سەرەکی » وتار » ئازاد ئیبراهیم ‌ » چواره‌م كۆنگره‌، كۆنگره‌ی‌ به‌هێزبوونه‌وه‌ی‌ كورد !

لەناو روداوەکاندا

چواره‌م كۆنگره‌، كۆنگره‌ی‌ به‌هێزبوونه‌وه‌ی‌ كورد !

چواره‌م كۆنگره‌ی‌ یه‌كێتیی نیشتمانیی كوردستان ته‌نها بۆ یه‌كێتی و یه‌كێتییه‌كان گرنگ نییه‌. ئه‌گه‌ر چواره‌م كۆنگره‌ی‌ یه‌كێتی نوێ بكاته‌وه‌ و یه‌كێتی به‌هێز ببێته‌وه‌، ئه‌وا ئه‌م نوێبوونه‌وه‌ و به‌هێزبوونه‌وه‌یه‌ بۆ ته‌واوی‌ هێزه‌ سیاسییه‌كانی‌ كوردستان و بۆ كورد وه‌ك نه‌ته‌وه‌ و بۆ پێگه‌ی‌ سیاسی و نێوده‌وڵه‌تی كوردستان و عێراقیش گرنگه‌، چونكه‌ هه‌موو لایه‌نه‌كانی‌ هه‌رێم و عێراقیش ئه‌و شاهیدییه‌ بۆ یه‌كێتی ده‌ده‌ن كه‌ هاوكێشه‌یه‌كی ڕاسته‌وانه‌ له‌نێوان یه‌كێتی له‌لایه‌ك و پێگه‌ی‌ كورد و عێراقیش له‌لایه‌كی دیكه‌وه‌ هه‌یه‌، ئه‌گه‌ر یه‌كێتی به‌هێز بێت ئه‌وا ئه‌و دوو پێگه‌ جوگرافییه‌ش به‌هێز ده‌بنه‌وه‌ له‌سه‌ر ئاستی ناوچه‌كه‌.
ڕۆژی 21/ 12/ 2019 ڕۆژێكی نوێیه‌ له‌ خه‌باتی سیاسی یه‌كێتی و یه‌كێتییه‌كاندا، ئه‌م ڕۆژه‌ نوێیه‌ هه‌مان وێنه‌ی‌ سه‌ره‌تای‌ شۆڕشی نوێی گه‌له‌كه‌مانه‌ كه‌ ئه‌و شۆڕشه‌ به‌ده‌ركه‌وتنی یه‌كێتیی نیشتمانیی كوردستان چه‌خماخه‌ی‌ داو سه‌ره‌تایه‌كی نوێ له‌ خه‌بات و تێكۆشانی گه‌لی كورد ده‌ستی پێكرد. وه‌ك چۆن ئه‌و ده‌سپێكه‌ی‌ شۆڕش هێز و گروتینێكی گه‌وره‌ی‌ به‌ خه‌باتی سیاسی گه‌له‌كه‌مان به‌خشی و جه‌سته‌یه‌كی مرد! و سستبووی سیاسی و نه‌ته‌وه‌یی و شۆڕشگێری كوردی بوژانده‌وه‌ و جارێكی دیكه‌ هیوای‌ به‌نائومێدی و ڕه‌شبینی به‌خشی و شه‌وه‌زه‌نگی كوردی دڕ پێدا، ئه‌وا چواره‌م كۆنگره‌ش خاوه‌ن هه‌مان وه‌زیفه‌ ده‌بێت كه‌ جارێكیتر و له‌ فۆرمێكی نوێدا ببێته‌وه‌ دار عاسای ئه‌و جه‌سته‌ لاوازبووه‌ بێ سه‌ركرده‌یه‌ی كورد و به‌ره‌و ڕێگای‌ سه‌ركه‌وتن و به‌هێزبوونه‌وه‌ی ببات.
حیزب له‌ هه‌ر كۆمه‌ڵگه‌یه‌كدا بێت و له‌ هه‌ناوی‌ سیاسی هه‌ر نه‌ته‌وه‌یه‌كه‌وه‌ هاتبێت، واته‌ به‌شێكیشه‌ له‌ جوڵه‌ی‌ سیاسی و پێگه‌ی‌ سیاسی ئه‌و نه‌ته‌وه‌یه‌، زۆرێك پارت و حیزبی سیاسی وێنه‌ی‌ نه‌ته‌وه‌یه‌ك له‌ دۆخێكی خراپی ناجێگیره‌وه‌ هه‌ڵده‌كێشێت بۆ دۆخێكی باش و ناوبانگێكی گه‌وره‌ی‌ مێژوویی، به‌پێچه‌وانه‌شه‌وه‌ حیزب هه‌یه‌ پێگه‌ی‌ نه‌ته‌وه‌یی و نیشتمانی میلله‌تێك له‌ دۆخێكی گه‌شانه‌وه‌ و كرانه‌وه‌ی سیاسییه‌وه‌ داده‌كشێنێت بۆ پێگه‌یه‌كی كه‌نارگیر و داخراو. له‌به‌رمه‌بنای‌ ئه‌م لێكدانه‌وه‌ سیاسییه‌دا یه‌كێتیی نیشتمانیی كوردستان دوو چركه‌ ساتی مێژوویی و سیاسی خۆیی به‌ شانازی‌ و گه‌وره‌یی تێپه‌ڕاندووه‌، یه‌كه‌میان سه‌ره‌تای‌ دامه‌زراندنێتی و دووه‌میشیان له‌دوای‌ ساڵی 2003 كه‌ حكومه‌تی‌ به‌عس و داروده‌سته‌كه‌ی‌ له‌ناو بران و یه‌كێتی چووه‌وه‌ به‌غدادو به‌شداری‌ بونیادنانه‌وه‌ی‌ عێراقی نوێی كرد، یه‌كێتی پێگه‌ی‌ مێژوویی‌ كوردی له‌نێوان هه‌ردوو قۆناغه‌كه‌دا پێكه‌وه‌ گرێدا، تاكو چركه‌ساتی ژیانئاوایی سه‌رۆك مام جه‌لال یه‌كێتی هه‌ڵگری‌ فه‌لسه‌فه‌و دونیابینی تایبه‌ت بوو بۆ بنیادنانه‌وه‌ی‌ عێراق، به‌ ئێستایشه‌وه‌ ئه‌وه‌نده‌ی‌ باس له‌ گرنگی یه‌كێتی و فه‌لسه‌فه‌ی‌ «مام جه‌لال» ده‌كرێت بۆ بنیادنانی عێراقێكی یه‌كگرتووی به‌هێز باس له‌هیچ حیزب و لایه‌نێكی دیكه‌ ناكرێت.
ئێستا كه‌ یه‌كێتی له‌ سه‌روبه‌ندی چواره‌مین كۆنگره‌ی‌ خۆیدایه‌، واته‌ پێگه‌ی سیاسی و مێژوویی یه‌كێتی و كوردیش له‌به‌رده‌م ته‌حه‌دییه‌كی گه‌وره‌دایه‌، ئه‌بێت یه‌كێتی هێنده‌ به‌سه‌ربه‌رزی و ده‌نگی بڵنده‌وه‌ له‌م كۆنگره‌یه‌ بچێته‌ ده‌ره‌وه‌، هیچ نه‌بێت لانی كه‌م خه‌ونی یه‌كێتییه‌كان و هه‌موو تاكێك بۆ به‌هێزبوونه‌وه‌ی‌ یه‌كێتی و كورد له‌گه‌ڵ خۆیدا بگه‌یه‌نێته‌ دوا خاڵی دڵنیایی و ئومێد. ئه‌وه‌ی‌ له‌م كۆنگره‌یه‌دا بۆ یه‌كێتی گرنگه‌ ئه‌وه‌یه‌ كه‌ یه‌كێتی نه‌ك نابێت توشی چوونه‌وه‌ ناوخۆو شكانه‌وه‌ی‌ ناوخۆیی ببێته‌وه‌ به‌ڵكو ده‌بێت یه‌كێتی بازدانی مێژوویی بكات و وه‌ك چۆن له‌ سه‌ره‌تای‌ دروستبوونیه‌وه‌ له‌ساڵی 1975 ئه‌م بازدانه‌ مێژووییه‌ی له‌خه‌بات و شۆڕشی كورددا كرد، ده‌بێت چواره‌م كۆنگره‌ی‌ یه‌كێتی كرانه‌وه‌یه‌كی سیاسی زۆرتر بۆ ناوخۆی‌ خۆیی و ناوخۆی كوردستان و عێراقیش له‌گه‌ڵ خۆیدا بهێنێت كه‌ له‌ئاست ئه‌و چاوه‌ڕوانی‌ و تموحه‌ بێت كۆمه‌ڵانی‌ خه‌ڵكی له‌ناوه‌وه‌ و ده‌ره‌وه‌ی‌ یه‌كێتی هیوایان پێی هه‌یه‌.
به‌ وردبوونه‌وه‌ له‌خه‌مخۆری‌ هاوڵاتیان بۆ چواره‌م كۆنگره‌ی‌ یه‌كێتی، ئه‌وه‌مان بۆ ڕوون ده‌بێته‌وه‌ كه‌ ئه‌م كۆنگره‌یه‌ ته‌نها بۆ یه‌كێتییه‌كان گرنگ نییه‌ و هه‌موو ئه‌و كه‌سانه‌شی دیدێكی به‌هێزیان بۆ پرسی نه‌ته‌وه‌یی و نیشتمانی‌ هه‌یه‌ به‌هیواوه‌ له چواره‌م‌ كۆنگره‌ی‌ یه‌كێتی و نوێبوونه‌وه‌ی‌ یه‌كێتی ده‌ڕوانن، چونكه‌ هه‌موو تاكێكی به‌ویژدان و كوردپه‌روه‌ر له‌وه‌ تێده‌گات كه‌ نوێبوونه‌وه‌ و به‌هێزبوونه‌وه‌ی‌ یه‌كێتی واته‌ به‌هێزبوونه‌وه‌ی‌ كورد له‌هاوكێشه‌ سیاسییه‌كانی‌ كوردستان و عێراق و ناوچه‌كه‌شدا.

*ئەم گۆشەیە شەممە: ئازاد ئیبراهیم، سێ شەممە: هێمن کەریم، پێنج شەممە: ستران عەبدوڵڵا دەینوسێت

print

 135 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*