سەرەکی » دۆسێ » تێگه‌یشتنی رژێمی سوریا و ئۆپۆزسیۆن له‌ باره‌ی‌ كوردەوە وه‌كو یه‌كه‌ و عه‌ره‌بی هاورده‌ش مه‌ترسی گه‌وره‌یه‌ بۆ رۆجاڤا

خاكی ره‌ش

تێگه‌یشتنی رژێمی سوریا و ئۆپۆزسیۆن له‌ باره‌ی‌ كوردەوە وه‌كو یه‌كه‌ و عه‌ره‌بی هاورده‌ش مه‌ترسی گه‌وره‌یه‌ بۆ رۆجاڤا

سه‌رتیپ جه‌وهه‌ر

به‌شی چواره‌م

نیوه‌ڕۆ دوای گه‌ڕانێكی زۆر له‌یه‌كێك له‌ قاوه‌خانه‌ دیاره‌كانی قامیشلی به‌ناوی (بورج) ئیسراحه‌تێكمان كرد، ئه‌و قاوه‌خانه‌یه‌ ده‌كه‌وێته‌ ناوه‌ڕاستی قامیشلیی له‌شه‌قامی قوه‌تلی. ئه‌و شه‌قامه‌ به‌ناوی (شوكری قوه‌تلی) سه‌رۆك كۆماری سوریایه‌ كه‌ به‌ڕه‌چه‌ڵه‌ك كورده‌و سێجار به‌ سه‌رۆك كۆماری‌ سوریا هه‌ڵبژێردراوه‌ (1943 – 1947 – 1955)، ئه‌و یه‌كێك بووه‌ له‌كه‌سایه‌تییه‌ دیاره‌كانی مێژووی نوێی‌ سوریا.
ئه‌و شه‌قامه‌ یه‌كێكه‌ له‌شه‌قامه‌ پاك و خاوێن و دیاره‌كانی قامیشلیی، زۆربه‌ی‌ دانیشتوانی گه‌ڕه‌كه‌كه‌ مه‌سیحین، ئه‌وه‌ی‌ جێی‌ سه‌رنج بوو بۆمن زۆربه‌ی‌ شه‌قامه‌كه‌ داخرابوو! چونكه‌ به‌شێك له‌باره‌گای حزبی به‌عس و ئه‌وه‌ی‌ پێیده‌گوترێت جه‌رگه‌ی‌ رژێم ده‌كه‌وێته‌ ئه‌و ناوچه‌یه‌.
رژێمی به‌عس له‌قامیشلۆ به‌ته‌واوی ده‌وردراوه‌، ئه‌و شه‌قامه‌ نه‌بێت كه‌ چه‌ند سه‌د مه‌ترێكه‌ شتێكی دیكه‌یان نییه‌ سه‌ری‌ لێ ده‌ربێنن، ئه‌و شه‌قامه‌ش به‌ كۆنكرێتی گه‌وره‌ داخراوه‌ ته‌نها رێ رۆیشتنی به‌پێیان هه‌یه‌.
شه‌قامێكی چۆڵ و بێده‌نگه‌، جارجار رێكخستنه‌كانی به‌عس له‌قامیشلۆ بۆ بۆنه‌و مه‌به‌ستی تایبه‌تی خۆیان به‌كاری دێنن، یان ئه‌گه‌ر بیانه‌وێ‌ خۆپێشاندانێكی لێ‌ رێكبخه‌ن.
ره‌نگه‌ به‌لاتانه‌وه‌ سه‌یر بێت كاتێك ده‌ڵێم به‌عسییه‌كان له‌قامیشلۆ؟! راستییه‌ك هه‌یه‌ پێویسته‌ بیزانین كه‌ پێكهاته‌ی‌ كۆمه‌ڵایه‌تیی (دیموگرافیا)ی رۆژئاوا جیاوازه‌ له‌گه‌ڵ باشوری كوردستان. له‌شارێكی وه‌كو قامیشلیی كه‌ ژماره‌ی‌ دانیشتوانه‌كه‌ی‌ به‌هه‌موو ناحیه‌كانی به‌پێی‌ ژماره‌یه‌ك كه‌ له‌ 2018 بڵاوكراوه‌ته‌وه‌ خۆی له‌ 425 هه‌زار كه‌س ده‌دات، ناوه‌ندی شاره‌كه‌ش ژماره‌یه‌كی وردو به‌رده‌ست نییه‌، به‌ڵام له‌ 100 هه‌زار كه‌س زیاتره‌. هیچ ئامارێكی ورد به‌رده‌ست نییه‌ له‌باره‌ی ژماره‌ یان رێژه‌ی‌ كوردو عه‌ره‌ب له‌شاره‌كه‌، به‌ڵام به‌پێی‌ هه‌ندێك خه‌ملاندن ره‌نگه‌ رێژه‌ی‌ عه‌ره‌ب خۆی له‌ 35%ی رێژه‌ی‌ دانیشتوانی قامیشلۆ بدات ئه‌و رێژه‌یه‌ش زۆره‌ به‌راورد به‌ پێكهاته‌ی‌ دانیشتوانی شاره‌كه‌. به‌شێكی گه‌وره‌ی‌ ئه‌و عه‌ره‌بانه‌ی‌ له‌قامیشلۆ و ده‌وروبه‌ری‌ نیشته‌جێن له‌و عه‌ره‌بانه‌ن كه‌ پێشتر له‌چوارچێوه‌ی‌ سیاسه‌تی به‌عه‌ره‌بكردنی رۆژئاوای كوردستان له‌دوای‌ 1962 له‌لایه‌ن رژێمی به‌عسی عه‌ره‌بییه‌وه‌ هێنراون، ئه‌وانه‌ به‌درێژایی ده‌یان ساڵی رابردوو له‌لایه‌ن رژێمی به‌عس هاوكاریی كراون و هه‌ر ئه‌و رژێمه‌ ئه‌وانی هێناوه‌ته‌ رۆژئاوا نیشته‌جێی‌ كردوون و دایمه‌زراندوون. ئێستا سه‌رباری‌ لاوازبوونی ئه‌و رژێمه‌و نه‌مانی داموده‌زگاكانی له‌ رۆژئاوای كوردستان، به‌ڵام ئه‌و عه‌ره‌بانه‌ هێشتا پشتیوانیی له‌ به‌عس ده‌كه‌ن، لانیكه‌م له‌ترسی ئه‌وه‌ی‌ ئه‌گه‌ر ئه‌و رژێمه‌ نه‌مێنێت ئه‌وا بێگومان پرسی گێڕانه‌وه‌ی‌ عه‌ره‌بی هاورده‌ و نه‌هێشتنی واقعی به‌عه‌ره‌بكردن دێته‌گۆڕێ، هه‌روه‌كچۆن له‌كه‌ركوك دوای ده‌یان ساڵ ده‌رفه‌ت ره‌خسا له‌ده‌ستوری عیراق بچه‌سپێت و به‌شێك له‌و عه‌ره‌بانه‌ بگه‌ڕێنرێنه‌وه‌ شوێنی پێشووی خۆیان. بۆیه‌ له‌كاتی بوونی هه‌ر بۆنه‌یه‌كی به‌عس یان په‌یوه‌ندیدار به‌دیمه‌شق، به‌شێك له‌و عه‌ره‌بانه‌ دێنه‌ ئه‌و گۆڕه‌پانه‌ و ئه‌و شه‌قامه‌ و به‌ركه‌نار له‌ناوچه‌یه‌كی دیاریكراو پشتیوانی خۆیان بۆ رژێمی به‌عس دوپات ده‌كه‌نه‌وه‌.
یه‌كێك له‌مه‌ترسییه‌ جدییه‌كانی رۆژئاوای كوردستان بوونی ئه‌و رێژه‌ زۆره‌ی‌ عه‌ره‌به‌. ئه‌و ژماره‌ زۆره‌ له‌چه‌ند روێكه‌وه‌ مه‌ترسین بۆ سه‌ر ئاینده‌ی رۆژئاوای كوردستان كه‌ ده‌كرێت به‌مشێوه‌یه‌ بیخه‌ینه‌ روو:
یه‌كه‌م: زۆربه‌ی‌ ئه‌و عه‌ره‌بانه‌ی‌ له‌ رۆژئاوای كوردستان به‌تایبه‌ت ناوچه‌ كوردستانییه‌كان نیشته‌جێن، پێشتر له‌ناوچه‌كانی ناوه‌ڕاستی سوریا هێنراون، به‌شێكیان پێیانده‌گوترێت عه‌ره‌بی غه‌مر واته‌ ئه‌و عه‌ره‌بانه‌ی‌ به‌هۆی دروستكردنی به‌نداوی فورات له‌ سه‌ره‌تای حه‌فتاكانی رابردوو له‌ پارێزگاكانی حه‌له‌ب و ره‌ققه‌ هێنراون و گونده‌كانیان ژێر ئاوی فورات كه‌وتووه‌، ژماره‌یان ئه‌وكاته‌ 24 هه‌زار كه‌س بوو، به‌درێژایی سنوری‌ رۆژئاوای كوردستان له‌ دێركه‌وه‌ تا رۆژئاوای سه‌رێكانی له‌سه‌ر خاكی كوردان نیشته‌جێكران. ئه‌و عه‌ره‌بانه‌ له‌لایه‌ن رژێمی به‌عس هاوكاریی كراون بۆیه‌ رژێمی سوریا به‌پشت و په‌نای خۆیانی ده‌زانن. له‌سه‌ر باشترین خاكی كوردان و به‌درێژایی سنور ده‌یان گوندیان بۆ دروستكراوه‌ كه‌ پێی ده‌گوترێت باخچه‌كانی ده‌وڵه‌ت (مزارع الدوله‌)، گرفتی هه‌ره‌ گه‌وره‌ی به‌رده‌وامی مانه‌وه‌ی‌ ئه‌و عه‌ره‌بانه‌ له‌ رۆژئاوای كوردستان زۆربونی ژماره‌یانه‌ به‌شێوه‌یه‌كی زۆر خیرا، چونكه‌ ئه‌و خێزانانه‌ لادێین و به‌سروشت له‌ رووی كۆمه‌ڵایه‌تییه‌وه‌ دواكه‌وتوون و پابه‌ند نین به‌ پێویستیی و چوارچێوه‌ی‌ زۆربونی ژماره‌ی‌ خێزان، هه‌روه‌كچۆن له‌ناوچه‌ گونده‌واره‌كانی عه‌ره‌ب له‌وڵاتانی عه‌ره‌بی به‌شێوه‌یه‌كی خێرا ژماره‌ی‌ دانیشتوان زیاد ده‌بێت.
دووه‌م: هه‌موو ئه‌و عه‌ره‌بانه‌ی‌ رۆژئاوای كوردستان سوننه‌ن، بۆیه‌ زه‌مینه‌ی‌ دروستبونی بزوتنه‌وه‌ی‌ توندڕه‌ویی ئیسلامییان تێدا هه‌یه‌، گه‌شه‌كردنی تیرۆرستانی داعش له‌ناوچه‌كانی ره‌ققه‌ و ته‌بقه‌ و دێرزۆر به‌هۆی بوونی زه‌مینه‌ی‌ له‌خۆگرتن و په‌ناگه‌یان بوو له‌ناوچه‌كه‌، بۆیه‌ بۆماوه‌یه‌كی درێژ له‌ناوچه‌كه‌ مانه‌وه‌.
سێیه‌م: په‌یوه‌ندیان به‌ حزبی به‌عسه‌وه‌ هه‌یه‌ و ماوه‌ی‌ ده‌یان ساڵه‌ له‌چوارچێوه‌ی‌ سیاسه‌تی شۆڤینزمی عه‌ره‌بی چ له‌ خوێندن و یان رێگای دیكه‌ گۆش ده‌كرێن به‌و تێگه‌یشتنه‌ی‌ كه‌ كورد له‌سوریا میوانن و پێشتر له‌باكوری كوردستانه‌وه‌ هاتوون و سوریا له‌چوارچێوه‌ی‌ هاوكاریی مرۆیی ره‌گه‌زنامه‌ی‌ پێداون! هه‌روه‌ك به‌ر له‌چه‌ند رۆژێك به‌شار ئه‌سه‌د له‌ چاوپێكه‌وتنێكی ته‌له‌فزیۆنیدا به‌روونی ئه‌و تێگه‌یشتنه‌ی‌ دوپاتكرده‌وه‌ و هه‌ستی شۆڤینی خۆی و رژێمه‌كه‌ی‌ له‌باره‌ی‌ دۆزی كورد نه‌شارده‌وه‌.
به‌شار ئه‌سه‌د سه‌رۆكی سوریا له‌چاوپێكه‌وتنێكی دا له‌گه‌ڵ كه‌ناڵی روسیا 24 زۆر به‌روونی رایگه‌یاند له‌سوریا شتێك نییه‌ به‌ناوی پرسی كورد! ئه‌م لێدوانه‌ی‌ سه‌رۆكی سوریا یه‌كه‌م لێدوانی راشكاوانه‌ی رژێمی سوریایه‌ له‌باره‌ی‌ پرسی كورد له‌و وڵاته‌، له‌وه‌ واوه‌تر گۆتی ئه‌و كوردانه‌ی‌ له‌ سوریا نیشته‌جێن خه‌ڵكی سوریا نین و هاتوون ئێمه‌ ره‌گه‌زنامه‌مان پێداون! ئه‌مه‌ش یه‌كه‌م لێدوانی له‌و ئاسته‌یه‌ كه‌ ئاوێته‌ی‌ تێگه‌یشتنی شۆڤینیه‌ و له‌دژی دووه‌م سه‌ره‌كیترین پێكهاته‌ی‌ نه‌ته‌وه‌ییه‌ له‌ سوریا، هاوكات یه‌كه‌م لێدوانه‌ كه‌ هیچ ته‌مومژێكی له‌باره‌ی‌ تێگه‌یشتنی رژێمی سوریا سه‌باره‌ت به‌كورد له‌و وڵاته‌ نه‌هێشته‌وه‌.
بۆ پشتڕاستكردنه‌وه‌ی‌ مه‌ترسی هه‌ستی شۆڤینی عه‌ره‌بی له‌ناو زۆربه‌ی‌ عه‌ره‌به‌كانی رۆژئاوای كوردستان، له‌گه‌ڵ راگه‌یاندنی ئه‌مریكا به‌ كشانه‌وه‌ی‌ له‌ رۆژئاوای كوردستان له‌ ئابی 2019 ده‌نگۆی گه‌ڕانه‌وه‌ی‌ رژێمی به‌عس بۆ رۆژئاوای كوردستان بڵاوبویه‌وه‌! له‌وكاته‌دا عه‌ره‌به‌كانی قامیشلۆ جموجۆڵێكی نائاساییان ده‌ستپێكردبوو وه‌ك ئه‌وه‌ی‌ ده‌بێ‌ كورد چاوه‌ڕوانی رۆژانێكی جیاواز بێت، به‌شه‌و چه‌ند گروپێك هاتنه‌ چه‌ند شه‌قامێكی قامیشلۆ و پشتیوانی خۆیان بۆ رژێمی به‌عس ده‌رئه‌بڕی، كاریگه‌ری‌ ده‌رونی له‌سه‌ر خه‌ڵكی قامیشلۆ دروستكرد. ئه‌م هاتنه‌ شه‌قامه‌ ئه‌گه‌ر به‌هاندانی حزبی به‌عسیش نه‌بوبێت ئه‌وا ئه‌و راستییه‌ دوپاتده‌كاته‌وه‌ كه‌ هه‌ستی شۆڤینی بوون لای به‌شێك له‌ عه‌ره‌به‌كانی قامیشلۆ دوپاتده‌كاته‌وه‌. هه‌روه‌ك ئه‌و هاتنه‌ شه‌قامه‌ی به‌شێك له‌ عه‌ره‌به‌كان به‌ڵگه‌مان ده‌داته‌ ده‌ست كه‌ حزبی به‌عسی سوریا له‌ڕێی‌ به‌شێك له‌ عه‌ره‌به‌كان ده‌توانێت ده‌ستوه‌ربداته‌ دۆخی ئه‌منی رۆژئاوای كوردستان.
له‌ قاوه‌خانه‌كه‌ هاتینه‌ده‌رێ‌ به‌پیاسه‌ به‌به‌رده‌م باره‌گای حزبی به‌عس و داموده‌زگاكانی رژێمی به‌عسدا تێده‌په‌ڕیم كه‌ ئه‌وان پێی‌ ده‌ڵێن داموده‌زگاكانی ده‌وڵه‌ت، بیرم له‌سه‌رده‌می رژێمی به‌عسی سه‌دام له‌عیراق ده‌كرده‌وه‌، كه‌ كورد له‌هه‌مان بارودۆخی سوریادا ده‌ژیا و دۆخێكی پڕ ئازار و ژێرده‌سته‌یی و سته‌م هه‌بوو، هه‌موو فه‌رمانگه‌و داموده‌زگاكانی ده‌وڵه‌ت له‌بری داموده‌زگای خزمه‌تگوزاریی بن، هه‌ستی داموده‌زگای ئه‌منی لا دروستده‌كردی! هه‌ڵسوكه‌وتی به‌ڕێوبه‌رانی داموده‌زگاكان و لێپرسراوانی، هه‌ڵسوكه‌وتی پیاوانی ئه‌منی سته‌مكار بوو، ده‌شا له‌سه‌ر هه‌ر پرسێك كێشه‌ت بۆ دروستبكه‌ن و تۆمه‌تی رێكخستنی سیاسی و نهێنیت بخه‌نه‌ پاڵ و به‌ ئاسانی سه‌رگمت بكه‌ن!
رۆژانی رژێمی به‌عس رۆژانێك بوون، مه‌گه‌ر ئه‌وانه‌ی‌ لێی‌ ژیان بتوانن كه‌مێكی وێنا بكه‌ن، له‌وانه‌یه‌ هیچ كه‌سێك نه‌توانێت پڕاو پڕ وێنه‌ راسته‌قینه‌كه‌ بخاته‌ڕوو به‌جۆرێك ئه‌و هه‌سته‌ت بۆ ده‌رببڕێت كه‌میلله‌تی كوردستان تێیدا ده‌ژیا، چونكه‌ زۆر سه‌ختتر و پڕ ئازارتر بوو له‌ژیانی جوله‌كه‌كانی سه‌رده‌می هیتله‌ر! هه‌رچی رێگای له‌ناوبردن و قڕكردن هه‌بوو ده‌گیرایه‌به‌ر، هه‌ر له‌ كوشتنی به‌كۆمه‌ڵه‌وه‌ بگره‌ تا روخاندنی شارو دێهاته‌كان و به‌كارهێنانی چه‌كی كیمیایی و زیندانی به‌كۆمه‌ڵ و سڕینه‌وه‌ی‌ هه‌رچی شوێنه‌واریی كوردبوونه‌.
به‌ده‌م خه‌یاڵی حزبی به‌عسی سه‌دام رێمده‌كرد، له‌پڕ برسێتی نانی نیوه‌ڕۆ له‌ خه‌یاڵه‌كه‌ی‌ پچڕیم، به‌و هاوڕێیه‌ی‌ له‌گه‌ڵم بوو وتم بۆ نیوه‌ڕۆ نانێكی شه‌عبی له‌بازاڕ نه‌خۆین، ئه‌گه‌ر بكرێت له‌ ناسراوترین كه‌بابخانه‌ نان بخۆین. كورد گۆته‌نی برسێتی ره‌گێكی له‌ هارییه‌!
دوای گه‌ڕانێكی زۆر به‌پێ، ته‌واو برسی ببوین، خۆم زۆرباش پێچابویه‌وه‌، سه‌رمایه‌كی زۆر وشك بوو، له‌یه‌كێك له‌كه‌بابخانه‌ ناسراوه‌كانی قامیشلۆ لاماندا، ئینجا كه‌باب به‌سه‌رما له‌گه‌ڵ نانی گه‌رم له‌وانه‌یه‌ تامێكی تایبه‌تی هه‌بێت.
من پێموابوو وه‌ك هه‌موو خواردنه‌كانی دیكه‌ كه‌بابیان زۆر به‌له‌زه‌ته‌و جیاوازتره‌ له‌وه‌ی‌ له‌ كوردستان هه‌یه‌، به‌ڵام وا ده‌رنه‌چوو. خواردنی كورده‌واریی رۆژئاوای كوردستان زۆر به‌تامه‌، نازانم بۆ كه‌بابه‌كه‌یان وه‌ك ئه‌وه‌ی‌ لای خۆمان له‌باشور به‌تام نه‌بوو. له‌وانه‌یه‌ به‌لاتانه‌وه‌ سه‌یر بێت ئه‌گه‌ر بڵێم ئه‌و كه‌بابه‌ی‌ له‌باشور هه‌یه‌ جیاوازه‌ له‌هه‌موو شوێنێك.
جارێكیان رۆژنامه‌نوسێكی ژاپۆنی به‌ناوی هیراتا له‌ ده‌زگای ئاساهی شیمبون كاریده‌كرد له‌یه‌كێك له‌كه‌بابخانه‌ ناسراوه‌كانی هه‌ولێر ده‌عوتك كرد، لێم پرسی هیراتا كه‌بابت خواردووه‌ پێشتر؟ وتی من ده‌مێكه‌ له‌قاهیره‌ داده‌نیشم، وڵاتانی ناوچه‌كه‌ زۆربه‌ی‌ گه‌ڕاوم و چه‌ند جارێكیش هاتوومه‌ته‌ كوردستان نه‌مبینیوه‌ له‌كه‌بابی كوردستان خۆشتر، به‌ڵام وتی خواردنتان به‌گشتیی زۆر گرانه‌ له‌سه‌ر گه‌ده‌، بۆیه‌ زوو قه‌ڵه‌و ده‌بن.
به‌ده‌م رێگه‌ی‌ گه‌ڕانه‌وه‌ سه‌رێكم له‌ هاوڕێیه‌كی كۆنمدا كه‌ دوكانی فرۆشتنی كۆمپیوته‌ر و پارچه‌ی‌ كۆمپیوته‌ری‌ هه‌بوو، ده‌مێك دانیشتین پرسیاری‌ ژیان و باری ئابورییم لێكرد كه‌ گرنگ بوو بۆمن.
به‌قسه‌ی‌ ئه‌و هاوڕێیه‌م به‌شێك له‌كه‌لوپه‌ل و پێداویستییه‌كانیان له‌دیمه‌شق له‌ڕێی‌ فرۆكه‌ دێنن، به‌شێكیش له‌ڕێی‌ باشوری كوردستان دێنن.
ئه‌و وتی بازاڕی ئێمه‌ جۆرێك له‌سه‌قامگیریی پێوه‌دیاره‌ و كه‌متر كاریگه‌ره‌ به‌ دۆخی هه‌رزانبونی نرخی لیره‌، چونكه‌ مامه‌ڵه‌ی‌ ئه‌وان به‌دۆلاره‌ نه‌ك لیره‌. به‌قسه‌ی‌ ئه‌و هاوڕێیه‌م ئه‌و پارچه‌ شتومه‌كانه‌ی‌ له‌باشوری كوردستان ده‌یهێنن له‌سه‌ر سنور گومرگ ده‌كرێت به‌بێ‌ ره‌چاوكردنی نرخی كاڵاكان، به‌ڵكو كورد وته‌نی له‌گۆتره‌ بڕێك پاره‌ت لێوه‌رده‌گرن! وتم باشه‌ ئه‌و وه‌سڵه‌ی‌ بڕی پاره‌ی‌ گومرگكراوی له‌سه‌ر ده‌نوسن مۆری حكومه‌تی هه‌رێمی پێوه‌یه‌؟ وتی نه‌خێر هیچی پێوه‌نییه‌ و هه‌ر له‌سه‌ر سنور ته‌نها به‌ته‌ماشاكردن و خه‌مڵاندنێكی ره‌مه‌كی رێژه‌ی‌ گومرگه‌كه‌ دیاریده‌كرێت و پاره‌كه‌مان لێوه‌رده‌گرن!
به‌قسه‌ی‌ ئه‌و بازرگانه‌و ئه‌ندامانی په‌رله‌مانی كوردستان، له‌سه‌ر سنوری‌ باشوری كوردستان به‌ره‌و رۆژئاوای كوردستان له‌لایه‌ن هێزێكی سیاسی گومرگ له‌هه‌نارده‌و هاورده‌ی‌ كاڵا وه‌رده‌گیرێت له‌ده‌ره‌وه‌ی‌ قانون و پاره‌كه‌یشی بۆ حكومه‌تی هه‌رێم ناگه‌ڕێته‌وه‌، به‌ڵكو دیار نییه‌ بۆ حزبه‌ یان كه‌سێكی دیاریكراوی ناو حزبه‌.
ئه‌و پرسه‌ لێكۆڵینه‌وه‌ی‌ وردی پێویسته‌، له‌میانه‌ی‌ گفتوگۆ له‌سه‌ر پرسی به‌قاچاخبردنی نه‌وت له‌ناو هۆڵی په‌رله‌مان له‌لایه‌ن په‌رله‌مانتارانه‌وه‌ مشتومڕی زۆری له‌سه‌ركرا، به‌ڵام نه‌بووه‌ پرسێكی جددی تا په‌رله‌مانی كوردستان لێكۆڵینه‌وه‌ له‌وباره‌یه‌وه‌ ده‌ستپێبكات. به‌قسه‌ی‌ په‌رله‌مانتارێكی یه‌كێتی نیشتیمانیی كوردستان كۆمپانیای (ستێر) كه‌ سه‌ر به‌پارتی دیموكراتی كوردستانه‌ راسته‌وخۆ سه‌رپه‌رشتی ئێشوكاری گومرگی ده‌روازه‌كه‌ ده‌كات و پاره‌ی‌ وه‌رگیراو به‌ناوی گومرگی ده‌روازه‌كه‌ش ناگه‌ڕێته‌وه‌ خه‌زێنه‌ یان گیرفانی حكومه‌ت.

print

وڵامێک بەجێ بهێڵە

بەبێ پۆستی ئەلکترۆنی ناتوانی لێدوان بنووسیت *

*