سەرەکی » وتار » د.به‌ختیار شاوه‌یس‌ » نوێبوونەوەی یەکێتی لە رەفتارەوە تا روخسار

له‌ كۆنگره‌ی چواره‌م

نوێبوونەوەی یەکێتی لە رەفتارەوە تا روخسار

(13)

بۆئەوەی بەدوای پەیوەندییە توندوتۆڵەكەی نێوان یەكێتی و گەنجان بگەڕێین، ئەوا پێویستە تەرزەكانی ئەو راستییە هەڵدەینەوە كە هەروەك چۆن شۆڕشی نوێی 1976 یەكەمین و دواهەمین شۆڕشی كوردە كە توانیویەتی لە مەودایەكی زەمەنی سنوورداردا كە ماوەكەی 15 ساڵەو بەرامبەر دڕندەترین رژێمی ئەوكاتەی ناوچەكە و دنیا تاجی سەركەوتن لەسەر بنێت و بەهاری ئازادی بەدیبهێنێت، ئەوا گرنگە تیشك بخەینە سەر ئەو راستییەی كە شۆڕشی نوێ‌ بە بەراوردی شۆڕشەكانی دیكە زیاتر لەهەموویان نزیكبووە لە گەنجان و خواستەكانی و هەروەها زۆرایەتی كاراكتەرەكانی لە هەڵگیرسێنەر و سەنتەری بڕیاری یەكێتیی كە خاوەنی شۆڕشەكەبوون كەسایەتی گەنج بوون.
گەنجبوونی یەكێتی و شۆڕشەكەی هەر بەتەنها لەڕووی چەندایەتی نەبووە، بەڵكو ئەم كارلێكە پڕلە تەواوكارییەی نێوان یەكێتی و گەنج زیاتر پەلی كێشاوە و ئاستی چۆنایەتی بڕیووە. بەمانایەكی دیكە ئەوە بەس نەبووە بۆ ئەم شۆڕشەو حزبە هەڵگیرسێنەرەكەی كە لەناو پێشمەرگایەتی و رێكخراوەیی و رێكخستن و هەروەها لەناو مەڵبەند و تیپ و كەرت و مەفرەزە و شانەكانی رێكخستن و زیندانەكانی بەعس و ریزەكانی پێشەوەی قوربانی لە كاروانی شەهیدانیدا بەشە شێرەكەی گەنجان بن، بەڵكو لەرووی فیكری حزبی و ئاراستەی سیاسی و پێكهاتەی رێكخراوەییەوە گەنجانە بووە و كاری داهێنانەی یەكێتی و نوێگەریی لە پرۆسەی كوردایەتیدا، سەرەوەی شوناسی ئەم حزبە بووە. بۆ زیاتر روونكردنەوەی مەغزاكانمان، دەڵێین گەنجبوونی یەكێتی هەربەتەنها ئەوە نەبوە كەسكرتێری كۆمەڵەكەی كەكاك ئارامەو لەسەروەختی شەهیدبوونیدا تەمەنی تەنها 31 ساڵ بوە كەئەمە شتێكی دەگمەن و سەرسورهێنەرە، بەڵكو خاڵەشیهاب و هاورێكانی كاتێك لەرووی فكرو پابەندبوونیان بە بنەماكانی بیرو باوەرەوە كەمترین سازش ناكەن و نەریتێكی نوێ‌ دائەهێنن ئەمەیان نموونەی زیندووی جۆرێكی دیكەی گەنجبوونەوەی بیروباوەڕی سیاسییە كە لەناو سەرەتاكانی یەكێتیدا رەنگیداوەتەوە.
لەدوای راپەڕینەوە پەیوەندیی نێوان گەنج و یەكێتی شێوەیەكی دیكە بەخۆیەوە دەبینێت و بەهۆی ململانێی سیاسی و هەروەها ناكۆكیی ناوخۆییەوە پەیوەندییەكە ساردو سڕیی تێدەكەوێت و بەتایبەتی لەدوای رووداوەكانی 31ئابی 1996 و دروستبوونی دوو ئیدارەیی و ئەستووربوونی دیواری ناڕەزایی جەماوەر و دەركەوتن و بەهێزبوونی هێزە ئیسلامییەكان، ئەوەندەی دیكە ئینتمای نیشتمانی لای تاكی كورد كاڵبۆوە، بەتایبەتی گەنجان كرانە سووتەمەنیی ململانێكان و بەمەش یەكێتی وەك هێزێكی كوردستانی كە ستراتیژیی كارەكانی لەسەر بنەمای بەرژەوەندییەكانی نەتەوە داڕێژراوە، ئەوەندەی دیكە پانتایی نێوان خۆی و گەنجان فراوانتر بوون.
لەلایەكی دیكەشەوە بەهۆی كەڵەكەبوونی كێشەكان و نەبەستنی كۆنگرەكانەوە لەكاتی خۆیدا كە دەبوایە یەكێتی لەماوەی 29 ساڵی دوای راپەریندا لانیكەم شەش كۆنگرەی ببەستایە و ئەمەش هۆكارێكی دیكەی نەهاتنە پێشەوە و پەراوێزخستنی گەنجان بووە.
لەم سۆنگەوە، ئەگەر باكگراوندی یەكێتی مێژوویەكی لێوان لێو بێت لە گەنجبوون و داهێنان و هەروەها لەئاستی پڕۆگرامەكەیدا خاوەنی پڕۆژەی چارەنووسساز و ستراتیژی بێت بۆ گەنجان و پێشخستنی تواناو داخوازییەكانیان و لەئاستی پەیكەرەكەشیدا رێژەیەكی بەرچاو لە كادیرانی مەكتەب و مەڵبەند و كۆمیتە و ئۆرگانەكانی دیكەی راگەیاندن و رێكخراوە دیموكراتییەكان و كەسوكاری سەربەرزی شەهیدان گەنج بن، ئەوا شوێنی هەڵوێستەو تێڕامان و خوێندنەوەی فرەڕەهەندە، كاتێك لەئاستی جەماوەریدا بۆشاییەكی فراوانی نێوان ئەم هێزە و گەنجان بوونی هەبێت و پێویستە بەشێكی دیار لە كارەكانی كۆنگرە لە دۆزینەوەی ئەڵتەرناتیڤی عەمەلی ئەم مەسەلەیە تەرخان بكرێت و گەنجبوونەوەی رووخساری یەكێتی شانبەشانی نوێبوونەوەی فیكرو سیستەمەكە هەوێنی سەرلەنوێ‌ ئاوێزانبوونی ئەم حزبە بێت لەگەڵ زۆرینەی چین و توێژەكانی كۆمەڵگە و ئەمەش بەدوو ئاستی جیاواز دەبێت، بەم شێوەیە:
یەكەم- وەك هەنگاوێكی سەرەتایی هۆبە یان بەشێكی تایبەت بەگەنجان لەئاستی مەكتەبی سیاسی یان دەستەی جێبەجێكار دروستبكرێت لەبابەتی ئەوەی كە پارتی لەیبەری بەریتانی هەیەتی. ژمارەیەكی بەرچاو لە ئەندامانی مەکتەبی سیاسی و سەركردایەتی كاری تێدابكەن و بۆئەمەش سوود لە ئەزمونی پارتە سۆشیال دیموكراتەكانی خۆرئاوا و ئەوانەیان سەركەوتنیان بەدەستهێناوە ببینرێت.
دووەم- پەیمانگایەكی ئەكادیمی – ستراتیژی دروستبكرێت كە بەشێوەیەكی پرۆفیشناڵانە كادیرانی گەنجی یەكێتی لە ئۆرگانە جیاوازەكان پەروەردە بكەن وەك سەركردەی ئایندە.

 176 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*