا و به‌ به‌رده‌وامیی ئه‌وه‌ ده‌بینین كه‌ له‌ په‌یوه‌ندیی سێكسی مه‌سیما و مێرده‌كه‌یدا هیچ ئاماژه‌یه‌ك بۆ چێژی سۆزداریی و جوانناسی وجودی نییه‌، هه‌ردوولا به‌رده‌وام گاڵته‌ به‌ ئه‌ندامی سێكسی یه‌كتر ده‌كه‌ن. بۆ نموونه‌« «دێڕه‌كانی كۆتایی ل 21 و …»

له‌ پۆرنۆگرافیدا سێكس كورت ده‌كرێته‌وه‌ بۆ كردارێكی ساده‌ و میكانیكی و ته‌نیا جه‌خت له‌ كرداره‌كه‌ و ئه‌ندامی سێكسی ده‌كاته‌وه‌ و ئیشه‌كه‌ی ته‌نیا نیشاندان یان وه‌سفكردنی ئه‌و ئه‌ندامانه‌یه‌، له‌م جۆره‌ ئه‌ده‌به‌دا ئاماده‌گیی ژن زیاتر وه‌كو بكه‌رێكی سێكسییه‌ و ئاسایی له‌ روانگه‌ی پیاوه‌وه‌ نووسراوه‌ كه‌واته‌ بێگومان هاوڕێكه‌ له‌گه‌ڵ ئاره‌زووه‌ سێكسییه‌كانی پیاودا.

هه‌روه‌كو له‌ نۆڤڵێته‌كه‌دا ده‌بینین و پێشانیش ئاماژه‌م پێدا مه‌سیما بۆ مێرده‌كه‌ی ته‌نیا بكه‌رێكی سێكسییه‌ و په‌یوه‌ندییه‌كه‌ نه‌ك ته‌نیا هیچ سه‌رنڕاكێش نییه‌ به‌ڵكو زیاتر به‌ یاد هێنه‌ره‌وه‌ی ئازار و ناخۆشییه‌كانێتی، (بۆ نموونه‌ كاتێ مێرده‌كه‌ی دێته‌ ماڵه‌وه‌ كابوس ئازاره‌كانی ده‌ستپێده‌كات سه‌باره‌ت به‌ ناخۆشییه‌كانی له‌گه‌ڵ خۆیدا ده‌دوێت، ئاسمان به‌لایه‌وه‌ ده‌بێته‌ هه‌ور و ده‌می باران، ماڵه‌كه‌ی به‌ تاریكی ده‌بینێت، چاوه‌ڕێی گه‌ڕانه‌وه‌ی كچه‌كه‌یه‌تی، حه‌ز به‌ مردنی مێرده‌كه‌ی ده‌كات، به‌رده‌وام سووكایه‌تیی و خیانه‌ته‌كانی مێرده‌كه‌ی به‌ یاد ده‌هێنێته‌وه‌… )

به‌م پێیه‌ پۆرنۆگرافی ته‌نیا و ته‌نیا به‌ ئاراسته‌ی وروژاندنی سێكسی مرۆڤ ئاماده‌كراوه‌ و به‌رهه‌م هێنراوه‌، له‌ هه‌موو جۆره‌ جوانناسییه‌كی هونه‌ری به‌دووره‌ و ته‌واو میكانیكییه‌.

به‌ڵام بۆچی ئه‌م ده‌قه‌ به‌شێوازی پۆرنۆگرافی نووسراوه‌ و ئه‌م ئه‌ده‌به‌ بۆچی؟ ئه‌و ئه‌ده‌به‌ی له‌ناو كوردا شێوازێكی تابۆیه‌!

له‌ روانگه‌ی نووسه‌ره‌وه‌، ده‌سه‌ڵاتداران گه‌وره‌ترین ئاره‌زوو و خه‌ونیان سێكسه‌. سێكس له‌گه‌ڵ ژناندا ئه‌وه‌نده‌ بێ كۆت و به‌ند بووه‌، هه‌میشه‌ به‌ هۆی ئه‌م خاڵه‌ لاوازە‌یانه‌وه‌ پایه‌ی حكومه‌ته‌كه‌یان لاواز بووه‌ و زۆر به‌رده‌وام نه‌بوون.

ئایا له‌ ئه‌ده‌بی كوردیدا رۆمان یان كتێبی وامان هه‌یه‌ كه‌ به‌م شێوه‌یه‌ نووسرابن؟

قوبادی جه‌لیزاده‌ یه‌كێكه‌ له‌ شاعیرانی (پۆرن). رۆمانی گۆشه‌گیری ئیسماعیل حه‌مه‌مین هه‌مان شته‌ و… (تێروانینی من بۆ ئه‌م نۆڤڵێته‌ ئه‌وه‌یه‌ نووسه‌ر ویستویه‌تی به‌م شێوازه‌ نووسینه‌ ره‌خنه‌ له‌ ده‌وڵه‌ت بگرێت و ته‌قریبه‌ن چه‌مكه‌كه‌ی گه‌یاندووه‌.) من وه‌كو یه‌كێك له‌ خوێنه‌رانی كتێبی په‌نجا و هه‌شت و یه‌كێك له‌ گروپه‌كانی كتێب خوێندنه‌وه‌ی شنۆ زۆر سوپاسی نووسه‌ر ده‌كه‌م و شایانی رێزه‌.

 181 جار بینراوە