سەرەکی » راپۆرت » مامۆستایان و خوێندكاران پێشوازی لە ساڵی نوێی خوێندن دەكەن

مامۆستایان و خوێندكاران پێشوازی لە ساڵی نوێی خوێندن دەكەن

راپۆڕتی/ رێزە حسێن

بەمەبەستی خۆئامادەكردن بۆ دەستپێكردنەوەی ساڵی نوێی خوێندن، ساڵانە بازاڕی كڕینی شمەك و ئەو كەلوپەلانەی پەیوەندارە بە پڕۆسەی خوێندنەوە گەرموگوڕی تێدەكەوێت و جمەی دێت لە کڕیار، هاوکات وەزارەتی پەروەردەی هەرێم جەختی لەوە كردۆتەوە كە رۆژی 14 ی ئەیلول، دەرگای باخچەو قوتابخانەو خوێندنگەكان لە سەرتاسەری كوردستاندا بە رووی خوێندكاراندا دەكرێتەوە.

بازاڕ جمەی دێت لە كڕیار
كەژان فەرەج وەك دایكی سێ خوێندكار لەناو بازاڕی سلێمانی سەرقاڵی كڕینی جانتای خوێندنگە بوو، لە وەڵامی پرسیاری كوردستانی نوێ بۆ ئاستی نرخی شمەك و كەلوپەلی خوێندن لە بازاڕدا، ئەو دایكە ئاماژەی بەوەكرد هەر شتێك خواستی زۆری لەسەر بێت، لە بازاڕدا نرخی زۆر بەرز دەبێتەوە، بە تایبەت ئەو شتانەی كە گرنگن بۆ خوێندكار، وتیشی: ئەمساڵ شمەكی باشی خوێندن هێنراوەتە بازاڕەوە بە شێوەیەك هانت دەدەن كڕیاری هەموو جۆرەكانی بیت، هیوای ساڵێكی تەندروست و پڕۆسەیەكی سەركەوتوویی خوێندن بۆ هەموو خوێندكاران دەخوازم .

لە میانەی ئامادەكردنی ئەم راپۆرتەی كوردستانی نوێدا، زانیاری ئەوە بەردەستكەوت، ئەمساڵ بەهۆی دابەشكردنی مووچەی فەرمانبەران لە كاتی خۆیدا و هاوكات نەمانی سیستمی پاشكەوتكردن، خەڵكی توانای بازاڕكردنی لەئاستێكی باشدایە، هەروەك بەپێی وتەی هاووڵاتیان بە گیرفانی پڕەوە روویان لە بازاڕەكان كردووە، لە هەمان كاتدا زۆرینەش نیگەران بوون لە گرانی نرخی شمەكەكانی خوێندن، هاوكات فرۆشیارانیش بەرزبوونەوەی نرخی كەلوپەلی خوێندنیان گەڕاندەوە بۆ بەرزبوونەوەی نرخی دۆلار بە رامبەر بە دیناری عیراقی، هاوكات فرۆشیاران ئەوەشیان پشتڕاستكردەوە كە جیاواز تر لە 8 ساڵی رابردووی كوردستان، بازاڕی شمەك كڕینی خوێندن بە شێوەی ئەمساڵ، گەرموگوڕی بە خۆیەوە نەبینیووە.

گرانی نیگەرانی لێكەوتۆتەوە
بەپێی زانیاری وەزارەتی پەروەردەی هەرێمی كوردستان، ئەمساڵ بەجێبەجێكردنی رێنماییەكانی خۆپارێزی، دژ بە پەتای كۆرۆنا، لە 14 ئەیلول، وەرزی نوێی خوێندنی ساڵی 2021- 2022، لە سەرتاسەری هەرێمی كوردستان دەستپێدەكاتەوە كە زیاتر لە ملیۆنێك و 780 هەزار قوتابی، دەچنە ناوەندەكانی خوێندنەوە.

سیروان حەمە رەشید وەك فەرمانبەرێكی حكومی بەدەستەكانی ئاماژەی بە گیرفان پڕی خۆی كرد، ئەو لەوبارەیەوە رایگەیاند: هیچ ساڵێك، وەك ئەمساڵ بە گیرفان پڕی بۆ شمەك كڕینی ساڵی خوێندنی مناڵەكانم نەهاتوومەتە بازاڕ، هەروەك نیگەران بوو لە بەرزكردنەوەی نرخەكان و خراپی كوالێتی ئەو شتانەی كە لەلایەن بازرگان و فرۆشیارانەوە هاوردەی بازاڕەكان كراوە.

بە قەبارەی گەورە شمەك هاوردەكراوە
بەپێی خواستی كڕین، بازرگان و كاسبكاران، هاوردەی شمەك و كەلوپەل دەكەن بۆ ناو بازاڕەكان، هەروەك وەك نەریتێك ساڵانە بەر لە دەستپێكردنەوەی پڕۆسەی ساڵی نوێی خوێندن، خواست بۆ كڕینی شمەك و كەلوپەلی تایبەت بەخوێندن زۆر دەبێت لەلایەن كەسوكاری خوێندكارانەوە، بۆیە زۆرترین هاوردەكردنی ئەو جۆرە لە شمەك، بۆ ئاستێكی بەرز تۆمار دەكرێت، هاوكات لایەنی پەیوەندار لە چاودێری بازرگانی سلێمانی ئاماژە بەو دەكەن كە ئەمساڵ بە قەبارەیەكی گەورە پێداویستییەكانی خوێندن لە شمەك و كەلوپەل، هاوردەی شارەكە كراوە.

سۆران غەفور بەڕێوەبەری چاودێری بازرگانی لە پارێزگای سلێمانی لەوبارەیەوە زانیاری زیاتری بۆ كوردستانی نوێ خستەڕوو ئاماژەی بەوەكرد كە جیاوازتر لە ساڵانی رابردوو، ئەمساڵ بە قەبارەیەكی زەبەلاح، پەڕاوگە و كەلوپەل و شمەكی تایبەت بە خوێندن هاوردەی كوردستان كراوە، هەروەك سەرجەم شمەكەمان بەپێی ئەو تایبەتمەندیانەی كە لەلایەن وەزارەتی پەروەردەی هەرێم دیاریكراوە بۆ پڕۆسەی خوێندن، لەلایەن بازرگانەكانەوە هاوردەی كوردستان كراوە.

مامۆستایانیش كڕیارن
بەپێی زانیاری كوردستانی نوێ، بازاڕەكان تەنها بە كڕیاری كەسوكاری خوێندكاران پڕنەبووەتەوە، هاوكات مامۆستایانیش لە هەردوو، رەگەز (نێر و مێ)، بە لێشاو، روویان كردۆتە ناو بازاڕ و مۆڵەكانەوە، بە مەبەستی كڕینی جلوبەرگی نوێ و خۆئامادەكردن بۆ ساڵی نوێی خوێندن، مامۆستا سۆزان فەریق بە خەندەوە لەوبارەیەوە ئاماژەی بەوەكرد كە ئەمساڵ داهاتی مووچەخۆر لە باشیدایە و گیرفانمان پڕە، بەهۆی پێدانی مووچە لە كاتی خوێدا و بەبێ لێبڕین، بۆیە مامۆستایان مەبەستیانە لە پاڵ پەروەدە و فێركردندا، بە رێكپۆشكردن و بە شێوەیەكی تەندروست و باش خۆیان ئامادەبكەن و لەبەردەم خوێندكاران، وانە بڵێنەوە.

ساڵنامەی خوێندن دیاریدەكرێت
لە كۆتایی مانگی ئابدا، لایەنی پەیوەندار لە وەزارەتی پەروەردەی هەرێم لە رێگەی كەناڵەكانی راگەیاندنەوە، جەختی لەوەكردەوە، بەجێبەجێكردنی رێنماییەكانی خۆپارێزی تەندروستی، دژ بە پەتای كۆرۆنا، ئەمساڵ لە 14ی ئەیلولدا، دەرگای باخچە و قوتابخانە و خوێندنگەكان لە سەرتاسەری كوردستاندا بە رووی خوێندكاراندا دەكرێتەوە، هاوكات لەوبارەیەوە بە شێوەی رەسمی، ساڵنامەی خوێندن، بۆ ساڵی خوێندنی 2021- 2022 ی ئاڕاستەی بەڕێوەبەرایەتی گشتی پەروەردەكانی (هەولێر، سلێمانی، دهۆك، هەڵەبجە، گەرمیان) كردووە، بەمەبەستی پەیڕەوكردنی لە گشت ناوەندەكانی خوێندنی حكومی و ناحكومییەكاندا.

 44 جار بینراوە