سەرەکی » ئاراستە » شەهید خەباتی مام شەریف

شەهید خەباتی مام شەریف

حەیدەر مەنتك

دوای كردنەوەی بارەگای مەڵبەندی سێ لە هەولێر لە ساڵی 2003 دا شەهید خەباتم ناسی، بینیم پیاوێكی بەهیبەت وگران و بەدیقەت بوو لەكاری رێكخستن، بەرپرسی یەكێك لە كۆمیتەكانی هەولێر بوو، پەیوەندییەكۆمەڵایەتییەكانی فراوان بوو جەماوەرو خەڵكێكی زۆر سەردانیان دەكرد.
بۆ زیاتر ئاشنابوون بەمێژووی ئەو پێشمەرگە دانەبڕاوە، هەڤاڵ شۆڕشی سەید مەجید پێشمەرگەی دانەبڕاو و هاوڕێیەكی نزیكی شەهید خەبات، وتی: شەهید خەباتی مام شەریف گەنجێكی جوان و روح سوك، هەم لە سیماو روخسار هەم لە دڵ ودەروندا پاك و بێگەرد، راستگۆو قسە لە روو، بەوەفا خۆشەویست و رێزلێگیراو لە ناو هاوڕێیانی.
شەهید خەبات جگە لەوەی پەروەردەی دەستی خوالێخۆش بوو (مام شەریف)ی پێشمەرگەی هەردوو شۆڕشان بوو، خۆشی قاڵبوەوەی خەباتی نهێنی ناو رێكخستنەكانی ناوشار بوو، ساڵی 1982 چەكی پێشمەرگایەتی كردە شان و زۆری پێ نەچوو كادر و پێشمەرگەیەكی هۆشیارو بە ئاگای لێ دەرچوو، هەرزوو بووە جێگای متمانەی هاوڕێ و هاوسەنگەرانی.
خەباتی روح سووك بەوپەڕی دڵسۆزی و خۆنەویستیەوە ئەرك وفەرمانەكانی سەرشانی خۆی چ لە خەباتی سەختی پێشمەرگایەتی پێش ڕاپەرین یان خەباتی رێكخستن و خەباتی جەماوەری لە دوای ڕاپەرین ئازایانە و چاونەترسانە جێبەجێ دەكرد.

ژیاننامەكەی
شەهید سەڵاح شەریف تەها حەمەد ناسراو بە خەباتی مام شەریف، لەدایكبووی رۆژی 1/1/1961ی شاری هەولێر.
دەرچووی قۆرناغی پیشەسازی بەشی كارەبا بوو، ساڵی 1978 پەیوەندیكردووە بە رێكخستنەكانی كۆمەڵەی رەنجدەرانی كوردستانەوەو رۆژی 9/2/1982 بووە بە پێشمەرگە لە كەرتی رێكخستن و دواتر گواستراوەتەوە بۆ تیپی 86ی دەشتی هەولێر.
لەماوەی پێشمەرگایەتییدا بەشداریی دەیان نەبەردی وچالاكی و شەڕی كردووە و جارێكیش لە دەشتی كۆیە برینداربووە.
لە ڕاپەریندا بەشداری كاریگەری هەبووە لە رزگاركردنی شاری هەولێر.
دوا پلەی ئەندامی مەڵبەندی سێ و بەرپرسی كۆمیتەی رۆژئاوای هەولێر بووە.
رۆژی 1/2/ 2004 لە تەقینەوەكەی بارەگای مەڵبەندی 3ی هەولێر شەهیدكرا.
شایانی باسە جگە لە خۆی سێ ئامۆزاشی شەهیدە.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*