سەرەکی » ئاراستە » وشیاری وەستا عەزیز دار ئەرخەوانێكی سەیوا

وشیاری وەستا عەزیز دار ئەرخەوانێكی سەیوا

ئازاد سه‌راوی

گەڕەكێكی قەراغی شار، نزیك بنار، بناری شار، ساڵانی هەشتای ڕابردو، ئەو سەردەمەی بەعس ببوو بە سەگی هار، لە خەڵكی شار، ئەو ڕۆژگارە مەجید بەگ ببوو بە قەڵای بەرگری و مۆتەكەی داگیركەری شار، بە نەجمی ڕێكخستنەكانی شار، مەجید بەگ ئەو سەردەمانە سكڵی سوری بن ئاگر بوو، بڵێسە و مەشخەڵ و گڕ بو، قەڵای داستان بو، سەنگەر بوو.
مەجید بگ ئەوەندە گەورە و بە ژارو ژەنگ و ئازار بوو، لە سەر دڵی ئەمنی سلێمانی ئەوسا، بەعس هێندە لە جوڵەی لاوانی ئەوێ بە گومان بوو، لە خشپەی گەڵاش ئەترسا، ئەگەر زنجیری ماڵێكی قەراغی شار بترازایە، ئەگەر تروسكەی ئاگرێك لە گژو گیای بناری گۆیژە هەستایە، ئەمنی سلێمانی یەكسەر ڕووەو مەجید بەگ دەهاتن، وەكوو سەگی پاسی بەزیوو، چوار دەوری گەڕەكیان دەگرت، تا بەیانی و خۆر هەڵاتن.
ڕێكخستنەكانی مەجیدبەگ، چاوی ساغی پێشمەرگە بون لە ناو شاردا، زۆر ئێواران پێش ئەوەی كە تاریك دابێ، خۆر لە گەڵ مانگە شەو ڕابێ، پێش ئەوەی گڵۆپەكانی شار داگیرسێن، ڕێكخسنەكان دادەگیرسان، دەستی پێشمەرگەیان دەگرت، دەبون بە چاوساغی شەویان، هەر هێندەی بڵێی یەك و دوو، لە ئاسمانی سلێمانی، دەبوو بە شریخەی گوللە و وریشانەوەی rbG، دەنگی، bkc و rbG هەر بۆڵەی بوو هەتا سوبحی بەیانی، ئیتر كوڕانی مەجید بەگ، دەستی پێشمەرگەیان دەگرت دەكشانەوە بۆ قەراغ شار، ئەو كراس ڕەشەی پێشەوە كە چاوساغی یەكەمیان بوو پێیان دەوت كاكە وشیار.
بەیانی كە خۆر هەڵدەهات، كازیوە سەری دەردێنا و مانگ ڕوخساری دەشاردەوە و بۆی هەڵدەهات، بەعس وەك سەگی بریندار، دەستی دەكرد بە پەلامار، بۆ خەڵكی شار، لێرەو لەوێ خەڵكی شاری دەسگیر دەكرد، كێی دەست بكەوتایە دەیبرد، لە خەڵكی بێ دیفاعی شار، لە زەحمەتكێش و كرێكار، بەڵام خەڵك بە كەڵبەی وەك سەگی هاریان پێ دەكەنی، لە ناو ماڵ و لە بازاڕ و لە گەڕەك و، هەتا دەگەیشتە ناو پاس، بە چرپەوە و هەندێك جاریش بە نیگایەك، چالاكیەكەی ئەو شەوە دەبووە هەواڵ و دەنگ و باس.
مەجید بەگ نیشتمانێك بوو، لە گەردو گوڵی بەیانیان، پێڵوی چاوان، هەناسەیەك بوو پڕ لە گڕ، بۆ ڕژێمی بەغدای تاوان، كورەی خەبات و شۆڕش بوو، نیشتمانێكی بچوك بوو، لە ڕوحمی گەورەی نیشتمان، قیبلە و پێگەی كۆڵ نەدان بوو، بۆ لاوان و گەورە پیاوان، بۆ وشیاریش وەك نیشتمانی دووەم بوو، نیشتمانێك بۆ كۆڵنەدان و بەرگری، وەك زێدی باب و با پیری وەك تەگەران.
ئەو دەمە تۆ شانزە ساڵ بوی، بە تەمەن بچكۆلە بویت و هەروەكو دەڵێن مناڵ بوی، بە ڵام بە ورە كەڵەگەت، شاخ و كێوو گردو یاڵ بوی، نۆبەرەی یەكەم قوربانی بەرەو شەوی سەری ساڵ بوی، لەو نزیك سەری ساڵەوە كە دەستگیریان كردی و ڕۆشتی، هەتا هەر چی سەری ساڵە، لە سەر بەرزترین لوتكە، لە دەمكەلی نیشتمان دا، دەشەكێیتەوە وەك ئاڵا.
ئەو دەمەی دەستگیریان كردیت، بەرە و زیندان و لێدان و پەتی سێدارەیان بردیت، هێندە نەبوو تازە خەت و خاڵت دابوو، تۆ بە تەمەن بچكۆلە بویت بەڵام ورەت هێندە بڵندو بەرز بوو، باڵای ورەت لە هەورا بوو، ئەو دەمەی تۆ بویتە قارەمانی زیندان، دڕت دا بە شەوەنگ و پەت و لێدان، ئەو دەمانە تۆ ئەوەندە خۆنەویست بویت، خۆت دەچویتە سەر سەری قامچی و جەللادو هەڵت دەسان، دەت وت ئەوە باڵای ورەم، ئەوەش كێڤڵ و پەتی خنكان، وات لێكردن هەمو جارێك تۆ پەت و قامچیت دەبەزان، ئەوەندە شەكەت و ماندوی ورەی تۆ بوون، نە دەخەوتیت هەتا ئەوانت دەخەوان، هەتا ئەوانت ئەنەوان.
ئەو ڕۆژانەی تەرمی پیرۆزت هاتەوە بۆ ئامێزی گردی سەیوان، ببویتە داری ئەرخەوان، من لەوێ بوم لە پرسەكەت، چۆن ببویتە فرمێسكی زامێكی كۆنی نوێ بوەوە، لە چاوانی وەستا عەزیز دا قەتیسمای، چۆن ببویتە برینێكی بە ئازارو، سەر لە نوێ دەكولایتەوە، لە نێو ئامێزی دایكت دا وەك كۆستێكی تازە كەوتوو دەتلایتەوە، ئاگام لێ بوو دڵی دیارو ڕێبواری وەستا عەزیز قوڵپی ئەدا، ئازارت هێندە بە سوێ بوو، هەر شاخ بوو لە شاخی ئەدا.
بنوو كاكە بە ئارامی لە ئامێزی نیشتمان دا، تۆ نەمردوی، لە پێڵوی چاوەكانمان دا هەڵمانگرتوی، تۆ ئێستاكە سەری بڵندی، وەك دووندی، بە سەر پەتی سێدارەوە، میدالیای شەرەف و ڕێزی، بە بەرۆكی وە ستا عەزیز و ڕێبوار و، بە سەر سنگی دیارەوە.

print

 179 جار بینراوە

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*