سەرەکی » وتار » “شەهید حەمە غەفور ئاغجەلەری “چەک دژی کورد بەرزناکەمەوە:

“شەهید حەمە غەفور ئاغجەلەری “چەک دژی کورد بەرزناکەمەوە:

د.پشکۆ حمەتاهیر ئاغجەلەری

کاتێک دەست دەکەیت بە خوێندنەوەی لاپەکانی مێژووی کورد دوو جۆر نووسین دەبینرێت، لە یەکەمیاندا ئارەزوو دەکەیت دەستی هەموو مرۆڤایەتی هی تۆبێت توند توند چاوەکانتی پێبگریت، ئەو لاپەڕانەی مێژوو نەخوێنیتەوە کە باس لە  شەڕی براکوژی کورد دەکەن بەرامبەر بە یەکتیر،  لەلایەکی تریشەوە کاتێک گوێ بۆ بیرەوەری کەسانی بەشداربوو و بەئاگا لە شۆڕش و ڕاپەڕینەکانی  کورد دەگریت، دیسانەوە ئارەزووی ئەوە دەکەیت پەنجەی هەموو مرۆڤایەتی هی تۆبێت و گوێی خۆتی پێ بگریت، بۆئەوەی گوێت لەو هەموو بیرەوەریانە نەبێت کە باس هەر باسی برا کوژییە لای کورد.

بەڵام لە دووەمیاندا جۆرێکتر نووسین و یادەوەری دەبینی و گوێت لێ دەبێت، بۆت دەردەکەوێت کە تەواوی مێژووی کورد بریتی نییە لە هاندان و هەوڵدان بۆ برا کوژی، نەخێر نموونەی جوانیش هەن لە مێژووی کورددا، کە کەسانی شۆڕشگێر و پێشمەرگە و سەرکردە کە  سوێندیان خواردووە چەک بەرامبەر کورد بەرزنەکەنەوە.

شەهید ( حەمە غەفور ئاغجەلەری) یەکێکە لەو پێشمەرگە و سەکردانەی ناو بزوتنەوەی رزگاریخوازی کوردی، کە سوێندی خواردبوو بە خاکی کوردستان تاوەکو لە ژیاندابێت و پێشمەرگەبێت، چەک بەرامبەر و کورد و پێشمەرگە بەرزنەکاتەوە. بەڵێ کاتێک چاو بە لاپەڕەکانی  بیرەوەی ئەو پێشمەرگە  و  فەرماندانەدا دەخشێنیت کە دەربارەی ( حەمە غەفور ئاغجەلەری) نووسیویانە و یان گێراویانەتەوە، هەموان گەواهی ئەوەی بۆ دەدەن حەمە غەفور ئەو سوێندە خوادبووی پێوەی پەیوەست بوو تاوەکو شەهید بوو.

بۆ وێنە  چەند پێشمەرگەیەکی شۆڕشی  ئەیلول و نوێ  (خەلیل بێدەری و مامۆستا هەڵمەت) چەندین جار و  لە چەندین شوێن کاتی گێرانەوەی بیرەوەیەکانیان دەڵێن: (( لە دوای نسکۆی شۆڕشی ئەیلول و دامەزراندنی یەکێتیی نیشتمانیی کوردستان، چالاکی پێشمەرگەی هەرێمەکانی یەکێتی کە شەهید حەمە غەفور ئاغجەلەری یەکەم بەرپرسی هەرێمی کەرکوک بوو، رۆژێک لە چەمی رەزان بوو کابرایەک هاتە لای کاکە حەمە غەفور و پێی وت: هێزێکی قیادە موەقەتە هاتوونەتە ناوچەکە و ئامانجیان ئەوەیە تۆ بکوژن، کاکە حەمە ئەمەی لە چەند شوێنێکی دیکەش بیستبوو. لە وەڵامی ئەو کەسەی هەواڵەکەی پێدا وتی : من سوێندم خواردووە لە دوای شۆڕشی ئەیلول ئیدی چەک بەرامبەر هیچ کوردێک بەرز ناکەمەوە و نامەوێت شەڕی برا کوژی لەمنەوە دەست پێبکاتەوە، ئەو کۆمەڵەیەی قیادە موەقەتەش کوردن من چۆن بیانکوژم، کە ئاسانە لە ناوبردنیان،  لەبەر کوردبوونیان نایکەم!!))، بەڵێ ئەم راستییە مێژووییە و وتەی ئەو پێشمەرگە و سەردارەی شۆڕشی نوێ چەندین کەسی دیکەش ئاماژەی پێدەدەن.

لێرەدا ئەگەر بوەستین لە وتەی ئەو سەکردە و پێشمەرگەیە وردبینەوە، بۆمان دەردەکەوێت ئەو بڕیار و سوێندە کە خواردوویەتی لەم ڕاسیانەوە سەرچاوەی گرتووە:_

یەکەم: شەهید حەمە غەفور ئاغجەلەری خاوەنی هەستێکی بەرزی نەتەوەی و کوردستانی بووە، هەر لەو هەستە قووڵەشییەوە ئەو بڕیارەی داوە.

دووەم: شەهید حەمە غەفور ئاغجەلەری ئاگاداری مێژووی خەباتی رزگاریخوازی کورد بووە، شارەزایی مێژوو و تەجرەبەی ژیانی پێشمەرگایەتی  بۆ دەرخستووە کە دیاردەی برا کوژی لە ناوکورددا چەند زیانی لە کورد و خەباتەکەی داوە.

سێیەم: شەهید حەمە غەفور ئاغجەلەری، بەو  سوێندە خوادبوو ویستێتی کۆتایی بهێنت لای خۆیەوە بە دیاردەی براکوژی لە ناو کورددا.

چوارەم: شەهید حەمە غەفور ئاغجەلەری، بەو سوێندەی خواردبووی ویستوویەتی دەستی دوژمن و دەرەکی دوربخاتەوە لە شۆڕش و راپەڕینەکانی کورد، چوون باش زانیوێتی  ململانێ و شەڕی برا کوژی هۆکارێکە بۆ هاتنە ناوەوەی دوژن بۆ ناو شۆڕشەکانی کورد.

بەو جۆرە پێشمەرگە و شەهیدی سەرکردە ( حەمە غەفور ئاغجەلەری)، لەسەرکەرەوەی سوێند و بڕیارەکەی خۆیبوو، هەرچەندە خۆی بووە قوربانی ئەو کەسانەی کە بەردەوام بوو لە براکوژی و خیانەکردن لە نەتەوەی کورد، چەکیان لە ساتی خەودا دژی  حەمە غەفور ئاغجەلەری و حەوت پێشمەرگەی هاوڕێ بەرزکردەوەو لە رێکەوتی (۲۳_۷_۱۹۷۷) شەهیدیان کرد.

 248 جار بینراوە