سەرەکی » ئاراستە » تێكۆشەرێكی دێرین و كەسایەتییەكی ناسراوی كوردەواریپەڕە 22

لە دووەم ساڵڕۆژی كۆچی دوایی عەلی ئاغای بوران دا

تێكۆشەرێكی دێرین و كەسایەتییەكی ناسراوی كوردەواری

ژیاننامەی عەلی ئاغای بوران

تێكۆشەری نەمر، عالی مەلا باس ناسراو بە عەلی ئاغای بوران، ساڵی 1952 لە گوندی (بوران)ی باڵەكایەتی، لەدایكبووە و دواتر ماڵیان چۆتە گوندی (وەڵزێ)ی هەمان ناوچە.
لە 18 ساڵیدا لەگەڵ خاتوو (مێر عەبدوڵڵا حسێن) چۆتە ژیانی هاوسەرییەوە و بوونە خاوەنی شەش منداڵ بەناوەكانی (محەمەد، نەجمەدین، رێباز، رێناس، نێرگز، دەرباز)، بەڵام محەمەد كە یەكەم منداڵیان بوو ساڵی 1977 لە زینداندا لە دایكبووەو ساڵی 1997 لە پێشمەرگایەتیدا شەهید كراوە.
عەلی ئاغا باوەڕی وابوو دەبێ مرۆڤ لە پێناو سودو خۆشبەختیی كەسانی تردا ئامادەی قوربانیدان بێت، هەر باوەڕەش وای لێكردبوو كە هەرگیز دانەبڕێ لە هاوڕێ و هاوسەنگەران و كەسوكاری شەهیدان.
ڕۆژێك لە ڕۆژان هێڵێكی جیاكراوەی دروستنەكرد لە نێوان خۆی و خەڵكیدا، باوەڕی بەوەبوو دەبێ مرۆڤ بە سادەیی بژی و هەنگاوەكانی ڕەنگدانەوەی ئەو سادەییە بێت، ئەوەش وایكردبوو كە خەڵكی وەكو شۆڕشگێڕێكی بەوەفا بیبینن، شۆڕشگێڕێك كە لە ناخیدا ڕۆحی سادەیی گەشەی كردووە و كردار و گوفتارەكانیشی ڕەنگدانەوەی ئەو سادەییە بوون.
ساڵی 1969 و لە تەمەنی 17 ساڵیدا بۆتە پێشمەرگەی شۆڕشی ئەیلول، بەهۆی شۆڕشەوە باجی زۆریداوە، ساڵی 1976 لەگەڵ خانەوادەكەی دوورخرانەوە بۆ ناحیەی شنافیە لە قەزای هەمزە- پارێزگای دیوانیەی باشووری عیراق، بەڵام كە زانی شۆڕش هەڵگیرساوەتەوە بەزوویی گەڕایەوە كوردستان و بووە پێشمەرگە و دواتر هاوسەرەكەشی ئازادكرا، بەڵام حكومەتی عیراق بۆ ناچاركردنی عەلی ئاغا تا دەست لەخەبات هەڵگرێت، لە ساڵی 1977 دا هاوسەرەكەی دەستگیر دەكاتەوەو لە زیندانی ئەبوغرێب دا (محەمەد)ی كوڕیان لە دایك دەبێت، دوای ساڵێكیش بە لێبوردنی گشتی ئازاد دەكرێن، بەڵام هەر دوای ئەوە، خاتوو (مێر)ی هاوسەریشی دەچێتە شاخ و شانبەشانی عەلی ئاغا بەشدار دەبێت لە خەباتی پێشمەرگانەدا تا ڕاپەڕینی 1991.
بەهۆی متمانەی شۆڕش و هەڤاڵەكانی، چەندین پلەی وەرگرتووە، وەك فەرماندەی هەرێمی7ی باڵەك، ئەمەش بۆ كاریزمایی و بیركردنەوەی ستراتیژیی سەربازی ئەو دەگەڕیتەوە كە ئەوەش وایكردبوو هێزەی پێشمەرگە لە زۆربەی ئەو ڕووبەڕووبونەوانەی كە عەلیاغای بوران سەرپەرشتی كردوون، سەركەوتنی گەورەی بە دەستهێناوە.
لە نسكۆی شۆڕشدا ساڵی 1975 ناچار دەبێت ماوەیەك لەماڵەوە دابنیشێت، لە واقیعێكی سەختدا بووە، لەهەوڵی ئەوەدابووە چۆن هێزی چەكدار رێكبخەنەوە لە دژی رژێمی بەعس، بۆیە بەردەوام لە پەیوەندیدابووە لەگەڵ تێكۆشەراندا، هەر لەوساڵەدا جیابەجیا سەردانی شەهیدان حەسەن بۆڵی و مەحمود سەیدە و عەزیز داود و هەروەها سمایل ئاغا دەكات و بیروڕا ئاڵوگۆڕ دەكەن، رۆژی 28/1/1976 بۆ ئەو مەبەستە لە ماڵی شەهید عەزیز داود لە گوندی سۆرەبان كۆبونەوەیەك ساز دەكەن، چەند رۆژێك دواتریش دوا كۆبوونەوەیان لە (ئاشی هەمزە ئاغا)ی گوندی وەڵزێی باڵەكایەتی دەكەن و بڕیار دەدەن ببنە دوو مەفرەزەی پارتیزانی و لەیەك كاتدا لە دوو شوێن پەلاماری ڕژێم بدەین، نەخشە و پلانەكان باش دانران و بەشدار بووانی كۆبوونەوەكەش بریتی دەبن لە:
شەهید حەسەن بۆڵی، شەهید مەحمود سەیدە، شەهید عەزیز داود، برایمەسێن، ئەحمەد دەروێش، كۆچكردوو رەحمان دەروێش، كۆچكردووان عەلی سمایل ئاغا و عەلی ئاغای بوران.
دوای چەند ڕۆژێك لەو كۆبوونەوەیە و بەر لە دەستپێكردنی كارەكان، رژێمی بەعس عەلی ئاغاو خێزانەكەی دوور دەخاتەوە بۆ باشوری عیراق، هەر ماوەیەكی كەمی دوای ئەوەش لە لایەن باوكییەوە نامەی شەهیدان مەحمود سەیدەو حەسەن بۆڵی پێدەگات دەربارەی سەرهەڵدانەوەی شۆڕش، ئیتر ئەو و شەهید عەزیز داود بەنهێنی لە باشووری عیراقەوە خۆیان دەگەیەننەوە كوردستان و دەبنە پێشمەرگە.
عەلی ئاغای كۆچكردوو كەسایەتی بە شكۆ و لێوەشاوەبووە، دوای ئۆپەراسیۆنەكانی ئەنفالی 1988 ماڵ و منداڵی ئاوارەی ڕۆژهەڵاتی كوردستان (ئێران)بوون و خۆشی لە ناوچە جیاجیاكانی باشوور وەك پێشمەرگەیەك بەردەوام بووە لەخەبات.
ساڵی 1991 لەگەڵ رەتڵی هەولێر بەشداریی ئازادكردنی كوردستانی كردووە و پلەكەشی فەرماندەی تیپ بووە، لەكاتی كۆڕەی نیسانی 1991دا بەشداری كارای هەبووە لە تۆماركردنی داستانی ( كۆڕێ)دا.
خاوەنی میدالی رێزلێنانی جەنابی مام جەلالە وەك پێشمەرگەیەكی دانەبڕاوی ساڵی 1976 و دواجاریش بە پلەی ( لیوا) خانەشین كراوە.
بەهۆی رووداوەكانی ساڵانی نەوەدەكانەوە بەماڵەوە ئاوارەی شاری رانیە بووە و هەر لەو شارەش لە رۆژی 10/2/2018 كۆچی دوایی كرد.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*