سەرەکی » ئابووری » لە سلێمانی تاپۆكردنی خانووە زیادەڕۆییەكان دەستپێدەكات

«300 هەزار هاووڵاتی لە هەرێم سوودمەند دەبن»

لە سلێمانی تاپۆكردنی خانووە زیادەڕۆییەكان دەستپێدەكات

یەکەی ئابووری

یاسای هەمواركراوی پەرلەمانی كوردستان كە تایبەتە بە زیادەڕۆیی، دەچێتە بواری جێبەجێكردنەوە و كێشە و گرفتی زیادەڕۆیی لە سلێمانی بەپێی یاسا چارەسەر دەكرێت.

بەپێی یاساكەی پەرلەمانی كوردستان، ئەو خانووە نیشتەجێبووانەی كە پێش رۆژی 31ی 12ی 2020، بەشێوەی زیادەڕۆیی دروستكراوە، بە بڕێك پارە تاپۆ دەكرێن و دەكرێت بە ناویانەوە، هەر خانوویەكی زیادەڕۆیش لە دوای ئەو رێكەوتەوە دروستكرابێت، نایاساییە و قەرەبووش نایانگرێتەوە و لەمەودواش رێگری لە هەموو جۆرە زیادەڕۆییەك دەكرێت.

چارەسەركردنی كێشەی زیادەڕۆیی
قایمقامی سلێمانیش رایدەگەیەنێت: چاوپۆشی لە هیچ كەس و لایەنێك ناكرێت و یاساكە وەك خۆی بەسەر هەموواندا جێبەجێ دەكرێت.

بەپێی راگەیەنراوێكی قایمقامییەتی سلێمانی كە كۆپییەكی ئاڕاستەی كوردستانی نوێ كراوە، ئاوات محەمەد قایمقامی سلێمانی لەگەڵ بەڕێوەبەری ناحیەكانی بازیان و بەكرەجۆ و تانجەرۆ و لیژنەی یاسایی قایمقامییەتی سلێمانی كۆبۆوە و رێكارەكانی چارەسەركردنی كێشەی زیادەڕۆیی لە سنووری قایمقامیەتی سلێمانی گفتوگۆی لە بارەوە كراوە.

دەربارەی چارەسەركردنی كێشەی زیادەڕۆیی، ئاوات محەمەد رایگەیاندووە: بەپێی یاسای ژمارە (3)ی هەمواركراوی ساڵی 2019ی پەرلەمانی كوردستان كە تایبەتە بە مامەڵەكردن لەگەڵ كێشەی زیادەڕۆییدا، قایمقامییەتی سلێمانی بە هەماهەنگی شارەوانی سلێمانی و لایەنە پەیوەندیدارەكان دەستبەكار دەبن بۆ جێبەجێكردنی یاساكە و بە پشتبەستن بە یاساكە، هەنگاو بۆ چارەسەركردنی كێشەی زیادەڕۆیی دەنێن.

بە پارچەیەك زەوی قەرەبوو دەكرێنەوە
ئاماژەی بەوەشداوە: بە رەچاوكردنی یاساكە، رێگری تەواو لە هەموو جۆرە زیادەڕۆییەك دەكەن و چاوپۆشی لە هیچ كەس و لایەنێك ناكرێت و یاساكە وەك خۆی بەسەر هەموواندا جێبەجێ دەكەن.

بەپێی یاسا هەمواركراوەكە، ئەو خانووە نیشتەجێبووانەی كە پێش رێكەوتی (31/12/2020) بەشێوەی زیادەڕۆیی دروستكراوە، بە بڕێك پارە تاپۆ دەكرێن و دەكرێن بە ناویانەوە، ئەو خانووانەشی دەكەونە سنووری خزمەتگوزاری، بە پارچەیەك زەوی قەرەبوو دەكرێنەوە و ئەو خانووانەشی دوای ئەو رێكەوتە دروستكرابێت، ئەو رێنمایانە نایانگرێتەوە و بەپێی یاساكەش هەر خانوویەك لە دوای ئەو رێكەوتەوە دروستكرابێت نایاساییە و قەرەبووش نایانگرێتەوە و لەمەودواش رێگری لە هەموو جۆرە زیادەڕۆییەك دەكرێت.

(5 %)ی نرخی راستەقینەی زەوییەكە كەمتر نەبێت
پێشتریش، لوقمان وەردی سەرۆكی لیژنەی شارەوانی و گواستنەوە و گەیاندن و گەشتوگوزار لە پەرلەمانی كوردستان، وردەكاریی ئەو پارەیەی لە هاووڵاتیان وەردەگیرێت لەبەرامبەر تاپۆكردنی خانووە زیادەڕۆییەكانیان ئاشكراکردبوو و رایگەیاندووە: ئەگەر بەهای زەوی خانوویەكی زیادەڕۆ پێنج هەزار دۆلار بێت، ئەوە بەبڕی تەنها 250 دۆلار زەوییەكە لەسەر هاووڵاتییەكە تاپۆ دەكرێت. دواتر (70 %)ی ئەو داهاتەی بەو تاپۆكردنە بەدەست دەهێنرێت، دەگەڕێتەوە بۆ شارەوانی بەمەبەستی گەیاندنی خزمەتگوزاریی بۆ ئەو گەڕەكانە.

ئاشكراشیكردووە، زیاتر لە 300 هەزار هاووڵاتی لە سەرتاسەری هەرێمی كوردستان سوودمەند دەبن لە جێبەجێكردنی ئەم یاسایە.

بەپێی یاساكەی پێشتر، نرخی تاپۆكردنی مەترێك زەوی زیادەڕۆ لەسەر هاووڵاتیان لە ناحییەكان بریتی بوو لە (5 – 8) هەزار دینار، لە قەزاكان بۆ هەر مەترێك (10 – 15) هەزار دینار، لە پارێزگاكان (15 – 30) هەزار دینار. بەڵام بەپێی یاسا هەمواركراوەكە، بە نرخێك تاپۆ دەكرێت كە لە (5 %)ی نرخی راستەقینەی زەوییەكە كەمتر نەبێت.

 103 جار بینراوە