سەرەکی » ئاراستە » تەحسین تەها هونەرمەندی چەند بوارێک ‌

تەحسین تەها هونەرمەندی چەند بوارێک ‌

خە لیل عەبدولڵا

تەحسین تەها هونەرمەندێكی دیار و ناسراوی كوردستانە‌ و لە چەند بوار و رشتەیەكی جیاوازدا خزمەتی بەهونەرەكانی گۆرانی ‌و موزیكی كوردی كردووە‌ و رۆڵی دیار ‌و بەرچاوی لە نوێكردنەوەی هونەری گۆرانی لە ناوچەی بادینان هەبووە.
تەحسین تەها محەمەد سەلیم ئامێدی ناوی تەواوی ئەم هونەرمەندەیە‌ و بە تەحسین تەها ناسراوە. ساڵی 1941 لە ناوچەی بیبۆی سەر بە شارۆچكەی ئامێدی لەدایك بووە.
قۆناغەكانی خوێندنی سەرەتایی‌ و ناوەندی لە مانگێش‌ و باتوفە‌ و دهۆك تەواو كردووە.
لەبەر ئەوەی هەر لە منداڵییەوە خولیای هونەری گۆرانی بووە، دوای قۆناغی ناوەندی چووەتە پەیمانگەی هونەرە جوانەكانی بەغدا‌ و لەساڵی 1964 ئەو پەیمانگەیەی تەواو كردووە.
ئەو ماوەیەی لە بەغدا بووە، هەلی بۆ ڕەخساوە چووەتە ڕادیۆی كوردی بەغدا ‌و گۆرانییەكانی بۆ ئەو ڕادیۆیە تۆمار كردووە ‌و ئەوەش بۆتە هۆی ئەوەی كە خەڵكی كوردستان بەدەنگە بەسۆزەكەی ئاشناببن‌ و بیناسن.
بەپێی هەندێک ئامار نزیكەی 120 گۆرانی لەو ئیزگەیە تۆماركردووە ‌و بەگشتیش خاوەنی نزیكەی 150 گۆرانییە. مامۆستا تەحسین تەها جگە لە گۆرانی لە بواری ئۆپەرێتیشدا خزمەتی كردووە ‌و لە ئۆپەرێتەكانی (داستانی شۆڕش‌ و ڕووباری ژیان ‌و دەرگاكانی ژیان) دا وەك ئەكتەر بەشداری كردووە‌ و ڕۆڵی دیار‌ و سەرەكی بینیوە.
تەحسین تەها وەك مامۆستای هونەریش خزمەتی زۆری بەهونەرەكانی موزیك‌ و سروود‌ و گۆرانی كردووە‌ و لە مەخموور ‌و هەولێر مامۆستای هونەر بووە‌ و شوێن پەنجەی بە خزمەتكردنی هونەر و پەروەردەی هونەری خوێندكارانەوە دیار بووە.
یەكێكیش بووە لە دامەزرێنەرانی تیپی هونەری میللی هەولێر، ئەو تیپەی خزمەتێكی زۆری پێشكەش بە هونەری كوردی كردووە. ئەم هونەرمەندە گەورەیە بەشی زۆری ژیانی بۆ خزمەتكردنی هونەری كوردی تەرخانكرد‌ و بەرهەم ‌و بەخششە هونەرییەكانی وەك سەرمایەیەكی هونەری بە نەمری دەمێننەوە.
بەداخەوە ئەم كەسێتییە مەزنە هونەرییە لە ئاوارەیی‌ و بە غەریبی لە ڕۆژی 28 ی ئایاری 1995 بۆ یەكجاری ماڵئاوایی لە جیهانی هونەر كرد‌ و چووە دونیای نەمرانەوە‌ و لە 4 ی حوزەیرانی هەمان ساڵ تەرمەكەی هێنرایەوە بۆ كوردستان ‌و لە زێدی خۆی لە شاری ئامێدی دڵگیر بەخاك سپێردرا.درود بۆ گیانی پاك ‌و پیرۆزی مامۆستا تەحسین تەهای هونەرمەندی ناسراوی كوردستان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

پێشمه‌رگه‌ی هه‌ڵمه‌تبه‌ری‌ شاخ و پارێزه‌ری‌ ئارامیی شار

ئالان حه‌مه‌جه‌زا سه‌وڵجانی‌ یه‌كێتیی نیشتمانیی كوردستان شۆڕشگێڕترین حزبه‌ كه‌ زۆرترین ...