سەرەکی » وتار » د.عیزه‌دین مسته‌فا » ناوی خۆی ئاشكرا نەكرد:

ئه‌م كونجه‌ش

ناوی خۆی ئاشكرا نەكرد:

پێم خۆشە ئەو چەند كەسە كەمەی (كونجەكەم) دەخوێننەوە، لێم تێ بگەن و دیارە پێشم خۆشە ڕایان لەگەڵما یەك بێ ( كەس نی یە هەستی وا نەبێ).
زۆرجار لەم كەناڵانەدا، یا لە یەكێك لە رۆژنامەكاندا باسی یەكێك دەكرێ و (ڕایەكی بڵاو دەكرێتەوە) – دەووترێ: كەسێك (كە ناوی خۆی ئاشكرا نەكرد) ووتی:
بۆچی ناوی خۆی ئاشكرا ناكا: لەچی دەترسێ – خۆ سوپاس كە ئێستا – بەتایبەتی لە ووڵاتی ئێمەدا ترس نەماوە. لەبەرئەوە حەز ئەكەم: كابرا – با ئەگەر بگونجێ بڵێم (خوشكە – یا خوشكە برا) ناوی خۆی بڵێ سوودی هەیە.
چونكە من – بە تایبەتی وەك خوێنەرێك – حەز ئەكەم لە ڕای كەسانی جیا بگەم. واتە: ڕای سیاسی و تێكۆشەرە كۆن و لێپرسراوە كۆنەكان – لەبارەی فڵانە ڕووداوی ئەمڕۆوە چی یە و ڕای (لاوان) یا بڵێم (گەنجان) كە نەوەی تازە پێگەیشتووی ووڵاتن و نیشتمان ئەكەوێتە دەست ئەوان، لەم بارەیەوە – یا لەو بارەیەوە چی یە. لەبەر ئەوە حەز ئەكەم دەستگاكانی ڕاگەیاندن، بە كابرا بڵێن با ناوی خۆی ئاشكرا بكا – ئەوە سوودی بۆ هاووڵاتیان زۆرە.

پێشوو:
هەر لەم كەناڵ و ڕۆژنامانەدا دەبیستم یا دەخوێنمەوە، قسەی كابرایەك بڵاودەكەنەوە و دەڵێن: وەزیری (فڵان شتی) پێشوو: یا لێپرسراوی فڵانە شتی پێشوو.
ئیتر هەر (پێشوو)ە – ناشزانم (لابراوە لەسەر كارەكەی ، یا خۆی وازیهێناوە). ئەوەم مەبەس نی یە، بەڵام ئەوەم مەبەسە. كە (پێشوو) نەبوو هەر هەبوو، هەڵوێستی بەرامبەر بەم كار و گوزەرانەی كە هەبوو، یا ئێستا هەن – هەر ئەمەی ئێستا دەبوو كە باسی دەكا، یا ئەو كاتە جۆرێكیتری رەفتار ئەكرد و هەڵوێستێكیتری دەبوو. باشتریش ئەوەیە كەناڵەكان زۆرتری – ناڵێم هەموو – چاوپێكەوتنەكانیان لەگەڵ (ئێستا )كاندا بێ و هەر لەگەڵ(پێشۆكاندا) نەبێت.

ماومە:
دیارە كونجەكەم – كونجێكی لاپەڕەی دووەمی ڕۆژانی پێنج شەممەی بۆ دانراوە – دیارە منیش ڕێز لە بڕیاری ڕۆژنامەكە دەگرم. چی بكەم، ئەوەی تا ئێرە نووسیومە سووچەكە هەمووی پڕ ناكاتەوە.
كەواتە – (سڵاو)
چڵی من ماو یە هێشتا چەند چڵی
جار و بار هەندێ هاوڕێ لێم دەپرسن: (ماوی) منیش بە ڕاستی یا بە گاڵتە دەڵێم (ماوم و ماویم) واتە – سەر بە بیروباوەڕی (ماوتسیتۆنگ) و چینم. ئەمە ئەگەر گاڵتەش بێت – دەبێ لەم ڕۆژانەدا سڵاوێك بۆ هاوڕێی دێرینم دوكتۆر عادل عەبدولمەهدیی مونتەفیكی سەرۆكی وەزیرانی ئێستای عیراق و دۆستی دێرینی گەلی كورد بنێرم – كە لەكاتی نووسینی ئەم چەند دێڕەدا لە (چین)ە. هیوام وایە سەركەوتوو بێت و گەشتەكەی سوودی بۆ عیراق و بۆ كوردستانیش هەبێت و سوودی عیراق و كوردستان یەك بخات.

ئێوەش هەر خۆش بن.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*