سەرەکی » دۆسێ » گازی ژەهراوی لە حەلەب بەكاردەهێنرێت

تۆمەتەكە رووی لە ئۆپۆزسیۆنە

گازی ژەهراوی لە حەلەب بەكاردەهێنرێت

نزیكەی سەد كەس دووچاری تەنگەنەفەسی بوون بەهۆی كەوتنەخوارەوەی ژمارەیەك بۆمب لە گەڕەكی خالیدیە و شەقامی نیل لە شاری حەلەبی سوریا كە گومان دەكرێت گازی ژەهراویان تێدا بوبێت، روسپاش گروپە چەكدارەكانی ئۆپۆزسیۆن بە هەڵدانی ئەو بۆمبانە لە ئیدلیبەوە تۆمەتبار دەكات كە بە ناوچەی هێوركردنەوە دادەنرێت لەژێر دەسەڵاتی چەكدارانی بەرەی نوسرەدایە.
روسیا داوای لە ئەنقەرە كردبوو (نێوەندگیری ئێستا كە ئۆپۆزسیۆن پابەند دەكات بە ئاگربەستەوە) رونكردنەوە لەو بارەیەوە پێشكەش بكات.
روسیا گروپە چەكدارەكانی ئۆپۆزسیۆنی سوریای تۆمەتبار كرد بە هەڵدانی ئەو بۆمب و موشەكانەی كە گازی ژەهراوییان تێدایە و 107 مەدەنییان دووچاری حاڵەتی تەنگە نەفەسی كرد.

گازی كلۆر بووە
لای خۆیەوە روانگەی سوریا بۆ مافەكانی مرۆڤ، ئاماژەی بە تۆماركردنی لانی كەم 107 كەس كردبوو كە شەش منداڵ و 13 ژنیان تێدابووە لە گەڕەكی خالیدیە و كۆمەڵگەی زەهرا، ئەو بۆنەش كە بۆتە مایەی دروستبوونی ئەو حاڵەتانە، بۆنی گازی كلۆر بووە، بەڵام روانگەكە نەیتوانی بوو ئەو لایەنە دیاریی بكات كە بەرپرس بووە لە هێرشەكە.
بەپێی ئاژانسی دەنگوباسی فەرمی سوریا (سانا)، گروپە تیرۆریستە چەكدارەكان، سەرلەئێوارەی 24ی تشرینی دووەمی 2018، گەڕەكی خالیدیە و شەقامی نیلیان بەو موشەكانە بۆردومان كردووە كە گازی ژەهراوییان تێدا بووە.
زیاد حاجی تەها، بەڕێوەبەری تەندروستی حەلەب رایگەیاندبوو، بەپێی ئەو نیشانانەی بە بریندرەكانەوە دەركەوتووە، ئەو گازەی لە هێرشەكەدا بەكارهاتووە دەكرێت بگوترێت گازی «كلۆری ژەهراوی» بووە.
بە گوتەی بەڕێوەبەری تەندروستی حەلەب، حاڵەتەكان روو لە زیادبوونن، لەگەڵ هاتنی حاڵەتی نوێ‌ بۆ نەخۆشخانەكان.

دیمەشق ئۆپۆسیۆن تۆمەبار دەكات
لای خۆیەوە، میدیاكانی سوریا، گروپە چەكدارەكانی ئۆپۆزسیۆنیان بە هەڵدانی ئەو موشەكانە تۆمەتبار كردبوو كە گازی ژەهراوییان تێدابووە بۆ گەڕەكەكانی حەلەب كە دووەم گەورەترین شار لە سوریادا دادەنرێت لەلایەن هێزەكانی حكومەتەوە بە تەواوەتی كۆنترۆڵكرایەوە، دوای ئەوەی بۆ چەند ساڵێك بەشێكی لەژێر دەسەڵاتی ئۆپۆزسیۆن و بەشەكەی تری لەژێر دەستی هێزە حكومییەكاندا بوو.
ئەمەش یەكەم جار نیە كە تۆمەتی لەو جۆرە رووبەڕووی گروپە چەكدارەكانی ئۆپۆزسیۆن دەكرێت، بەو پێیەی لە مانگی تشرینی یەكەمی 2016شدا، میدیای رەسمی سوریا، گروپە چەكدرەكانی ئۆپۆزسیۆنی بە ئەنجامدانی هێرشێك بۆسەر شارەكە بە گازی ژەهراوی تۆمەتبار كرد كە تێیدا 35 كەس دووچاری حاڵەتی تەنگەنەفەسی بوون.
لەماوەی ئەم چەند مانگەی دوایی، حكومەتی سوریا، و روسیای هاوپەیمانی، گروپە چەكدارەكانی ئۆپۆزسیۆنیان لە پارێزگای ئیدلیب بەوە تۆمەتبار كردبوو كە چەكی كیمیایان هەیە.

یەكتر تۆمەتباركردن
پێشتر دیمەشق و مۆسكۆ، گروپە چەكدارەكانی ئۆپۆزسیۆنیان بەوە تۆمەتبار كردبوو كە دەیانەوێت ئەو جۆرە چەكە لە ناوچەكانی ژێر دەسەڵاتی خۆیان و لە شوێنە قەرباڵغەكان بەكاربهێن و دواتر هێزەكانی حكومەتی سوریا بە ئەنجامدانی هێرشی كیمیایی بۆسەر مەدەنییەكان تۆمەتبار بكەن.
لەماوەی چەند ساڵی رابردووی ناكۆكییەكان لە سوریا، زیاتر لە 350 هەزار كەس كوژراون، بەردەوام حكومەتی سوریا بە ئەنجامدانی هێرشی كیمیایی لە ناوچەكانی ژێر دەسەڵاتی گروپە چەكدارەكانی ئۆپۆزسیۆن تۆمەتبار كراوە، ئەمەش لەلایەن دیمەشقەوە بە تەواوەتی رەتكراوەتەوە.
لە پارێزگای ئیدلیب لە 4ی نیسانی 2017، زیاتر لە 80 كەس كە 28یان منداڵ بوون كوژران، ئەمەش بەهۆی بۆردومانی شاری خان شەیخون بە گازی ژەهراوی.
پسپۆڕەكان لە لیژنەی هاوبەشی نێوان نەتەوە یەكگرتووەكان و رێكخراوی قەدەغەكردنی چەكی كیمیایی، لە دواتردا ئاماژەیان بە بەكارهێنانی گازی سارین كردبوو لەو هێرشەدا كە بەرپرسیارێتییەكەی خرایە ئەستۆی حكومەتی سوریا، ئەمەش لەلایەن دیمەشقەوە رەتكرایەوە.
لە شاری دۆما كە دەركەوتووترین مۆڵگەی گروپە چەكدارەكانی ئۆپۆزسیۆن بوو لە غوتەی شەرقی نزیك دیمەشق، لە مانگی نیسانی رابردوو، زیاتر لە 40 كەس بەهۆی گازی ژەهراوییەوە گیانیان لەدەستدا، ئەمەش بە گوتەی تیمە فریاگوزارییەكان و چالاكوانان. لەو دەمەشدا دیمەشق و روسیای هاوپەیمانی رەتیانكردەوە هێرشی لەو جۆرە رویدابێت.
لە كۆتایی ئابی 2016، لیژنەی لێكۆڵینەوەی نێونەتەوەیی و رێكخراوی نێودەوڵەتی قەدەغەكردنی شەكی كیمیایی، رێكخراوی «دەوڵەتی ئیسلامی»یان بە ئەنجامدانی هێرشی كیمیایی بۆسەر مارع لە پارێزگای حەلەب، تۆمەباركردبوو.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*