سەرەکی » دۆسێ » هەڵبژاردنەكەی ئیستەنبوڵ دووبارە دەكرێتەوە

خۆرئاواییەكان رەخنەدەگرن

هەڵبژاردنەكەی ئیستەنبوڵ دووبارە دەكرێتەوە

ژمارەیەك لە هێزە خۆرئاواییەكان رەخنە لە بڕیارەكەی دەسەڵاتدارانی توركیا دەگرن سەبارەت دووبارەكردنەوەی هەڵبژاردنی شارەوانی لە شاری ئیستەنبوڵ كە تێیدا پارتی فەرمانڕەوا بەسەركردایەتی سەرۆك رەجەب تەیب ئەردۆغان دووچاری شكست بوو.
یەكێتی ئەورپا لە 7ی ئایاری 2019، داوای لە لیژنەی هەڵبژاردنی توركیا كردبوو، هۆكاری بڕیارەكەی سەبارەت بە دووبارەكردنەوەی هەڵبژاردنی شارەوانی لە ئیستەنبوڵ، رونبكاتەوە.
لای خۆیەوە، هایكۆ ماس، وەزیری دەرەوەی ئەڵمانیا، بڕیاری دووبارەكردنەوەی هەڵبژاردنی بە نەشیاو وەسفكردبوو.
هەروەها ئەردۆغان لەلایەن حكومەتی فەرەنسا، و گای فرهۆفستات ئەندامی پەرلەمانی ئەوروپاوە دووچاری رەخنە بۆوە كە رایگەیاندبوو»شەپۆلەكان لە توركیا بەرەو دیكتاتۆری دەچن».
پارتی داد و گەشەپێدان لە مانگی ئاداری رابردوو بە جیاوازییەكی كەم، پۆستی سەرۆكی شارەوانی ئیستەنبوڵی لەدەستدا كە گەورەترین شاری توركیایە.
بڕیاری دووبارەكردنەوەی هەڵبژاردنەكان لە 23ی حوزەیرانی 2019، بووە مایەی خۆپیشاندانی ناڕەزایی لە ئیستەنبوڵ و سەدان كەس لە گەڕەكە جیاجیاكانی شارەكە گردبوونەوە و دروشمی دژ بە حكومەتییان بەرزكردەوە.
فیدریكا موگرینی گەورە دیپلرۆماتكارانی یەكێتی ئەوروپا لە 7ی ئایاری 2019 لە بەیاننامەیەكدا رایگەیاندبوو»زامنكردنی پرۆسەیەكی هەڵبژاردنی بێخەوش و دادپەروەرانە و بەرچاوڕوون، پێویستە بۆ هەر دیموكراتییەك، ئەمەش ترومپای پەیوەندییەكانی یەكێتی ئەوروپایە لەگەڵ توركیا».
لای خۆیەوە، حكومەتی فەرەنسا دەسەڵاتدارانی توركیای هاندابوو»رێز لە پرەنسیپەكانی دیموكراتی و فرەیی و دادپەروەریی و بێخەوشی بگرێت».
گای فرهۆفستات، سیاسەتمەداری بەلجیكی لای خۆیەوە لەڕێی تۆڕی كۆمەڵایەتی (تویتەر) رایگەیاندبوو، دووبارەكردنەوەی هەڵبژاردن لە ئیستەنبوڵ، هاتنەناوەوەی توركیا بۆ نێو یەكێتی ئەوروپا «ئەستەم» دەكات، و هەرەشە لەسەر وتوێژەكان دروست دەكات.
هەر لەو چوارچێوەیەدا، ئەكرەم ئیمام ئۆغڵۆ، كاندیدی ئۆپۆزسیۆن كە لە هەڵبژاردنەكەدا پۆستی سەرۆكی شارەوانی ئیستەنبوڵی بردبۆوە، بڕیاری دووبارەكردنەوەی هەڵبژاردنی بە «ناپاكی» لەقەڵەمدابوو. پارتی گەلی كۆماری ئۆپۆزسیۆن كە ئۆغڵۆ سەر بەو حزبەیە، لیژنەی هەڵبژاردنی بە ملدان بۆ گوشارەكانی ئەردۆغان، تۆمەتبار كردبوو.

بۆچی هەڵبژاردنەكە دووبارە دەكرێتەوە؟
رەجەب ئۆزێل، یەكێك لە نوێنەرانی پارتی داد و گەشەپێدانی فەرمانڕەوا لە هەڵبژاردنەكانی شارەوانی توركیا ڕایگەیاندبوو، بڕیاری دووبارەكردنەوەی هەڵبژاردنەكان، بەرەنجامی بوونی ژمارەیەك لە بەرپرسانی نامەدەنی بووە لەكاتی پرۆسەی هەڵبژاردنەكە، هەروەها هەندێك لە كارتەكانی دەنگدان مۆرنەكرابوون.
بەڵام ئۆنۆرساڵ ئدیگۆزیل، جێگری سەرۆكی پارتی گەلی كۆماری پێیوایە»بڕیارەكە دەریخست كە یاسایی نییە جگە لە پارتی داد و گەشەپێدان كەسی تر براوە بێت».
ئۆدیگۆزیل، لە ئەكاونتی خۆی لەسەر تۆڕی كۆمەڵایەتی (تویتەر)، بڕیارەكەی بە «دیكتاتۆرییەكی ئاشكرا و روون» وەسفكردبوو.
هەروەها را یگەیاندبوو»ئەو رژێمەی ئیرادەی گەل رەتدەكاتەوە و رێز لە یاسا ناگرێت، ناكرێت دیموكراتی یان شەرعی بێت».
لە وتارێكیشیدا كە لەڕێی پێگە كۆمەڵایەتییەكانەوە پەخشكرابوو، ئیمام ئۆغڵۆ بڕیارەكەی لیژنەی هەڵبژاردنی ئیدانەكردبوو، كە بە گوتەی ئەو»لەژێر كاریگەریی حزبی فەرمانڕەوادایە».
هەروەها رایگەیاندووە»سازش لەسەر بنەماكانمان ناكەین، ئەم وڵاتە 82 ملیۆن نیشتمانپەروەری تێدایە كە تا دوایین سات لەپێناو دیموكراتیدا دەجەنگن».
هەروەها گروپێكی سەر بە ئیمام ئۆغڵۆ، داوای كردبوو دانبەخۆداگربن و»یەكڕیزبن و هێمنی بپارێزن تا ئەو كاتەی سەردەكەون كە دڵنیان لەوەی دووبارە سەردەكەونەوە».

هەڵوێستی ئەردۆغان
لە كۆبوونەوەی ئەندامانی پەرلەمانی فراكسیۆنی داد و گەشەپێدان، ستایشی بڕیارەكەی رەجەب تەیب ئەردۆغان سەرۆكی توركیا كرابوو بۆ دووبارەكردنەوەی هەڵبژاردن لە ئیستەنبوڵ.
ئەردۆغان رایگەیاندبوو»پێمانوایە ئەم بڕیارە باشترین هەنگاوە بۆ بەهێزكردنی تواناكانمان لەپێناو چارەسەكردنی كێشەكان لە چوارچێوەی كاریی دیموكراتی و یاسا».
هەروەها ڕایگەیاندبوو كە هەڵبژاردنەكان «گەندەڵییەكی رێكخراو»باڵی بەسەریاندا كێشابوو.
بەڵام هەندێك لە راپۆرتەكان ئاماژە دابەشبوون لە ریزەكانی پارتی داد و گەشەپێداندا دەكەن بەهۆی بڕیاری دووبارەكردنەوەی هەڵبژاردن.
بەپێی راپۆتەكان، عەبدوڵڵا گول، سەرۆكی پێشوو و ئەندامی دامەزرێنەری حزبەكە، خۆی بۆ دامەزراندنی حزبێكی تر ئامادە دەكات.

پاشخانەكان
هەڵبژاردنەكان كە لە 31ی ئاداری 2019 ئەنجامدران، وەك راپرسییەكی فراوان لەسەر ئاستی جەماوەریی ئەردۆغان تەماشا دەكرا.
هەرچەندە ئەو هاوپەیمانییەی لەلایەن پارتی داد و گەشەپێدانەوە سەرۆكایەتی دەكرا، رێژەی لەسەدا 51ى دەنگەكانی بەدەستهێنا لەسەر ئاستی دەوڵەت، بەڵام پارتی گەلی كۆماری عەلمانی لە ئەنقەرەی پایتەخت و ئەزمیر و ئیستەنبوڵ براوە بوو. ئەردۆغان رۆژێك لەڕۆژان سەرۆكی شارەوانی ئیستەنبوڵ بوو.
زیاتر لە 8 ملیۆن كەس لە ئیستەنبوڵ دەنگیانداوە. لە كۆتاییدا بردنەوەی ئیمام ئۆغلۆ بە جیاوازی كەمتر لە 14 هەزار دەنگ، راگەیەندرا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

نەتانیاهۆ: شەڕی غەززە كۆتایی نەهاتووە

واپێدەچێت لە غەززە ئاگربەست لەنێوان ئیسرائیل و فەلەستینییەكان دەستیپێكردبێت، دوای ...