سەرەکی » ساڵۆنی کوردستانی نوێ » هەڵسەنگاندن و مشتومڕێک لەبارەی ئەدەبیاتی کوردییەوە بە شێوەزاری هەورامی

ساڵۆنی کوردستانی نوێ

هەڵسەنگاندن و مشتومڕێک لەبارەی ئەدەبیاتی کوردییەوە بە شێوەزاری هەورامی

لەم ساڵۆنەدا
لە درێژەی بابەت ‌و كۆڕە هەمەڕەنگەكانیدا، ساڵۆنی كوردستانی نوێ پێیوایە سەرەڕای بوونی بابەتی هەمەڕەنگ لەڕووی سیاسی ‌و فیكریی ‌و ئەدەبییەوە، مەسەلەی زمان و دیالێكتیكە جیاجیاكانی كوردیش بایی ئەوەیە كە لای لێبكرێتەوە، لەوەش گرنگتر، ئەوەیە كە ئەوانەی لەوبارەیەوە بەرهەم ‌و هەوڵیان هەیە، خۆیان بەرهەم ‌و هەوڵەكانیان بخەنەڕوو و لەبارەیەوە بدوێن.
ئەم بەرهەمەی كاك ئەردەڵان عەبدوڵڵا یەكێكە لەو هەوڵانەو یەكێكیشە لە نۆبەرەی كارەكانی ساڵۆنی كوردستانی نوێ لەو بوارەدا، بێگومان دەشێت لە داهاتوودا ئەمە ببێتە رچەشكێنێك بۆ شێوەزارو دیالیكتە جیاجیاكانی كوردی و بەخستەڕوو و مشتومڕی ئامادەبووان لەبارەی ئەو بەرهەمانەشەوە، خاڵە هاوبەش ‌و جیاوازەكانی ناو دیالیكتیكە جیاجیاكان زیاتر بۆ بەشدارانی كۆڕەكان روون ببێتەوەو لەڕێی ئەو مشتومڕانەشەوە زیاتر بۆ خوێنەرانی كوردستانی نوێ روونببێتەوە، بەو پێیەی دووتوێی ساڵۆنی كوردستانی نوێ پوختە یان دەقی سەرجەم كۆڕەكان ‌و مشتومڕو رەدو بەدەلەكانی نێوان كۆڕگێڕو ئامادەبووان بڵاودەكاتەوە.
ئەم كۆڕەی ساڵۆنی كوردستانی نوێ لە رۆژی یەكشەممە رێكەوتی 11/11/2018 بۆ ناساندن ‌و گفتوگۆ لەبارەی كتێبی «رازی هۆرامی» لە نووسینی نووسەر‌و رۆژنامەنووس ئەردەڵان عەبدوڵڵا بەڕێوەچوو.

ساڵۆنی كوردستانی نوێ

سەرنووسەر: ئامادەبوانی بەرێز هەموو لایەك بەخێر بێن بۆ كۆڕی ئەمرۆمان كە دەربارە ئەم كتێبەی كاك ئەردەڵان عەبدوڵڵایە.
ئەم كتێبەی ئەمرۆ دەیناسێنین رەنگە تایبەتمەند بەڵام لە راستیدا هەق وایە تایبەتمەند نەبێت چونمە ئێمە قسە لەسەر ئەدەب بە هەموو جۆرەكانیەوە دەكەین، ئەم كتێبەی كاك ئەردەڵان یەكەم كتێبی نیە بەڵام رەنگە یەكەم كتێبی بێت بە شێوەزاری هەورامی نوسی بێتی، پێشتر كتێبێكی كاك ئەردەڵانمان لێرە پێشكەشكرد وەرگێرانی رۆمانێكی فەرەنسی بوو.
من لێرەدا ناتوانم باس لە چیرۆكەكان بكەم چونكە چیرۆكەكان بە شێوەزاری هەورامیەو كتێبەكەش تازە گەیشتووە بە دەستم بەلام باسێكی كورتی كاك ئەردەڵانتان بۆ دەكەم, بەراستی كاك ئەردەڵان یەكێكە لەو خوێندەوارانەی كە كوردستانی نوێ شانازی پێوە دەكات مەلەف تیە كاك ئەردەڵان هاوكاری نەكردبێت‌و كاری تێدا نەكردبێت، ئەم كۆرەی ئەمرۆ وەكوو رۆژنامە نووس نیە وەكوو چیرۆك نووسە، ئەم كۆمەڵە چیرۆكەی بەئێمە دەناسێنێ رەنگە كەس وەكوو خاوەنی كتێب نەتوانێت بە تەواوی لەسەر كتێبی خۆی قسە بكات، رەنگە ناكۆكیەك هەبێت لەسەر ئەوەی كەی زمانیكوردی یەك ریز دەبێت؟ بەڵام تا ئەو كاتە ئەم جۆرە لاكردنەوەیە لە شێوەزاری هەورامی ‌و شێوەزارەكانی تریش ئەركێكی نیشتمانیە.
لێرەوە كاك ئەردەڵان خۆی باسی كتێبەكەتان بۆ دەكات.
ئەردەڵان عەبدوڵڵا:
سەرەتا بەخێرهاتنی هەموولایەكتان دەكەم و سوپاستان دەكەم، بۆ بەخشینی كەمێك لە كاتی خۆتان ، بۆ بەشداربوون لەم مەراسیمەدا. هەروەها زۆر سوپاسی ساڵۆنی كوردستانی نوێ و كاك ستران عەبدوڵڵا دەكەم، كە رێگەیان داین لێرەدا ئەم مەراسیمە ساز بكەین.
دەمەوێت قسەكانم بكەم بە دوو بەشەوە، بەشی یەكەمیان باسی ئەدەبیاتی كوردی بە شێوەزاری هەورامی دەكەم، بەشی دووەمیش باسی ئەم كتێبە نوێیەم دەكەم.
دیارە نووسین و فەرهەنگ و ئەدەبیات بە شێوەی هەورامی مێژووییەكی دێرینی هەیە و دەگەڕێتەوە بۆ سەدەی چواردەی زایینی. لەوكاتەوە هەورامی زمانی نووسین و شیعر و ئەدەب بووە، هەروەها زمانی فەرمی ئیمارەتی ئەردەڵانیش بووە، كە یەكێك بووە لە ئیمارەتە مەزنەكانی كوردستان.
هەمیشە بۆ پێشكەوتنی زمان، پێویستی بە بوونی دەسەڵاتی سیاسی هەیە، لە كوردستانیشدا كاتێك سەیری مێژووی كوردی دەكەین بە تایبەتی ئیمارەتەكان، دەبینین هەر كاتێك ئیمارەتێك لە رووی سیاسییەوە بەهێز بووبێت، لە رووی ئەدەبیی و فەرهەنگیشەوە بەهێزبووە، هەروەها دەبینین هەر ئیمارەتێكیش پشتگیری شێوەزارێكی كردووە.


گەر سەیری كتێبخانەی كوردیش بكەین، دەبینین بەشێكی گەورەی ئەدەبیاتی كلاسیكی كوردی بە تایبەتی لە رووی شیعرەوە بە شێوەی هەورامی نووسراوە، دەتوانین ئاماژە بە بەرهەماكانی شاعیرانی گەورەی وەكو « خانای قوبادی، بێسارانی، مەولەوی، وەلی دێوانە « بكەین.
لە لایەكی تریشەوە لە رووی ئاینیشەوە شێوەی هەورامی سیمایەكی ئایینی هەبووە، چونكە كتێبی پیرۆزی « یارسانەكانی « پێ نووسراوەو هەورامی بۆتە زمانی یارسانەكان. زمانیش بە دەسەڵاتی سیاسیی و ئایینی و ئابووریش پێشدەكەوێت.
بەلام بەداخەوە وا بۆ ماوەی سەد سالێك دەچێت كە شێوەزاری هەورامی پاشكەوتووە، دیارە ئەمەش بە هۆی دوو هۆكارەوە بووە:
یەكەمیان: لە باشووری كوردستاندا دەسەڵاتی سیاسی دژایەتی هەموو شتێكی كوردی كردووە، هەروەها ئەوە شێوەزارەشی كە دەوڵەت رێگەی پێداوە، سۆرانی بووە، ئەمەش رۆڵی لە پێشخستنی سۆرانی هەبووە، لەبەرامبەریشدا رۆڵی لە پاشكەوتنی هەورامی هەبووە.
دووەمیان: پەیوەندی بە نووسەرانی هەورامانەوە هەیە، چونكە ئەوانیش « بە خۆشمەوە» كەمتەرخەم بوون و بە هەورامی نەیانووسیوە، دیارە هەموو زمانێكیش بۆئەوەی پێشبكەوێت، دەبێت پێی بنووسرێت.
لە بارەی كتێبی رازی هۆرامی
دیارە هەموو كتێبێك حكایەتی خۆی هەیە، ئەم كتێبەش بەهەمانشێوە حكایەتی خۆی هەیە. پێشتر لە ئەڵمانیا لەگەڵ كۆمەڵێك دۆست و برادەری ئازیز،گۆڤارێكی هەورامیمان هەبوو ، مانگانە لەسەر سایتەكان دەرمان دەكرد، لەوكاتەوە هەندێك لە كورتە چیرۆكەكانم نووسیوە، دواتریش لەم چەند ساڵەی دواییدا ، هەندێكی تریانم نووسیوە. لەبەرئەوە مێژووی ئەم كورتە چیرۆكانە كۆنە و هەندێكیان دەگەڕێتەوە بۆ دە ساڵ پێش ئێستا.
چەند جارێكیش هەوڵمداوە كە چاپیان بكەم، بەڵام دەرفەت نەبووە، تا لە ماوەی پێشوودا لە رێگەی چرۆ خانەوە ، باسی ئەم كتێبەم بۆ كرد وتم دەمەوێت چاپیان بكەم، ئەویش بە سووپاسەوە پەیامەكەمی گەیاندبووە كاك قووباد تاڵەبانی، پاش ماوەیەك جەنابی كاك قووباد رەزامەندی دەربڕی بۆئەوەی ئەركی بە چاپ گەیاندنی ئەم كتێبە بگرێتە ئەستۆ، لێرەدا جێگەی خۆیەتی كە سوپاسی كاك قوباد بكەم، وە هیوادارم لە پشتگیریكردنی ئەدەب و هونەری كوردیدا بەردەوام بێت. هەروەها سوپاسی ئەرك و ماندوبونی چرۆ خانیش دەكەم
دیارە ئەم كتێبە بریتییە لە كۆمەڵێك كورتە چیرۆك كە خۆیان لە حەوت كورتە چیرۆك دەبیننەوە كە ئەوانیش بریتین لەمانەی خوارەوە:
1 . من و فشۆ نیسانی
2. جگەرەكۆ لالو هەسەنی
3. ئا شیوعیەی كەبی بە مەڵڵا
4. نەخشبەندیوی كافر
5. جە مەمكە مژۆ پەی جگەرەی
6. زاڵم زەواڵش پێ یاونە
7. مەوعیدو حبەكام
سەرەتا دەمەوێت ئەوە بڵێم كە كورتە چیرۆك خۆی لە كۆمەڵێك رەگەزی گرنگ پێكدێت كە ئەوانیش بریتین لە : شوێن، كات، دیالۆگ، مۆنۆلۆگ،پاڵەوان، رووداو، گێڕەوەر، رەگەزی كتوپڕ، زمان» دیارە زمانیش گرنگی خۆی هەیە .


من لەم كورتە چیرۆكانەدا هەوڵمداوە، زیاتر خۆم بە ناوچەیەك یان كاتێكی دیاریكراو نەبەستمەوە، بگرە چیرۆكەكان باسی كۆمەڵێك شوێن و كاتی جیاواز دەكەن. هەروەها هەوڵمداوە زیاتر پشت بە رێچكەی « قووتابخانەی ریالیزمی سیحری» ببەستم. كە تێیدا « واقیع» تێكەڵ بە « خەیاڵ و فەنتازیا « دەكرێت. كەسایەتییەكانی ناو ئەم كورتە چیرۆكانە لە واقعی ئەمڕۆماندا نزیكن، بەڵام لەهەمانكاتیشدا هەوڵمداوە، لە رێگەی خەیاڵ و فەنتازیای خۆمەوە، پاڵەوان و رووداوەكان، بە شێوەیەكی ئەدەبی دابرێژم. هەوڵمداوە واقیع و خەیاڵ تێكەڵ بكەم.
ئەم كتێبە خۆی لە دووتۆی 100 لاپەڕەدا دەبینێتەوە، ئەمەش هەژدەهەمین كتێبی چاپكراومە، بەڵام یەكەمین كتێبمە بە كە بە شێوەی هەورامی نووسیبێتم.
دووبارە زۆر سوپاسی ئامادەبوونتان دەكەم لەم مەراسیمەدا و هیوادارم هەمیشەش ساڵۆنی كوردستان نوێ، ئاوەدان تر و گەرمووگوڕ تر بێت.
سەرەتا پێم خۆشە لەسەر شێوەزاری هەزرامی قسە بكەم، راستە رەنگە هەندێكتان بەلاتانەوە سەیر بێت بڵێن كورتە چیرۆك تا ئێستا بە هەورامی نەنوسراوە بەڵام.
شێوەزاری هەورامی شێوەزارێكی دەوڵەمەندە مێژوویەكی دێرینی هەیە بەشێكی زۆر لە كتێبخانەی كوردی بەو شیوەیە نوسراوە، دەتوانین باسی دیوانەكانی خانای قوبادی‌و بێسارانی‌و مەولەوی بكەین كە ئەمانە لە رووی شیعری كلاسیكی كوردیەوە دەتوانم بڵێم شێوەزاری هەورامی زۆر دەوڵەمەندە، بۆ هەموو شێوەزارێكیش هەر ئیمارەتە‌و شێوەزارێكی هەبووە لە ئیمارەتی ئەردەڵاندا ئەو شێوەزارەی فەرمی بووە هەورامی بووە، بەڵام ماوەی سەد ساڵێك ئەم شێوەزارە لەرووی ئەدەبیەوە وەكو شێوەزارەكانی تر پێشنەكەوتووە، ئەوە دەگەڕێتەوە بۆ دوو هۆكار یەكێكیان ئەوە كە هەموو زمان‌و شێوەزارێك پێشبكەوێت دەسەلاتی سیاسی لە پشتەوە بووە ئەمە رۆڵی سەرەكی هەبووە بەشێكی تریشی دەگەڕێتەوە بۆ خەمساردی نوسەرانی هەورامان، بەڵام بە گشتی لە رووی شیعریەوە شێوەزاری هەورامی زۆر دەوڵەمەند بووە، بەڵام لەرووی رۆمان كورتە چیرۆكەوە نوك هەر هەورامان كوردستان بە گشتی مێژوویەكی چل پەنجا ساڵەی كورتی هەیە.
لەلایەكی دیكەوە تا ئێستاش رۆژنامە‌و گۆڤارێك نەبووە گرنگیەكی وا بدات بەو شێوەزارە، ئەمەش وای كردووە تۆزی پاشەكشە بكات.
لەبارەی ئەم كتێبەوە پێكهاتووە لە 7 كورتە چیرۆكە هەندێكیان دەگەڕێتەوە بۆ 10 ساڵ پێش ئێستا هەندێكیشیان دەگەڕێتەوە بۆ ساڵێك پێش ئێستا، هەندێك لەم كورتە چیرۆكانە كە لە ئەڵمانیا بووم لەگەڵ هەندێك برادەر گۆڤارێكمان هەبوو بە هەورامی دەمان نووسی لەوێدا هەندێكیانم بڵاوكردووەتەوە، بەڵام بەشێكیشیان بەشێوەی سۆرانی بڵاوم كردووەتەوە بەڵام بە هەورامی هەر مەجال نەبوو.
ماوەیەكی زۆر بوو كۆمكردبوونەو تا وەكوو خۆشبەختانە لەرێگەی چرۆخانەوە كە پێمخۆشە سوپاسی بكەم توانیم پێشكەشی كاك قوباد بكەم ‌و ئەوانیش رەزامەندیان دەربڕی بۆ ئەوەی كە ئەم كتێبە چاپكرێت.
لە چیرۆكەكاندا بە گشتی خۆم نەبەستوەتەوە نە بە كات نەبەشوێنەوە، ئەو چیرۆكانەی باسم كردووەن نەم وەتووە لە فڵان كاتی دیاریكراو یان تایبەتن بەشوێنێك.
هەروەها زیاتر هەوڵمداوە پشت بە واقیعی سیحری ببەستم كە هەم واقیعە‌و هەم نوسەر خۆی تونیویەتی لەرووی فانتازیا‌و خەیاڵی خۆیەوە كەسایەت‌و رووداوەكان دابڕێژم.
لە هەمان كاتیشدا هەوڵمداوە سیمایەكی واقیعی پێوە بێت، پێمخۆشە ئەوەش بڵێم ئەم كتێبە هەژدەهەمین كتێبمە پێشتریش كۆمەڵێك كورتە چیرۆكم هەبووە.
لەرووی زمانەوە من هەوڵمداوە بەو زمانە بنوسم كە وەرمگرتووە‌و ئاسان بێت، دووبارە زۆر خۆشحاڵ بووم بە ئامادە بوونتان نامەوێت زۆر كاتتان بگرم ‌و هیوادارم بەدڵتان بێت.
د.حسێن محەممەد عەزیز:
دەستت خۆشبێت، بەڵام من چەند سەرنجێكم هەیە قۆناغەكانی زمانی نووسینی كوردی بە هەر چوار دیالێكتەكە نووسراوە، سەرەتا لوڕی بووە، لەسەردەمی بابە تایەر‌و هاوەڵەكانیان پاشتر پەڕیوەتەوە بۆ شوێنێكی تر وەك گۆران ‌و بادینان ‌و پاشان هاتووەتەوە ناوچەی خۆمان قوتابخانەی نالی‌و مەحوی لێ دروست بووە.
بەگوێرەی زمان‌و دەسەڵات ‌و پێشكەوتنی زمانی كوردی، هەرجارەی بە جۆرە دیالێكتێك نووسراوە.
بۆیە ئەدەبی هەورامی ‌و زازایی ‌و كرمانجی خواروو، سەروومان هەیە، بەڵام لەگەڵ تێپەڕبوونی سەردەمەكان ‌و دەسەڵاتەكان ئەو جۆرە دیالێكتانە گۆڕان ‌و باویان نەما‌و بوون بە زمانی قسە كردن.
من لێرەدا بۆچوونێكم هەیە، جارێك دكتۆرێك بانگهێشت كرابوو بۆ پرۆگرامێكی رادیۆ، جەختی دەكردەوە كە هەورامی كورد نین ‌و زمانەكەیان سەربەخۆیە، ئەمە بەراستی كارەساتە، هەروەها نووسین بە دیالیكتی جیاواز هەركەس بێت‌و بە دیالێكتی خۆی بنووسێت، ئەمە وا دەكات تا ماوین زمانێكی یەكگرتووی گشتیمان نەبێت سوپاس.


ئەیوب رۆستەم:
زۆر دەستخۆشیت لێدەكەم، بە راستی كاك ئەردەڵان شتێكی باسكرد تائێستا بە هەڵە هاتووە، ئەو سەردەمە شیعر وتراوە، ئەو دیالێكتەی شیعری پێ نووسراوە، هەورامی نییە، ئەو زمانێكی ئەدەبی زۆر فراوانە بە ناوی گۆران.
هەرگیز منی هەورامی وەكو شعیرەكانی مەولەوی قسەم نەكردووە، زمانە ئەدەبییەكە زمانێكی بەرفراوان بووە، زمانێكی یەكڕیزیی ئەدەبی بووە.
سەبارەت بەوەی د.حسێن وتی: ئێمەی هەورامی كوردین، ئەگەر یەكێك بیەوێت بۆ بنەچەی كوردی بەرێت، دەبێت بگەڕێـتەوە ئاوێستا ‌و زەردەشت ‌و پیرەكان كە هەمووی لە هەوراماندا بووە، ئەوانەی وا دەڵێن، لەوبارەیەوە دوو خاڵ هەیە:
یەكەم بەدحاڵیبوون ‌و تێنەگەیشتن.
دووەم ئەو گوشارەی لەسەر دیالێكتی هەورامی هەیە.
با بێمە سەر كتێبەكەش، لە راستیدا رازی هۆرامی سۆرانی نییە، ئێمە دەڵێین رازی هۆرامیەت، چونكە راز بۆ مێینەیە، هەروەها مەمك مژە لە هەورامیدا نییە، ئێمە دڵێین مەمڵە.
پاش خوێندنەوەی كتێبەكەش چەند تێبینیەكت دەدەمێ.

ئەردەڵان عەبدوڵڵا:
سەرەتا سوپاس بۆ سەرنجەكانی هەردوو بەڕێزان د. حسێن ‌و كاك ئەیوب، مەسەلەی نەتەوە و زمان مەسەلەیەكی قووڵترە باسی بكەین، هێشتا كورد وەكو پرۆسەكە تەواو نەبووە، تا ئەگەر باسی كورد بكەین، ئەوەی بەڕێزیشت باسی دەكەیت، هەم لە رووی زمان ‌و هەم لە رووی نەتەوایەتییەوە، نەگەیشتووینەتە ئەوەی كە تەواو دروست ببین، بەڵام لام ئاساییە ئەگەر بە هەورامییەوە بنووسی چی كێشەیە؟ كۆمەڵێك كتێبی تریشم هەیە بە سۆرانی نووسیومە‌و زۆر ئاساییە.
سەبارەت بە سەرنجەكانی مامۆستا ئەیوبیش زۆر سوپاسی دەكەم، من وتم: لە رووی زمانی كتێبەكەوە بە دڵنیاییەوە كێشەم هەیە، چونكە من ئەمە یەكەمین ئەزموونمە ‌و یەكەم ئەزموونیش بەو چڕوپڕییە نابێت، بەڵام من زیاتر هەوڵمداوە زمانێكی ئاسان بێت ‌و بەو شێوەیە بێت كە خۆم قسەی پێ دەكەم ‌و خەڵكێكی ئاساییش لێی تێبگات. دووبارە سوپاس.
جەواد حەیدەری:
بەراستی من لەگەڵ ئەو قسەیەدا نیم، چونكە دەبێت خوێنەر ببرێتە سەرێ نەك تۆ بۆی بێیتە خوارێ. ئەوەندە بۆی سادە بكەیتەوە كە خوێنەر فێری حازرخۆری بەر سێبەریی بكەیت. پێویستە خوێنەریش خۆی ماندوو بكات ‌و دەبێت بەو زمانە بنووسی كە خۆت پێی ئاسوودەیت.

ئەردەڵان عەبدوڵڵا:
دەستخۆش كاك جەواد خۆی ئەو بابەتە فیكرییە كە ئایا نووسەر بە زمانێكی ئاسان بنووسێت یان قورس تەنانەت لەناو فەیلەسوفەكانیشدا هەمیشە دەڵێن تۆ بۆ كێ دەنووسیت؟
من خۆم لەگەڵ ئەوەدام كە شت بنووسیت بە زمانێك بێت هەموو خەڵك لێی تێ بگات، بە دڵنیاییەوە خەڵكی تریش هەیە حەز دەكات زمانەكە تایبەت بێت.
موعتەسەم نەجمەدین:
دەستت خۆش بێت، ئەمە بابەتێكی نوێیە‌و جیاوازە لەوانەی كە پێشتر نووسیوتە، بەڕاستی من زیاتر كاك ئەردەڵان لەڕێی نووسینی سیاسی ‌و كاری رۆژنامەوانییەوە ناسیومە، دەتوانم ئەو شایەتیەش بدەم كە پیاوێكی بە سەلیقە بووە، رەنگە لەو گفتوگۆیەش دەربارەی ئەو كتێبە چ لەبەرئەوە بێت ئێمە هەورامی نازانین ‌و بابەتەكەمان نەخوێندووەتەوە، بابەتێكی تر بێت، بەڵام بۆچی ئەم شتە پەل دەكێشێت بۆ ناو مەسەلەی زمان؟
لەڕووی زمانی نووسینەوە، زاراوەی زۆر كەممان هەیە، بەڵام رەنگە ئەمجۆرە بەرهەمانە بەدیوێكی تردا خزمەت بەوە بكات كە هەندێك وشە هەبێت لە زاراوەی هەورامیدا لە سۆرانیدا نەبێت ‌و من بتوانم زمانێكی بۆ تەواو بكەم، بۆیە ئەو زاراوانە پێكەوە كۆبكرێنەوە زمانێكی كوردی چڕی لێ دروست بكرێت، ئەوە زۆر شتێكی باش دەبێت.
محەمەد مێرگەسۆری:
دەستت خۆشت بێت كاك ئەردەڵان، من تەنها تێبینیم لەسەر ئەوەیە ئێستا دەبینین كەمترین ئەو كەسانەی بە زاراوەكانی تر شت دەنووسن، زۆر بە كەمی بە هەورامی نووسراوە، كەسانی رۆشنبیر‌و نووسەری هەورامی بە سۆرانی زیاتر شت دەنووسن، بەڵام بۆ نموونە لە باكور دەبینین لەژێر دەسەڵاتێكی زۆر دڕندەشن، بەڵام لەپاش شۆڕشی سەید رەزا، زازاییەكان لە رووی رۆشنبیرییەوە زۆر پەرەی پێ دەدەن ‌و لە هەمان كاتیشدا ئێستا زۆرترین ئەو كتێبانەی لەسەر رۆشنبیریی ‌و سیاسی ‌و ئابوورین، بە زازاییش دەنووسرێن، ئەوەندەی بە زازایی دەنووسرێت، ئەوەندەش بە كرمانجی دەنووسرێت، لەوانەیە لێرە ئەگەر سەیر بكەین، هەندێك جار دەوڵەتی توركیا هاوكاریی زازاییەكان بكات بەوەی كە ئەمانە كورد نین، یاخود وای لێبێت زمانی كرمانجی بەرەو پاشەكشە بچێت، بەڵام ئێستا لە باكووری كوردستان ئەو ناوچانەی كە زازاكین، زۆرترین بڵاوكراوەكانیان هەر بەو زمانەیە، من لێرەدا مەبەستم ئەوەیە دەبوایە لێرە ئەوانەی بە سۆرانی ‌و كرمانجی دەنووسن، بە هەورامیش بنووسن ‌و بە پێچەوانەشەوە.
ئەمە مانای ئەوەیە تا زاراوەكان ئاوێتەی یەك نەكەیت، ناتوانیت زمانێكی یەكگرتوو دروست بكەیت.
ئەردەڵان عەبدوڵڵا:
سوپاسی سەرنجی هەردووكتان دەكەم، یەشێكی ئەوەی تائێستا نەنووسراوە، لەوانەیە وەكو نووسەرانی هەورامان خەتای خۆشمانی تێدا بێت، لە هەمان كاتیشدا بۆ پێشخستنی زمان بوو، گۆڤار‌و رۆژنامە رۆڵێكی دیاری هەیە.
ئەوەی كاك موعتەسەمیش وایە، ئێمە كێشەمان هەیە، بۆیە بوونی ئەم زاراوانەش دەوڵەمەندی دەدات بە زمانەكە و دووبارە زۆر سوپاس.

print

 255 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*