سەرەکی » ئاراستە » تێڕوانینی كادرانی یەكێتی سەبارەت بە كۆنگرەی نوێبوونەوە

تێڕوانینی كادرانی یەكێتی سەبارەت بە كۆنگرەی نوێبوونەوە

لەگەڵ دیاریكردنی رۆژی بەستنی چوارەمین كۆنگرەی یەكێتیی نیشتمانیی كوردستان لەلایەن مەكتەبی سیاسی ‌و ئەنجومەنی سەركردایەتییەوە كە وابڕیارە لە رۆژی 7/12/2019 ببەسترێت، ئەندامان ‌و كادران ‌و هەوادارانی یەكێتیی لە پەرۆشییانەوە بۆ ئایندەی حزبەكەیان بە وتار‌و پێشنیاز ‌و راسپاردەی جیاجیا بۆچوون ‌و تێڕوانینی خۆیان بۆ كۆنگرەیەكی چۆنایەتیی بەئاراستەی نوێبوونەوەی یەكێتی بڵاودەكەنەوە.
ئەم چەند وتارەی كە بڵاوبووەتەوە، گوڵبژێرێكە لەو وتار‌و تێڕوانینانەی هەڤاڵانی یەكێتی كە گروپی تایبەت بە كۆنگرەی نوێبوونەوە لە لە تۆڕی كۆمەڵایەتیی وەتسئاپ-دا بڵاویان كردووەتەوە، كوردستانی نوێ-ش پێی باش بوو كە گوڵبژێرێك لەو وتارانە بڵاوبكاتەوە.

خەسڵەت ‌و جۆرەكانی گۆڕانكاریی*

خەسڵەتەكانی گۆڕانكاری

حەتمیەت (Determinism): واتە دەبێت گۆڕانكاری رووبدات، چونكە بەشێكە لە ژیانی سیاسی، هەموو شتێك گۆڕانكاریی بەسەردا دێت، ئەگەر گۆڕانكاریی نەبوو، لەگەڵ تێپەڕبوونی كات دەبێتە هۆی پوكانەوە، دواتریش لەناوچوون.
گەشەسەندن (Evolution): چونكە گۆڕانكاریی ئامرازێكە بۆ گواستنەوەی قۆناغەكە لە بارێكی خراپەوە بۆ بارێكی باشتری گونجاو لەگەڵ پێشكەوتنەكانی سەردەم.
بەردەوامی (Continuity): لەبەرئەوەی گۆڕانكاری پڕۆسەیەكی بەردەوامە، چ بەهۆكاری پلانی پێشوەخت، یاخود بەهۆی كاریگەریی رووداوێكی دیاریكراوەوە، بۆیە دەبێت بەردەوامی لە گۆڕانكارییدا هەبێت.
گشتگیریی (Inclusiveness): بنچینەیەكی گرنگی گۆڕانكارییە، واتە دەبێت گۆڕانكاریی تەواوی جومگەكان بگرێتەوە.
جۆرەكانی گۆڕانكاریی
گۆڕانكاریی بەپلان: ئەم گۆڕانكارییە بەپێی پلانێكی داڕێژراو جێبەجێ دەبێت كە نەخشەڕیگەی بۆ دیاری بكرێت.
گۆڕانكاریی قۆناغبەندی: ئەمجۆرە گۆڕانكارییە دەبێ بەپێی قۆناغ بێت.
گۆڕانكاریی گشتی (بناغەیی): ئەو گۆڕانكارییەیە كە هەموو جومگەكان دەگرێتەوە، پێویستی بە كاتێكی دیاریكراو نییە، كارێكی ناكاوە، پلانی پێشوەختی نییە.
یەكێتی لەبەردەم گۆڕانكاریدایە، نادیدەگرتنی گۆڕانكاریی، واتە پوكانەوەیەكی هێواش، دواتریش نەمان و وشك بوون.
یەكێتی نابێت لە گۆڕانكاریی بترسێت، دەبێ بە هێز و ئیرادەی كادر و ئەندامان، ئەو ئاڵانگارییە پەسند بكات و لە چوارەمین كۆنگرەیدا شانی بداتە بەر.

*ئەم كورتە باسەش هەر لە نووسینی كاك ئازاد وەرتی-یە، بەڵام لەبەرئەوەی وتاریكی دیكەشی هەبوو بەبێ ناو بڵاوکراوەتەوە.

زەرورەتی نوێبوونەوە

پەری عەزیز

زەرورەتی نوێبوونەوەی یەكێتی لەناو كۆنگرە دەبێت بە ئاوێتەكردنی رۆحی عەقڵە سیاسییە پێگەیشتوو خاوەن ئەزموون و گەنجەكان بێت. هیچ كام لە وانە ناكرێت لە نوێبوونەوەی یەكێتی و بونیانتنانەوەیدا رۆڵیان پەراوێز بخرێت، لەبەرئەوەی پێكهاتەی ئۆرگانەكانی یەكێتیی نیشتمانیی كوردستان لە هەموو تەمەنەكانی تێدایە، دەكرێت هەریەك بەپێی تواناو ئەزموونی خۆی رۆڵی هەبێت لەو نوێبوونەوەیە.
مەرج نییە كەسایەتی مرۆڤ بەند بێت بە پلەو پایەو پۆست و بەرژەوەندیییەوە، بەهێزبوونەوەی یەكێتی گەورەترین دەستكەوت و پاڵپشتە بۆ هەموومان لە بچوكترین كادرەوە بۆ بەرزترین پۆست، جا حزبی بێت یان حكومی.
ئەگەر ئێمە بیركردنەوەمان وابێت بە گۆڕینی دەموچاوەكان هەموو كێشەكانمان یەكلایی دەبێتەوە ئەوا هەڵەین، لەبەرئەوەی هەڤاڵانمان لە مەكتەبی سیاسی و سەركردایەتی بەپێی ئەزموونی كاركردنیان لەگەڵ پارتە سیاسیەكانی كوردستان و عیراق، عەقڵییەتی بەرامبەرەكانیان خوێندووەتەوە و هەڵیانسەنگاندوە و دەزانن چۆن مامەڵەیان دەكەن. بۆیە ئاوێتە بوونی نەوەی پێشوو و نەوەی نوێ پێویستە بۆ سوود وەرگرتن لە ئەزموونەكانیان.
هەڤاڵان ئەو بەڕێزانە گەنجینەیەكن لە زانیاری و ئەزموون و خەبات، دەكرێت چاویان لێ بكەین بۆ كارە جوانەكانیان بە پێی گۆڕانكارییە سیاسی و ئیداریی و ئابوریەكانیش چاو بە هەڵەی هەموولایەكماندا بخشێنینەوە و گەنجەكانمان لەوە تێبگەن كە سەركردایەتیی یەكێتی هەروەك ئەوان گەنج بووە و لە زەحمەتترین بارودۆخدا خەباتیان كردووە و شایانی هەموو رێز و تەقدیرێكن.

گەنجان و لاوان هێز وزەی كۆمەڵگە و نەتەوەن

ئازاد وەرتی

ئەگەرچی هیچ پێناسەیەكی یەكانگیریی گشتگیر بۆ گەنجان نییە، بەڵام نەتەوە یەكگرتووەكان پۆلێنبەندیی گەنجانی كردووە كە لە 15 ساڵییەوە دەستپێدەكات تا 25 ساڵی.
ئێمە دەبێ توێژی گەنجان پۆلێن بكەین، چونكە هەر قۆناغێكی تەمەن پێداویستی خۆی هەیە و جیاوازە لەگەڵ قۆناغێكی هەورازتر.
ئەوەی جێی تێڕامانە، یەكێتی وەك پێویست گوتارێكی روونی بۆ گەنجانی 15-25 ساڵ نییە، نەیتوانیوە ئاراستەیان بكات.
گەنجانی 15-20 ساڵ، پێویستیان بە هزرێكی هاندەر هەیە بۆ دیاریكردنی ئاراستەی ژیانی سیاسییان، چونكە ئەو تەمەنە كە پێی دەنێتە تەمەنی دەنگدانەوە، دەبێت بتوانێت بە پێی هۆشیاریی خۆی دەنگ بدات و بە لاڕێدا نەبرێت.
ئەگەر سەیر بكەین، تەمەنی هەرزەكاریی لە كوردستان، بەشێكیان روویان لە ئیسلامی سیاسی و سەلەفییەت كردووە، هۆكارەكەشی ئەوەیە كە دوو رەگەز غائیبە، یەكەمیان بایەخدان و سودوەرگرتن لە وزە و تواناكانیان، دووەمیشیان نەبوونی هزرێكی جێگرەوە بۆ گلدانەوە و دروستكردنی بیروباوەڕ، چونكە گەنجان لەو تەمەنانەدا پێویستیان بە دیاریكردنی هەندێك ئامانجی پیرۆزە، واتە دەبێت پیرۆزیی لە ناخیاندا بچێندرێت، چونكە پیرۆزیی وادەكات پاڵنەری پۆزەتیڤیان بۆ دروست بكات و ئاراستەیان بكات.
كەواتە دەبێت یەكێتی بتوانێت بە بەرنامە و لە رێی توێژینەوەی زانستی و كۆمەڵایەتییەوە گەنجان لە هەڵدێران و لادانی كۆمەڵایەتی و سیاسی بگرێتەوە و نەهێڵێت بكەونە باوەش و داوی هزرە رادیكاڵییە توندەكانەوە.

نەوەی دوای راپەڕین دید وحەزی جیاوازی هەیە

ئاوێزان نادر

نوێبوونەوە لە حزب نییە، هێندە نەبێ ئەگەر بەرنامە سیاسی و ئابووریی و پەیوەندییەكانی هاوتەریبی ئاست و پێویستییەكانی ئەو كۆمەڵگەیە نەبێت كە كاری تێدا دەكات. یەكێتی پێویستی بە گۆڕینە، گۆڕینی سیاسەتی ناوخۆ و كار و داڕشتنەوەی ئۆرگانەكانی و پاككردنەوەی لە كەسانی تەمبەڵ و مشەخۆر و گەندەڵ.
هیچ هەڤاڵێك جگە لە مام جەلال وەك پێویست كاری رۆژانەی حزبی لەسەر پەیڕەو و بەرنامە نەكردووە، پێویستە هیچ هەنگاوێك بێ ئەو بەرنامە و پەیڕەوە نەنرێت كە كۆدەنگیی لەسەر دەبێت.
نەوەی دوای راپەڕین ئێستاش پەیوەستە بە نەبەردییەكانی پێشمەرگە و خەباتی خوێناویی دوێنێمان. هێندە هەیە هەستی ئەوەیان لا دروست بكرێت كە داهاتوو هی ئەوانە نەك نەوەی سیاسییەكان! لە شۆڕش گرنگترین پێویستی دەبێ سەركردایەتی لەڕێگەی حكومەتەوە بۆ نەوەی شۆڕش و راپەڕینی دابین بكات.
تائێستا و دوای نزیكەی 30 ساڵ لە راپەڕین پڕۆژەیەكی ستراتیژیی مادی و مەعنەوی نە پێشنیازكراوە نە هەنگاوی بۆ نراوە. نەوەی دوای راپەڕین ئێستاش سۆزدارن لەگەڵ یەكێتی، بەڵام گەورەن و هۆش و عەقڵیان هەیە و پێویستیان بە خزمەتە لە حكومەتێك كە تادوێنێ یەكێتی نیوەی پێكدەهێنا.
جگە لەكایە سیاسی و ئیدارییەكانی كە قۆرخ كراون، نەوەی دوای راپەڕین دیدی جیاواز و حەزی جیاوازی هەیە، ئاو و كارەبا و ئینتەرنێتی هەرزان و وەرزش و هونەر و نان و كاری پێویستە، حزب كاتێك دەچێتە حكومەتەوە هەرچەندە بەرنامەكەی جوان و پیرۆز و پڕ وشەی بریقەداربێت كە هیچی نەكرد و پڕۆژەی عەمەلی نەبوو بۆ هەڵسانەوەی ئابووریی و پێشكەوتنی كۆمەڵایەتی، ئەوا ناتوانێت تاسەر پێشڕەویی كۆمەڵانی خەڵك بكات.
زۆر گرنگە بۆ حزبێك كە لەشاخەوە دێتەوە شارو دەچێتە حوكمڕانیی، كادیری بەتواناو شارەزا بۆ حوكمداری هەڵبژێرێت.
مەسەلەی فیكر لە كوردستان پەیوەستە بە هۆشیاریی خەڵكەوە، خەڵكی خۆمان دەبێ پۆلین بكەین و دیراسەی بكەین، خەڵكێكی موسوڵمانی تێكەڵ لە شارستانی و لادێی و فرە كەلتورو پڕ ئازار، دەبێ چ فیكرێكی نزیك لەو تێكەڵەیە دروست ببـێ بۆ حزب؟
ئەوە دەبێ كادیرە هۆشیار و بیرمەندەكانی ناو حزب بە پاڵپشتی توێژینەوەی واقیعیانە ئەو بڕیارە بدەن كە ئاخۆ ئێمە دەتوانین بەكۆپی فیكریی حزبێكی سویدی یان بەریتانی یان ئەڵمانی یاخود فەڕەنسییەوە بچینە ناو ئەو خەڵكەی خۆمان؟ بێگومان نەخێر.. ئێمە لە نێوان عەرەب و تورك و فارسدا و لە ناوچەیەكی پڕ لە ململانێدا پێویستیمان بە تێگەیشتنی تایبەتی كوردانەی خۆمان هەیە.

ئەو گەنجانە پێشبخرێن كە لەگەڵ رەوتی ژیانی هاوچەرخ گونجاون

ئەحمەد عەسكەریی

بە بڕوای گەنج لەسەر ئەو بنەمایە نەهێنرێتە پێشەوە، تەنها لەبەرئەوەی گەنجە، بۆ رتوش و رازاندنەوەی حزب بەكاربێت. دەبێت لەناو گەنجەكاندا ئەو گەنجانە پێشبخرێن كە باشترینن و لەگەڵ رەوتی ژیانی هاوچەرخیان گونجاون و توانای كاری باشی سەردەمیان هەیە و داهێنەرانە بەشداریی لە كاری رێكخراوەیی كۆمەڵایەتیدا دەكەن.
گەنجانێكی زۆر هەن بەتەمەن لەسەرەتای لاوێتیدان بە بیركردنەوە لە سەدەكانی رابردوودا دەژین.
لە خولەكانی پێگەیاندنی كادیراندا و لەناو ئۆرگانەكانی رێكخستندا دەستنیشان بكرێن بە ئاڕاستەی بیرو باوەڕی یەكێتی و رێبازە پیرۆزەكەی مام گۆشبكرێن، گرنگی تەواو بە لایەنی پەروەردەییان بدرێت، ئەو جۆرە گەنجانە پێویستە پێشبخرێن، چ لە گەنجێك بكەین هیچ سوودێكی نەبێت، تەنانەت ئامادەی گوێگرتنیشی نەبێت. بەڵام ئەگەر پێشبخرێن و سەردەمیانە فێری كاری حزبیی بكرێن و تواناكانیان لەناو یەكێتیدا بخەنەگەڕ، بەدڵنیاییەوە دەبنە داینەمۆی هەرە گرنگی نوێبوونەوەی یەكێتی.

چیبكەین بۆ نوێبوونەوە و كۆكردنەوەی گــەنجان لە دەوری یەکێتی؟

خەمینە ساڵح

مەركەزییەت لە بڕیارەكاندا واتە كە بڕیارێك درا، تەواو هەڵسەنگینراو بێت و پشتگیریی بڕیاری كادرانی باڵا بكرێت و یەك وتە و یەك هەڵوێستی پاشگەزبوونەوە لە بڕیارەكان، گۆڕینی دیكۆر و واجیهەی بەحزبی كردنی گەنجان، لەبری ئەوەی كۆمیتە و بنكە حزبییەكان ببنە هۆكار بۆ دەرخستنی توانای گەنجان، بەنموونە هۆكاری بۆ كاری ئەدەبی هونەری پیشەیی و… هتد. بەجۆرێك كار لەسەر ئەوە بكرێت گەنج بە ویستی خۆی پەیڕەوی لە پەیڕەو و بیرو بۆچوونەكانی یەكێتیی نیشتمانیی كوردستان بكات.
خولی بێ بەرامبەر لە سەرجەم بوارەكاندا، راگەیاندن، هونەریی، پیشەیی شان بە شانی خولەكانی كەرتی تایبەت، تا فێرخواز بتوانێت سوودمەندبێت لێی، بەجۆرێك گەنج بتوانێت بەوەرگرتنی بڕوانامەی ئەو خولانە، هەلی كار بەدەست بهێنێت .
كەمكردنەوەی وتارە حزبییەكان لای گەنجان، تا نەبێتە هۆی بێزاریی و رەواندنەوەیان تەنها، بەسە كە خزمەت بكرێن، ئەوكات خۆبەخۆ دەبنە لایەنگر و پشتیوان.
خەڵاتی جیاجیا دابنرێت بۆ ئەو گەنجانەی لە بوارێكدا داهێنان دەكەن، لەگەڵ ئەوەشدا دەستباری بكرێت تا پەرە بەو بەهرە و توانایەی بدات. گرنگیدانی زیاتر بە بواری سۆشیال میدیا و راگەیاندنی پیشەیی تا لەكاتە یەكلاكەرەوەكاندا راستییەكانی تێدا بوترێت و خەڵك بیبیستێت.

با بۆ سەركردایەتی، پێوەرێك بۆ تەمەن هەبێت

چاپوك سەید عومەر

پێویستە رێژەیەك بۆ تەمەن هەبێت لە ئەنجومەنی سەركردایەتی كەمترینیان لە كادری بەتەمەن بێت و لە ئەنجومەنی ناوەندیش كەمترینیان لە كادری گەنج بێت. چونكە لە ئەنجومەنی ناوەند زیاتر پێویستی بە ئەزمونە و لە سەركردایەتی زیاتر پێویستی بە توانایە، جگە لەبوارەكانی تر. بۆنمونە؛ لە سەركردایەتی سەرەتا هەڵبژاردن بۆ پێنج كەس بكرێت كە تەمەنیان لە 70 ساڵ بەرەو سەرە، بەڵام براوەكان ئاشكرا نەكرێت تا ئەوانیتریش دەكرێن. دواتر هەڵبژاردن بۆ 12 كەس بكرێت كە تەمەنیان لە 60 ساڵ بەرەوژوورە، دوای ئەوە هەڵبژاردن بۆ 27 كەسەكەی دیكە بكرێت لە تەمەنی 60 ساڵی بەرەوخوار.
لەكۆتایی هەموو هەڵبژاردنەكاندا پێكەوە بەیەدەگەكانییانەوە براوەكان ئاشكرابكرێن.
بۆ ئەنجومەنی ناوەند 10% بۆ لە 30 ساڵ بەرەوخوار بێت ‌و 20% لە 40 ساڵ بەرەو خوار بێت، 70% لە 40 ساڵ بەرەو ژوور بێت.
گرنگە ئەو بیرۆكەیە لە پەیڕەویشدا جێگیر بكریت و جۆرێك لە تەمەن دیاریكراوبێت. هەروەها پێویستە چەند خول بۆ ئەندامی سەركردایەتی دابنرێت تا تەمەنەكان زۆر گەورە نەبن.

كۆنگرەی سێ تا چەند توانی وێستگەیەكی فیعلی بێت بۆ جێكردنەوەی چەمكی نوێبوونەوە

جەمال حسێن

بەرلە كۆنگرەی پێشوو، لە كوردسات و گەلی كوردستان و لە كوردستانی نوێ و چەندین رۆژنامە و سایت و كۆڕ و سیمیناریش كرا بۆ ماوەیەكی زۆر بە ناونیشانی (نوێبونەوەو چاكسازی) لە یەكێتیدا، كە دواتر بەشێك لەو چاوپێكەوتن و گفتوگۆیانە كران بە كتێبێكی قەبە بەناوی (نوێبوونەوە). كە لەم گفتوگۆیانەدا زۆرینەی مەكتەبی سیاسی و سەركردایەتی و كادرەكانی یەكێتی تێیدا بەشداربوون، كە ژمارەیەكی زۆریان ئێستا لەم گروپەدان، بە بەشێك لەنووسەرانی دەرەوەی یەكێتیش. جگە لەوەش لە رۆژانی كۆنگرەدا هەموومان شاهیدی گفتوگۆی گەرمی ناو هۆڵی كۆنگرە بووین. پرسیارە سادەكە دوای كۆنگرە ئەوەبوو چەندی ئەم بۆچوونانە توانیی كاریگەریی كردارەكی دابنێ بەسەر یەكێتی دوای كۆنگرەوە؟ كۆنگرە تاچەند توانی ویستگەیەكی فیعلی بێت بۆ جێكردنەوەی ئەو بۆچونانە؟ ئەمانە و چەندین پرسیاری تر وادەكات بڵێم:
لەم گفتوگۆیانەی لەلایەن هەموو هەڤاڵانەوە لێرە دەكرێ، بەڕاستی بەسەر بۆچوون و راو پێشنیازی سەرنجڕاكێش و جواندا دەكەوین، لەسەر ئاستی فیكری شایەنی دەستخۆشی و سەرنجدانە. بەڵام ترسی من، پرسیار و نیگەرانیی من ئەوەیە كە ئایا دەشێ ئەمجارە وانەبێت و لانیكەمی ئەو بۆچوونانە ببنە شوناسی یەكێتی دوای كۆنگرە؟ ئەو میكانیزمانە چین كە وادەكەن (ئەمجارە)، بە( جاران)ی پێشوو نەچێت؟
ئەگەر مۆڵەتم بدەن، ئەزموونی یەك پڕۆژەی تایبەت بە راگەیاندنی یەكێتیتان بۆ بكەمە نموونە، كە چەندیین مانگ پێش كۆنگرە ئامادەكراو لە قەڵاچوالان بە ئامادەبونی مەكتەبی راگەیاندن و رۆژنامەنووسانی یەكێتی و بەشێك لە سەركردایەتی یەكێتی ئامادەكرا، سەرباری چەندین لیژنە و كۆبوونەوە و گفتوگۆ، بەڵام كە بردمانە كۆنگرە، نەك گفتوگۆی لەبارەوە نەكرا، بگرە نەخرایە كارنامەش و بەبێ دەنگی رەتكرایەوە.
لێرەوە سەرباری دەستخۆشی زۆرم بۆ هەموو ئەو گفتوگۆیانە، بەڵام من ترسێكم هەیە كە لەبۆشاییەوە نەهاتووە و بە پەخشان و رۆمانسیەتیش ناڕەوێتەوە، ئەویش ترسە لەوەی ئەم گفتوگۆیانە تەنها وەكو دیاردەی زمانەوانی و گفتوگۆی هەڤاڵانە بمێنێتەوە، نەك ژێرخانێك بێت بۆ نوێبوونەوە و گۆڕانكاریی كردارەكی لە بونیادی سیاسیی یەكێتیدا.
بەهیوام من هەڵەبم، بەڵام دەشێ ئەم گروپە وەك چۆن سەركەوتوبوو لەوەی ببێتە ناوەندێكی نەرمی گوشار بەئاراستەی كۆنگرە و نزیك كردنەوەی ئاراستە جیاجیاكان، دەشێت بیرێكی جدیش بكاتەوە لەوەی چۆن كاریگەریی فیعلی زیاد بكات!.

هۆكارەكانی غیابی گەنج لەناو ی.ن.ك دا چیین؟

هاوڕێ‌ شاكار

بەدڵنیاییەوە دەكرێت قسەی زۆر لەبارەی هۆكاری غیابی گەنج لەناو یەكێتیدا بكەین، یان دەتوانین بڵێین هوكارەكان زۆرن، بە كورتی ئاماژە بەچەند هۆكارێكی سەرەكی دەدەین.
هەیكەلی رێكخراوەیی و سیاسیی یەكێتی شێوەیەكی كۆن و تەقلیدییە و سیستمی حزبێكی هەرەمییە و بۆ ئەم سەردەمە دەتوانین بڵێن كۆن بووە، لەناو ئەو سیستمەدا نەبوونی دیموكراسیی هەڵبژاردنی دادپەروەرانە و فەرامۆشكرنی كۆنفرانس و كۆنگرە حزبییەكان و نەبوونی دیدگای روون و زەمینەسازیی بۆ بەشداریپێكردنی گەنج لەكایەی سیاسیدا، وایكردووە گەنج نەتوانیت لەناو ئەم حزبەدا وەكو پێویستە جێگەی ببێتەوە، ئەنجامی ئەم تێگەیشتنە یان سیاسەتە هەڵەیەش ئەمانەیە:
1-رێژەی گەنج لەئاستی سەركردایەتی و مەكتەبی سیاسی بەپێی (پێوەری تەمەن) زۆر كەمە، ئەمە روونە.
2-لەئاستی مەكتەب و دامودەزگاكانی حزبدا گەنجی چالاك و بەتوانا هەن، بەڵام رێژەكەی زۆر نییە و رۆڵی ئەوتۆیان لە بڕیارداندا پێنەدراوە.
3-لەناو مەڵبەندو كۆمیتەكانی رێكخستندا، گەورەترین بەربەست سیستمە رێكخراوەیی و حزبییەكەیە كە رێگرە لەبەردەم هاتنەپێشەوەی گەنج.
4-رێكخستنەكانمان توانای مەعریفی و فیكری و رۆشنبیریی سەردەمیانەی وەك پێویست نییە تا بتوانیت گەنجانی خوێندكار لە زانكۆو پەیمانگەكان وەربگرێت.
5-خوێندكارانی زانكۆو پەیمانگەكان دوای تەواوكردنی خوێندن هەلی كاریان لە كەرتی گشتیی بۆ ناڕەخسێت و لە فەوزای كەرتی تایبەتدا لەلایەن كۆمپانیاكانەوە بە گرێبەستی ناهاوسەنگ لەماف و ئەركدا بێزار دەكرێن، لەو بێدادییەی لەم هەرێمە دووچاری رەشبینی و بێهیوایی دەبنەوە و كەس نییە لە بێدادیان بپرسێت و لەئەنجامدا نەك ئینتیمایان بۆ حزب نابێ‌ت، بەڵكو بۆ خاك و نەتەوە و نیشتیمانیش لاواز دەبێت! ئەگەر چارەنەكرێت ئەمە گەورەترین مەترسییە لەسەر ئایندەی هەرێم.
6-دروستبوون یان سەرهەڵدانی چینایەتی لە نێوان كەمینەیەكی دەسەڵاتدار و زۆرینەیەكی بێ‌ پشت و پەناو نەبوونی دادپەروەریی كۆمەڵایەتیی، ئەمانە هەمووی كاریگەریی راستەوخۆی لەسەر زۆربەی چین و توێژەكانی كۆمەڵگە داناوە بەتایبەتی گەنجان.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*

x

هەواڵێ هاوشێوە

ماڵئاوا پێشمەرگە و رووناکبیر

هه‌ڤاڵ سه‌ڵاح ره‌نجده‌ر كۆچی دوایی كرد به‌داخێكی گرانه‌وه‌، به‌ره‌به‌یانی دوێنێ ...