سەرەکی » ئاراستە » ژنە شێوەكارێك: رەنگی مۆر واتای هێز و ژن بوون دەگەیەنێت

ژنە شێوەكارێك: رەنگی مۆر واتای هێز و ژن بوون دەگەیەنێت

ژنۆرنال-چیا

ژنە شێوەكارێكی كورد ماوەی 12 ساڵە لەپاڵ كاری گرافیك و دیزاین و ریكلامدا كاری شێوەكاری دەكات، بەڵام بەوتەی خۆی هەرگیز نەیتوانیوە بەدڵی خۆی ئەو شتەی دەیەوێت بیكاتە تابلۆیەك نمایشی بكات.
تارا محەمەد خەڵكی شاری مهابادی رۆژهەڵاتی كوردستانە و ماوەی 12 ساڵە بەردەوامە لەكاری هونەری و شێوەكاری و گرافیك و دیزاین و ریكلام، بەجۆرێك 3 پێشانگای جیاوازی لە رۆژهەڵاتی كوردستان و سلێمانی كردۆتەوە و بەنیازە لە هەولێریش پێشانگایەك بكاتەوە.
ئەو ژنە شێوەكارە،كە خاوەنی بڕوانامەی بەكالۆریۆسە لەگرافیك دیزایندا بە «ژنۆرناڵی» ڕاگەیاند، لە پشت تابلۆكانیەوە چیرۆكی ژیانی تارا و هەموو ئەو ژنانەی بەهێزن و بەهیوان و حەز بەئازادی دەكەن هەیە، هەربۆیە زیاتر رەنگی مۆر بەكاردێنێت، چونكە رەنگی مۆر واتای هێز و ژن بوون دەگەیەنێت.
تارا دەڵێت:
«بەكارهێنانی رەنگەكان لە تابلۆكانی مندا هەموویان واتای تایبەتی خۆیان هەیە، رەنگە ساردەكان واتا بە تابلۆی ژنەكان دەبەخشن» ئەمە وتەی تارای شێوەكارە.
بە وتەی ژنە شێوەكارەكە، بەربەستی بەردەم ژنێكی شێوەكار لەكۆمەڵگای ئێمە، بەراورد بە وڵاتانی دەرەوە زۆر جیاوازی هەیە، بۆیە هەرگیز نەیتوانیوە بەدڵی خۆی ئەو شتەی دەیەوێ بیكاتە تابلۆیەك و لە رۆژهەڵاتی كوردستان نمایشی بكات.
تارا محەمەد، كە ماوەی 8 ساڵە لەشاری سلێمانی دەژی باسی لەوەكرد، لە كوردستان مافی ژن و پیاو یەكسان نییە و ژن هەمیشە قوربانی بووە، هەر بۆیە زۆرجار نەیانتوانیوە ئەو شتانەی دەیانەوێت بیكەن بە تابلۆیەك، ئەویش لەبەرئەوەی كۆمەڵگا قبولی ناكات، یان تێگەیشتنێكی هەڵەی بۆ دەكەن و لێی تێناگەن.
ناوبراو وتیشی:» هونەری شێوەكاری تا ڕادەیەك بۆتە پیشە و ژیانمی پێ تێپەڕ دەكەم، بەنمونە كاتێك خەڵك داوادەكات تابلۆیەكی بۆ بكێشم هونەرەكە دەبێتە بزنس، بەڵام زۆر جار وێنەكێشان وەكو حەز و ئارەزویەكە، چونكە كاری خۆم شتێكی ترە، و كاتی بێ تاقەتی تابلۆ كێشان ئارامم دەكاتەوە».
تارا كاری ماڵەوە و دەرەوەش دەكات، هاوكات نیگاریش دەكێشێت و خزمەتی منداڵەكەشی دەكات، بۆیە كاتەكانی ڕۆژانەی دابەشكردوە بەجۆرێك بۆ هەر كارێك كاتێكی تایبەت بەخۆی بۆ داناوە.
ئەو شێوەكارە دەشڵێت:»پێش ئەوەی ببم بەدایك، كاتی پشوو و خەوم كەم بوو، زۆر گرنگیم بەخەو نەدەدا، بەجۆرێك نیوەی شەوانم بۆ كاری هونەری دانابوو، بەیانیان كاری ماڵەوەم ئەنجام دەدا، نیوەڕۆیانیش تا شەو دەوامم هەبوو، بەڵام لەم كاتەدا زیاتر لەماڵەوە دەبم و كاتێكی زیاترم بۆ خێزانەكەم داناوە، چونكە كچەكەم لەهەمو شتێك زیاتر لا گرنگترە و دەمەوێت كچەكەم زۆر بەهێز بێت، وەكو تابلۆكانی خۆم دروستی بكەم».
تارا هیوای وایە ڕۆژێك بێت، ژنان بەشێوازێكی عاقڵانە خۆیان بڕیاردەری ژیانی خۆیان بن، و چاویان لەدەستی پیاوان نەبێت، و ژنان خۆیان بەهێز و دەسەڵاتداربن، خۆیان ژیانی خۆیان دروست بكەن، لەگەڵ هەموو ئەمانەش خێزانێكی باش بن و ژیانێكی تەندروستیان هەبێت.

print

 49 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*