سەرەکی » وتار »  ‌عه‌داله‌ت عه‌بدوللا‌ » بۆ رێگرتن لە خوێنڕشتنێكی بەردەوام

بۆ رێگرتن لە خوێنڕشتنێكی بەردەوام

لەدوای كۆتایی هاتنی جەنگی دژ بە تیرۆرو جاڕدانی بەزاندنی داعش، دەبوایە كاربەدەستانی عیراق و دەزگا پەیوەندیدارەكانیان جەنگی دژ بە گەندەڵیشیان دەست پێبكردایەو نەیانكرد!. مەرجەعییەتی ئاینی لە نەجەف، لەبۆشاییەوە ئەو بانگەوازەی نەدەكرد، ئەو مەترسیی ئەوەی هەبوو كە لەسایەی گەندەڵیدا، دۆخی وڵات، ناهەموار ببـێ و بە رۆژگاری ئەمڕۆ بگات. مەرجەعییەت، زیاتر لە جارێك وەها باسی لە گەندەڵی كردووە كە بۆ سەر وڵات و هاوڵاتی، لە داعش مەترسیدارترە!.
لەواقعیشدا هەر وایە، ئەگەر داعش عیراقییەكانی لێك كۆكردبێتەوەو یەكخستبێت، ئەگەر لەو جەنگە چارەنووسسازەدا خوێنی هاوڵاتی و هێزی ئەمنی، پێشمەرگەو سەرباز، حەشدی شیعی و سوننەی عیراق تێكەڵ بەیەك بووبن و لە زاخۆوە بۆ بەغداو لەوێشەوە تا بەسرە، بەرەیەكی نیشتمانی لەدژی تیرۆریزم بەرپا كردبێت، ئەوا گەندەڵی و بەتاڵانبردنی سامانی گشتی لەلایەن كاربەدەستانی دەوڵەت و گروپە سیاسییەكان و مافیاكانی جەنگ و ناسەقامگیرییەوە، كە مەزەندە دەكرێت لەسەرو (700) ملیار دۆلار بێت، عیراقیان بە تەواوی بەزاند!، ئەم وڵاتەیان لەناوەوە لێكترازاندو دابەشیان كرد، بەتایبەتی دابەشبوونی نێوان دەوڵەت – كۆمەڵگەو، بگرە دابڕانیان لەیەكترو رووبەڕووبوونەوەی رۆژانەی نێوانیان.
ئەمڕۆ، بە ئاشكرا، بێ متمانەییەكی بێ سنور لەنێوان دەوڵەت و شەقامی عیراقیدا هاتۆتە ئاراوە، ئەم بێ متمانەییە وەك بڵێی ئازارێكی لەمێژ چەپێنراوی ناخی هەموو هاووڵاتیەك بێت، وەك بوركانێك تەقیوەتەوە، شەقام و شوێنە گشتییەكانی شارەكانی پڕكردووە لە گەنج و پیر، ژن و پیاو، تەنانەت منداڵ و مێرمنداڵیش كە ئەندازەی تووڕەیی و بێزارییان وای لێكردوون سنگی ڕووت و بێ قەڵغانی خۆیان بخەنە بەر فیشەكی دەوڵەت و هێزەكانی، ئەم بژاردەیەشیان لە بێدەنگی و ژیانی كولەمەرگی پێ باشتر بێت، ئەوان ئێستا ئامانجی ناڕەزاییەكانیان وەها ئەخوێنرێتەوە كە سەر لە گۆڕانكارییەكی رادیكاڵەوە دەربهێنێت و بە كۆمەڵێك چاكسازیی رواڵەتی رازی نەبێت.
بێگومان راستە دەبوایە هێزە سیاسییەكان، هەر لەسەرەتای پێكهێنانی كابینەی حكومەتەوە هاوكاری عادل عەبدولمەهدی بن بۆ ئەوەی حكومەتێكی تەكنۆكرات Technocratic government پێك بهێنێت، تەكنۆكرات بەو مانایەی كەسانێك بخاتە پێكهاتەی دەسەڵاتی جێبەجێكردنەوە كە بە پشتیوانی گروپە سیاسییەكانیان پشتئەستوور نەبن و چاوپۆشی لە گەندەڵیی بڵاوەبووی ناو وەزارەت و دەزگا دەوڵەتییەكان نەكەن. پەرلەمانیش، هێزی لێپرسینەوەی لە حكومەت و كاربەدەستانی تێوەگلاو لە گەندەڵی هەبێت و فراكسیۆنەكان نەكەونە ژێر فشاری گروپە سیاسییەكانەوەو نەوێرن گەندەڵكاران بدەنە دادگا.
ئێستا هەندێ لەو چاكسازییانەی كە حكومەتی عەبدولمەهدی دەستی پێوە داوە، ناتوانێت دڵنیایی دروست بكات. راستە پێویست وایە كە هانبدرێن و پاڵپشتی بكرێن بۆ ئەوەی درێژەیان هەبێت و بگەنە چاكسازی لە هەموو كایەكانی دەوڵەتدا، بەتایبەتی لەبواری كەمكردنەوەی موچەو دەرماڵەو پاسەوان و ئیمتیازاتی كاربەدەستان، بەڵام هەلومەرجی گڕگرتووی ئێستا تەنها بەو رێكارییانە دانامركێتەوە، ئەو هەنگاوانە ناتوانن كێشە بنەڕەتییەكان كۆنترۆڵ بكەن، بەتایبەت كێشەكانی وەك بێكاری، نەبوونی خزمەتگوزاری، هەژاری، نادادپەروەریی كۆمەڵایەتی، نەبوونی دامەزراندن، مەحسوبییەت و مەنسوبیەت، بەڵێنی ناڕاستی بەرپرسان بە هاووڵاتیان و زۆری دیاردەی تریش كە هۆكاری سەرەكیی پشتی خۆپیشاندانەكانن.
بێگومان خۆپیشاندان، بەشێكی سەرەكییە لەماف و ئازادییە دیموكراتییەكان و دەبێ رێگە بە خەڵكی عیراق بدرێت كە گوزارشت لە ڕاو هەڵوێستی خۆی بكات، بەتایبەتی كە وا دەردەكەوێت هاووڵاتیان بە تەواوی متمانەیان نە بە پارتە سیاسییەكان مابێ و نە بە توانای نوێنەرایەتیكردنیان بۆ گەل، ئیتر چ لەناو ئەنجوومەنی نوێنەراندا بێت، یان حكومەت و دەزگا دەوڵەتییەكانی تر. كاتێك لە شارێكی وەكو ناسریەدا دەبینیت كە بارەگای هەموو پارتە سیاسییەكان، وەك یەك، دەسووتێنرێت، پەلاماری سوپا و هێزە ئەمنییەكان و دژە تیرۆری عیراق دەدرێت، بە تەواوی بۆت روون دەبێتەوە كە گۆڕەپانەكە خەریكە بە فیعلی دەبێتە گۆڕەپانی جەنگێكی خوێناویی نێوان دەوڵەت و كۆمەڵگە.
ئەو بۆچوونە راستە كە خەڵكانی خراپ و دوژمن بە گەلی عیراق هەن كە ئەیانەوێ سوود لە ناڕەزایی خۆپیشاندەران ببینن و بە ئاراستەی توندوتیژیی زیاتریاندا ببەن. لە تازەترین بانگەوازی مەرجەعییەتیشدا لە رۆژی هەینی 29ی 11دا، سەر لەنوێ ئەم مەترسییە دووپاتكراوەتەوە، بەڵام ئەمە نابێتە پاساو بۆ كوشتنی زیاتر لە 400 هاووڵاتیی خۆپیشاندەر!.
راستە سوتاندنی بارەگای كونسڵگەری هەر وڵاتێك لەعیراقدا لە قازانجی گەلانی عیراقدا نییەو رەفتارێكی جێی گومانە. ئەو خۆپیشاندەرانەش كە هۆشیارییەكی سیاسیی بەرزیان هەیە ئەم راستییە دەزانن، بۆیە ئەو رووداوانە گوزارشت نین لە دیمەنی گشتیی خەڵكی خۆپیشاندەر كە داوای ناو و ژیان دەكەن، ناشبێتە بیانوو بۆ ئەوەی چەندین كەناڵی راگەیاندن و دەزگای میدیایی جیاجیا دابخرێن، هێڵی ئەنتەرنێت بپچڕێنرێت و تۆڕە كۆمەڵایەتییەكان قەدەغە بكرێن. ئەو رێكارییە ئەمنییانە وەك ئەوەیە تەنانەت لەكات و پرۆسەی خۆپیشاندانیشدا، كە مافێكی سروشتیی مرۆڤەو لە شۆڕشی فەرەنسیی ساڵی(1789ز)ەوە بانگەوازی بۆ دەكرێت، نان و ئاو لە خۆپیشاندەران ببڕیت!.
بەڵێ لەسایەی قەدەغەكردنی رووماڵی ئازادانەی رووداوەكانەوە لەلایەن میدیاكانەوە، تۆڕە كۆمەڵایەتییەكان دەبنە جێگرەوە!، بگرە تاقە چەكی خۆكۆكردنەوەو خۆ رێكخستن و پلان و بەرنامە داڕشتن و سازدان و جۆش و خرۆشی خۆپیشاندەران. كاتێك كە نان و ئاو ئەلكترۆنی لەخۆپیشاندەران ئەگریتەوە، ئاكام ئەوەیە پەنا بۆ توندوتیژی دەبەن، لەبری هەڵڕشتنی خەم و ئازارو مەینەتییەكانیان لە سەكۆكانی ئەو جیهانە گریمانەكراوەی كە تۆڕە كۆمەڵایەتییەكان دروستی دەكەن، ناچار ئەبن لە واقعدا رەفتاری توندوتیژ بنوێنن و لە بەرامبەریشدا توندوتیژی دەوڵەتیش زیاد بكات و بەم جۆرەش خوێنڕشتن بەردەوام بێت.
بۆ هاویشتنی هەنگاوێكی تر لەرێی رێگرتن لە بەردەوامیی ئەو خوێنڕشتنە، وازهێنانی عەبدولمەهدی لە سەرۆكایەتیی حكومەت، رووداوێكی مەعنەویی باشە، لانیكەم، مەعنەوی بۆ خۆپیشاندەران كە دەیانەوێ خوێنڕژانیان لە شەقامەكانی عیراقدا بێ دەسكەوت نەبێت، چیتر هەست بە بوون و سەنگ و بەهای خۆیان بكەن.
بێگومان دەزانین ئەو گرەوە راست نییە كە دووركەوتنەوەی عەبدولمەهدی، بە دوای خۆیدا، برینەكان سارێژ بكاو كۆتایی بەقەیرانەكان بهێنێت، كەس لەم وەهمەدا ناژی، بەڵام، رووداوەكە، هەر هیچ نەبێ، خۆپیشاندەران بەوە دڵخۆش دەكا كە كاریگەرییەكیان لەسەر ناوەندی دەسەڵات بەجێ هێشتووە، سەركەوتنێكیان لەفۆرمی سەركەوتنی خۆپیشاندەرانی وڵاتی لوبنان تۆماركردووە كە دەستلەكاركێشانەوەی باڵاترین دەسەڵاتی راپەڕاندنە لە وڵاتدا كە سەرۆكی حكومەتە، ئەوەش لە ژێر فشارو ناڕەزایی و قوربانییەكی زۆری ئەواندا.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*