سەرەکی » چاوپێکه‌وتن » قوباد تاڵەبانی: گرنگە بە یەكڕیزیی و یەكدەنگییەوە بچینەوە بۆ بەغدا، تا تەواوكاری رێبازەكەی هەڤاڵ مام جەلال و سیاسەت و بۆچوونەكانی كاك نەوشیروان بین

قوباد تاڵەبانی: گرنگە بە یەكڕیزیی و یەكدەنگییەوە بچینەوە بۆ بەغدا، تا تەواوكاری رێبازەكەی هەڤاڵ مام جەلال و سیاسەت و بۆچوونەكانی كاك نەوشیروان بین

قوباد تاڵەبانی سەرۆكی هاوپەیمانیی كوردستان رایدەگەیەنێت، لە ژێر چەتر و قەوارەی هاوپەیمانیی كوردستان كە پێكهاتەی بزوتنەوەی گۆڕان و یەكێتیی نیشتمانیی كوردستانە، دەچینە ناو هەڵبژاردنەوە، بۆئەوەی بە زۆرترین كورسی و هێزەوە لە بەغدا ئەو نادادپەروەری و ستەمەی لە كەركوك كراوە بەرامبەر دانیشتوانە رەسەنەكەی، راستی بكەینەوە.

لە دیدارێكی تایبەتدا لەگەڵ كەناڵی ئاسمانیی كەركوك، قوباد تاڵەبانی وتی: «هەموو جارێك دەڵێم هەر كەسێك ئەگەر تۆزێك بێ ئومێد بێت و پێویستی بەوە بێت مەعنەویاتی بەرزبكرێتەوە، بچێت سەردانی كەركوك بكات و ببینێت كادرانی یەكێتی لە كەركوك چۆنن».

*سوپاس كە ئەمڕۆ هاتی بۆ كەركوك و ئێمەت بەسەركردەوە
زۆر سوپاس

* بە خێربێیت
زۆر خۆشحاڵم، زۆر سوپاس بۆ ئەم دەرفەتە

*لە سۆنگەی ئەم خەمخۆرییەتان بوو یان ئەم خۆشەویستییەتان بۆ كەركوك، كە ئەمڕۆ كەرنەڤاڵی دەستپێكی هاوپەیمانیی كوردستانتان راگەیاند؟
كەركوك قودسی كوردستانە، ئێمە كە ئێستا دەچین بەرەو تاقیكردنەوەیەكی قورس كە بانگەشەی هەڵبژاردنی ئەنجومەنی نوێنەرانی عیراقە، پێویستە ئێمە لە قودسی خۆمانەوە دەستپێبكەین، لە كەركوكەوە دەستپێبكەین، لە كەركوكی باباگوڕگوڕەوە دەستپێبكەین، بۆئەوەی پەیامێك بگەیەنین بە كۆمەڵانی خەڵكی كوردستان، پەیامێك بگەیەنین بە بەغدا، پەیامێك بگەیەنین بە كەسوكاری سەربەرزی شەهیدانی خۆمان، پەیامێك بگەیەنین بە پێشمەرگە قارەمانەكانمان، بە كەمئەندامانی سەنگەر، بە زیندانیانی سیاسیمان، كە راستە رەنگبێت ئەمڕۆ بەراورد بە چەند ساڵێك لەمەوپێش پێگە و كاریگەریمان لە كەركوك كەمێك لاوازتر بووبێت، بەڵام هەرگیز كەركوكمان لە بیرنەچووە و لەبیرمان ناچێت.

* كەركوك و ناوچە كێشەلەسەرەكان کە ئێستا ئاماژەت پێكرد، حكومڕانییەكی خراپ دەكرێت و وەكو پێویست نییە، بۆ داهاتووی كەركوك چاوەڕوانی چی دەكەن، ئایا ئەم دۆخە بەمشێوەیە دەمێنێتەوە؟ یاخود لە ئەگەری بردنەوەی لیستی هاوپەیمانیی كوردستان دۆخەكە چۆن دەبێت؟
ئێمە قورساییەكی زۆرمان خستۆتە سەر ئەم هەڵبژاردنە، چونكە دەبێت لە بەغدا بەهێز بین، من لەم ساڵ و نیوەی كە هاتوچۆی بەغدام كردووە، گرنگیی بەغدام بۆ دەركەوتووە، كورد و كوردستانیان ئەگەر لە بەغدا بەهێزبن لە كەركوكیش بەهێز دەبین، ئەگەر لە بەغدا بەهێز بین لە سلێمانی و هەولێر و دهۆك و هەڵەبجەش بەهێز دەبین، ئەگەر لە بەغدا بەهێز بین، لەگەرمیان و دەڤەری راپەڕینیش بەهێز دەبین، بەڵام ئەگەر لە بەغدا بەهێز نەبین، ناتوانین وەك پێویست ئەو شەڕە بكەین لەسەر ماف و داواكارییەكانی دانیشتوانە رەسەنەكانی كەركوك و ناوچە كێشە لەسەرەكان، بۆیە ئێمە هێزی خۆمان و سەنگی خۆمانمان كۆكردۆتەوە لەم بانگەشەیەدا، خۆشبەختانە بەتەنیا نین، وەكو «یەكێتیی نیشتمانیی كوردستان» لە ژێر چەتر و قەوارەی هاوپەیمانیی كوردستان كە پێكهاتەکەی بزوتنەوەی گۆڕان و یەكێتیی نیشتمانیی كوردستانە، دەچینە ناو ئەم هەڵبژاردنەوە، بۆئەوەی بچینە بەغدا، بە زۆرترین كورسی و بەزۆرترین هێزەوە لە بەغداوە ئەو نادادپەروەری و ئەو غەدر و ستەمەی لە كەركوك كراوە بەرامبەر دانیشتووانە رەسەنەكەی ئێرە، بتوانین راستی بكەینەوە و چاكی بكەینەوە.

* دەتوانین بڵێین ئەم هاوپەیمانییە درێژكراوەی سیاسەتەكانی سەرۆك مام جەلال و كاك نەوشیروانە؟
بەڵێ، ئەم هاوپەیمانییە خەونی هەردوو خوالێخۆشبوو مام جەلال و كاك نەوشیروانە، ئەم هاوپەیمانییە هەنگاوێكی گرنگە بۆ جێبەجێكردنی رێكەوتنی دەباشان، ئەم دوو هێزە كە لەیەك جیابوونەوە هەردووكیان لاواز بوون، بەڵام كە ئێستا خەریكین لە ژێر چەتری هاوپەیمانیی یەكمانگرتۆتەوە بەیەكەوە بەهێزترین.

* جۆش و خرۆشی كەركوكییەكانت ئەمڕۆ چۆن بینی، بەتایبەت بۆ خۆت وتارێكت پێشكەشكرد لەو كەرنەڤاڵەدا؟
من هەمیشە ئەو جۆش و خرۆشەی كە لە كەركوكدا دەیبینم لەكەم شوێنی كوردستاندا دەیبینم، رۆحیەتێك هەیە لێرە، ئەمە نە گلەییە لە شوێنەكانی تر نە دووربێت بێ رێزییە بەرامبەر بە شوێنەكانی تر، بەڵام كەركوك و كوردستان، كەركوك و كورد، كەركوك و یەكێتی، بە راستی پەیوەستبوونێكی رۆحی تایبەتی خۆی هەیە، بۆیە كە هەمیشە دێینە ئێرە، هەست بەو رۆحیەتە دەكەین، هەست بەو جۆش و خرۆشە دەكەین، هەست دەكەین ئاساییە، هەست دەكەین خۆڕسكە، هەست دەكەین ئەم رۆحیەتە لەناو رۆحی تاك بە تاكی كوردستانییەكانی كەركوكدا هەیە، بۆیە من هەمیشە دڵخۆشم، هەموو جارێك دەڵێم هەر كەسێك ئەگەر تۆزێك بێ هیوا بێت، هەر كەسێك پێویستی بەوە بێت مەعنەویاتی بەرزبكرێتەوە، بچێت سەردانی كەركوك بكات و ببینێت كادرانی یەكێتی لە كەركوك چۆنن، ببینێت هەواداران و لایەنگرانی یەكێتی لە كەركوك چۆنن، ببینن پێشمەرگەكانی ئێمە لە كەركوكدا چۆنن، ئینجا دەزانن رەسەنایەتی و راستی یەكێتیی نیشتمانیی كوردستان چۆنە.

* كاك قوباد بۆ مەبەستی سەرخستنی لیستی هاوپەیمانیی كوردستان، تاچەند گرنگە هەڵمەتی كۆڵان بە كۆڵان دەستپێبكرێت بۆ ئەوەی لیستەكە سەربخرێت؟
ئەم هەڵبژاردنە جیاوازە لە هەڵبژاردنەكانی پێشووتر، ئەم هەڵبژاردنە دابەشكراوە بەسەر بازنەی جیاجیا، بۆیە ئەمە ئەوە نییە وەكو جارانی تر بتوانین دوو سێ كۆبوونەوەی گەورە بكەین و قەرەباڵغی گەورە دروست بكەین و ئیتر حەشامەتێك كۆبكەینەوە و بڵێین فەرموو هەمووتان بڕۆن دەنگ بدەن بە لیستی هاوپەیمانی بێت یەكێتی بێت یان گۆڕان بێت، ئەم هەڵبژاردنە زۆر جیاوازە، كاندیدەكان لەسەر بازنەی تایبەت دابەشكراون، بۆیە دانیشتوانی بازنەیەك تەنها دەتوانن دەنگ بەو كاندیدە بدەن كە لە بازنەكەی خۆیاندایە، بۆیە «وەكو ئێوە وتتان» هەڵمەتی دەرگا بەدەرگا و كۆڵان بە كۆڵان و گەڕەك بە گەڕەك، زۆر زۆر گرنگە، هەم بۆ هوشیاركردنەوەی دەنگدەر لەسەر چۆنێتی دەنگدان بە كاندیدەكانی خۆیان، هەمیش بۆئەوەی بە خەڵك بڵێین كە ئەم هەڵبژاردنە چەندە گرنگە، چەندە پێویستە بە دەنگێكی زۆرەوە بچین بۆ بەغدا.

*چیتان كردووە بۆ ئاشتكردنەوەی كۆمەڵێك كادر كە پێیانوایە لە حزبەكەیان نیگەرانن و لە ئاستی پێویستدا نین؟
یەكێتی هەمیشە حزبێكی زیندوو بووە، بۆیە هەمیشە كادرانی یەكێتی، لایەنگرانی یەكێتی خاوەن بۆچوونی خۆیان بوون و رەخنەی خۆیانیان گەیاندووە، وەكو هەندێك حزبی تر نییە وەكو رۆبۆت بێت و بەڵێ گەورەم و ئەزبەنی و ئەو شتانە قەت نەبووە لەناو یەكێتی و قەتیش نابێت.

* ئازادی رادەربڕین هەیە؟
ئەمە پەروەردەی مام جەلالە، مام فێری كردووین رەخنە لە خۆی بگرین، بۆیە زۆر زۆر ئاساییە ئەمڕۆ سەركردایەتی یەكێتی، مەكتەبی سیاسی یەكێتی، بەرپرسانی یەكێتی لەناو حكومەت رەخنەیان لێبگیرێت و ئاساییشە كادرانی یەكێتی ناڕازی بن و گلەییان هەبێت، بەڵام ئەمڕۆ یەكێتی لەبەردەم تەحەدییەكی گەورەدایە. لەبەرئەوەی یەكێتی هێزێكی سەرەكی كوردستانە و كوردستان لەبەردەم مەترسییەكی گەورەدایە، من بەم سەردانانەی كە كردوومە بۆ بەغدا بۆم دەركەوتووە نیەتی خراپ هەیە بەرامبەر بە هەرێمی كوردستان، نیەتی خراپ هەیە بۆ شێوازی حكومڕانی لە عیراقی ئایندەدا، ئەو روئیایەی كە من هەستی پێدەكەم كە لە بەغداوە خەریكە هەڵدەقووڵێت زۆر دوورە لە بۆچوونەكانی ئێمەوە، زۆر دوورە لە مەبدەئی فیدڕاڵی، زۆر دوورە لە مەبدەئی لامەركەزیی، من دەترسم كورد لاواز بێت لە بەغدا. عیراق بەرەو وڵاتێكی زۆر مەركەزی دەڕوات، ئەگەر عیراق بەرەو وڵاتێكی مەركەزی بڕوات، دۆخی ئێمە لە كەركوك خراپ دەبێت، لە خانەقین خراپ دەبێت، لە موسڵ و سەلاحەدین و لە خورماتوو خراپ دەبێت، لە هەولێر و سلێمانی و دهۆك و هەڵەبجەش خراپ دەبێت، بۆیە من داواكارم لە هەموو ئەو كادر و ئەندام لایەنگرانەی یەكێتی كە زویر بوون، كە گلەییان هەیە، یان ناڕازین لە حكومڕانی و لە سیاسەت و لە هەمووی، مافی خۆیانە گلەیی خۆیان هەبێت، دەبێت گلەییەكانیان بە هەند وەربگیرێت، بەڵام ئەمڕۆ لەپێناوی پاراستنی قەوارەی هەرێمی كوردستان، دەبێت زۆرترین دەنگ كۆبكەینەوە تا زۆرترین كورسیمان هەبێت، تاكو بتوانین بچین لە بەغدا كێشەی مووچە و بودجە و سەقامگیریی و خزمەتگوزاریی چارەسەر بكەین.

* بەو پێیەی جەنابتان گەنجن..
گەنج ماوین؟

* بەڵێ.. لە خوا بەزیاد بێت.
خێرت بنووسێ.

* چیتان كردووە بۆ گەنجان و تاچەندە گەنجان لە گەنجێكی وەكو تۆ رازین؟
لە راستیدا كێشەكان هەمەجۆرن، لە هەرێمی كوردستان و لەو ناوچانەی كە لەژێر ئیدارەی حكومەتی هەرێمی كوردستاندان، وەكو حكومەت هەوڵێكی زۆرمان داوە لە رێگەی كارگە و هەندێك پڕۆژەی كەرتی تایبەت، هەلی كار بۆ گەنجان بڕەخسێنین. لەناوچە كێشەلەسەرەكان كەمێك قورسترە، لەبەر ئەوەی ئێمە لێرە حكومەت و دەسەڵاتدار نین. ئێمە لێرە تاڕادەیەك جۆرێكین لە ئۆپۆزسیۆن. بەتایبەتی ئەمڕۆ لە كەركوك بێت لە خانەقین و دیالە و موسڵ و ناوچەكانی تر بێت. بۆیە ئامانجی ئێمە رێكخستنەوەی هەرێمی كوردستان و بووژانەوەی ئابووریی هەرێمە، بەڵام لە هەمان كاتیشدا دەبێت لە بەغدا رۆڵمان هەبێت و قسەمان بڕوات و كاریگەریمان هەبێت، بۆ ئەوەی لەوێوە بتوانین پڕۆژەی ستراتیژیی بێنینەوە بۆ كەركوك. لەوێوە بتوانین گوشار لە وەزارەتە جیاجیاكان بكەین بۆئەوەی كارگەكانیان بهێننەوە بۆ كەركوك، بازاڕ و ئابووریی كەركوك و ناوچەكانی دیكە ببوژێنینەوە، كە ئابووریی ئێرە گەشەی كرد، هەلی كار بۆ گەنجان دەڕەخسێت و سەرەنجام ئومێدی زیاتری دەبێت بۆ ئایندەی خۆی.

* چاكسازییەكەی حكومەتی هەرێمی كوردستان كە بەڕێزتان پشكی شێرتان بەردەكەوێت، بەتایبەت پڕۆژەی بایۆمەتری، ئەم پڕۆژەیە بەكوێ گەیشتووە؟
پڕۆژەی بایۆمەتری هەنگاوێكە لە پڕۆسەیەكی دوور و درێژی چاكسازیی، كە ئەمڕۆ خەرجییەكی زۆر بەفیڕۆدەچێت لەناو حكومەتدا، تەنها بۆ بەڕێوەبردنی حكومەتەكە. بۆیە ئێستا بە جێبەجێكردنی سیستمی بایۆمەتری، بندیوار و فەرمانبەری وەهمیمان نەهێشتووە، ئێستا دەزانین كێ مووچە وەردەگرێت و چەند وەردەگرێت و لەكوێ وەریدەگرێت. ئێستا لە قۆناغی دووەمی ئەم پڕۆژەیەدا كار لەسەر رێكخستنەوەی هەیكەلی حكومەت دەكەین، بۆئەوەی بزانین بۆ ئەو فەرمانبەرە مووچە وەردەگرێت، بە فیعلی كەسێكی شیاوە لە شوێنێكی شیاو دانراوە یان نا؟ كە ئەمەمان كرد، پێموایە حكومەتێكی پوختەترمان دەبێت، حكومەتێكمان دەبێت كە دابەشكاریی فەرمانبەرەكانی دادپەروەرانەتر دەبێت. ئەوكاتەش حكومەتێكی كاراترمان دەبێت و بەرهەمی زیاتر دەبێت، سیاسەتەكانی كە دایدەڕێژێت دەتوانێ جێبەجێی بكات، تێچووی بەڕێوەبردنی حكومەتەكەشمان كەمتر دەبێت. كەمتر خەرج بكەین بۆ بەڕێوەبردنی حكومەت، دەتوانین زیاتر تەرخان بكەین بۆ پڕۆژە و هاندانی وەبەرهێنان و رێكخستنەوەی هەندێك لەو نادادپەروەرییەی كە ئەمڕۆ هەن لە كوردستاندا.

* پڕۆژەكان بەشێوەیەكی گشتی و پڕۆژە خزمەتگوزارییەكان بەتایبەتی، بە یەكەسانی لە شارەكانی هەرێمی كوردستان جێبەجێكراون؟
هەرێمی كوردستان کەموکووڕییەکی زۆری هەیە لە ژێرخاندا، بۆ نموونە رێگاوبان. راستە لە هەندێك بواردا زۆر پێشكەوتووین. لە بواری پەیوەندیكردن و ئینتەرنێت و هەندێك بواری تری وەكو كارگە و پیشەسازیی كشتوكاڵ، هەرێمی كوردستان لەچاو خۆی پێشكەوتووە. بەڵام لە هەندێك بواری دیكەدا هێشتا زۆرمان ماوە. بە هەڵسەنگاندن و مەزەندی ئێمە بایی 30 ملیار دۆلار کەموکووڕیمان هەیە لە ژێرخاندا كە بریتییە لە: (رێگاوبان، تونێل، پرد و تۆڕی هاتوچۆ) بەگشتی. لەم بارودۆخەی كە ئێستا ئێمە تێیداین كە بارودۆخێكی سەختی دارایی و ئابوورییە، ئەو بڕە پارەیە نییە تا تەرخانی بكەین بۆ ئەوەی ئەو شەقامانەی كە پێویستن بە خێراییەكی گونجاو تەواو بكرێن. بۆیە ئەمە ئەو هاوكێشەیەیە كە دەبێت هاوسەنگییەك دروست بكەین.

ئەولەوییەتی ئێمە لەچەند ساڵی رابردوودا، دابینكردنی مووچە بووە بۆ مووچەخۆرانی هەرێمی كوردستان، بەڵام هەموو دانیشتوویەكی كوردستان مووچەخۆر نییە. ئێمە ملیۆنێك و 200 هەزار مووچەخۆرمان هەیە لەناو پێنج ملیۆن كەسدا، ئەوەی كە مووچەخۆر نییە، چۆن خزمەتی بكەین، بۆیە دەبێت هاوسەنگییەكمان هەبێت لەنێوان ئەو خەرجییانەی كە سەرفی دەكەین بۆ دابینكردنی مووچە، لەگەڵ ئەوەی كە پێویستە بۆ گەیاندنی خزمەتگوزاریی (ئاو، كارەبا، رێگاوبان، چاككردنەوە، تەندروستی، پەروەردە و…هتد). بەڵام گوشارەكە زیاتر گوشارێكی مووچەیی بووە، گوشارێك بووە لەلایەن جەماوەر و فەرمانبەرەكانمان كە شەو و رۆژ كار دەكەن، بۆیە لە راستیدا بارودۆخەكە ئاسان نەبوو.

*ئێستا پەیوەندییەكانی یەكێتیی نیشتمانیی كوردستان لەسەر ئاستی ناوچەكە و عیراق و كوردستان لە چ ئاستێكدایە؟
من هەست دەكەم یەكێتیی نیشتمانیی كوردستان رێزێكی تایبەتی لێ دەگیرێت لەناو عیراقدا، من خۆم هەستی پێدەكەم كە دەچین بۆ بەغدا رێز و حیسابێكی تایبەت دەكرێت بۆ یەكێتیی نیشتمانیی كوردستان. با خۆمان هەڵنەخەڵەتێنین ئەوە نە لەبەر منە نە لەبەر جەنابتە نە لەبەر كەسێكی ترە، ئەوە لەبەر مام جەلالە. مام جەلال وەبەرهێنانی زۆری كرد لە عیراقدا، كەسایەتییەك بوو كە توانی بچێتە ناو دڵی هەموو عیراقییەكەوە، چ سوننە بێت، چ شیعە و مەسیحی و سابیئی و كلدانی و شیوعی و هەموو پێکهاتەکانی تر. ئەو چەپكە گوڵەی كە هەمیشە مام جەلال باسی دەكرد، بە فیعلی لەناو هەریەك لەو گوڵانەدا مام خۆشەویستییەكی چاندووە لە دڵیاندا. بۆیە ئەمەمان بۆ ماوەتەوە، بەڵام پێموایە ئەو خۆشەویستییە بۆ هەتا هەتا نییە، ئەگەر ئێمە نەتوانین برەو بەو پەیوەندییانە بدەین، ئەگەر ئێمە نەتوانین گرنگی بەو پەیوەندییانە بدەین كە هەڤاڵ مام جەلال دروستیكرد، بەرە بەرە ئەو پەیوەندییە ستراتیجییە مێژووییە كاڵ دەبێتەوە. ئەمە تەنها بۆ عیراق وانییە، بەڵكو لەگەڵ وڵاتانی دراوسێشدا وایە. لەگەڵ هەر بەرپرسێكی ئێران و توركیا و سعودیە و ئوردن و كوێت قسە بكەیت، هەموویان چیرۆكێكیان هەیە لەگەڵ مام جەلال-دا. بڕۆ بۆ وڵاتانی ئەوروپا، ئەمریكا و بەریتانیا، هەر شوێنێك دەچیت هەریەکەو چیرۆكێكی هەیە لەگەڵ مام جەلال-دا. ئەمە شتێكی زۆر گەورەیە كە بۆ هەموومان ماوەتەوە، بۆ یەكێتی ماوەتەوە، سەروەتێكە كە دەبێت یەكێتی باشتر لەئێستا وەبەرهێنانی تێدا بكات و پەرەی پێ بدات و بێمنەت نەبێت و بڵێت قەیناکە لەبەرئەوەی مام جەلال ساڵانی 2007 و 2008 و 2009 و 2010، ئەمەی كرد، یەكێكی تر دەتوانێت شتێكی تر بكات، نەخێر ئێمە رێزێكی تایبەتمان هەیە بۆ یەكێتی، ئەو رێزە هەتاهەتایی نییە، دەبێت وەبەرهێنانی پێوە بكەین، دیسانەوە دەڵێم بۆیە گرنگە بەهێزەوە بچین، بە یەكڕیزییەوە بچین، بە یەكدەنگییەوە بچین، بەیەكەوە بچینەوە بۆ بەغدا تا تەواوكاری رێبازەكەی هەڤاڵ مام جەلال بین و تەواوكاری سیاسەت و بۆچوونەكانی كاك نەوشیروانی رەحمەتی بین.

* هەندێك لایەن كەركوكیان بە داگیركاریی ناو دەبرد و دەیانوت داگیركراوە، ئێستا گەڕاونەتەوە بۆ ئەوەی بانگەشەی هەڵبژاردن لەم شارەدا بكەن كە پێیان دەوت داگیركراو، پەیامتان بۆ ئەوە چییە؟
ئێمە تەنها دەتوانین لەسەر خۆمان قسە بكەین، ئەمڕۆ كەركوك لەژێر ئیدارەی ئێمەدا نییە، من هەست دەكەم ئەمە غەدرێكە بۆ خەڵكی كەركوك، غەدرێكە لە یەكێتی، ئێمە دەبێت هەموو توانایەكی خۆمان بخەینەگەڕ بۆ ئەوەی بگەڕێینەوە بەهێز و بە سیاسەت و بە حیكمەت و ئاشتیانە بێینەوە حوكمڕانییەكی باشتر لە جاران، پیشانی خەڵكی كەركوك و ناوچەكە بدەین كە ئێمە باشترین كەسین هەم بۆ نوێنەرایەتیكردنی كۆمەڵانی خەڵكی كەركوك لە بەغدا، هەم بۆ بەڕێوەبردنی كەركوكیش.

* رۆڵی ژنان لەم بانگەشەیەی هەڵبژاردنەدا و لە نێو قەوارەی هاوپەیمانیی كوردستاندا چۆنە؟
رۆڵی ژنان رۆڵێكی زۆر كاریگەرە و دەتوانرێت رۆڵێكی یەكلاكەرەوە ببینێت. من خۆشحاڵم بووم كە ئەمڕۆ لە هۆڵی سەنتەری رۆشنبیریی و لە راگەیاندنی هەڵمەتەكەدا بینیم هۆڵەكە پڕ بوو، تێكەڵ بوو لە كوڕان و كچان و ژنان و پیاوان. خەڵكی تێكۆشەر و خەڵكی گەنج. هەموو جۆرێكی تیابوو. بۆیە ئەوە مایەی دڵخۆشی بوو بۆ من. پێموایە یەكێتی حزبێكە یەكێتی هێزێكە یەكێتی باوەڕێكە كە دەگونجێت لەگەڵ بیر و باوەڕی ئەم سەردەمەدا. راستە رابردوویەكی زۆر پیرۆزمان هەیە و هەقە شانازیی پێوە بكەین. بەڵام یەكێتی تەنها حزبێك نییە كە لە رابردوودا بژیت، یەكێتی حزبێكە كە بۆ ئێستا پێویستە و بۆ ئایندەش پێویستە. بۆ ئەوەی لە ئێستا و ئایندەدا پێگەی خۆمان بەهێز و كاریگەر بكەین، پێویستمان بە هەموو چین و توێژێكە لە هەرێمی كوردستان. پێویستمان بە كوڕانە پێویستمان بە كچانە پێویستمان بە نوێنەری هەموو رێكخراوە دیموكراتییەكان و هەموو پێكهاتەكانی كۆمەڵگەیە. ئەمەش پێویستی بەوەیە هەم ژنی كارامان هەبێت لەناو ئەم حزبە كە هەمانە لەناو سەركردایەتی و مەكتەبی سیاسی و لەناو حكومەتدا هەمانبێت، لەناو هەموو ئۆرگانەكانی حزب هەمانبێت. من بەشبەحاڵی خۆم پێموایە هەقە زیاترمان هەبێت، هەقە رێگایەكی زیاتر بدرێت بە خانمان بۆ ئەوەی رۆڵێكی كاریگەرتر ببینن لە سیاسەت، هەقیشە دووربكەوینەوە لە عەقڵییەتی پیاوسالاری.

* حەز دەكەم پرسیارێك دوور لە سیاسەتت لێ بكەم، تاچەند تۆڕە كۆمەڵایەتییەكان بەكاردەهێنێت و جگە لە پۆستی سیاسی كە لە تۆڕە كۆمەڵایەتییەكان ئەگەر بتەوێت پۆستی بكەیت، حەزت لێیە چ پۆستێكی تر بكەیت؟
لەم سەردەمەدا هەموومان ناچارین موتابەعەی تۆڕە كۆمەڵایەتییەكان بكەین، خۆشم ناو بەناو بەشدارم لە هەندێك لەو ماڵپەڕانە چ ئینستاگرام بێت یان تویتەر، بەڵێ لە فەیسبووك شتەكانم دادەبەزێنم، بەڵام بەداخەوە ئێمە كۆمەڵگەیەكی زۆر زۆر سیاسین. من حەز دەكەم هەندێكجار پۆستێك دابەزێنم لەسەر وەرزش. بۆ نموونە من هاندەری یانەی مانجستەر یونایتدم و لەم كۆتاییەدا رۆناڵدۆ گەڕایەوە بۆ ماڵی خۆی، بۆیە زۆر دڵم پێخۆشبوو، خۆم پێنەگیرا هەندێك پۆستم كرد لەسەر ئەوە، بەڵام لەبەرئەوەی كۆمەڵگەی ئێمە ئەوەندە سیاسییە، رەخنەكان دێن «كاكە ئێمە كارەبامان نییە و تۆ باسی رۆناڵدۆ دەكەیت.. كاكە ئێمە مووچەمان نییە و تۆ باسی رۆناڵدۆ دەكەیت..»، راستە منیش سیاسیم، بەڵام منیش بەشەرم منیش هیوایەتم هەیە، راستە من سیاسیم و رەنگ بێت لە 24 سەعاتدا 14 بۆ 15 سەعاتی خۆم تەرخان بكەم بۆ سیاسەت و حكومەت و حزبایەتی و ئەو ئەركانەی كە پێم سپێردراوە كە جێگەی شانازین، بەڵام رەنگبێت بۆم هەبێت نیو سەعاتێك موتابەعەی هیوایەتێكی خۆم بكەم، بۆیە زۆر گوێی نادەمێ و پۆستەكانی خۆم ئەكەم و رووبەڕووی رەخنەكانیش دەبمەوە و پێموایە بەرگەی رەخنەكانیش دەگرم و گرتوومە و دەشیگرم.

* بەناوی دەزگای میدیایی كەركوكەوە جارێكی تر پێت دەڵێین بەخێربێتەوە بۆ كەركوك
زۆر زۆر سوپاستان ئەكەم. كەركوك شاری خۆمە و لەماڵی خۆمم و خۆشحاڵم كە لێرەم و لە خزمەت ئێوەی بەڕێزم.

 93 جار بینراوە