سەرەکی » ئاراستە » پیشانگه‌یه‌ك و گفتوگۆیەکی هونەریی نێوان دارا رەسوڵ (دارۆ) و قەرەنی جەمیل

پیشانگه‌یه‌ك و گفتوگۆیەکی هونەریی نێوان دارا رەسوڵ (دارۆ) و قەرەنی جەمیل

دارۆ رەسوڵ

بەشی یەكەم

قەرەنی جەمیل یەكێك لەو هونەرمەندە كوردانەی كە خاوەنی ئەزموونێكی دەوڵەمەندی كاری هونەرییەو لە پاڵیشیدا خاوەنی پاشخانێكی زانیاری و رۆشنبیریی شێوەكاری كوردی و جیهانییە، دوایەمین ئەزموونی شێوەكار كردنەوەی پیشانگەیەك بووكە هەڵبژاردەیەك لە ئەزموونی ساڵانی رابرووی خۆی نمایش كردبوو كە سەرەتا لەشاری هەولێرو دواتریش لە شاری سلێمانی، ئەم پیشانگەیە بووە هۆكاری درووستبوونی گفتووگۆیەكی هونەری نێوان شێوەكار (دارۆ رەسوڵ) رێكخەری پیشانگەكە لەسلێمانی لەگەڵ هونەرمەنددا.

دارۆ: حەزدەکەم وەك ڕێکخەری پێشانگاکەت، گفتوگۆکەمان بەوە دەستپێبکەین، کە سەرەتا تۆ لە چەند ڕەهەندو دیدێکەوە باسی بەرهەمە نیگارکێشییەکانت بە گشتی بکەیت و بە تایبەتیش تیشك بخەیتە سەر ئەو بەرهەمانەی کە لە ‹›گەلەری ئێستا››ی کارگەی کولتوری سلێمانی بۆ یەکەمینجار نمایشکراون.

قەرەنی جەمیل: ئەم پێشانگایەم پێكهاتووە لە هەڵبژاردەیەكی تایبەتیی تابلۆكانم، کە دەتوانم بڵێم ئەنجامی ئەزمونی رابردووی هونەریمە، تابلۆكان لە ساڵانی 1998 تاكو ئێستا ئەنجامدراون، ڕەنگە لە ڕوی ستایل و بەكارهێنانی ڕەنگ و هەندێ كەرەستە، ئەوەندە جیاوازییان نەبێت، بەڵام لە ڕوی بابەتییەوە هەندێك لە تابلۆكان ڕەنگدانەوەی بیركردنەوەو تێڕامانی زەمەنێكی دیاریكراومە، كە زیاتر بونگەرایی لەخۆ دەگرن، ئەویش بەپێی كاریگەرییەكانی واقیع و خوێندنەوەم بۆ ڕەهەندەكانی ئەو زەمەنە.

لەو زنجیرە تابلۆیانەم، لەگەڵ جیاوازی زەمەنیاندا، باس لە تراژیدیا دەكەم، ئەو تراژیدیایەی كە خاك و گیانلەبەرانی نغرۆی بێهودەیی كردووە، بێگومان ئەویش دەگەڕێتەوە بۆ شێوەی بیركردنەوەی هونەریم، بەبێ زۆر لەخۆكردن، وەك كەسێكی ئازاد لەنێو جیهانی هونەردا جددییەتێك بەسەر هۆشی بابەتیمدا زاڵبوەو بەرەو ئەم ڕوگەیەی بردوم، لێرەدا ویستوومە شێوەیەك لە جوگرافیا دیاری بكەم و لەسەر ئەم پانتاییە خاكێك دروستبكەم بێسنور، مێژوویەك هەیە ڕوداوەكانی دووبارە بوونەوەو زۆر بێهودانە لە بازنەیەكدا دەخولێنەوە.

(ئەركیۆلۆژیای كات و شوێن)، ناونیشانی زنجیرەیەك لە تابلۆكانمە لەو پێشانگەیەدا، كە هەوڵمداوە وەك لێكۆڵینەوەیەكی ئەفسانەیی، بە ڕێگای ئەم ستایلەم لە دوو چەمكی هەمیشە زیندووی ژیانی هەمو كائینێك بكەم و لەسەر ئەم پانتاییەدا بە ڕەنگ و فۆڕمی هەڵبژاردەی خۆم، لە فەزایەكی سێ ڕەهەندی ئەنجامبدەم، ڕەهەندی ئاسۆیی كە كۆتایی نایێ تێكەڵ بە خاكی ئۆكەری و قاوەیی، بە تێكەڵاوبوونیان لەگەڵ ئاسمانێكی ونبوو، هەستكردن بە تەنیاییەكی ئەزەلی، وەك بڵێی بەدرێژایی زەمەن لەسەر ئەم خاكە هیچ جوڵەیەكی ئینسانی بۆ خۆدروستكردن ڕوی نەدابێت، شوێن وشك و كەئیبە وەك (وێرانە خاك) هیچی لەسەر نەڕواوە، تەنانەت بەكەڵكی هیچ گیانەوەرێك نەهاتووە، من ساڵانێكی زۆر لە دەرەوەی وڵات بووم، پێش ئەوەی بڕۆمە دەرەوە، شێوازی كاركردنم تەعبیرییەكی ڕەنگاوڕەنگی شین و مۆر باوی و فیگەرو فەزای كوردەواری بوو، زیاتر تاك بابەتیی بوون، واتە هەر تابلۆیەك لەسەر یەك تێمە ئەنجامدەدرا، بەڵام ئەو گۆڕانكارییانەی كە بەسەر شێوەو تەكنیكی كاركردنمدا هات، زۆر بوون، لە ئەبستراكت و ئیرتیجالی و بەكارهێنانی شێوەی سیمبۆلی و….هتد. بەڵام ئەو ساڵانەی لە ئیسپانیا بووم كاریگەرییەكی زۆری هونەری ئیسپانی، لە ڕوی تەكنیكی و فكرییەوە لەسەرم هاتەدی و زۆر لەوانە سەرسامی كردووم، بۆ نموونە گۆیا، پیكاسۆ، تاپێس، بەرشێلۆ… زۆری دی، ئەوەی كە پێی سەرسام بووم زیاتر ئەو ئازادییە ڕەهایەیە كە هونەرمەندانی ئیسپانی هەیانە، هیچ شێوازو قوتابخانە لای ئەوان نییە، گرینگ كاركردنە بەو جورئەتەی كە هونەرمەندەكە هەیەتی، بێ بیركردنەوە لە دەوروبەرو ستاییلە جیاجیاكان، داڕشتنی فكرە گرینگە، لێرەدا، من تەنیا یەك فكرەم هەبووە بۆ داڕشتن كە ئەو زنجیرە تابلۆیەی لە خۆگرت و بوو بە بابەتی ئاركیۆڵۆژیای كات و شوێن، كە دوو جەمسەری زۆر گرینگ و پڕ لە لوغزو نهێنین بۆ ژیانی مرۆڤ.

(ئینسانی وەهمی و وەهمی شارستانییەت)، ئەم زنجیرە تابلۆیەم وەكو ئەوەی پێشتر، فكرەیەك بو لەسەر چارەنووسی مرۆڤ بە گشتی و ئەم ناوچەیەی ئێمەی لێ دەژین بە تایبەتی، لە ئینسان بێهودەترو بەدبەخت و بێ بەهاتر نییە لە سەر گۆی زەوی. حەقیقەتی ئینسان، وەهمێكی زۆر كۆنە، دێت و دەڕوات، مێژوویەكی دوورودرێژ لەگەڵ خۆی بە نائومێدی دروستدەكات، وەك وەهمێك لە بنیاتنانی شارستانی، مرۆڤ بە جلووبەرگی پۆشتەو ڕێك، لەگەڵ كۆمەڵێ بەهای ئەخلاقی و فكری، لە ژیان لە جموجۆڵدایەو سەرقاڵی هەمو شتێكە، بەڵام بە بچوكترین تێكچونی مێشك، وەك شێت، هەموی دەگۆڕێت و دەچێتە خوارەوە بۆ وەهم، تەنیا یەك ئاوتڵاینی سپی دەوروبەری جەستەی دەمێنێتەوە، هێدی هێدی لە چاڵێكی تاریكەوە دێتە دەرەوەو لە ژیان بەردەوام دەبێت، بنیادی وەهمەكانی دەكات، لێرەدا جێبەجێكردنم بۆ ئەم فكرەیە لە چەند تابلۆیەكدا، بەشێوەی گێڕانەوەیەک، یا وەك ڕۆمانێك باس لە چارەنووس دەكەم و وەك هەڵوێستێك بەرانبەر ژیان و گوزەرانیی مرڤ و دەوروبەری دروستكراو، دیسان فۆڕم و فیگەرەكان واقعین، لە فەزایەكی سێ ڕەهەندی، ڕەنگی خۆڵ و خاكیی سورو قاوەیی و مرۆڤی وەهمی، ئەو كەرەستانەی كاری پێدەكەم، ڕەنگی ئەكریلیك تێكەڵاوی هەویرێكی كاغەزی دەكەم لە سەر كانڤاس، بەڵام بە شێوەیەك كە پانتایی تابلۆ پڕدەكەم و بە ڕەنگ دەیپەستم وەك دیوارێك كە خۆتی لێبدەیت هەست بە دیوارێكی قوڕ بكەیت، یا خاكێكی قوڕاویی دەشتێكی چۆڵ، هەندێكجار لە نێو كارێكی ئێستراتیژیی جددی، بە ئیرتیجالێكی ڕەنگ كۆتایی بە تابلۆ دێنم.

(خەونی خەونەكان)، ناوی كتێبێكی ئەدیب و نوسەری ناوداری ئیتالی (ئەنتۆنیۆ تابوكی)یە، كۆمەڵە چیرۆكێكە كە هاوڕێی هونەرمەند (جەلال ڕەئوف) بۆ سەر زمانی كوردی وەریگێڕابوو، ناونیشانی ئەو زنجیرە ئاوییانەیە كە دوا كارەكانمە، بە یەك قەبارەو یەك هێماو یەك سیمبۆلی بەكارهاتوو، بە شێوە تەعبیرییەكی واقیعی ئەنجاممداون، ئێمە لەم ناوچەیە، بێگومان خۆشم پێشەكی، ڕابردووەكمان هەیە لە خەون دەچێت، دیار نییە، ناگیرێت، كە لەو خەوەش بەئاگادێیتەوە هەر دیار نییە، ئێستای كەسەكانیش ئامادە نییە، لێرەدا بابەتی خەون وەك لەپەلكەوتنی كۆمەڵگە دەبینم، مێژوویەك پڕ لە ئێش و ئازارو نەهامەتی، بێ توانایی داهێنانی شارستانی و نوێبونەوەو پێشكەوتن، خەونی درێژخایە، لەم ئاوییانە ڕەنگم زۆر بەكارنەهێناوە، بەڵكو زیاتر گرینگیم بە كۆنتراست و سێ ڕەهەندیی داوە، لە نێو كەشوهەوایەكی ڕۆمانتیكی كە یارمەتی بەجێهێنانی ناوەڕۆكەکەم بدات.

 128 جار بینراوە