سەرەکی » راپۆرت » ئامادەکردنی:بورهان ئەمین » ماكرۆن و لۆپان و كۆشكی ئەلیزێ

ماكرۆن و لۆپان و كۆشكی ئەلیزێ

راستڕەوی توندڕەوی فەرەنسا، كە بەرەی نیشتمانی بە سەرۆكایەتیی مارین لۆپان ژنە سەركردەی دیاری وڵات رابەرایەتی دەكات، لە هەڵبژاردنی هەفتەی رابردووی هەرێمەكانی ئەو وڵاتە بە بەدەســـتهێـنـــانی رێـژەی 20 ٪ی دەنگەكان، شكستی گەورەی هێنا و ئەو ئایندە گەشەی لەبەردەمدا داخرا، كە ماوەكانی پێشتر پێشبینی بۆ دەكرا و لە راپرسییەكاندا لە ریزبەندیی یەكەمی پارتە سەركەوتووەكانی هەڵبژاردنی ئایندەدا بوو، كە بڕیارە لە سەرەتای ساڵی داهاتوودا بكرێت، بەڵام حزبەكەی لە هیچ كام لە هەرێمەكاندا نەبووە زۆرینە و سەركەوتنیان بەدەستنەهێنا.

هەروەها پارتەكەی ئیمانوێل ماكرۆن (كۆماری بۆ پێشەوە)، بە هەمانشێوە پاشەكشەی كرد و ئەو ئەنجامە چاوەڕوان نەكراوانە بوونەتە جێی شۆكی نێوەندە سیاسییەكان، چونكە لەكاتێكدا ماكرۆن خۆی بە پێشڕەوی چینی گەنج و لاوان دادەنێ و بە دیدێكی مۆدێرنەوە بۆ كێشەكانی وڵات دەڕوانێت ‌و لۆپان-یش رابەرایەتیی پارتە راستڕەوەكانی وڵات دەكات كە ئێستا رەواجیان پەیداكردووە، كەچی زۆربەی خەڵكی وڵات بە هەموو ئاراستەكانەوە بایكۆتی هەڵبژاردنەكەیان كرد و رێژەی زیاتر 66 ٪یان، دەنگیان نەدا و نەچوونە سەر سندوقەكانی دەنگدان، بۆیە ئەو دوو رەوتە شكستیانهێنا. لە بەرامبەردا، راستڕەوە كلاسیكییەكان لە كۆی 12 هەرێم، لە حەوت هەرێم بردیانەوە و توانیـیان 38 ٪ی دەنگەكان بەدەستبهێنن، چەپەكانیش لە پێنج هەرێم بردیانەوە.

لەسەر كەمیی رێژەی بەشداریی هاووڵاتیانی فەرەنسا لە پڕۆسەكەدا، رۆژنامەی Neue Osnabrcker Zeitong ی ئەڵمانی پێیوایە، كاتێك زیاتر لە دوو لەسەر سێی دەنگدەران، هەڵبژاردن رەتبكەنەوە، مانای ئەوەیە پڕۆسەیەكی بێبایەخە و رەتكردنەوەی پارتە سیاسییەكان و دەسەڵاتیشە بە گشتی.

پارتە كلاسیكییەكان
رۆژنامەی Le Figaro فەرەنسی، پێیوایە كە سەركەوتنی لایەنە چەپ و پارێزگارەكان ئاماژەیەكە بۆ گەڕانەوەی ئەو رەوتانە بۆ كۆشكی ئەلیزێ و رێژەی نزمی بە شداریكردنی هاووڵاتیانیش، رەتكردنەوەی سیاسەتی دەسەڵات و سەرۆكی وڵاتە لە ئاست كێشە ناوخۆییەكان و دەرەوەشدا.

رۆژنامەی Lomond ی فەرەنسی، بە هەمانشێوە دەنووسێت: كاتێك لە ساڵی 2017 دا ماكرۆن پارتەكەی دامەزراند، بوو بە بوومەلەرزەیەكی سیاسی و هاووڵاتیان خەونی خۆیان لەسەر بونیاد نا، بۆیە دەنگیان پێدا و پشتیان كردە پارتە كلاسیكییەكان، بەڵام ئێستا كە دەركەوت بەرنامەكانیان لە دروشم زیاتر نییە، مەحاڵە جارێكی تر چارەنووسی خۆیان و وڵاتەكەیان بدەنەوە دەستی.

ئەو شكستەی راستڕەوەكان چی بوو؟
لە راپۆرتە شیكارییەكان و بۆچوونی چاودێراندا، دەردەكەوێت كە لەو هەڵبژاردنەدا زۆر هۆكار بوون بەهۆی شكستی بەرەی نیشتمانیی راستڕەو. یەكەمیان ئەوەیە، دیارە فەرەنسییەكان ئەو هەڵبژاردنەیان بە بایەخدار وەرنەگرتووە و دەیانەوێت نیگای خۆیان بخەنەسەر هەڵبژاردنی سەرۆكایەتیی داهاتوو، چونكە بۆ ئەوان پۆستی سەرۆك گرنگە و دەسەڵاتی زۆری هەیە. دووەمیشیان، ئەو كەشە ئازادەیە كە لە دوای داخرانی بازاڕەكانەوە كە بەهۆی كۆرۆناوە هاتبووە گۆڕێ و ئێستا كرانەوەی بازاڕ و شوێنە گشتییەكان لەبەردەم خەڵكدا، وایكرد دەنگدەران نەپەرژێنە سەر مەسەلەی هەڵبژاردن، بەڵكو لە كۆتایی هەفتەدا گەڕان و پیاسە بكەن و هەڵبژاردنەكە پەراوێز بخەن.

لە رۆژنامەی Neue Zrche Zeitung ی سویسری-شدا هاتووە: هۆكاری سەرەكیی شكستەكەیان، ئاراستەی توندڕەوییان بووە ‌و بە هەموو توانایەكیانەوە لە دژی یەكێتیی ئەوروپا وەستاونەتەوە، ئەمەش ئاراستە و ئامانجی زۆرینەی فەرەنسییەكان نییە.

كاریگەری بۆ سەر هەڵبژاردنی سەرۆكایەتی
بەپێی پێگەی گۆڤاری Spiegel ئەڵمانی، ئەنجامی ئەم هەڵبژاردنەی هەرێمەكان جیاوازی زۆر دەبێت لەگەڵ هی سەرۆكایەتی و هەردوو سەركردەی دیار «ماكرۆن و لۆپان» دەكەونە ململانێیەكی توندەوە و لە نێوانیشیاندا ئاراستەی چەپ و راستڕەوەكانی تریش كاندیدی سەرۆكایەتییان دەبێت و بەم جۆرە دەنگەكان بەسەر ژمارەیەك كاندیددا بڵاودەبنەوە و ركابەرییەكان توندتر دەبنەوە. بەو پێیەش، لایەنە چەپ و پارێزگار و كلاسیكییەكان كە بەناوی بەرەی كۆماری، هاوپەیمانییان لە دژی بەرەی نیشتمانی پێكهێناوە، كاریگەریی نەرێنی دەكەنە سەر لۆپان، لەوبارەشدا پێدەچێت ئەنجامەكان لە بەرژەوەندیی ماكرۆن تەواو ببێ و بەختی هێنانی دەنگی پێویستی هەیە بۆ ئەوەی پۆستەكەی بەدەستبهێنێتەوە.

سەرچاوە: ئاژانسەكان

 174 جار بینراوە