سەرەکی » مانشێت » ژمارەیەك پێشمەرگەی دێرینی یەكێتی خەڵات دەكرێن

ژمارەیەك پێشمەرگەی دێرینی یەكێتی خەڵات دەكرێن

PUKmedia

لە رێوڕەسمێكدا كە لە بارەگای مەكتەبی سیاسی بەڕێوەچوو، خەڵاتی رێزلێنان بەخشرایە ژمارەیەك پێشمەرگەی دێرینی یەكێتیی نیشتمانیی كوردستان.
لەسەرەتای رێوڕسمەكەشدا كە رۆژی پێنجشەممەی رابردوو رێكەوتی 7/3/2019 ەو بەبۆنەی 28ـەمین ساڵڕۆژی راپەڕینی شاری سلێمانییەوە بەڕێوەچوو، كۆسرەت رەسوڵ عەلی جێگری سكرتێری گشتی رایگەیاند: ئێوەی پێشمەرگەی دێرین رۆڵی بەرچاوتان بینیووە لە شۆڕشی نوێ و راپەڕینی گەلی كورددا لەساڵی 1991 هەروەها وتی: كەسوكارتان و یەكێتییەكەشتان بەئێوەوە سەربەرزەو شانازییش بەخوێنی شەهیدەكانمانەوە دەكەین.


دواتر حاكم قادر حەمەجان كارگێڕی مەكتەبی سیاسی وتەی مەكتەبی سیاسی بەو بۆنەیەوە پێشكەشكردو وتی: ئەمڕۆ بەشانازییەوە مەدالیای رێزلێنان دەبەخشینە ژمارەیەك پێشمەرگەی دێرین، بەڵام ئەمە بە مانای ئەوە نایەت كە تەنها ئەم ژمارە پێشمەرگە دێرینە خزمەتیان كردووە، بەڵكو ئەو ژمارە پێشمەرگەیە نموونەیەكن لە خەرمانێكی خەباتگێڕانی یەكێتی .


كارگێڕی مەكتەبی سیاسی ئاماژەی بەوەشكرد كە ئەم پۆلە تێكۆشەرە وەك پێشمەرگەی دێرین لە رۆژگارێكدا هاتنە ریزكانی یەكێتییەوە كە كەسانێك بەترسەوە ناویشیان دەهێنان و وتی: بۆیە ئێستا جێی خۆیەتی رێزتان لێ بگیرێت و بە خەبات و تێكۆشانتان بزانرێت.
لەبەشێكی دیكەی وتەكەشیدا وتی: ئێوەی پێشمەرگەی دێرین بوون كە خەباتی شاخ و شارتان پێكەوە بەستەوە، بۆیە یەكێتی قەدری پێشمەرگە دێرینەكان و گوندنیشنەكان و ئەندامان و لایەنگرانی خۆی دەزانێت و رێزیان لێدەگرێت و یەكێتی بەردەوام دەبێت لە خزمەتی گەل و خۆی بە خزمەتكاری گەلەكەی دەزانێت.


هەر لە میانی رێوڕەسمەكەدا بافڵ تاڵەبانی وتەیەكی پێشكەشكردو رایگەیاند: بەپێویستی دەزانم سوپاسی یەك بەیەكتان بكەم، ئێمە خۆمان بە قەرزای ئێوەی پێشمەرگەی دێرین دەزانین. جەختیشی لەسەر ئەوە كردەوە كە یەكێتی ئێستا یەك دەنگ و یەك هەڵوێستە و زۆر لە چەند مانگی رابردوو بەهێزترە و وتیشی: بەڵێن دەدەین پارێزەری رێبازەكەی مام بین و هەروەها داواشتان لێدەكەم رێگەمان پێنەدەن هیچ هەنگاوێكی هەڵە بنێین و رێگە راستەكەمان نیشان بدەن.

 161 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*