سەرەکی » وەرزش » یاریی كۆتایی ئه‌م وه‌رزه‌ش له‌ ئه‌سته‌نبوڵ ناكرێت

یاریی كۆتایی ئه‌م وه‌رزه‌ش له‌ ئه‌سته‌نبوڵ ناكرێت

به‌ ئه‌گه‌رێكی زۆر ئه‌م وه‌رزه‌ش هاوشێوه‌ی وه‌رزی داهاتوو یاری كۆتایی چامپیۆنس لیگ له‌ شاری ئه‌سته‌نبوڵ ناكرێت و ره‌نگه‌ یارییه‌كه‌ بگوازێته‌وه‌ بۆ به‌ریتانیا به‌دیاری كراوی بۆ یاریگای ڤیلا پاركی تایبه‌ت به‌ ئه‌ستۆن ڤێلا.

له‌دوای سه‌ركه‌وتنی دوو یانه‌ی‌ ئینگلیزی بۆ یاری كۆتایی چامپیۆنس لیگی ئه‌م وه‌رزه‌ هه‌رزوو ده‌نگۆی ئه‌وه‌ دروستبوو كه‌ هه‌ردوو یانه‌ ئاره‌زوو ده‌كه‌ن یارییه‌كه‌ بگوازرێته‌وه‌ بۆ به‌ریتانیا، به‌تایبه‌ت كه‌ ئه‌گه‌ر زۆره‌ یارییه‌كه‌ به‌بێ ئاماده‌بوونی هانده‌ران بكرێت، ئه‌مه‌ش ئه‌گه‌ر بێت و یارییه‌كه‌ له‌ ئه‌سته‌نبوڵ بكرێت.

شاری ئه‌سته‌نبوڵ ده‌بوو وه‌رزی رابردوو میوانداری یاری كۆتایی چامپیۆنس لیگ بكات، به‌ڵام به‌هۆی دۆخی كۆرۆنا یارییه‌كه‌ گوازرایه‌وه‌ بۆ پرتوگال، له‌به‌رامبه‌ر ئه‌وه‌شدا بڕیاردرا یاری كۆتایی ئه‌م وه‌رزه‌ له‌و شاره‌ بكرێت، به‌ڵام ره‌نگه‌ ئه‌مساڵیش یارییه‌كه‌ له‌و شاره‌ نه‌كرێت.

سه‌ره‌تا داوای گواستنه‌وه‌ی‌ یاری كۆتایی ئه‌م وه‌رزه‌ ته‌نها ده‌نگۆیه‌ك بوو، به‌ڵام به‌ تێپه‌ڕبوونی كات ده‌نگۆكه‌ زیاتر ده‌بوو به‌تایبه‌ت دوای ئه‌وه‌ی‌ حكومه‌تی به‌ریتانیا بڕیاری دا وڵاتی توركیا بخاته‌ لیستی سووری ئه‌و وڵاتانه‌ی‌ كۆرۆنا تیایدا به‌شێوه‌یه‌كی زۆر به‌ربڵاوه‌.

به‌هۆی ئه‌م بڕیاره‌ش گه‌شتكردن له‌ به‌ریتانیاوه‌ بۆ توركیا قه‌ده‌غه‌ ده‌بێت و هه‌ر كه‌سێكیش له‌و وڵاته‌ بگه‌ڕێته‌وه‌ ده‌بێت بۆ ماوه‌ی‌ 10 رۆژ كه‌ره‌نتینه‌ بكرێت، بۆیه‌ دۆخی هه‌ردوو یانه‌ی‌ چێڵسی و مان سیتی ئاسان نابێت بۆ گه‌شتكردن بۆ ئه‌و شاره‌.

یاری كۆتایی چامپیۆنس لیگ 29ی ئه‌م مانگه‌ به‌ڕێوه‌ده‌چێت، بۆیه‌ ئه‌سته‌مه‌ هیچ یاریزانێك رازی بێت دوای ئه‌و به‌رواره‌ 10 رۆژ كه‌ره‌نتین بكرێت، چونكه‌ یارییه‌كانی یۆرۆی 2020 له‌ مانگی داهاتوو به‌ڕێوه‌ده‌چێت و یاریزانان ده‌یانه‌وێت به‌ زووترین كات په‌یوه‌ندی به‌ هه‌ڵبژارده‌كانیان بكه‌نه‌وه‌.

ئه‌مه‌ش یوفا ناچار ده‌كات بڕیار بدات یارییه‌كه‌ بگوازێته‌وه‌ بۆ به‌ریتانیا و یاری كۆتایی وه‌رزی داهاتوو بخاته‌ شاری ئه‌سته‌نبوڵ كه‌ ره‌نگه‌ ئه‌مه‌ به‌سوودی شاره‌كه‌ش بێت، چونكه‌ ده‌كرێت ئه‌و كات به‌ ئاماده‌بوونی هانده‌رانه‌وه‌ میوانداری یارییه‌كه‌ بكه‌ن.

ئه‌گه‌ر بێت و یارییه‌كه‌ش له‌ به‌ریتانیا به‌ڕێوه‌بچێت ئه‌گه‌ر زۆره‌ ژماره‌یه‌كی زۆری هانده‌ران ئاماده‌بن، ئه‌مه‌ش به‌هۆی ئه‌وه‌ی‌ یاری كۆتایی ئێف ئه‌ی كه‌پ كه‌ پێش یاری كۆتایی چامپیۆنس لیگ له‌ شاری له‌نده‌ن به‌ڕێوه‌ده‌چێت بڕیاردراوه‌ 22 هه‌زار هانده‌ر ئاماده‌ی‌ بێت.

له‌لای خۆشییه‌وه‌ حكومه‌تی به‌ریتانیا ئاماده‌یی وڵاته‌كه‌ی‌ بۆ میوانداریكردنی یاری كۆتایی چامپیۆنس لیگ ده‌ربڕی و وه‌زیری گواستنه‌وه‌ی‌ ئه‌و وڵاته‌ش ئاماژه‌ی به‌وه‌ داوه‌ یه‌كێتی تۆپی پێی ئینگلته‌را بۆ ئه‌و مه‌به‌سته‌ گفتوگۆ له‌گه‌ڵ یوفا ده‌كات.

 433 جار بینراوە