سەرەکی » مانشێت » 9/12، جەژنی دیموكراسیی حزبییە

كۆنفرانسی مەڵبەندەكان..

9/12، جەژنی دیموكراسیی حزبییە

دوێنێ 9/12/2019 كۆنفرانسی مەڵبەندەكان لە 17 مەڵبەندی یەكێتیی نیشتمانیی كوردستان بە سەركەوتوویی بەڕێوەچوو.
كۆنفرانسی مەڵبەندەكان لە سەعات 8ی بەیانییەوە دەستیپێكرد و هەڤاڵانی بەشداربوو بە جۆش و خرۆشی یەكێتییانەوە بەشدارییان لە كۆنفرانسەكەدا كرد و نوێنەرانی خۆیان بۆ چوارەمین كۆنگرە هەڵبژارد.

كۆنفرانسی مەڵبەندەكان
كۆنفرانسی مەڵبەندەكان لە 17 مەڵبەند بەڕێوەچوو، لە پرۆسەكەدا 4886 هەڤاڵ بەشداربوون و لەو رێژەیەش 1726 هەڤاڵ كاندید بوون. بۆ هەر مەڵبەندێكیش رێژەیەك بۆ كۆنگرە دیاریكراوە، لە هەموو ئەو رێژانەشدا نابێت رێژەی ژنان 20 % كەمتر بێت.
كۆنفرانسی مەڵبەندەكان لەلایەن 17 لیژنەوە سەرپەرشتی دەكران، كە ژمارەی سەرۆك و ئەندامانی لیژنەكان 165 هەڤاڵ بوو، پێكهاتبوون لە هەڤاڵانی ئەنجومەنی ناوەند و ئەندامانی مەكتەبەكان.

چوارەمین كۆنگرە
كۆنفرانسی مەڵبەندەكان لە چوارچێوەی ئامادەكارییەكاندایە بۆ بەستنی چوارەمین كۆنگرەی یەكێتیی نیشتمانیی كوردستان. ئەمەش لەكاتێكدایە رۆژانی 16-18/11/2019 كۆنفرانسی كۆمیتەكان لە 207 كۆمیتە لە سنووری سەرجەم مەڵبەندەكاندا بەسەركەوتوویی بەڕێوەچوو، رۆژی 21/11/2019ش كۆنفرانسی مەكتەبەكان لە 12 مەكتەب دەستیپێكرد و بەسەركەوتوویی بەڕێوەچوو.
لە كۆنفرانسی كۆمیتەكاندا 19674 هەڤاڵ بەشداربوون و لەو رێژەیەش 3569 هەڤاڵ كاندیدبوون، 1773 هەڤاڵ وەك نوێنەری كۆمیتەكان هەڵبژێردران بۆ ئەندامی كۆنفرانسی مەڵبەندەكان. رێژەی بەشداربوون لە كۆنفرانسی كۆمیتەكاندا زیاتر 95 % بوو.
شایانی باسە رۆژی 5/12/2019 ئەنجومەنی سەركردایەتیی یەكێتیی نیشتمانیی كوردستان كۆبۆوە و بڕیاریدا رۆژی 9/12/2019 كۆنفرانسی مەڵبەندەكان، رۆژی 21/12/2019ش چوارەمین كۆنگرە بەڕێوەبچێت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*