سەرەکی » مانشێت » لاهور شێخ جەنگی: یەكێتی، یەكخستنی پێشمەرگەی كردووە بە ئەولەویەتی كارەكانی و رۆڵی كارای هەیە تیایدا

لاهور شێخ جەنگی: یەكێتی، یەكخستنی پێشمەرگەی كردووە بە ئەولەویەتی كارەكانی و رۆڵی كارای هەیە تیایدا

دوێنێ، لە فەرماندەیی هێزەكانی 70 لە سلێمانی، لاهور شێخ جەنگی هاوسەرۆكی یەكێتیی نیشتمانیی كوردستان، لەگەڵ سەرجەم فەرماندە و ئەفسەر و پێشمەرگەی هێزەكانی پشتیوانیی دوو، كۆبۆوە.

لە سەرەتادا، لاهور شێخ جەنگی، چاوی بە تیمی حەرەس شەرەف، كەوت، كە تیمێكی نوێیە و لەلایەن هێزەكانی پشتیوانیی دوو پێكهێنراوە، پیرۆزبایی لێكردن و پشتیوانیی خۆی بۆ دووپاتكردنەوە.

دواتر لە كۆبوونەوەیەكدا، كە هەریەك لە مستەفا چاوڕەش فەرماندەی هێزەكانی 70 و جەلال شێخ ناجی لێپرسراوی هەواڵگریی پێشمەرگە و وەستا رەسوڵ راوێژكاری سەربازیی سەرۆكایەتیی یەكێتی و لیوا روكن مەریوان فەرماندەی هێزەكانی پشتیوانیی دوو و عەبدوڵڵا كانی بەردینەیی لێپرسراوی مەڵبەندی پێشمەرگە ئامادەیبوون، هاوسەرۆك لاهور شێخ جەنگی، پیرۆزبایی لە هێزەكانی پشتیوانیی دوو كرد، كە لە چوارچێوەی پرۆسەی یەكخستنەوەی پێشمەرگەدا، بە رەسمی دەچنەسەر وەزارەتی پێشمەرگەی حكومەتی هەرێمی كوردستان.

راشیگەیاند: پێزانینی خۆم پێشكەش بەم هێزە پۆڵاینە دەكەم، كە بە بڕیاری سەرۆك مام جەلال، دامەزراوە و خاوەنی بنچینەیەكی سەربازیی بەهێزە لەسەر دەستی فەریق نەوشیروان فوئاد مەستی، كە زۆر بە سەركەوتوانە شارەزاكراون بە دیسپلین و زانستی سەربازی و مەشق و راهێنانی باشیان کردووە، هەربۆیە ئەم هێزە دەبێت بە بڕبڕەی هێزی پێشمەرگە، وەك چۆن لە رابردوودا رۆڵی بەرچاویان بینیوە لە شەڕی بەرەنگاربوونەوەی داعش و بە خوێنی خۆیان سەلماندوویانە، كە خاوەنی تۆماری بەرگریی نەتەوەیی و نیشتمانین و خاوەنی دەیان شەهید و بریندارن لە سەروویانەوە فەرماندەكەیان لیوا حسێن مەنسوور و چەندین داستانی بەرەنگارییان تۆماركردووە.

دواتر باسی لە بارودۆخی گشتیی عیراق و هەرێمی كوردستان كرد و رایگەیاند؛ ئێمە وایدەبینین قووڵایی ستراتیژییمان لە بەغدایە لە روانگەی ئەو دەستوورەی، كە پارێزگاریی لە مافەكانمان دەكات و تاكە چەكە لە ئێستادا بەرگریی لە مافەكانمان پێبكەین.

لاهور شێخ جەنگی، ئاماژەی بە دۆخی ئەمنی و بەردەوامیی مەترسییەكان كرد و رایگەیاند: بەردەوامیی هەڕەشەكان لەسەر ئەزموونەكەمان، دەخوازێت زیاتر گرنگی بە هێزی پێشمەرگە بدەین، هەربۆیە یەكێتیی نیشتمانیی كوردستان یەكخستنی پێشمەرگەی كردووە بە ئەولەویەتی كارەكانی و رۆڵی كارای هەیە تیایدا، لەپێناوی ئەو ئامانجەی كە هەرێمی كوردستان ببێت بە خاوەن هێزێكی دامەزراو و نیزامیی مەشقپێكراوی تۆكمەی نیشتمانی و هەمیشە ئامادەبێت بۆ بەرگریی لە بەها باڵا كوردستانییەكان.

دواتر باسی لە پرسی هەڵبژاردنەكانی داهاتوو كرد و گرنگی و چارەنووسسازیی ئەو هەڵبژاردنەی روونكردەوە و وتی: ئەگەر كورد یەكڕیز و یەكدەنگ بێت لە بەغدا، دەتوانین لە رێگەی خەباتی پەرلەمانییەوە كار بۆ بەدیهێنانی ئامانجەكانمان بكەین، لەو سۆنگەیەشەوە پێكهێنانی هاوپەیمانیی نێوان یەكێتی و بزوتنەوەی گۆڕان-ی بە دەستكەوتێكی گەورە لە قەڵەمدا و جەختیكردەوە كە دەرگای هاوپەیمانیەتییەكەمان كراوە دەبێت بۆ هەموو ئەو لایەنانەی كە بەرژەوەندیی باڵای میللەتەكەمانیان لەبەرچاوە و دەیانەوێت بەیەكەوە و بە بەهێزیی؛ بەرگریی لە مافەكانی میللەتەكەمان بكەین.

 387 جار بینراوە